Lé Kpẹ̀a E Lúùk Beè Emí

12 Tṍóá, gã́bug nen beè bõoná naa ní e bà daamà togó gè zàgà boo ká tọọ̀ ene. À gbóó zẹ́ẹ́ kọ́ nè túá pá a gbò nyòòne nvée kọọ̀: “Ọẹi dẽe ló nú ea ólò gbuuve fétúlú pá Fárìsíì, ea dú dùm bààsĩ́. 2 Sõò náa íe tọ́ọ̀ kà nú e ba beè palàge gõ̀ e náa é beè dọ bàlà kẽ, vaá náa íe tọ́ọ̀ kà nú ea di ke gũ̀a e bà náa é beè nyimá. 3 Vó à naa, kọ̀láá kà nú eo kọ́ì gbẹaí ke gũ̀a é beè dọ bàlà kẽ, vaá kọ̀láá kà bel eo sáàgàì gbẹaí mm̀ tọ, bà é beè tõó boo tọ vee. 4 Kọ̀láá bé ea dì naa, m̀ kọ́ọ̀ nèi e pá ńdáà kóò kọ ó gá siiai pọ̀ ló gbò e bà é láá fẹ́ bọọ nom̀ kpáló, vaá tṍó e ba ni náa vó lọ̀l, bà náa é láá naa nái tọ́ọ̀ kà nu. 5 M̀ é do bá neń eo é síiai pọ̀ ló. Siiai pọ́ ló Neń e tṍó ea ni fẹ́i lọ̀l, à íe kpóó gè tobvíi tẹlẹ Gẹ̀hénà.* M̀ kọ́ọ̀ nèi kọọ̀, siiaíe pọ̀ ló. 6 Bà ólò oo vòò kà ńgá kṍò ló bàà kà kpọ́gọ́lọ́ kpègè e bè á gé ló tọ́ọ̀ nu, sẹ̀ bà náa ólò naa vó é? Sõò bã̀àna enè ọ̀và náa ólò tá nyíè Bàrì. 7 Bàrì nyímá bã̀àna gã́bug paà gyáa ea dìí togó. Vó à naa, pọ̀ á gá siíi boo béè kọọ̀ ka di ló boolo èl gã́bug ńgá kṍò.

8 “M̀ kọ́ọ̀ nèi kọọ̀, kọ̀láá neń ea náa kọ gbò nen á nyimá kọọ̀ à gé nyoonèè nvéè nda, Sã́áná nená é náa kọ gbò nyómá tóm Bàrì á nyimà kọọ̀ à gé nyooném nvée. 9 Sõò kọ̀láá neń ea amàm sàn gbẹá kèsĩ́ gbò nen, nda é amàe sàn gbẹá kèsĩ́ gbò nyómá tóm Bàrì. 10 Bà é ia ló nè kọ̀láá neń ea ló bel uú boo Sã́áná nená, sõò bà náa é ia ló nè neń ea on nyómá káí. 11 Tṍó e bà túi siimá kèsĩ́ gbò nen, gbò e bà gé bẹl nè gbò e kpóó di bà, ó gá iei tã̀àgã̀ bùlà ea kil ló bá eo é lóomai bel àbèè bel eo é lói mm̀ ge kpènà bọọ bá, 12 boo béè kọọ̀ nyómá káí é ló bel eo é lói kà lèlà tṍóá nèi.”

13 Tṍóá, enè neń ea beè di gbàà gbòa à gbóó kọ́ nèe kọọ̀: “Neǹ Dòbá, kọ́ nè ńdáà vígà kọ á naa mè nda nè ẹ̀ẹ̀ é dõonà ìènù bẹẹ tẹ̀.” 14 À gbóó kọ́ nèe kọọ̀: “Gbálàí, mée ní ea beè túm naamá neǹ bèèla àbèè neń ea é dõo bọọ gyọ́ ẹ́?” 15 Tṍóá, à gbóó kọ́ nè va kọọ̀: “Kuai dẽe ló vaá ò íei ọ̀ẹ̀ dẽe kilmaí ló kọ̀láá íb dùm gọ̀l òò, boo béè kọọ̀ bã̀àna tṍó e nen íe gã́bug nu, a dùm náa ólò dẹ̀ẹ̀a boo gbò nú ea íe.” 16 À gbóó ló ene kà bel dòòle ló nè va kọọ̀: “Nu beè palàge dum boo ól ene kà gbálà. 17 À gbóó kọ́ nè a bá kọọ̀, ‘Éé ní em é náa ẽ́? Ním íènà kĩée em é sẹlẹ gbò nú ea ni léèvè em lọl ól.’ 18 Tṍóá, à gbóó kọọ̀, ‘Nee nú em é náaí: M̀ é kṹúná gbò tọ em ólò kpoogè dee ló gyọ́ sẹlẹ́ m, vaá m̀ tib gbò ní ea bọọ́ kà èl vó. Kĩá ní em é gbóó sẹlẹ gbò súú-súú gyã́á nè gbò nú em íè e, 19 vaá m̀ é gbóó kọ́ nè nà bá kọọ̀: “O íe gã́bug lé-lé nu eo beè kpoogè dee ló ea é tõó ní bá gã́bug gbáá. Gbóó bṍséi, vaá ò dé, õ̀, vaá ò dé kpéè.”’ 20 Sõò Bàrì beè gbóó kọ́ nèe kọọ̀, ‘Neǹ ból, ò é ú bílá deeí. Mée ní ea é gbóó ié dénè nú eo beè kpoogè dee ló sẹlẹá ẹ́?’ 21 Níà bé ea é meà naa ló neń ea gbó gyọ́ nèà a bá, sõò náa gbo gyọ́ kèsĩ́ Bàrì e.”

22 Tṍóá, à gbóó kọ́ nè pá a gbò nyòòne nvée kọọ̀: “Níà nú ea náa m̀ kọ́ nèi kọọ̀ ó kubvii gè iei tã̀àgã̀ bùlà ea kil ló nú eo é déi àbèè nú eo é nveai ẽ́. 23 Boo béè kọọ̀ dùm bọọ èl gyã́á gè dè vaá kpáló nen à bọọ èl nu gè nvèà. 24 Zẹ́ẹ́ ẹbvii gbò ńnóm, bà náa ólò fó nu àbèè ge kọlí nu. Bà náa íe dá àbèè tọ gè sẹlẹ gyọ́ m, sõò Bàrì ólò nè va gyã́á. É kọọ̀ ka á gé ló boolo èl gbò ńnóm? 25 Mée ea dìí zẹ̀ẹ̀ ní ea é láá tú enè dee* tẹlẹ boo a dùm tení dú ló gè ié tã̀àgã̀ bùlà ẹ? 26 Vó à naa, be nóo é láá naanii nú ea dú ńkem naaá, éé ní ea náa ò iei tã̀àgã̀ bùlà ea kil ló dénè nagbò nuá ẽ́? 27 Ẹbvii bé e víl ea di boo bàlà ól dum naa: Bà náa ólò fó nu àbèè ge lò kàn simá, sõò m̀ kọ́ọ̀ nèi kọọ̀ bã̀àna Sólomòn ea beè palàge ié gyọ́ náa beè láá nvèà nú ea kpé dẽe belí gbò vílí. 28 Beè Bàrì láá nvèè kọ̀là ló gbò víl ea di boo bàlà ól ea é láá dum nieí vaá bà kpá sã́ ló lọ̀ọ̀leá boo, é kọ náa é nveè kọ̀là ló boolo èlmà vó, e boólo eo íèì ńkem̀ zìgà! 29 Vó à naa, kubvii gè tãagẽi bọọ bùlà ea kil ló nú eo é déi nè nú eo é ṍi, vaá ó gá tãagẽi bọọ bùlà zelmaí kẽ. 30 Boo béè kọọ̀ dénè gbò nuí ní e gbò e bà náa nyímá ló Bàrì e bà di bàlà booí gé ká nyíe gbẹẹ́ boo gè ié é, sõò bọọ Tẹ̀ nyímá kọ ò íèì bíi ló dénè gbò nuí. 31 Tãa vó, kilíí sĩ́ gè gbĩi Boǹ Méné Bàrì, mè Bàrì é néi dénè gbò nuí.

32 “Pọ̀ á gá siíi, e gbò ńkem̀ gònò naanà ból, boo béè kọọ̀ bọọ Tẹ̀ a zigà kọ à é neèi Boǹ Méné ã́. 33 Oolii nú eo íèì vaá ò dõonii nu nei gbò tãa.* Naanii bẹ̀lẹ̀ ge nvèè kpègè m e náa é kyọà tọ́ọ̀ dee, ea tṍó dọ̀ ge gbó gyọ́ e náa é tá tọ́ọ̀ dee sẹlẹ́ káála, kĩée e gbò zib náa é láá iná ló vaá kàkám* náa é láá taa. 34 Boo béè kọọ̀ kĩée e bọọ gyọ́ dì ní e bọọ nyíe é di nàgé é.

35 “Nveai nu, kpenai ló, vaá ò munii bọọ té sã́, 36 vaá ò dii belii gbò e bà gé élá bànà ba tẹ̀ tọ kọ á òòà aa kè ílà dóm nè va dù, kọbé tṍó ea é dú vaá kòn bá nvéè nùtọ, bà láá gbẹá boo kùùlà nèe. 37 Ẹ́ẹ́-ẹẹ̀ nyíe á di ló gbò gyóòlo e tṍó e ba tẹ̀ tọ oòa kẽ dù, à mon kọ bà di kùà dẽe ló! M̀ lóò kà-kà bel nèi kọọ̀, à é nveà nuù tóm vaá kọ bà á ĩìtẽ́ kẽ. Tṍóá, à é gbóó nè va gbò nú e bà íe bíi ló. 38 Ẹ́ẹ́-ẹẹ̀ nyíe á dì vá ló be à dú ãa ból dáá* àbèè taa tóm dáá* vaá mòn kọ bà di kpènà ló! 39 Sõò nyimai kọọ̀ beè tẹ̀ íè tọ beè nyimá tṍó e neǹ zib é dú, náa gáẹ̀ beè zìgà kọ á baa bãè mm̀ a tọ. 40 Boolo nagé, dìí kpènà ló, boo béè kọọ̀ tṍó e nóo beè ẹbmai dẽe ní e Sã́áná nená é dú é.”

41 Tṍóá, Pítà à gbóó bĩináe kọọ̀: “Neń Ea Íéi, é kọ ò gé ló bel dòòle ló nuí nè áá beele sẹ̀ dénè nen ẽ́?” 42 Neń Ea Íéi à kọọ̀: “Mée ní ea dú gyóòlo ea bọ́ló dẹ̀lẹ̀ nyíé boo vaá nyímá nu, e a tẹ̀ tọ é túe sẹlẹ́ togó pá a gyóòlo kọ á nè va gyã́á kà lèlà tṍó ea bọ́ló é? 43 Nyíè gyóòloá á ẹẹ beè a tẹ̀ tọ dú vaá mòn kọ à gé náa vó! 44 M̀ lóò kà-kà bel nèi kọọ̀, à é túe sẹlẹ́ togó dénè a gyọ́. 45 Sõò beè gyóòloá kọ́ mm̀ a nyíe kọọ̀, ‘Ńdáà tẹ̀ tọ pee tṍó ló gè dù,’ vaá dààmà togó gè bòm nagbò gyóòlo págbálà nè pábiaá, vaá dé gyã́á nè ge ṍ míí tẽeá dẽe, 46 tẹ̀ tọọ̀ gyóòloá é dú deé e náa beè ẹ̀bmà dẽe nè tṍó e náa beè nyimá, vaá à é née kà agẹ ba kpọ̀té vaá túe sẹlẹ́ kĩée e gbò e bà náa bọ́ló dẹ̀lẹ̀ nyíé boo dì. 47 Tṍóá, bà é gbóó tú gã́bug tóm té kpọ́ ló gyóòloá, boo béè kọ a beè dã́ ból ló nú ea dú bùlà a tẹ̀ tọ, sõò náa beè di kpènà ló àbèè ge naa nú ea beè kọ́ á naa. 48 Sõò bà náa é tú gã́bug tóm té kpọ́ ló neń e náa dã́ ból ló nú ea tẹ̀ tọ kọ́ á naa, vaá à naa nú ea bĩ́íná gè kpọ́ẹ té ló. Mm̀ kà-kà, bà é bĩ́íná gã́bug nu lọl bá neń e ba beè nèe gã́bug nu, vaá bà é bĩ́íná kà gã́bug nu lọl bá neń e ba beè túe sẹlẹ́ togó gã́bug nu.

49 “M beè dú ló gè tẹlẹ̀ sã́ boo kunukẽ̀í, sõò éé ní e nda é kpáá naa beè sã́á a daamà togó gè bẹ̀ ẹ? 50 Mm̀ kà-kà, à íe dììa múú em é diià, vaá m̀ é kilsĩ́ gè ié tã̀àgã̀ bùlà dọ̀ọ̀mà tṍó ea é tá! 51 Ò doomàì kọọ̀ m beè dù gé nvèè fẹ́ẹ́-fẹẹ̀ ló boo kunukẽ̀í? M̀ kọ́ọ̀ nèi kọọ̀ níì vó nì, tãa vó, m beè domà pò-pòòà. 52 Boo béè kọọ̀ lọl kátogóí ààmà, pò-pòòà é dí mm̀ tọ. Beè vòò nen di mm̀ tọ, taà nen é náa uú boo bàà nen, vaá bàà nen náa uú boo taà nen. 53 Bà é pooà, tẹ̀ é náa uú boo a nvín págbálà, vaá nvín págbálà náa uú boo a tẹ̀, kà é náa uú boo a nvín pábia, vaá nvín pábia náa uú boo a kà, kà dóm é náa uú boo vaà a nvín, vaá va náa uú boo a kà dóm.”

54 A beè kọ nágé nè gbòa kọọ̀: “Tṍó eo monìì gíní boo ea bã́ deè dọ̀ọ̀mà tẽ́ nàànì, ò ólò gbẹaí boo kọi kọọ̀, ‘Kà bá kpóó boo é dọọ,’ vaá à ólò naaá naa vó. 55 Vaá tṍó eo monìì kọọ̀ fọ́ọ́lọ́ ulà aa deè kpọ̀lọ̀-kpọ̀lọ̀, ò ólò kọi kọọ̀, ‘Kẽ é palàge bẹ̀à sã́,’ vaá à ólò naaá naa vó. 56 Gbò bààsĩ́, ò dã́ì ból ló bé e boo kunukẽ̀í nè sĩ́dee meà naa, sõò éé ní ea náa nóo dã́ì ból ló gbò nú ea gé nááá kátogóí é? 57 Éé ní ea náa nóo dã́ì ból ló lèlà nú ea bọ́ló kọ ó naanii ẽ́? 58 Dì belí nu dòòmà bá, be nen náa bel nè ni, pììga boo gè zọ̀ẹ kpoogè dee ló belá tṍó eo dií èèlè eo gé síí ló neń ea gé bẹl, kọbé nená náa tú ni siimá kèsĩ́ neǹ bèèla, vaá neǹ bèèlaá tú ni lọa bá nè neń ea gé sí tóm tọ bèèla, vaá neń ea gé sí tóm tọ bèèlaá tú ni nvee tọọ̀ kpọ́gọ́lọ́. 59 M̀ kọ́ọ̀ nè ni kọọ̀, bà náa é sọ́ ni bá dọ̀ọ̀mà tṍó eo é kpẽ́ kọ̀láá kà kpègè ea dì ní bá.”