Gbò Bíb E Gbò E Bà Bugi Bĩ́íná
Tṍó E Jíízọ̀s Beè Nvèè Dè Gyã́á Ló M̀m̀neè Bẹẹ Tẹ̀ Íe Kẽ, Ãàe Ní E 70 Nen Ea Beè Lẹ̀ẹ̀là Kọ Bàá Kọ́ Kpẹ̀aá Beè Dì E? É Kọ Ba Beè Sọ̀ẹ Bá Gbẹẹ́ Kẽ?
Náa dú bíi kọ é bugi togó kọọ̀ boo béè kọ 70 nená náa beè di tṍó e Jíízọ̀s nveè dè Gyã́á Ló M̀m̀neè Bẹẹ Tẹ̀ Íeá kẽ, tõó dọ̀ kọọ̀ Jíízọ̀s náa beè tenmà nà va, àbèè kọ 70 nená beè sọ̀ẹ bá gbẹẹ́ kẽ. Áá gbò tómá ní e Jíízọ̀s beè gbĩ́ gè zọ̀ deá gyã́áá ẽ́.
Jíízọ̀s beè tenmà 12 nená bií ló 70 nená. Sõò túá 12 nená ní ea beè zẹ́ẹ́ sà ẹ, vaá a beè kolí va pá a gbò tóm. (Lúùk 6:12-16) A beè di Gálilì tṍó ea ‘sa òb nè bàà nená’ vaá lẹ̀ẹ̀là va “kọ bàá àà gé vee lé kpẹ̀a ea kil ló lẹ̀ẹ̀là bel Bàrì, nè ge bó gbò zọ̀ ló.” (Lúùk 9:1-6) Tṍó e tṍó téní e Jíízọ̀s ni íná Jùdíà, a beè “gbóó íbá ló dõona kà 70 nen lọl gbàà gbò e bà ólò nyoonée nvée vaá lẹ̀ẹ̀là bàà-bàà ọ̀và kọ bàá gyaẹ̀ẹ́ sĩ́.” (Lúùk 9:51; 10:1) Vóà naa, Jíízọ̀s beè ié gbò nyòòne nvée e ba beè tõó kele-kele ketõ̀ò vee kpẹ̀a ea kilíé ló.
Àé láá dú kọọ̀ gbò nyòòne nvéè Jíízọ̀s e bà dú Júù beè olòó zọ̀ pá ba tọ sẹlẹ Nàànù Ténì Zelí buù gbáá. (Ẹ́xọ. 12:6-11, 17-20) Pọ́ì ńkem̀ tṍó besĩ́ bà kalá fẹ́ Jíízọ̀s, pá a gbò nyòòne nvée nè ẹ̀ẹ̀ beè àà kil Jèrúsalẹ̀m. Sõò náa beè kolí dénè pá a gbò nyòòne nvée e ba beè di Jùdíà, Gálilì, nè Pẹ̀ríà kọ bàá dù gé zọẹ̀ẹ sẹlẹ Nàànù Ténì Zelí. À palàge dọa bàlà kẽ kọọ̀ Jíízọ̀s beè gbĩ́ gè zọ̀ áá pá a gbò tóm sẹlẹ sẹ̀lẹ̀nùa. A beè kọ́ nè va kọọ̀: “À géè tànim gè zọ̀i dé nakà gyã́á Vààla Gyọ́ọ̀ Ténì Zelíí bé m̀ kálá ù.”—Lúùk 22:15.
À íe nú ea beè naa vaá à naa vó. Ńkem̀ tṍó aa ló tṍóá, Jíízọ̀s é ú dì belí “Nvín Naanà Ból Bàrì ea tóólá náàkyọ̀ bàlà boo lọ̀l.” (Jọ́ọ̀n 1:29) Àé ú gbẹá Jèrúsalẹ̀m kĩée e bà ólò tõo vaalá gyọ́ọ nè Bàrì. Nom e ba beè olòó vaamá gyọ́ọ deè Vààla Gyọ́ọ̀ Ténì Zelíá beè kẽeé nyíè pá Ízràẹ̀l bé e Jìhóvà beè dùùlà va lọl Íjẹ̀pt naa, sõò ú vààa gyọ́ọ̀ Jíízọ̀s é náa èlmà vó. Àé náa kọọ̀ gbò nen á di pọ́ì aa bá náàkyọ̀ nè ú. (1 Kọ́r. 5:7, 8) Boo béè ú vààa gyọ́ọ̀ Jíízọ̀s, òb nè bàà nená é íe nèà deè ge dú kpò kúm bõ̀ònatõ̀ò gbò e bà gé nyoone nvéè Kráìst. (Ẹ́fẹ 2:20-22) À dú lé kọọ̀ bà tú ‘òb nè bàà kà dem dòòmà díí kẽè’ Jèrúsalẹ̀m ea dú bon ea di káíá vaá ba beè emí béè “òb nè bàà nen e Nvín Naanà Ból beè lẹ̀ẹ̀làa boo òb nè bàà kà demí.” (Kùùà 21:10-14) Mm̀ kà-kà, gbò tóm e ba beè bọ́ló dẹ̀lẹ̀ nyíé booá é íe kà pọ̀b kà tóm gè sì mm̀ ge mm-mè tóm̀ bùlà Bàrì. Vóà naa, èé gbóó láá dã́ ból ló nú ea náa vaá Jíízọ̀s beè gbĩ́ kọ bàá zọẹ̀ẹ dé dee-deè nvéè gyã́á Nàànù Ténì Zelíá nè Dè Gyã́á Ló M̀m̀neè Bẹẹ Tẹ̀ Íe.
70 nená nè dõona gbò e bà ólò nyoonée nvée náa beè zọ̀ Jíízọ̀s dé gyã́áá. Sõò, dénè pá a gbò nyòòne nvée e bà bọ́ló dẹ̀lẹ̀ nyíé boo é íe bélè lọl ló Dè Gyã́á Ló M̀m̀neè Bẹẹ Tẹ̀ Íe e Jíízọ̀s beè nvee kẽá. Dénè gbò nyòòne nvéè Jíízọ̀s e Bàrì beè tṍ nóo ból é zọ Jíízọ̀s bãàa mm̀ zíl kọbé bà láá zọ̀ẹ bẹ̀l, dì belí bé e Jíízọ̀s beè kọ́ nè pá a gbò tóm bílá deè deé e bà géè deá gyã́áá naaá.—Lúùk 22:29, 30