Jìhóvà Náa Kọọ̀ Sámsìn Á Ié Kpóó

Dõona tṍó, gã́bug pá Ízrẹẹ̀l beè kpáá àà gé fã̀gàgì ńneǹ té. Vó beè naa kọ Jìhóvà á sọ̀tọ́ deè kọọ̀ pá Fìlístìà á lẹ̀ẹ̀là va bel ló. Sõò à íe sìgà pá Ízrẹẹ̀l e ba beè vùlè Jìhóvà. Enè ọ̀và kọlà Mànóà. Ẹlẹ nè a va náa beè ié tọ́ọ̀ kà nvín. Enè dee, Jìhóvà beè lẹ̀ẹ̀là nyómá tóm siimá ló vaà Mànóà. Nyómá tómá beè kọ́ nèe kọọ̀: ‘Ò é íe ene kà nvín págbálà. À é duulà pá Ízrẹẹ̀l lọl bá pá Fìlístìà. À é dú neǹ Náziraìt.’ É kọ ò nyímà ló gbò Náziraìt? Bà dú gbò gyóòlo Jìhóvà e bà dì kele. Bà náa beè olòó zìgà kọọ̀ gbò Náziraìt á kpọá gyáa.

Tṍó e tṍó téní, nvín Mànóà beè gbóó mèà, vaá a beè kolíe Sámsìn. Tṍó e Sámsìn bọọ, Jìhóvà beè naa kọ á palàge ié kpóó. A beè tú bá fẹẹmá kpẹẹ̀. Enè dee, áá Sámsìn beè fẹ́ 30 neǹ Fìlístìà. Pá Fìlístìà beè gbóó ọbvié vaá gbĩ́ sĩ́deè ge fẹẹmáe. Enè deè bílá dee tṍó e Sámsìn di dáá gbẹá Gázà, ba beè gbóó àà kil ló gbànsĩ́ boná gé elá kọbé bà fẹ́ẹ̀ẹ tṍó e dee é zilà. Sõò taa tóm dáá, Sámsìn beè gbóó aa boo sí ló gbànsĩ́ boná gé gbaalá lọl deè. A beè tú gbànsĩ́á bẹ̀ẹ̀la boo gànàgĩ̀e kilma kà kpã́á boo gù ea di kuló Híbròn!

Tṍó e tṍó téní, pá Fìlístìà beè gbóó àà sí ló Dìláílà, ea dú kóò pábià Sámsìn gé kọ́ nèe kọọ̀: ‘Èé kpẽ́ gã́bug kpègè e bà náàmà ẹ́ẹ́ kpé nè ni be ò láá gbĩ́tẽ́ ló nú ea náa kọọ̀ Sámsìn á palàge ié kpóó. È gbĩ́ ge siíe vaá túe nvee kpọ́gọ́lọ́.’ Dìláílà géè gbĩ́ gè tú kpègèa, vó beè naa kọ á zìgà nú e bà kọ́. Túá tṍó, Sámsìn náa beè zìgà ge kọ́ nèe nú ea náa kọ á ièè kpóó. Sõò a beè kilsĩ́ gè tãagẽ́e dọ̀ọ̀mà tṍó ea zigà vaá gbóó kọ́ a nuù ke gũ̀a nèe. A beè kọ́ neè kọọ̀: ‘M̀ gáà kpọá gyáa tọ́ọ̀ dee boo béè kọọ̀ ndaà neǹ Náziraìt. Be m̀ kpọ́á gyáa, ním é íe na kpóó.’ Sámsìn beè ié kà agẹ bá lọ̀ boo béè kọ à kọ́ nèe, sẹ̀ níì vó nì?

Dìláílà beè gbóó gbẹá boo kọ́ nè pá Fìlístìà kọọ̀: ‘Nda a nyímá a nuù ke gũ̀a!’ Dìláílà beè gbóó tú Sámsìn maamé boo kpóó tọ́ẹ naa ní e dáá bã́é dẽe, tṍóá, à gbóó kọọ̀ nen á kpọ́ẹ gyáa. Dìláílà á gbóó kòòlà kpã́ kọọ̀: ‘Sámsìn, pá Fìlístìà a dú ee!’ Sámsìn gá kẽeà aa boo, tọ́ọ̀ kà kpóó ágé naé ló. Pá Fìlístìà à gbóó siíe, gimèe dẽe, vaá túe nvee tọọ̀ kpọ́gọ́lọ́.

Enè deé, gã́bug tõ̀ò pá Fìlístìà beè di bṍóná mm̀ tọọ̀ káí ba ńbàlì Dégòn e bà géè vulí kpã́ kọọ̀: ‘Bẹẹ bàrì a tú Sámsìn nvèèí bá! Tui Sámsìn domai! Naanii mè èé túe bìlmà bil.’ Ba beè gbóó túe ele gbà-gbá bàà kà bã̀, vaá nvèèmàe lẹ́. Sámsìn à gbóó kòòla kpã́ kọọ̀: ‘Zééì Jìhóvà, sóo-sóo kpáá nèm kpóó áá enè tóm.’ Tṍóá, a gyáa a kpáá bọọ́ begè. À gbóó tú dénè a kpóó tãamá bá pálaa kà bã̀ ea di mm̀ tọọ̀ káíá. Zivèkà tọá à gbóó kõoá dọ̀, vaá fẹ́ dénè gbò e ba beè di mm̀ tọọ̀ káíá. Sámsìn beè u nágé.