Lé Kpẹ̀a E Jṍòn Beè Emí

7 Tṍó e níí nááá lọ̀l, Jíízọ̀s à gbóó kilsĩ́ gè kọ́ kpẹ̀a gbẹá Gálilì. Náa géè gbĩ́ gè naa vó gbẹá Jùdíà boo béè kọọ̀ pá Júù géè gbĩ́ gè fẹ́ẹ. 2 Sõò tṍó e pá Júù ólò sẹlẹ Sẹ̀lẹ̀nù Tọọ̀ La a íná kuló. 3 Vó à naa, pá a vígà págbálà à gbóó kọ́ nèe kọọ̀: “Aa kĩí kil Jùdíà kọbé pá o gbò nyòòne nvée láá mòn tóm eo gé sí. 4 Tọ́ọ̀ nen náa ólò gṍ nú ea gé náa tṍó ea gbĩ́ kọọ̀ gbò nen á nyimàèe ló. Be ò gé náa gbò nuí, tú o lóó zogè bàlà boo.” 5 Mm̀ kà-kà, pá a vígà págbálà náa beè iée zìgà m. 6 Vó à naa, Jíízọ̀s à gbóó kọ́ nè va kọọ̀: “Ńdáà tṍó gáà lee, sõò boolo íèì tṍó lee. 7 Pá bàlà booí náa íe nú e bà é élá boo ọbví boolo, sõò bà ọ́bví nda boo béè kọ m̀ síì neǹ ditõ̀ò kìlmà vá ló kọọ̀ tóm e bà gé sí dú pọ́lọ́. 8 Aalii sií kẽè sẹ̀lẹ̀nùá. À gáà lee tṍó e nda é sí, boo béè kọọ̀ ńdáà tṍó gáà lee.” 9 A beè gbẹá Gálilì tṍó ea ló gbò belí nè va lọ̀l.

10 Tṍó e pá a vígà págbálà aà sí kẽè sẹ̀lẹ̀nùa, ẹlẹ à gbóó àà nàgé, sõò náa beè tú a lóó tẹlẹ bàlà kẽ. 11 Pá Júù à gbóó dààmà togó gè gbĩ́e gbẹá kẽè sẹ̀lẹ̀nùa vaá bĩiná kọọ̀: “É gbálàá di ãà ẽ?” 12 Sìgà gbò e ba beè di kĩá beè ló gã́bug bel ea kilíé ló. Sìgà gbò beè kọọ̀: “Ẹ̀ẹ̀ lé nen.” Sìgà ọ̀và à kọọ̀: “Ẹ̀ẹ̀ níì lé nen nì. À ólò kẹlẹ gbò nen.” 13 Sõò tọ́ọ̀ nen náa beè dọ bàlà kẽ ló bel ea kilíé ló, boo béè kọọ̀ pọ̀ beè sií va ló pá Júù.

14 Tṍó e nú ea é láá dú ténì dee ni téní aa ló deé e ba beè dààmà togó sẹ̀lẹ̀nùa, Jíízọ̀s beè gbóó àà kil mm̀ tọọ̀ káí vaá dààmà togó gè noomà nu. 15 A beè palàge bọọ́ ló pá Júù naa ní e bà bĩ́íná kọọ̀: “Éé ní ea náa kọọ̀ gbálàí á nyimá Kpá Káí naa vó, boo tṍó ea gáà si tọọ̀ kpá* ẹ́?” 16 Jíízọ̀s à gbóó aalá nè va kọọ̀: “Nú em nóòmà náa aa bá nda, sõò à aa bá nen ea beè lẹ̀ẹ̀làm. 17 Kọ̀láá neń ea gbĩ́ gè naa bùlà Bàrì é nyímá be m̀ nóòmà nú ea aa bá Bàrì àbèè m̀ nóòmà nú ea dú nà bùlà. 18 Kọ̀láá neń ea nóòmà nú ea dú a bùlà gé gbĩ́ kọ gbò nen á nveenìèe ka ló. Sõò neń ea gbĩ́ gè nvèè ka ló nen ea beè lẹ̀ẹ̀làẹ ólò ló kà-kà bel, vaá tọ́ọ̀ kà pọ́lọ́ lab dogò á géé m. 19 Mózìs beè nèi Log, sẹ̀ níì vó nì ẽ? Sõò bã̀àna enè bọ̀ì nóo gbanìì tṍ ló Logá. Éé ní ea náa ò gbĩi gè fẹḿ mi ẽ́?” 20 Gbòa à gbóó kọ́ nèe kọọ̀: “À íe zọ ea dì ní m. Mée gbĩ́ gè fẹ́ ni ẽ́?” 21 Jíízọ̀s à kọ́ nè va kọọ̀: “Áá ene kà tóm dũ̀ùnè ní em beè sì, vaá à bọọ́ ló dénè bọ̀ì e. 22 Níà nú ea náa vaá Mózìs à nèi log kọ ó koolii bọọ gbò nvín págbálà ẹ—logí náa aa bá Mózìs, sõò à aa bá bọọ gbò nómá tẹ̀—vaá ò ólò koolii neń deè bõ̀séi. 23 Be ò koolìì neń deè bõ̀séi kọbé nóo dọì Log Mózìs, éé ní ea náa ò nveením mi súng ló boo béè kọọ̀ m̀ bóò neń deè bõ̀séi é? 24 Kubvii gè beelai bel dẹ̀ẹ̀a boo nú eo monìì, sõò beelai bel mm̀ sĩ́deè ea lelà.”

25 Tṍóá, sìgà gbò e bà ólò di Jèrúselẹ̀m à gbóó dààmà togó gè kọọ̀: “Níì gbálà e bà gbĩ́ gè fẹ̀a, sẹ̀ níì ẹ̀ẹ̀ nì ẽ? 26 Ẹbvii! À dọ́ bàlà kẽ ló bel, vaá bà náa ló tọ́ọ̀ kà bel nèe. É kọọ̀ gbò e bà gé bẹl a nyímá kọọ̀ ẹlẹ ní ea dú Kráìst e? 27 Níì ẹ̀ẹ̀ nì, boo béè kọọ̀ beele nyímà kĩée ea aà dù, sõò tṍó e Kráìst é dú, tọ́ọ̀ nen náa é nyímá kĩée ea aà dù.” 28 Tṍó e Jíízọ̀s géè noomà nu gbẹá mm̀ tọọ̀ káíá, a beè tú agẹ mon kọọmá kọọ̀: “Ò nyímàm mi ló, vaá ò nyímàì kĩée em aà dù. Ním beè dú boo nà lóó, sõò neń ea beè lẹ̀ẹ̀làm dì, vaá nóo nyímàìe ló. 29 Nda nyímàe ló, boo béè kọọ̀ m beè dú boo a bée, vaá Ẹlẹ ní ea beè lẹ̀ẹ̀làm ẽ́.” 30 Vó à naa, ba beè gbóó gbĩ́ gè siíe, sõò tọ́ọ̀ nen náa beè daáẹ bá ló boo béè kọọ̀ a tṍó gáà beè lee. 31 Sõò gã́bug nen beè iée zìgà m, vaá kọọ̀, “Tṍó e Kráìst é dú, é kọọ̀ à é sí gã́bug tóm dũ̀ùnè èlmà ní e gbálàí ni sí?”

32 Pá Fárìsíì beè dã́ tṍó e gbòa gé ló gbò belí kìlmàé ló. Vó à naa, gbò togó vààla gyọ́ọ nè pá Fárìsíì à gbóó lẹ̀ẹ̀là gbò kùdẽe ló tọọ̀ káíá kọ bà á gé siíe. 33 Jíízọ̀s à gbóó kọọ̀: “Pọ́ì ńkem̀ tṍó ní em é kpáá dììmàí ló besĩ́ m̀ kálá àà nyoone Neń ea beè lẹ̀ẹ̀làm ẽ́. 34 Ò é gbím mi, sõò nóo é moním mi, vaá nóo é láá ináí kĩée em dì.” 35 Vó à naa, pá Júù à gbóó bĩiná ene kọọ̀: “Ãàe ní e gbálàí gbĩ́ gè kìl naa ní e née é mon náe ẽ́? É kọ à gbĩ́ gè àà nyoone pá Júù e ba beè zààla gbàà pá Gríìs, kọbé à nóòmà nuù pá Gríìs? 36 Éé ní ea gé kọ́ tṍó ea kọ́ọ̀, ‘Ò é gbím mi, sõò nóo é moním mi, vaá nóo é láá ináí kĩée em dì e’?”

37 Kà lèlà deé ea dú dee deè nvéè deè sẹ̀lẹ̀nùa, ea dú kà pọ̀b deé gbàà gbò deè sẹ̀lẹ̀nùa, Jíízọ̀s à gbóó elá èla vaá tú agẹ mon kọọmá kọọ̀: “Kọ̀láá neń e òòe ká kpáá á dúm ló gé ṍ múú. 38 Dì belí bé e Kpá Káí beè kọ́ naa, kọ̀láá neń ea íém zìgà m: ‘Múú dùm é ọ́ví ààẹ́ m.’” 39 Jíízọ̀s géè ló bel kilma ló nyómá káí e gbò e bà íée zìgà m é beè gé ié. Tṍóá, bà gáà ie nyómá káí, boo béè kọọ̀ bà gáà nvèè ka ló Jíízọ̀s. 40 Sìgà gbò e ba beè di gbàà gbòa e ba beè dã́ bel ea loá à gbóó dààmà togó kọọ̀: “Mm̀ kà-kà, níì Neǹ Kọ́ọ̀ Bùlà Bàrì.” 41 Dõona gbò a kọọ̀: “Níà Kráìst.” Vaá sìgà gbò à kọọ̀: “É kọọ̀ Kráìst é aa Gálilì? 42 É kọọ̀ Kpá Káí náa kọ́ọ̀ Kráìst é aa mm̀ mana-manaà Dévìd, vaá aa Bẹ́tlìhém̀, ea dú boń e Dévìd dú?” 43 Pòòà à gbóó bã̀ vá gbàà boo béè Jíízọ̀s. 44 Sìgà ọ̀và beè gbóó gbĩ́ gè siíe, sõò tọ́ọ̀ nen náa beè daáẹ bá ló.

45 Tṍóá, gbò kùdẽe ló tọọ̀ káíá à gbóó òòa kẽ iná ló gbò togó vààla gyọ́ọ nè pá Fárìsíì. Pá Fárìsíì à gbóó bĩiná va kọọ̀: “Éé ní ea náa nóo fáàlàìe domai ẽ́?” 46 Gbò e bà ólò kùdẽe ló tọọ̀ káíá à aalá kọọ̀: “Beele gáà mòn neń ea ló bel belí gbálàá.” 47 Pá Fárìsíì à gbóó bĩiná va kọọ̀: “Kọ́ à gáà dàgẹ̀ nàgé boolo a? 48 É kọọ̀ à íe neń ea gé bẹl àbèè neń ea dṹùnà pá Fárìsíì ea ni íée zìgà m? 49 Tãà bá nagbò ala, bà náa nyímá nú e Log kọ́ vaá Bàrì é né va kpọ̀té.” 50 Nìkòdímòs ea dṹùnà va, ea beè zẹ́ẹ́ sí ló Jíízọ̀sa à gbóó bĩiná va kọọ̀: 51 “É kọọ̀ bẹẹ Log sọtọ́ deè kọ é beelá bel lo nen e gáà zẹẹ dã bel lọ̀líé gã́ vaá nyimá nú ea gé náa?” 52 Bà gbóó bĩináe kọọ̀: “É kọọ̀ olo dú nàgé Gálilì? Gbĩ́tẽ́ ló, mè ò é mon kọọ̀ tọ́ọ̀ kà neǹ kọ́ọ̀ bùlà Bàrì náa é aa Gálilì.”*