Tóm Gbò E Jíízọ̀s Beè Lẹ̀ẹ̀là
14 Tṍó e ba ni íná Àìkónìòm, bà gbóó bã mm̀ tọ bõ̀ònaló fã̀ pá Júù vaá ló bel mm̀ sĩ́deè ea náa kọọ̀ gã́bug pá Júù nè pá Gríìs* á nyoone nvéè Jíízọ̀s. 2 Sõò pá Júù e bà náa ziga ló bel e bà géè lòa beè gbóó kyọ̀ nyíè gbò e bà dú dõona kà dó kọ bà á naa uú boo Pọ́ọ̀l nè Bánabàs. 3 Vó beè naa kọ bà á tú agẹ ló loomá bel mm̀ gã́bug tṍó tení dú ló kpóó ea aa bá Jìhóvà,* ea dú nen ea beè naa kọ gbò nen á nyimá kọọ̀ kpẹ̀a e bà gé kọ́ kilma ló sàn nyíe ea aalìèé bá dú kà-kà, boo béè gbò tóm dũ̀ùnè nè nu bọ̀ọ̀ló ea beè tú va naamá. 4 Sõò gbò e bà di boná beè pòòà bàà. Sìgà gbò beè di nvéè pá Júù vaá sìgà gbò à di nvéè gbò e Jíízọ̀s lẹẹlàa. 5 Tṍó e gbò e bà aa gbò dó àla nè pá Júù, bií ló gbò e bà gé bẹl va beè gbĩ́ gè tú pọ́lọ́ bá sẹ̀ẹ̀mà va vaá tobmà va dem, 6 Pọ́ọ̀l nè Bánabàs beè gbóó dã́ nú ea kil ló vaá teelá kil gbò boń ea di Lìkìónìà, ea dú Lístrà, Dẹ́bì, nè gbò boń ea di kuló kĩá. 7 Bà gbóó kilsĩ́ gè kọ́ lé kpẹ̀a gbẹá gbò boná.
8 Tṍó e bà íná Lístrà, à íe enè neǹ kọ̀và ea beè di ĩ́ìtẽ́ kĩá. Gbálàí beè dú kọ̀và aa gbàà kà vaá à gáà kyãa tọ́ọ̀ dee. 9 Gbálàí géè pãane tṍ ló Pọ́ọ̀l tṍó ea gé ló bel. Pọ́ọ̀l à gbóó biíe bá ló ẹ̀b vaá mòn kọ à íe zìgà ea é láá naa kọ á boá. 10 À gbóó tú agẹ mon kọọmá nèe kọọ̀: “A boo elá èla.” Gbálàa à gbóó pẹẹ aa boo vaá dààmà togó gè kyã̀à. 11 Tṍó e gbòa mon nú e Pọ́ọ̀l náa, bà gbóó kòòlà kpã́ mm̀ dém bel pá Lìkìónìà kọọ̀: “Gbò ńbàlì a meà belí nen vaá dú ló beele!” 12 Bà gbóó dààmà togó gè kolí Bánabàs kolíe Zúùs, sõò ba beè kolí Pọ́ọ̀l kolíe Hẹ́mìs, boo béè kọọ̀ ẹlẹ ní ea géè gyaama sĩ́ ló gè ló bel é. 13 Vó à naa, nen ea ólò vaalá gyọ́ọ nè Zúùs, ea tọọ̀ káí beè di kĩée e bà ólò tení bã̀àma mm̀ boná beè gbóó faalági láo nè úla domá ló gbànsĩ́á, vaá gbĩ́ gè zọ́ gã́bug gbò e ba beè di kĩá vaalá gyọ́ọ nè Pọ́ọ̀l nè Bánabàs.
14 Sõò tṍó e Bánabàs nè Pọ́ọ̀l dã́ naa vó, bà gbóó baagi ba kọ̀là ló vaá pẹẹ bã gbàà gbòa vulí kpã́ kọọ̀: 15 “Pá nà vígà, éé ní ea náa ò gé naanii gbò nuí ẽ́? Beeleè gbò nen e gé mon nagé tã̀àgã̀ belí boolo. È gé kọ́ lé kpẹ̀a nèi kọ ó ooai aalíí ló gbò nú ea dú kóló m vaá ò nyoonei Bàrì ea di dùm, ea beè dèm káála nè kunukẽ̀ nè pène nè dénè nú ea di m. 16 Mm̀ gbò tṍó ea kil nvéeá, a beè sọ̀tọ́ deè kọọ̀ kọ̀láá kà dó á naa nú ea léémá va, 17 náa kal ló béè kọọ̀ náa beè aa ló gè sí neǹ ditõ̀ò kilma ló a bá tení dú ló gè naa nú ea dú lé. À ólò dọọvẹ boo lọl káála nèi vaá naa kọọ̀ nú eo beè foi á mumí tṍó e bà ólò mumí. À ólò náa kọ ó iei gyã́á vaá naa kọ nyíéi á ẹẹ.” 18 Náa kal ló béè kọ bà ló gbò belí, a beè palàge tàvàlà besĩ́ bà kalá láá kpèg gbòa lọl ló gyọ́ọ e bà beè gbĩ́ gè vaalá nèva á.
19 Sõò pá Júù beè gbóó aa Ántiọ̀k nè Àìkónìòm dù vaá kyọ̀ nyíè gbòa naa ní e bà tóbmà dem̀ Pọ́ọ̀l vaá dùlie kilma nvéè bon dòòmà kọ a ú. 20 Sõò tṍó e gbò e bà ólò nyoone nvéè Jíízọ̀s kpẽ́á beeáẹ́ ló, à gbóó aa boo vaá bã boná. Deé ea bẽene, Bánabàs nè ẹ̀ẹ̀ à gbóó àà kil Dẹ́bì. 21 Tṍó e ba ni kọ́ lé kpẹ̀a gbẹá Dẹ́bì lọ̀l vaá sìgà nen a nyoone nvéè Jíízọ̀s, bà gbóó òòà kil Lístrà, Àìkónìòm, nè Ántiọ̀k. 22 Ba beè siè kpóó ló gbò e bà ólò nyoone nvéè Jíízọ̀s gbẹá kĩá kọ bà á kilsĩ́ gè ié zìgà, vaá kọọ̀: “Èé íè gè mòn gã́bug tã̀àgã̀ besĩ́ è kálá bã mm̀ boǹ méné Bàrì.” 23 Nagé, ba beè íbá ló gbò kànen nèva mm̀ buù kà bõ̀ònatõ̀ò. Ba beè tã̀àgã ló Bàrì vaá ká gã́, vaá tú va nvee bá Jìhóvà* e ba ni íée zìgà m ã́, kọ á ẹ̀b nú ea kil vá ló.
24 Tṍóá, bà gbóó tení Pìsídìà kil Pàmfílìà, 25 vaá tṍó e ba ni vee moǹ bel Bàrì gbẹá Pẹ́gà lọ̀l, bà gbóó kil Àtàláíà 26 Tṍó e ba aa kĩá, bà gbóó bã mm̀ faà sĩ́ múú àà kil Ántiọ̀k, ea dú kĩée e ba beè tõo tã̀àgã va ló Bàrì boo kọ Bàrì á ié va sàn nyíe ló kọbé bà láá sí tóm e ba ni sí lọl dẽeí.
27 Tṍó e bà íná kĩá vaá kolí bõ̀ònatõ̀òa bõonè, bà gbóó nootẽ́ nèva gã́bug tóm e Bàrì ni túè va siimàè, nè bé ea ni kuulà deè nè gbò e bà aa dõona kà gbò dó kọ bà á ié zìgà naa. 28 Bà gbóó tú gã́bug tṍó tõ̀òma ló gbò e bà ólò nyoone nvéè Jíízọ̀sa.