Jìhóvà Beè Nvèè Bá Nèi Kọ É “Nyaaná Bá Ló Sìgà Nu Dẹ̀ẹ̀a Boo Bé E Dìtõ̀ò Meà Naa Vaá Ié Ẹ́ẹ́-ẹẹ̀ Nyíe Gbẹá Kọ̀láá Kĩée E Dì”

Dóm nè vaí beè sí tọọ̀ kpá Gílẹẹ̀d mm̀ gbáá 1979, vaá mm̀ gbò gbááá ba dìtõ̀ò beè nyaaá tṍó e bà géè sí tóm gbẹá Iran, Mauritius, Myanmar, Tanzania, Uganda, nè Zaire. Aẹ̀ beè gbẹá tọọ̀ kpá Gílẹẹ̀d ní e ba beè dã́ tṍó e ene kà ba neǹ dòbá e a bée kọlà Jack Redford, né va dùùlà bá deè tṍ ea nveè bá nè va kọ bàá láá nyaaná bá ló nu tṍó e bà né va ãa tóm gè sìe. Bà é kọ́ nèi bé e nu beè naaá naa.

Mats, sóo-sóo kọ́ nèi bé eo beè bã mm̀ kà-kàí naa.

Mats: Ńdáà tẹ̀ beè di Poland tṍó e Bàà Tóm Bé Bàlà Boo beè beá, vaá a beè mòn gã́bug dùm bààsĩ́ ea beè di mm̀ bõ̀ònaló fã̀ pá Fádá. À ólò bọọgẹ̀ kọọ̀, “M̀ nyímà kọ à íe kà-kà bõ̀ònaló fã̀ ea dì!” Tṍó e tṍó téní, m beè gbóó nyimá kọọ̀ bel e ńdáà tẹ̀ beè olòó loa dú kà-kà. M beè zalí gã́bug nómá kpá kọbé m̀ bugi. Ene kà zẹ̀ẹ̀ gbò kpáá dú ní ea kóó dú bulú-bulúù e a bée kọlà The Truth That Leads to Eternal Life. Kpáá beè palàge leemám, vaá m beè bugi zivè kpoò kpáá lọl bílá deè deeá. Tṍó e dee ni zilà, m beè gbóó nyimá kọ m mon kà-kà belá!

Lọl April 1972 ààmà, m beè gbóó bugi gã́bug kpá Gbò Neǹ Ditõ̀ò Jìhóvà, vaá gbò kpáá beè aalá gã́bug nà bíb. M beè belí neǹ ùlà ki ea di mm̀ bel dòòle ló Jíízọ̀sa, e tṍó e a mon ból lọ́ọ̀ ea palàge sí kpègè, a beè àà gé oo dénè nú ea íe kọbé à láá zalí. Níà nú em beè naa ẽ́. M beè beeláfùl ge fã̀ Jìhóvà vaá tú dénè nà tṍó siimá tóm nèe, tãa vó em síì pọ̀b tọọ̀ kpá vaá dú neǹ dóm biè. (Máát. 13:​45, 46) M beè gbóó diia múú ló December 10, 1972.

Mm̀ kóló tẽ̀ènè gbáá, ńdáà tẹ̀ nè ńdáà kà, bií ló ńdáà ńkem̀ vígà págbálà beè gbóó bã mm̀ kà-kàí vaá dììa múú. M beè dààmà togó gè sí tóm kọ̀ kpẹ̀a dénè tṍó ló July 1973. A beè ié ene kà neǹ gyà deèsĩ́ tóm kọ̀ kpẹ̀a dénè tṍó ea beè di beélè bõ̀ònatõ̀ò e a bée kọlà Ann-Catrin, ea beè palàge vùlè Jìhóvà. E beè vùlè ene vaá ilá mm̀ gbáá 1975. Tṍó e ílà lọ̀l, e beè tú ténì gbáá tõoma Strömsund, ea dú ene kà bon ea palàge kpe dẽe ea di Sweden e gã́bug gbò e bà di kĩá ólò gbĩ́ gè nó Kpá Káí.

Ann-Catrin: Ńdáà tẹ̀ beè nó kà-kà belí gbẹá pọ̀b tọọ̀ kpá ea di Stockholm. Náa kal ló béè kọ m beè toolá kóló taà ẽ́ tṍóá, a beè olòó faalám tṍó ea gé kọ̀ kpẹ̀a nè tṍó ea gé sí nònù. Náa beè olòó leemá ńdáà kà kọ ńdáà tẹ̀ fáálám siimá nònù, vaá a beè olòó gbĩ́ gè naa kọ bàá dòòmà kọọ̀ Gbò Neǹ Ditõ̀ò Jìhóvà dú pọ́lọ́. Sõò náa beè láá kpègii lọl ló gè fã̀ Jìhóvà. Tṍó e tṍó téní, a beè dààmà togó gè nó Kpá Káí vaá dììa múú. M beè dììa múú tṍó em ni tóólá 13 gbáá, vaá dú neǹ gyà deèsĩ́ tóm kọ̀ kpẹ̀a tṍó em ni tóólá 16 gbáá. Tṍó em ni tú sìgà tṍó siimá tóm gbẹá Umeå, kĩée e bíì gbò kọ̀ kpẹ̀a beè bọọ, ba beè gbóó ím bá ló naamá nen ea di boo kele íb sìtóm kọ̀ kpẹ̀a dénè tṍó.

Tṍó e Mats nè nda ni ílá lọ̀l, nyíéi beè ẹẹ kọ è láà nvèè bá nè gã́bug nen kọ bàá nó Kpá Káí. Béè enè nen e beè nvèè bá nè kọlà Maivor, ea dú ene kà nvín ãa bia e a beè sọ̀bá a nu sẹ̀ẹ̀a sĩ́ ea dú gè gànè ló, vaá a beè zọ̀ ńdáà ńkem̀ vígà pábia dú neǹ gyà deèsĩ́ tóm kọ̀ kpẹ̀a. Ba beè gbá sí tọọ̀ kpá Gílẹẹ̀d mm̀ gbáá 1984, vaá pálaa ọ̀và di Ecuador e bà gé sí tóm gè kọ́ kpẹ̀a aa dó dọ dó.

Éé ní ea beè nvèè bá nè pálaa bọ̀ì kọ ó “nyaanai bá ló nu dẹ̀ẹ̀a boo bé e dìtõ̀ò meà naa, vaá tui ẹ́ẹ́-ẹẹ̀ nyíe siimai bọọ tóm ẽ́”?

Mats: Ba beè olòó kọ é àà kil dõona ketõ̀ò gé sí ãa tóm. Sõò ene kà nú ea beè olòó nvèè bá nèi kọ é láá nyaaná bá ló nu dẹ̀ẹ̀a boo bé e dìtõ̀ò meà naa dú gè pììga boo gè nó Jíízọ̀s, bọọ èlmà tõ̀ò bé ea beè kìlmà kpá ló kẽ naa. (Kọ́l. 2:​6,7) Dì belí nu dòòmà bá, tãa vó e kọ́ọ̀ nè pá vígà e bà di kĩée e bà lẹẹlài tẹlẹ̀ kọ bàá naa nu belí bé e beele gbĩ́ì naa, è ólò pììgà ge naa nu belí bé e bà ólò naa nu naa. È ólò gbĩ́ gè nyimá bé e pá ba bálásĩ́ ólò naa nu naa, nè bé e bà ólò bugi togó naa. Tṍó e nóò Jíízọ̀s, à ólò naa kọ á valíí ló gè nyaaná bá ló nu dẹ̀ẹ̀a boo bé e dìtõ̀ò meà naa vaá ié ẹ́ẹ́-ẹẹ̀ nyíe mm̀ bẹẹ sìtóm.​—Ps. 1:​2, 3.

Ann-Catrin: Kọbé té e bà buulà vaá fó dõona ketõ̀ò láá bọọ, à ólò ié bíi ló gbẹi. Jìhóvà ólò zogè kọọ̀ à dúè “nàànì” nèài. (Ps. 84:11) Jìhóvà a tã́ànèi dee bá vaá nèi gã́bug pá vígà e bà vulèi. Dì belí nu dòòmà bá, gbẹá mm̀ ene kà ńkem̀ bõ̀ònatõ̀ò ea di Tehran, ea dú ene kà pọ̀b bon ea di Iran, pá vígà e bà di kĩá beè palàge vùlèi vaá dõo nu nèi. Bé e ba beè dõo nu taalẹ bá naa beè naa kọ é kẽ̀èa boo bé e sìgà gbò e ólò bugi nú ea kil vá ló lọl mm̀ Kpá Káí beè olòó dõo nu naa. A beè tànii gè gbẹá Iran, sõò ló July 1980, kpóó ea géè bẹ̀l beè kùb tóm Gbò Neǹ Ditõ̀ò Jìhóvà gbẹá kĩá, vaá ba beè nèi 48 ávà kọ é ààma dóá. Ba beè gbóó lẹ̀ẹ̀lài tẹlẹ Zaire (e bà kólíe Congo kátogóí) ea di Africa.

M beè tò tṍó em nyímà kọ bà lẹẹlài tẹlẹ Africa. Bel em beè dã̀ ea kil ló naanà nè kom ea di Africa beè siimàm pọ̀. Sõò bàà kà nà kóò e ba ni tú gã́bug gbáá siimá tóm gbẹá Africa beè kọ́ nèm kọọ̀ “Pọ̀ á gá síi ni, ò gáà zẹẹ tõo Africa tọ́ọ̀ tóm! È nyímà kọọ̀ àé palàge leemá ni.” Bel e ba beè lòa beè dú kà-kà. Pá vígà e bà di Africa beè palàge vùlèi, vaá tú lé bá tuumái. Kàsĩ́, tṍó e ọ̀ọ̀lẹ̀ gbáá ni téní e bà kọ́ é aa Zaire boo béè kọ bà kub bẹẹ sìtóm kọ̀ kpẹ̀a gbẹá kĩá, m beè màngã̀ boo béè kọ bé em géè bugi togó naa beè nyaaá. M̀ géè tã̀àgã ló Jìhóvà kọọ̀ “Sóo-sóo naa kọ é gbẹá Africa.”

Mókà gbò tã́áná dee bá ní eo ni íei lọlíí ló gè tui dénè bọọ dùm fãamai Jìhóvà ẹ?

Mats: Tóm e gé síí a náa kọ é bã̀àà kóò gã́bug gbò e bà ólò kọ́ kpẹ̀a aa dó dọ dó e bà aa kele-kele ketõ̀ò. Nyíè ńdáà va nè nda ólò palàge ẹẹ boo béè kọ kọ̀láá kĩée e bà lẹẹlài tẹlẹ̀, buù bẹ̀ì ólò láá ié nú ea é dú 20 nen eé nóòmà Kpá Káí. Gbá ló vó, kà lé bá e pá vígà e bà di Africa beè sẹ̀ẹ̀mài nè bé e ba beè vùlèi naa náa é táí nyíe. Mm̀ bẹẹ faà ní e ólò mà tṍó e síì gé kãa gbò bõ̀ònatõ̀ò ea di Tanzania ẽ, vaá pá vígà e bà di kĩá ólò naa kọ̀láá kà nú e bá va sim tùlà ge ẹ̀b nú ea kilíí ló, náa kal ló béè kọ bà náa beè ié gã́bug nu gè tõ̀òma dùm. (2 Kọ́r. 8:3) Ene kà nú e ńdáà va nè nda beè olòó palàge dé kpéè ló dú gè ĩìtẽ́ kẽ buù dee vaá kọ́ nú e buù bẹ̀ì beè tení bá nè ene, nè ge õá Jìhóvà zaa ló bé ea nveè bá nèi naá buù dee.

Ann-Catrin: Ene kà nú e nda beè palàge dé kpéè ló dú gè di zẹ̀ẹ̀ pá vígà e bà aa kele-kele ketõ̀ò. E beè nó kele-kele dém bel, dì belí Farsi, French, Luganda, nè Swahili, e beè no nagé bá e kele-kele gbòa ólò naamá nu. E beè nvèè bá nè gã́bug pá vígà kọ bàá láá fã̀ Jìhóvà leevè, bã̀àà gì ãa kóò, vaá zọ̀ va dé kpéè ló gè fã̀ Jìhóvà.​—Zèf. 3:9.

E beè mòn nàgé gã́bug nu e Jìhóvà beè dèm ea palàge kpe dẽe. Jìhóvà beè noomài bé eé sí tóm e bà néi naa. Buù tṍó e bà néi ãa tóm ge sì, Jìhóvà beè noomài gbò nú e née gáẹ̀ láá nyimá boo bẹẹ lóó.

Mókà gbò ànà-ànà ní eo beè kpeelii sĩ́ ló é, vaá éé ní ea beè nvèè bá nèi kọ ó láá ĩimai ẽ́?

Mats: Kpá lói beè olòó zọ̀, kàsĩ́ à íe tṍó e ákòm beè bã̀ ḿ ló. Ba beè baa Ann-Catrin gã́bug tṍó, boo béè kọọ̀ kom̀ bààà beè olòó bã̀e ló. E beè olòó ié tã̀àgã̀ bùlà ea kil ló gè ẹ̀b nú ea kuu bẹẹ tẹ̀ nè bẹẹ kà e ba ni dú kànen mm̀ dee; sõò nyíéi beè olòó ẹẹ boo béè kọ sìgà pá bẹẹ tọ beè dìvá ló e bà géè ẹ̀b nú ea kil vá ló leevè. Ba beè ié ĩ̀ìmà, vulè, vaá nyíé va beè ẹẹ ló gè ẹ̀b nú ea kil vá ló (1 Tím. 5:4) Náa kal ló béè vó, sìgà tṍó nyíéi ólò bììlà boo béè kọ a beè tànii gè ẹ̀b nu ea kil ló bẹẹ tẹ̀ nè bẹẹ kà vaá dìvá kpàn lee.

Ann-Catrin: Kom ea kọlà cholera beè zọ̀m mm̀ gbáá 1983, tṍó e géè sí tóm gbẹá Zaire. Neǹ dóm biè beè kọ́ nè Mats kọọ̀, “Tú o va lọl dóí niei!” Deé ea bẽene, e beè bã mm̀ ńkìlà vaá àà kil Sweden.

Mats: E beè tò boo béè kọ e beè dòòmà kọọ̀ née é láá kọ́ ná kpẹ̀a aa dó dọ dó. Sõò kpá ló Ann-Catrin beè valí, náa kal ló béè kọ neǹ dóm bièa beè kọọ̀ kpá lóe náa é válí ná. E beè òòa kẽ kil Zaire tṍó e enè gbáá ni téní, vaá e beè kil ene kà bõ̀ònatõ̀ò e bà ólò ló dém bel Swahili ea di Lubumbashi gé sí tóm.

Ann-Catrin: Nvín ea beè dìḿ gbàà beè ù tṍó e di Lubumbashi. Náa kal ló béè kọ née beè noo gè ié gbò pá nvín, nyíém beè palàge bììlà tṍó e nvín ea beè dìḿ gbààa ú. Sõò tṍó e beè di kèbá tàvàlà dìtõ̀òa, Jìhóvà beè palàge nvèè bá nèi mm̀ sĩ́deè e née beè ẹ̀bmà dẽe. E beè noomà Kpá Káí gã́bug nen èlmà bé e beè olòó naa. Besĩ́ enè gbáá à kalá tení, 35 neǹ kọ̀ kpẹ̀a e ba beè di bẹẹ bõ̀ònatõ̀òa beè bọọ dọ ló naa ní e tóòlà 70 nen, vaá 40 nen e ba beè olòó dú nònù besĩ́ à kalá dọ̀ tṍóá beè bọọ dọ ló vaá toolá 220 nen. E beè olòó tú bẹ̀à sã́ bùlà kọọmá kpẹ̀a vaá Jìhóvà beè tãanè dee bá bẹẹ pììgà, vó beè naa kọ nyíém á ẹẹ. Tẹlẹ̀ kátogóí, è ólò kẽ̀èa boo bẹẹ nvín ea beè ùa. È ẹbmà dẽe kọọ̀ mm̀ páradaìs, Jìhóvà é náa kọ nyíéi a gá bììlà nà.

Mats: À íe tṍó e lóó Ann-Catrin beè olòó palàge ọọ, tẽ̀ènè tṍóá ní e cancer beè zọ̀m vaá bà baá m ẽ́. Sõò kátogóí kpá lóm a válí, vaá Ann-Catrin dì ea gé piigà bé e a kpóó sim tùlà naa gè fã̀ Jìhóvà.

Sõò e mon kọọ̀, níì áá beele ní e gé kpeesĩ́ ló tàvàlà dìtõ̀òe nì. Tṍó e tã̀àgã̀ ea beè naa kọ bàá fẹ́ gã́bug nen gbẹá Rwanda ni naaá lọl mm̀ gbáá 1994, e beè sì gé kãa gã́bug pá vígà e ba beè di kĩée e gbò e bà di ól tee ólò tõo. Ge mòn bé e pá vígàí íe ĩ̀ìmà, agẹ zìgà, vaá dõo nu taalẹ bá naa, beè naa kọ é kẽ̀èa boo kọ Jìhóvà íe kpóó gè ẹ̀bmà nú ea kil ló pá a gbò kèbá kọ̀láá íb tã̀àgã̀ e bà kpeesĩ́ ló.​—Ps. 55:22.

Ann-Catrin: Dõona kà tã̀àgã̀ e beè kpeesĩ́ ló dú tṍó e beè sí kẽè ge tú tọ nàà tóm e ba beè tìb gbẹá Uganda nvee bá Jìhóvà mm̀ gbáá 2007. Tṍó e nòònùa ni íná kùbmà, 25 nen e bà ólò kọ́ kpẹ̀a aa dó dọ dó nè gbò e bà ólò sí tóm Bẹ́tẹẹ̀l nè bẹ̀ì beè gbá bã faà kil Nairobi, ea di dó Kenya. Besĩ́ è kalá iná kĩée eé téní bã Kenya, ene kà faà beè tú bá kpóó teemá aa boo bá kĩée ea beè dì gé kòn faà e beè di m-má. Nen ea géè ọví faàa nè vòò kà pá vígà beè ú tẽ̀ènè tṍóá; tṍó e tṍó téní, ene kà vígà pábia ea beè dìí ló beè ú gbẹá tọọ̀ biè. À palàge tànii gè kpáá mòn pá vígà e ba beè ùa!​—Jóòb 14:​13-15.

Kpá lóm beè valí tṍó e bà bó gbò kom ea beè bã̀ ḿ ló lọ̀l. Sõò nú ea beè naaá ã́ beè tãagẽ ńdáà dóm nè nda bíi ló gbò e beè gbá di mm̀ faàa. Pọ̀ ólò siím vaá ním beè láá olòó daa gã́bug bílá dee. Ge olòó tã̀àgã ló Bàrì vaá bugi sìgà dọ̀ Kpá Káí ea ólò palàge leemái beè nvèè bá nèi. E beè ié nágé nvèè bá lọl bá neǹ dóm biè ea ólò bó gbò e bà íe agẹbá tã̀àgã̀ bùlà. Kátogóí, lóói a agà vaá è ólò bàn Jìhóvà kọọ̀ á naa kọ é láá nvèè nàgé bá nè gbò e bà gé téní bá íb nú e beele beè tení báá.

Tṍó eo géè kọi bé eo beè láá ĩimai gbò tã̀àgã̀ eo géè teníí báá naa, o beè kọi kọọ̀ Jìhóvà beè faalái “belí nyim̀ ké kõ̀ò.” Éé ní e belá tõó dọ̀ ẹ?

Mats: È túù moǹ belá lọl ló moǹ bel pá Swahili ea kọọ̀ “Tumebebwa kama mayai mabichi,” ea tõó dọ̀ “Ba beè faalái belí nyim̀ ké kõ̀ò.” Dì belí bé e nen ólò tú ọ̀ẹ̀ dẽe faamá nyim̀ ké kõ̀ò kọbé náa ú naaá, níà bé e Jìhóvà géè tú gbọ́ọ́-gbọọ̀ bá faamái mm̀ kọ̀láá kà tóm e géè sì naa ẽ́. E beè olòó ié gbò nú e íè bíi ló èlmà bé ea géè biíi naa. Enè sĩ́deè e beè mòn bé e Jìhóvà vulèi vaá nvèè bá nèi naa, dú bé e Gbò Ge Tùlà Tóm beè ié tọa ló kìlmàí ló naa.

Ann-Catrin: Àé léémám gè kọ́ enè sĩ́deè e Jìhóvà beè nvèèmà bá nèi. Enè dee, ba beè kolím boo fóòn vaá kọ́ nèm kọọ̀ kpá ló ńdáà tẹ̀ palàge zọ̀ gbẹá Sweden vaá à di tọọ̀ biè. Ákòm beè sii Mats vaá kpá lóe ã́àa valí. Née beè ié kpègè ge kpẽ́ ló tíkèt eé bãama mm̀ ńkìlà naa ní eé láá sí be. E beè beeláfùl kọ èé óo bẹẹ faà. Tṍóá ba beè gbóó kolíi boo fóòn bàà tóm; ene kà kólá beè aa bá ene kà dóm nè va e ba beè dã́ nú ea naaáí ló vaá ba beè gbĩ́ gè kpẽ́ kpègè ló tíkèt nèi. Ní ea égè bàà kà kólá beè aa bá ene kà vígà pábia ea ni dú kànen mm̀ dee ea beè kùmà sìgà kpègè sẹlẹ́ mm̀ ńkpó vaá emí bée ló kọọ̀ “Ge nvèèmà bá nè nen e bíi di ló.” Mm̀ pọ́ì ńkem̀ tṍó, Jìhóvà beè nvèè bà nèi!​—Híb. 13:6.

Tṍó eo kẽeàì boo nú eo ni ténii bá mm̀ 50 gbáá eo ni síimai tóm dénè tṍó, éé ní eo ni nói ẽ́?

Ann-Catrin: M mon kọọ̀ bẹẹ kói dẹẹa boo “gè ié dĩ̀ìnè ló bùlà nè ge dẹlẹ nyíé boo” Jìhóvà. Tṍó e dẹlẹ̀ nyíé boo Jìhóvà, à ólò bé-bé nèi. (Àìz. 30:15; 2 Kró. 20:​15, 17) Boo béè kọ e tú dénè bẹẹ kói fã̀àmà Jìhóvà mm̀ buù kà tóm e ni sí, e íe gã́bug tã́áná dee bá e née gáẹ̀ beè láá ié.

Mats: Kà pọ̀b kà nú em ni nó dú gè dẹ̀ẹ̀a boo Jìhóvà kèbá kọ̀láá kà dìtõ̀ò kọbé m̀ mon bé ea gé nveè bá nèm naa. (Ps. 37:5) À ólò mm-mè kọ̀láá kà nú ea beè zìgà. È dì e gé mon nagé bé ea gé nveè bá nèi naa mm̀ bẹẹ tóm e gé sí gbẹá Myanmar.

È agàlà nàgé boo kọọ̀ Jìhóvà é íe vulè ea kyãa mm̀ bọ́ọ̀ló dẹ̀lẹ̀ nyíé boo kilma ló kọ̀láá kà gbò nvín ãa e bà gbĩ́ gè bọ̀ọ̀vẹ̀ gbàà ba sìtóm nè Jìhóvà. È dẹlẹ̀ nyíé boo kọ be bà sọtọ́ deè kọ Jìhóvà á nveenìè bá neè va tení dú ló gè nyaaná bá ló nu dẹ̀ẹ̀a boo bé e dìtõ̀ò meà naa, bà é tú ẹ́ẹ́-ẹẹ̀ nyíe siimá kọ̀láá kà tóm e bà né va.