Ãa Neǹ Tùle Nè Bàà Kà Pábia E Bà Íe Agẹ Ló

Tṍó e Jóshùà ni túlè gbò níí Bàrì mm̀ gã́bug gbáá, a beè gbóó ù tṍó ea ni tóólá 110 gbáá. Tṍó Jóshùà beè di dùm, pá Ízrẹẹ̀l beè kilsĩ́ gè fã̀ Jìhóvà. Sõò tṍó e Jóshùà ú, ba beè gbóó dààmà togó gè fã̀ gbò ńbàlì e bà náàmà bá belí pá Kénaàn. Boo béè kọọ̀ pá Ízrẹẹ̀l náa beè gbàn nà tṍ ló tùle ea aa bá Jìhóvà, a beè sọ̀tọ́ deè kọọ̀ Jébìn, ea dú méné pá Kénaàn á naa kọọ̀ dùm á tàvàlà vá ló. Pá Ízrẹẹ̀l beè gbóó bàn Jìhóvà kọ á nveenìè bá neè va. Vó beè naa kọọ̀ Jìhóvà á íbá ló Béràk naamá ba neǹ tùle. À é nveè bá nè pá Ízrẹẹ̀l kọ bàá òòa kẽ nyoone Jìhóva.

Dẹ̀bórà, ea dú pábia ea géè kọ́ bùlà Bàrì beè lẹ̀ẹ̀là tóm kolmá Béràk. Jìhóvà beè kọ́ nèe kọ á kọ́ nè Béràk kọọ̀: ‘Faalá 10,000 gbò gbálà, vaá ò aà gé bé gbò bé Jébìn gbẹá ló múú ea di Káíshòn. Ò é bé èlbá Síserà, ea dú neǹ togó gbò bé Jébìn gbẹá kĩá.’ Béràk à gbóó kọ́ nè Dẹ̀bórà kọọ̀: ‘M̀ é sí be ò nyooném.’ À aalá nèe kọọ̀: ‘M̀ é nyooné ni. Sõò nyimá kọọ̀ níì olo ní eo é fẹ́ Síseràẹ nì. Jìhóvà beè kọọ̀ pábia ní ea é fẹ́ẹ ẹ́.’

Dẹ̀bórà beè gbóó nyoone Béràk nè pá a gbò bé kil boo Gù Tébọ̀ gé kpoogá dee ló bé. Síserà gé dã́ gé naa vó, à gbóó faalá pá a gbò bé nè gbò a faà bé kilma deè kpọ̀lọ̀-kpọ̀lọ̀ ea di ló kĩá. Dẹ̀bórà à gbóó kọ́ nè Béràk kọọ̀: ‘Nieí ní e Jìhóvà é náa kọ ó bé èlbá ẹ́.’ Béràk nè 10,000 pá a gbò bé beè aa bo gùa nyoone gbò bé Síserà e bà palàge ié kpóóá.

Jìhóvà beè gbóó naa kọọ̀ múú Káíshòn á m-má bã boo kpò. Gbò faà bé Síserà beè siilá gbẹá gbàà gbá, naa ní e Síserà aa mm̀ a faà bé teelá. Béràk nè pá a gbò bé beè bé èlbá gbò bé Síserà, sõò Síserà beè teelá kìl! A beè teelá àà gé gũá mm̀ tọ kàn ene kà ńnváá ea kọlà Jéẹ̀l. Jéẹ̀l beè nèe múúmá láo kọ á õ̀, vaá tú kàn uué ló. Neǹ béí beè daa boo béè kọọ̀ lóóe a ọọ. Tṍóá, Jéẹ̀l à gbóó gẹẹlẹ ló bã̀é ló vaá tú kpóó ńgà ea ólò di ló tọ kàn káẹ́ togó. Gbálàí beè gbóó ù.

Béràk beè gbĩ́ Síserà sí kĩá. Jéẹ̀l à gbóó aa mm̀ tọ kàna dọ bàlà kẽ vaá kọ́ nèe kọọ̀: ‘Bã tọ, mè m̀ é dobá gbálà eo gé gbĩ́á nè ni.’ Béràk à gbóó bã tọ vaá mòn Síserà ea ni ú. Béràk nè Dẹ̀bórà beè gbóó ọlí sọ́l lèèmà Jìhóvà boo béè kọ à náa kọọ̀ pá Ízrẹẹ̀l á bé èlbá ba gbò ọ́b. Lọl tṍóá ààmà, pá Ízrẹẹ̀l beè ié fẹ́ẹ́-fẹẹ̀ ló mm̀ 40 gbáá.