Gídiòn Beè Bé Pá Mídìàn Èlbá

Tṍó e tṍó téní, pá Ízrẹẹ̀l beè kpáá òòà aa ló Jìhóvà vaá dààmà togó gè fã̀ gbò kyáá ńbàlì. Pá Mídìàn beè tú àlàbà gbáá zìbmà nom̀ pá Ízrẹẹ̀l vaá kyọ̀sĩ́ nú e ba beè fò. Pá Ízrẹẹ̀l beè gũá mm̀ kóló dem nè gbàà gù kọbé bà láá dùùà aa bá pá Mídìàn. Ba beè bàn Jìhóvà ko á duulàẹ̀ va. Vóà naa, Jìhóvà beè gbóó lẹ̀ẹ̀là ene ka nyómá tóm siimá ló ene kà nvín ãa gbálà ea kọlà Gídiòn. Nyómá tómá beè kọọ̀: ‘Jìhóvà a sá ni kọ ó dú kpã̀àmà neǹ bé.’ Gídiòn à gbóó bĩináe kọọ̀: ‘À é náà và m̀ láá dùùlà pá Ízrẹẹ̀l ẹ? Nda á gé ló tọ́ọ̀ nu.’

À é náà và Gídiòn nyímá kọọ̀ Jìhóvà beè saẹ̀ẹ ẹ́? A beè tú gyáa e ba beè kọọ lọl ló naanà ból sẹlẹ́ kunukẽ̀ vaá kọ́ nè Jìhóvà kọọ̀: ‘Beè bílà múú bòm dee gyọ́ọ̀vẹ̀ gyáà naanà bólí tṍó e dee é zilà vaá kunukẽ̀ di kã́á-kãa, m̀ é nyímá kọ ò gbĩ́ì kọ ḿ dùùlà pá Ízrẹẹ̀l.’ Tṍó e dee zilà, gyáaá beè gyọọ, sõò kunukẽ̀ di kã́á-kãa! Sõò Gídiòn beè kpáá kọọ̀ tṍó e dee é zilà, gyáaá á di kã́á-kãa sõò kunukẽ̀ á gyọọ. Tṍó e níá nááá, Gídiòn beè gbóó àgala boo kọọ̀ Jìhóvà a saẹ̀ẹ. A beè gbóó bõonè ló gbò bé kọbé à béè pá Mídìàn.

Jìhóvà beè kọ́ nè Gídiòn kọọ̀: ‘Nda é náa kọọ̀ pá Ízrẹẹ̀l á bé èlbá. Sõò boo béè kọ ò fáàlà gã́bug gbò bé, ò é láá dòòmà kọ ò elìè bá boo o lóó. Kọ́ nè kọ̀láá neń e pọ̀ sííe kọ á òòà kil be.’ Vóà naa 22,000 gbò bé beè òòà kil be, sõò 10,000 nen beè gbẹá. Jìhóvà à gbóó kọọ̀: ‘Gbò béí kpáá bọọ́ tõ̀ò. Tú va siimá ló múú, vaá ò kọ́ nè va kọ bàá õ̀. Faalá áá gbò e bà kuà dẽe ló vaá ẹ̀b beè neǹ ọ́b gé dú tṍó e bà gé ṍ múú.’ Áá 300 nen ní e ba beè kùà dẽe ló tṍó e bà gé ṍ múú ẽ́. Jìhóvà beè zìgà kọọ̀ pọ́ì ńkem̀ gbòí é bé èlbá 135,000 gbò bé pá Mídìàn.

Bílá deè deeá, Jìhóvà beè kọ́ nè Gídiòn kọọ̀: ‘A lée tṍó gè bé pá Mídìàn!’ Gídiòn beè gbóó tugági koò nè pọ̀bkà káná e ba beè gṍ sã́ gè ẹ̀bmà kẽ m nè pá a gbò. A beè kọ́ nè va kọọ̀: ‘Ẹbvii nda, vaá ò náanii gbõ̀ònà nú em náà.’ Gídiòn à gbóó uuli a koò, tú a káná sá kẽ, viige a sã́, vaá vulí kpã́ kọọ̀: ‘Gẹ̀ bé Jìhóvà nè níí Gídiòn!’ 300 nená beè gbóó naa nagé vó. Pọ̀ beè sii pá Mídìàn naa ní e bà téélá zààla kọ̀láá ketõ̀ò. Tṍó e gyõ̀ ni bã́ vá dẽe, áá ọ̀và beè gbóó beá ene. Jìhóvà beè nvèè bá nè pá Ízrẹẹ̀l kọ bàá bé ba gbò ọ́b èlbá.