Bàrì Beè Dò Íb Zìgà E Ébràhám̀ Íe

Ébràhám̀ beè noomà a nvín Áízìk kọ á vùlè Jìhóvà vaá dẹlẹ nyíé boo kọ̀láá kà nú e Jìhóvà beè zìgà. Sõò tṍó e Áízìk ni láá tóólá 25 gbáá, Jìhóvà beè kọ́ nè Ébràhám̀ kọ á naa ene kà nú ea palàge tàvàlà. Éé ní ea beè kọ á naa ẽ́?

Bàrì beè kọ́ nè Ébràhám̀ kọọ̀: ‘Sóo-sóo tú áá kà o nvín vaá ò túe vaamá gyọ́ọ gbẹá boo ene kà gù ea di boo kunukẽ̀ Mòráíà.’ Ébràhám̀ náa beè nyimá nú ea náa vaá Jìhóvà à kọ́ nèe kọ á naa vó. Sõò a beè gbàntṍ ló Jìhóvà.

Kà bòm deè deé ea bẽene deeá, Ébràhám̀ beè gbóó tú Áízìk bií ló bàà kà a gyóòlo vaá kpeesĩ́ deè Móráíà. Tṍó e taà dee ni téní, ba beè gbóó láá tõó kpã́á mòn gbò gù ea di Móráíà. Ébràhám̀ beè gbóó kọ́ nè pá a gyóòlo kọ bàá elá, boo tṍó e ẹlẹ nè Áízìk é aà gé vaalá gyọ́ọ. Ébràhám̀ beè tú kã́áni nè Áízìk kọ á toolá, sõò ẹlẹ beè faalá gíma. Áízìk à gbóó bĩiná a tẹ̀ kọọ̀: ‘É nom eé váámá gyọ́ọ dì ãàe?’ Ébràhám̀ à aalá kọọ̀: ‘Ńdáà nvín, Jìhóvà é náa kọ é ié.’

Tṍó e bà íná boo gùa, bà gbóó tìb gbàni vààla gyọ́ọ. Tṍóá, Ébràhám̀ à gbóó bọbví bá nè tọọ̀ Áízìk vaá túe maamé boo gbàniá.

Ébràhám̀ à gbóó tú gímaá. Kà lèlà tṍóá, nyómá tóm Jìhóvà à gbóó tõó káála kolíe kọọ̀: ‘Ébràhám̀! Ó gá nvèè kom ló nvíná! Kátogóí, m nyímá kọ ò íè zìgà, boo béè kọọ̀ o beè di kpènà ló gè tú o nvín vaamá gyọ́ọ.’ Tṍóá, Ébràhám̀ à gbóó mòn ene kà dṍóna ea koò ã́gã́ dáà té gbẹá gbàà víl. À gbóó gbẹá boo taalá Áízìk vaá tú dṍónaá vaamá gyọ́ọ.

Lọl deeá ààmà, Jìhóvà beè gbóó kolí Ébràhám̀ kolíe a kóò. É kọ ọ̀ nyímà nú ea náa à kolíe a kóò? Ébràhám̀ beè naa kọ̀láá kà nú e Jìhóvà gbĩ́ kọ á naa, bã̀àna tṍó e náa beè dã́ ból ló nú ea náa vaá Jìhóvà à kọ á naa nuá.

Jìhóvà beè kpáá tení boo nú ea beè zìgà nè Ébràhám̀a kọọ̀: ‘Nda é tã́ànè ni dee bá, vaá m̀ é náa kọọ̀ pá o nvín á bọọ́ tõ̀ò.’ Níí tõó dọ̀ kọọ̀ Jìhóvà é tã́ànè dee bá kọ̀láá kà neǹ lé lab dògò tení dú ló pá tọọ̀ Ébràhám̀.