25 NU GÈ NÒ
Tọ Kàn Káí Gè Tõó M Fã̀ Bàrì
Tṍó e Mózìs beè di boo Gù Sàìnáì, Jìhóvà beè kọ́ nèe kọ à tìb ene kà kele íb tọ kàn, e bà é kólíe tọ kàn káí, e pá Ízrẹẹ̀l é tõó m fãèe. Bà é láá dàlà tọ kàní kilma kọ̀láá kĩée e bà gé kil.
Jìhóvà beè kọ́ nèe kọọ̀: ‘Kọ́ nè gbòí kọ bàá domà kọ̀láá kà nú e bà é láá nvèèmà bá ló gè tìbmà tọ kàní.’ Pá Ízrẹẹ̀l beè nè nóò kpé, ẹ́ẹ́ kpé, gbébílí, gbò kpò dem e ka di ló, nè ból lọ́ọ̀. Ba beè domà nàgé gyáà naanà ból, báà kàn e bà tú línìn naamá, kpá nom, nè gã́bug dõona kà nu. Ba beè dõonu taalẹ bá naa ní e Mózìs kọ́ nè va kọọ̀: ‘Ní e ni íé a gbõoma! Ó gá doma nai.’
Gã́bug gbò gbálà nè gbò bia e bà íe kalì beè nvèè bá tìb tọ kàna. Jìhóvà beè nè va nyìmànù e bà síímá tómá. Sìgà ọ̀và beè lò díí, sìgà ọ̀và à lò kàn, vaá sìgà ọ̀và à tã́ nú dẽe. Boo tṍó e dõona gbò géè noo dem, tú nóò kpé dèmà nu, àbèè ge ọ́ té naamá nu.
Ba beè tìb tọ kàna gbõ̀ònà bé e Jìhóvà beè kọ bàá tìb naa. Ba beè naa kà lé báà kàn fùlmà mm̀ tọ kàn káíá naamá bàà m. Enè m beè dú Ketõ̀ò Káí, vaá enè m à dú Ketõ̀ò Káí Ea Tõo Lọ̀l Vaá À Lee. Ba beè tú té àkésìà nè nóò kpé naamá kpó zíl sẹlẹ́ Ketõ̀ò Káí Ea Tõo Lọ̀l Vaá À Leeá. Sõò té sã́ e bà náàmà nóò kpé, bií ló tébòl nè gbàni vààla gyọ́ọ e bà ólò mùn ínseǹs sẹlẹ́ boo beè di mm̀ Ketõ̀ò Káíá. Fẹ́ẹ́lẹ́ e bà tú gbébílí naamá nè pọ̀b kà gbàni vààla gyọ́ọ beè di mm̀ be ea di ló tọ kàn káíá. Kpó zílá beè olòó kẽeé nyíè pá Ízrẹẹ̀l kọ ba beè zìgà kọ bà é gbanìè tṍ ló Jìhóvà. È kọ ò nyímá nú e zíl tõó dọ̀? À tõó dọ̀ kele íb zìgànù.
Jìhóvà beè sà Érọ̀n nè pá a nvín naamá gbò vààla gyọ́ọ e bà é ólòó sí tóm mm̀ tọ kàn káíá. Bà é ẹb nú ea kil ló vaá olòó vaalá gyọ́ọ nè Jìhóvà gbẹá kĩá. Áá Érọ̀n, ea dú pọ̀b neǹ vààla gyọ́ọ ní e Jìhóvà beè sọ̀tọ́ deè kọ á bã Ketõ̀ò Káí Ea Tõo Lọ̀l Vaá À Leeá ẹ́. Áá enè tóm mm̀ enè gbáá ní ea beè olòó bã kĩí vaá vaalá gyọ́ọ boo a pọ́lọ́, níí pá a tọ, né níí zivèkà dó Ízrẹẹ̀l ẹ.
Pá Ízrẹẹ̀l beè tìb tọ kàn káíá lọ̀l tṍó e enè gbáá ni téní aa ló tṍó e ba beè aa Íjìpt. Kátogóí, baa íe kĩée e bà é ólòó tõo fã̀ Jìhóvà.
Jìhóvà beè naa kọọ̀ a ka á m-má mm̀ tọ kàn káíá, vaá a beè naa kọ bù dee á tõó boo tọí. Pá Ízrẹẹ̀l beè gbẹá kĩée e bà dì begè dẽè tṍó e bù deeá tõó boo tọ kàn káíá. Sõò kọ̀láá tṍó e bù deeá aa boo tọá, bà ólò gbóó nyimá kọọ̀ tṍó gè àà a lée. Bà ólò gbóó làb tọ kàn káíá vaá kyã̀à bììa nvéè bù deeá.
“M beè dã́ ene kà gbele mon ea silà aa ló kpò té méné kọọ̀, ‘Ẹ̀b, mè Bàrì a tú a tõ̀ò sẹlẹ́ zẹ̀ẹ̀ gbò nen! À é tõó vá zẹ̀ẹ̀, vaá bà é dú pá a gbò. Kà lèlà bá ẹlẹ́ Bàrì, é tõó vá zẹ̀ẹ̀ vaá dú ba Bàrì.’”—Kùùà Nù 21:3