Gbò Bíb E Gbò E Bà Bugi Bĩ́íná
Mó tṍó ní e lé kpẹ̀a e gé veeí é íná kùbmà ẽ?
Jíízọ̀s beè kọọ̀: “Bà é vee lé kpẹ̀a ea kil ló Boǹ Méné Bàrì inmá dénè ketõ̀ò ea di bàlà booí, naa ní ea é sí neǹ ditõ̀ò nè dénè dó. Tṍóá, kùbmà é gbóó bã ló bàlà booí.” (Máát. 24:14) Moǹ bel Gríìk ea kọlà teʹlos ní e bà tab naamá “kùbmà” mm̀ dọ̀ Kpá Káíí nè mm̀ a 6 nè 13 gã́bel é. À gé lóá bel nyòòmà tṍó e kùbmà é bã́ ló bàlà boò Sétàní, tṍó bé Ámàgídòn. (Kùùà 16:14, 16) Vóà naa, èé kilsĩ́ gè vee lé kpẹ̀aí dọ̀ọ̀mà tṍó e kùbmà é bã́ ló nakà bàlà booí. Níí náa kọ é nyaaná bá ló bẹẹ dã̀ból ló nu.
Tṍó ea kil nvéeá, e beè olòó tuumá kọ née é kọ́ ná kpẹ̀a tṍó e pọ̀b kpo tã̀àgã̀ é daaà togó, naamá tṍó e bà é kyọsĩ́ Gbele Bábilòn. (Kùùà 17:3, 5, 15, 16) E beè olòó tuumá nagé kọ tṍó e pọ̀b kpo tã̀àgã̀ é daaà togó, Jìhóvà náa é ne nà deè gbò nen kọ bàá dã́ lé kpẹ̀aí vaá dù gé fã̀e naa ní e bà é duuà. (Àìz. 61:2) E beè olòó tuumá nágé kọọ̀ gbò e bà é ful zelí bá pọ̀b kpo tã̀àgã̀ é zógè kọ bà bọ́ẹ̀ ló dẹ̀lẹ̀ nyíé boo neè Jìhóvà besĩ́ pọ̀b kpo tã̀àgã̀ kálá dààà togó. E beè tú va doolé ló pá Júù e ba beè fùl zelí bá kyọ̀àsĩ́ ea beè dọ boo Jèrúsalẹ̀m mm̀ gbáá 607 B.C.E. Besĩ́ à kalá dọ̀ tṍóá, ba beè nvèè kpíí ló gbòí kọ bà é duuà, boo béè kọ ba beè fã̀ Jìhóvà vaá ọbví nú ea dú pọ́lọ́. (Èzí. 5:11; 9:4) Sõò nakà bel dòòle lóí náa gbááá ló nú e Jíízọ̀s beè kọ́ mm̀ kpá Máátìù 24:14, ea tẹ́lẹ bàlà kẽ kọọ̀ gbò nen é íe nèà deè ge dã́ lé kpẹ̀aí besĩ́ kùbmà kálá bã ló bàlà booí tṍó bé Ámàgídòn.
Boo béè kọ è kpáà palàge dã́ ból nú ea di mm̀ kpá Máátìù 24:14, náa kọ é nyaaná bá ló bé e beè olòó dã́ ból ló nú ea di mm̀ kpá Kùùà Nù 16:21, ea kọ́ nú ea kil ló agẹbá lẹ̀ẹ̀la tóm eé beè kọ́ nè gbò nen ea é bélí “gbele báà-báà múú ea nyèè belí kpò dem.” Gbò nú e kpáà gbĩ́tẽ́ ló tẹ́lẹ bàlà kẽ kọọ̀ pálaa kà dọ̀ Kpá Káíá gé ló bel kilma ló tẽ̀ènè kà nu. Éé ní ea náa vaá è kọ́ vó é? Nú ea náa vaá è kọ́ vó dú nú e Kpá Káí kọ́ kilma ló bé e gbò nen é lábví láb naa nyòòmà lé kpẹ̀aí. Neǹ tóm Pọ́ọ̀l beè emí kọọ̀ ‘kilma ló gbò e bà é duuà, lé kpẹ̀aí é gãa nù ló vaá zààlà iná vá ló.’ Sõò, à dú pọ́lọ́ kpẹ̀a kilma ló gbò ọ́b Bàrì, “à tõo vá ló belí bẹ̀m nù ló íí nu ea é fẹ́ nen.” (2 Kọ́r. 2:15, 16) Bà ọ́bví lé kpẹ̀aí, boo béè kọ à tẹ́lẹ bàlà kẽ kọọ̀ bàlà boò Sétàn e bà palàge vùlèí palàge dú pọ́lọ́ vaá pọ́ì ńkem̀ tṍó àla, àé kyọa sĩ́.—Jṍòn 7:7; 1 Jṍòn 2:17; 5:19.
Nvèè kpíí ló kọọ̀ gbele báà-báà múú e kpá Kùùà Nù 16:21 kọ́ nú ea kil lóá é palàge ‘nyee belí dem.’ Níí tẹ́lẹ bàlà kẽ kọọ̀ tṍó pọ̀b kpo tã̀àgã̀ lé kpẹ̀a e gé veeí é palàge kyẽ́ gbò nen, boo béè kọ gbò nen é palàge nyimá béè Jìhóvà tṍóá èlmà kọ̀láá tṍó. (Èzí. 39:7) Tṍó e ba ni kyọsĩ́ Gbele Bábilòn lọ̀l, é kọ sìgà nen é íe lèèma kilma ló gè dã́ lé kpẹ̀aí, belí bé e gbò nen ólò ié lèèma kilma ló kpéè nù ló nu naaá? Àé láá naaá naa vó. Be à sẹlẹ, bà é láá kẽ̀èa boo kọọ̀ Gbò Neǹ Ditõ̀ò Jìhóvà a tú gã́bug gbáá kọọmá nú ea kil ló kyọ̀àsĩ́ ea é dọ́ boo kyáá bõ̀ònaló fã̀.
Níà íb nú ea beè naaá ló pá Íjìpt tṍó e Jìhóvà tú Òb Kà Kpọ̀té tẹlẹ̀ vá boo lọ̀l ẹ. Tṍó e Jìhóvà ni “béélá bel ló dénè gbò ńbàlì pá Íjìpt” lọ̀l, “gã́bug” pá Íjìpt beè zọ̀ pá Ízrẹẹ̀l aa Íjìpt. (Ẹ́xọ. 12:12, 37, 38) Pá Íjìpta beè sà ge fã̀ Jìhóvà, tṍó e bà mon kọ kọ̀láá kà nú e Mózìs beè kọ́ kilma ló Òb Kà Kpọ̀téá nááá.
Kọ̀láá nen ea sa gè fã̀ Jìhóvà tṍó e ba ni kyọsĩ́ Gbele Bábilòn lọ̀l, é íe nèà deè ge nvèè sãa kúm gbò e Bàrì beè tṍ nóo ból e bà sígá boo kunukẽ̀í. (Máát. 25:34-36, 40) À dú kà-kà kọọ̀ nèà deè ge ié dùm e bè náa tá é íná kùbmà besĩ́ bé Ámàgídòn kálá beá, ea dú tṍó e gbò e Bàrì beè tṍ nóo ból e bà sígá boo kunukẽ̀í é kil káála.
Nakà ãa dã̀ból ló nuí kpáá tẹlẹ bàlà kẽ bé e Jìhóvà palàge ié vulè nè sàn nyíe naa. Mm̀ kà-kà, Jìhóvà “náa gbĩ́ kọ tọ́ọ̀ nen á ié kyọ̀àsĩ́; tãa vó, à gbĩ́ kọ dénè nen á ọgá ló ba pọ́lọ́.”—2 Pít. 3:9.