Gbò Bíb E Gbò E Bà Bugi Bĩ́íná

Éé ní ea náa vaá à bọ́ló kọọ̀ gbò nyòòne nvéè Kráìst á ié ọ̀ẹ̀ dẽe tṍó e bà gé tú gbò application ge lẹ̀ẹ̀mà tóm má nen siimá tóm ẽ́?

Sìgà gbò nyòòne nvéè Kráìst ólò tú ãa nuù tóm e bà tẹ́lẹ bàlà kẽí kolmá àbèè ge lẹ̀ẹ̀mà tóm má pá ba tọ nè dõòna kà pá vígà. Sõò neǹ Kráìst e togóe ni tulà nu é tú nagbò dùùlà bá deè tṍí sẹ̀ẹ̀a bùlà: “Neǹ nyìmànù ólò mòn tã̀àgã̀ ea gé dú vaá à iilà ló, sõò nen ból ólò põone ból vaá dọ bá kyọ̀à sĩ́.”—Pró. 27:12.

È nyímà kọọ̀ Jìhóvà gbĩ́ gè kpènài. Vóà naa, née ólò zọ̀ gbò e bà ólò tãa pòòà tẹlẹ zẹ̀ẹ̀ gbò nen, gbò e ba beè kpó lọl mm̀ bõ̀ònatõ̀ò, àbèè gbò e ba nòòmànù náa gbááá ló Kpá Káí naaá nu. (Róm̀ 16:17; 1 Kọ́r. 5:11; 2 Jọ́ọ̀n 10, 11) Àé láá dú kọọ̀ sìgà gbò e bà di mm̀ bõ̀ònatõ̀ò náa gban tṍ ló gbò dùùlà bá deè tṍ ea di mm̀ Kpá Káí. (2 Tím. 2:20, 21) À dú bíi kọ é tú níá sẹ̀ẹ̀a bùlà tṍó e gé sa gbò eé bãaà kóò. Sõò áá gè zọ̀va loá sọ́l boo gbò applicationí náa é nveè bá nèi kọ é láá sà kà lé kóò.

À palàge dú bíi kọ ó ié ọ̀ẹ̀ dẽe ea kil ló gbò eo é bãaà kóò, bọọ èlmà tõ̀ò tṍó e gbò e bà di mm̀ grúùp kiẽ́e eo di palàge bọọ́ tõ̀ò. Pọ́lọ́ nu a nááá ló sìgà gbò nyòòne Kráìst e bà bã́ mm̀ grúùp kiẽ́e e gbò nen bọọ́ tõ̀ò. Mósĩ́ deè ní e vígà págbálà àbèè pábia é láá ié ọ̀ẹ̀ dẽe tṍó e gbò ea di mm̀ grúùp e ẹlẹ dì sígá ló enè gbò àbèè enè tõ̀ò ẽ? Àé tavàlà ge nyimá ló buù nen ea di mm̀ grúùpá nè bé e ba gbaa ló kilma ló Jìhóvà dì naa. Kpá Psalm 26:4 kọ́ọ̀: “Ním ólò zọ̀ gbò kẹ̀lẹ̀ ĩiá tẽ́ kẽ, àbèè ge zọ̀ gbò bàà sĩ́ gbaaá ló.” É kọọ̀ níá náa zógè kọ à bọ́ló kọọ̀ ó lẹ̀ẹ̀là nu má áá gbò eo nyímà ló?

Kọbèè grúùp e gbò nen náa bọọ́ tõ̀ò m, à bọ́ló kọọ̀ neǹ vígà á ọẹ̀ dẽe ló gã́bug tṍó ea é zọ̀ọ̀mà va lọá sọ́l nè nú e bà gé ló sọ́l boo. Náa bọ́ló kọ é aalá bel tẹlẹ dẽè kọ̀láá kà lẹ̀ẹ̀la tóm e bà lẹẹlà mái, náa dẹẹ̀a boo nú e bà gé ló bel boo nè gã́bug tṍó ea bãàa m. Pọ́ọ̀l beè ãane Tímotì ea kil ló gbò e “bà olòó ló bel nen vaá sọlẹ̀ gã́ m bel e bè náa kuúva.” (1 Tím. 5:13) Deè nieí, à válí gè naa nagé vó tenmá boo íntanèt.

Nen ea gé nyoone nvéè Kráìst náa é ló àbèè ge pãane tṍ ló bel gbẹ́a, àbèè bel ke gũ̀a ea kil ló dõòna kà neǹ vígà. (Ps. 15:3; Pró. 20:19) Náa é tẹ́lẹ̀ pẹ̀lẹ ló bel àbèè ge ló gbò bel ea gáà gbĩ tẽ́ kọbè à dú kà kà àbèè kyáá. (Ẹ́fẹ. 4:25) È ólò ié gbò bel ea dẹẹ̀a boo Kpá Káí nè gbò kpẹ̀a eé láá dẹlẹ nyíé boo lọl boo bẹẹ website, ea dú jw.org nè JW Broadcasting^® buù ẽ́.

Sìgà pá vígà ólò tú gbò application ge lẹ̀ẹ̀mà tómí oomá nu, zalmá nu, kọọmá nú ea kil ló nú e bà gbĩ́ gè oo, àbèè ge nèèmà tóm nen. Gbò níá kuu gè ùlà ki, níì ge fã̀ Bàrì nì. Gbò e bà gé nyoone nvéè Kráìst e bà gbĩ́ gè kpòòlà lóó lọl “ló gè vùlè kpègè” náa é tú pá vígà ùlmà ki.—Híb. 13:5.

É kọ èé tú gbò application ge lẹ̀ẹ̀mà tóm má není bànmà kpègè nè pá vígà e bíi di ló àbèè gbò e nu kyọa ló? È vulè pá vígà, vaá è ólò gbĩ́ gè nvèè bá nèva vaá siè va kpóó ló. (Jém̀z 2:15, 16) Sõò ge tú gbò application ge lẹ̀ẹ̀mà tóm má není bànmà kpègè má pá vígà e bíi di ló é náa kọ á tàvala ló tọ nàà tóm nè bõ̀ònatõ̀ò ge nvèè bá nè gbò e bíi di ló. (1 Tím. 5:3, 4, 9, 10, 16) Vaá tọ́ọ̀ bẹ̀ì née gbĩ́ gè naa nú ea é náa kọ gbò nen á bugi togó kọọ̀ ba beè sàí mm̀ kele sĩ́deè kọ é ẹ̀b nú ea kil ló pá vígà.

È gbĩ́ gè naa nú ea é nveè ka ló Bàrì. (1 Kọ́r. 10:31) Vóà naa, tṍó eo gbĩ́ gè tú gbò application ge lẹ̀ẹ̀mà tómí siimá tóm, bugi togó boo gbò gẹẹ-gẹẹ ló ea di ló vaá ò íe ọ̀ẹ̀ dẽe.