Lé Kpẹ̀a E Lúùk Beè Emí
13 Tṍóá, sìgà gbò e ba beè di kĩá beè kọ́ nè Jíízọ̀s nú ea kil ló sìgà pá Gálilì e Páílèt beè fẹ̀ tṍó e bà géè vaalá gyọ́ọ. 2 À kọ́ nè va kọọ̀: “É kọ ò bulàì kọọ̀ ge kọọ̀ gbò e bà dú Gálilì e bà fẹ́i dú pọ́lọ́ èl dénè nagbò e bà dú Gálilìa ní ea náa kọ bà á fẹ́ va ẹ́? 3 Níì vó nì, m̀ kọ́ọ̀ nèi kọọ̀, be nóo ọ́gàì, bà é kyọ nàgé sĩ́ boolo. 4 Sẹ̀ ò bulàì kọọ̀ 18 neń e tọ gbàn deè ea di Sìlóàm beè dọ boo vaá fẹ̀a íe bẽgẽ bel èlmà dénè nagbò e bà di Jèrúselẹ̀ma? 5 Níì vó nì, m̀ kọ́ọ̀ nèi kọọ̀, be nóo ọ́gàì, boolo é íei naigé kyọ̀àsĩ́ belí bé baala beè ié naaá.”
6 À gbóó dààmà togó tú nakà nu dòòle lóí loomá bel nè va kọọ̀: “Ene kà gbàlà beè fó té fíìg mm̀ a ól vã́ìn, vaá tṍó ea dú gé ẹ̀b be à é monìè ból bè, náa beè mòn tọ́ọ̀ kà. 7 Tṍóá, à gbóó kọ́ nè neń ea ólò ẹ̀b nú ea kil ló ólá kọọ̀, ‘Níí nè ẹ̀ẹ̀ taà gbáá em ni dú gé ẹ̀b boo té fíìgí be m̀ é mon ból bè, sõò ním monì tọ́ọ̀ kà. Kẽe tẹlẹ kẽ! Éé ní ea náa à gé dõogẽ biile tõ̀ò kĩí ẽ́?’ 8 À gbóó kọ́ nèe kọọ̀: ‘Tẹ̀ tọ, zẹ́ẹ́ aa ló enè gbáá á kpáá tení, mè m̀ é ub kẽ beemá ló vaá nvèè biè ló. 9 Be à múmí tṍó e tṍó ni téní, lè. Sõò be náa múmí, ò é gbóó láá kẽe tẹlẹ kẽ.’”
10 A beè di ene kà tọ bõ̀ònaló fã̀ pá Júù ea géè noomà nú Deè Bõ̀séi. 11 À íe ene kà ńnváá e zọ beè naa kọọ̀ kpálóe á zọ̀ mm̀ 18 gbáá, naa ní e náa ólò láá elá èla lèlà. 12 Tṍó e Jíízọ̀s moníe, à gbóó kọ́ nèe kọọ̀: “Pábia, o bóá aa ba o zọ̀ló.” 13 À gbóó dẹlẹ́ẹ bá ból, vaá tẽ̀ènè tṍóá, pábiaá beè gbóó elá èla lèlà vaá dààmà togó gè lèèlà Bàrì. 14 Neń ea di togó tọ bõ̀ònaló fã̀a à gbóó bã̀ súng boo béè kọọ̀ Jíízọ̀s bó neń Deè Bõ̀séi, vaá gbóó kọ́ nè gbò e ba beè di kĩá kọọ̀: “È íè ọ̀ọ̀lẹ̀ dee gè siimá tóm. Olòó dui kọbé ò íei bóa gbò deeí, sõò ó gá duí Deè Bõ̀séi.” 15 Sõò Neń Ea Íéi à aalá nèe kọọ̀: “Booló gbò bààsĩ́, é kọ nóo ólò taalai bọọ láo nè bọọ nom̀ tóòmà tò siimaí kĩée ea é ṍ múú Deè Bõ̀séi? 16 É kọ náa é dú lé gè taalá ńnváá ea dú nvín Ébràhám̀, e Sétàn beè bọbvíe nvea bá mm̀ 18 gbááí lọl bá díí bọ́b Deè Bõ̀séi?” 17 Tṍó ea ló gbò belí, kẹ́ẹ beè gbóó dààmà togó gè sii gbò e bà géè naa uué boo, sõò nyíè dénè gbò e bà di kĩá beè palàge ẹẹ ló gbò lé tóm ea sí.
18 À gbóó kilsĩ́ gè kọọ̀: “Éé ní e Boǹ Méné Bàrì bélí é, vaá éé ní em é láá tú doolé ló é? 19 À bélí súú móstàd e ene kà gbálà tú fó mm̀ a ól. À gbóó bọọ vaá dú zivè té naa ní e gbò ńnóm lo tẹ̀ ló gbò a gbónó.”
20 À gbóó kpáá kọ nágé kọọ̀: “Éé ní em é láá tú Boǹ Méné Bàrì doolé ló é? 21 À bélí nú ea ólò gbuuve fétúlú e ene kà ńnváá tú nvee gbàà gã́bug fàlávà vaá feví. À gbóó aa ló dọ̀ọ̀mà tṍó ea gbuuve zivèkà fàlávàa.”
22 Boo tṍó e Jíízọ̀s gé kil Jèrúselẹ̀m, à gbóó kyã̀à aa pọ̀b bon dọ pọ̀b bon nè aa ńkem̀ bon dọ ńkem̀ bon vaá noomàgì nu gbò nen. 23 Ene kà gbálà à gbóó bĩináe kọọ̀: “Neń Ea Íéi, é kọọ̀ pọ́ì ńkem̀ gbò ní e bà é duuà ẹ?” À aalá nè va kọọ̀: 24 “Palàge siai kpóó ló kọbé ò láá teníí nùtọ ea biilàa, boo béè kọ m̀ kọ́ọ̀ nèi kọọ̀ gã́bug nen é gbĩ́ gè bã m, sõò bà náa é láá bã m. 25 Tṍó e tẹ̀ íè tọá é aa boo kùb nùtọá, ò é beè tõoníí kèdẹi konii bá nvée kọọ̀, ‘Neń Ea Íéi, kùùlà nèi.’ Sõò à é kọ́ nèi kọọ̀: ‘Ním nyímà kĩée eo aalìì dui.’ 26 Ò é beè gbóó kọi kọọ̀, ‘E beè zọ̀ ni dé nu vaá ṍ nu, vaá o beè noomà nu gbẹá boo beélè gbò pọ̀b èèlè.’ 27 Sõò à é kọ́ nèi kọọ̀, ‘Nda ním nyímà kĩée eo aalìì dui. Tenii aalím mí sĩ́, e dénè booló gbò sìì pọ́lọ́ tóm!’ 28 Ò é tói vaá taalii dáa tṍó eo é monii Ébràhám̀, Áízìk, Jékọ̀b, nè dénè gbò kọ́ọ̀ bùlà Bàrì e bà di mm̀ Boǹ Méné Bàrì, sõò boolo dií kèdẹi. 29 Nagé, gbò nen é aa kọ̀láá ketõ̀ò ea di bàlà booí vaá gbá ĩìtẽ́ kẽ dé gyã́á gbẹá Boǹ Méné Bàrì. 30 À íe gbò e ba beè di deè nvée e bà é beè di deèsĩ́, vaá gbò e ba beè di deèsĩ́ é beè di deè nvée.”
31 Kà lèlà tṍóá, sìgà pá Fárìsíì beè gbóó dù gé kọ́ nèe kọọ̀: “Aa kĩí àà, boo béè kọọ̀ Hẹ́rọ̀d gbĩ́ gè fẹ́ ni.” 32 Jíízọ̀s à kọ́ nè va kọọ̀: “Aalii gé kọi nei kpòòlòá kọọ̀, ‘Ẹ̀b! M̀ gé kpó zọ lọl mm̀ gbò nen, vaá bó gbò neń nieí nè lọ̀ọ̀leá boo, vaá ní ea égè taà dee ní em é sí lọ̀l ẹ.’ 33 Kọ̀láá bé ea dì naa, m̀ é kilsĩ́ gè sí nà tóm nieí, lọ̀ọ̀leá boo, nè vígà sṍóe, boo béè kọọ̀ bà náa é láá fẹ́ neǹ kọ́ọ̀ bùlà Bàrì gbẹá dõona kà bon e bè níì Jèrúselẹ̀m nì. 34 Jèrúselẹ̀m, Jèrúselẹ̀m, boólo eo ólò fẹi gbò kọ́ọ̀ bùlà Bàrì vaá tobmai dem̀ gbò e Bàrì beè lẹ̀ẹ̀là mái—m piiga boo gè bõonèi ló gã́bug tṍó belí bé e kà kõ̀ò ólò bõonè ló pá a nvín sẹẹa kè pó naaá, sõò nóo zigàì! 35 Ẹbvii! Bàrì a kin bọọ tọ gbẹẹí ló. M̀ kọ́ọ̀ nèi kọọ̀, nóo é mon naḿ mi dọ̀ọ̀mà tṍó eo é kọ́i kọọ̀: ‘Tã́áná dee bá á di ló neń ea dú boo béè Jìhóvà!’”*