Jékọ̀b Nè Ísọ̀ Nááá Fẹ́ẹ-fẹẹ̀ Ló

Jìhóvà beè zìgà nè Jékọ̀b kọ à é kpenàèe belí bé ea beè kpenàè Ébràhám̀ nè Áízìk naaá. Jékọ̀b beè tõó kĩée ea kọlà Héràn, kĩá ní ea beè tõo ilí va, ié pá tọ, vaá ié gã́bug gyọ́ ẹ́.

Tṍó e tṍó téní, Jìhóvà beè gbóó kọ́ nè Jékọ̀b kọọ̀: ‘Òòa kẽ kil bọọ bon.’ Vó à naa, Jékọ̀b nè pá a tọ beè gbóó dààmà togó gè kyã̀à gbele begè dẽè kyẽè e bà gé ooà kil be. Gbẹá èèlè e bà gé aà, sìgà gbò beè dú ló Jékọ̀b gé kọ́ nèe kọọ̀: ‘O vígà Ísọ̀ gé dú, vaá à fáálá 400 nen bììa ló!’ Pọ̀ beè sii Jékọ̀b kọọ̀ Ísọ̀ gbĩ́ gè sí pọ́lọ́ pá a tọ nè ẹ̀ẹ̀. A beè gbóó tã̀àgã ló Jìhóvà kọọ̀: ‘Sóo-sóo dùùlàm lọl bá ńdáà vígà.’ Tṍó e dee zilà, Jékọ̀b beè gbóó dõo gã́bug naanà ból, ból, námà, kámẹẹ̀l, nè nom̀ tóòmà tò má Ísọ̀.

Bílá deè deeá tṍó e áá Jékọ̀b di kẽ, a beè gbóó mòn nyómá tóm. Nyómá tómá à gbóó dààmà togó gè bé e. Ba beè bé dọ̀ọ̀mà tṍó e dee zilà. Náa kal ló béè kọọ̀ kom beè bã ló Jékọ̀b, náa beè zìgà ge aa ló nyómá tómá. Nyómá tómá à gbóó kọọ̀: ‘Sọ̀m bá mè m̀ é aà.’ Sõò Jékọ̀b beè kọ́ nèe kọọ̀: ‘Ẽ́èe, ním é sọ́ ni bá dọ̀ọ̀mà tṍó eo é tã́ànèm dee bá.’

Dee deè nvée, nyómá tómá beè gbóó tãanè dee bá Jékọ̀b. Jékọ̀b à gbóó nyimá kọọ̀ Jìhóvà náa é zigà kọọ̀ Ísọ̀ á sièe pọ́lọ́.

Boo lọ̀ọ̀leè deeá, Jékọ̀b beè gbóó dàlà dẽe ẹ̀bmà deè sĩ́ vaà mòn Ísọ̀ nè 400 nen e bà dìé ló. Jékọ̀b beè gbóó kyã̀à gya sĩ́ pá a tọ vaá kumí sĩ́ kẽ nè a vígà àlàbà tóm. Ísọ̀ beè gbóó teelá nyoone Jékọ̀b vaá tobví bũ̀ùnàe. Bàà vígàí beè gbóó tọ̀ vaá nvèè fẹ́ẹ́-fẹẹ̀ ló. Ò bulà kọọ̀ bé e Jékọ̀b síi bá ló dìtõ̀òí naa tọ́á Jìhóvà naa vàẹ?

Tṍó e tṍó téní, Ísọ̀ beè gbóó òòa kẽ kil ńlẹ́ẹ̀ be, vaá Jékọ̀b à àà kil ńlẹ. Jékọ̀b beè ié 12 kà nvín págbálà. Ba bée kọlà Rúbèn, Símiòn, Lívaì, Júdà, Dã́àn, Náftalaì, Gáàd, Áshà, Íssakà, Zébulọ̀n, Jósẹ̀f, nè Bénjamìn. Jósẹ̀f ea dú ene kà gbàà gbò nvíní ní e Jìhóvà beè tú dùùmà pá a gbò e. É kọọ̀ ò nyímà bé ea beè naaá naa? Naa mè èé gbĩ́tẽ́ ló.