Jìhóvà Beè Ié ĩ̀ìmà Kilma Ló Jónà

Gbò e bà di pọ̀b boǹ Nínevà, ea di dó Àsìríà beè palàge ié pọ́lọ́ láb. Jìhóvà beè kọ́ nè a neǹ kọ́ọ̀ bùlà Bàrì Jónà kọ á sí Nínevà gé kọ́ nè va kọ bà á nyaaá aa ló ba pọ́lọ́ láb. Sõò Jónà beè teelá kil dõona ketõ̀ò. A beè bã mm̀ mìàlo ea gé kil Táshìsh.

Tṍó e mìàloá ni íná sĩ́ pène, agẹ bá fọ́ọ́lọ́ beè ùlà naa ní e pọ̀ beè palàge sii gbò e bà géè ọví mìàloá. Ba beè tãagã ló ba gbò ńbàlì vaá bĩiná kọọ̀: ‘Éé ní ea náa vaá nuí gé nááá ẽ́?’ Dee deè nvée, Jónà à gbóó kọ́ nè va kọọ̀: ‘À dú bá nda. M̀ téèlà aa ló nú e Jìhóvà beè kọ ḿ naa. Tọbvím mi tẹlẹí pèneí, mè fọ́ọ́lọ́í é sẹẹà.’ Náa beè tàn gbò e bà géè ọbví mìàloí gè tobví Jónà tẹlẹ mm̀ pèneá, sõò a beè kilsĩ́ gè kọ́ nè va kọ bà á tobvìèe tẹlẹ m. Tṍó e bà tóbvíe tẹlẹ pèneá, fọ́ọ́lóá beè gbóó sẹ̀ẹ̀à.

Jónà beè ié bùlà kọ à é ú è. Sõò a beè tã̀àgã ló Jìhóvà tṍó ea gé díi kil kè tẽ́ pèneá. Jìhóvà beè gbóó lẹ̀ẹ̀là ene kà pọ̀b kà gyã́à máe. Gyã́àa beè sọ̀ọ̀là mèn Jónà, sõò náa beè fẹ́ẹ. Jónà beè tõó gbàà gyã́àa tãagã ló Bàrì kọọ̀: ‘M̀ zigà kọ m̀ é ólòó gban ni tṍ ló lee.’ Jìhóvà beè naa kọọ̀ Jónà á tõó gbàà gyã́àa mm̀ taà dee naa ní e bè náa ú. Ní ea égè taà deeá, gyã́àa beè gbóó kpọ̀ Jónà tẹlẹ boo kpò.

É kọọ̀ Jìhóvà é aa ló Jónà kọ á gá si ná Nínevà boo béè kọ à duulàẹ? Ẽ́èe. Jìhóvà beè kpáá kọ́ nè Jónà kọ á sí kĩá. Jónà beè gbóó gbànie tṍ ló. À beè sí boná gé ãane gbòa kọọ̀: ‘Áá 40 dee ní ea sígá ẹ́, vaá kyọ̀àsĩ́ é dọ́ boo boǹ Nínevà.’ Tṍóá, nú e náa géè ẹ̀bmà dẽe beè naaá​—pá Nínevà beè gbàntṍ ló bel ea kọ́á vaá nyaaá. Méné boǹ Nínevà beè kọ́ nè pá a gbò kọọ̀: ‘Tãagãi ló Bàrì vaá ò ọ́gai. Be à sẹlẹ, náa é kyọ́i sĩ́.’ Tṍó e Jìhóvà mon kọọ̀ pá Nínevà ọ́gá, a beè gbóó aa ló gè kyọ̀va sĩ́.

Jónà beè nveè súng boo béè kọọ̀ kyọ̀àsĩ́ náa dọ́ boo boná. Bugi togó boo níí: Jìhóvà beè ié ĩ̀ìmà nè sàn nyíé ló Jónà, sõò Jónà náa beè ié sàn nyíe ló pá Nínevà. Tãa vó, a beè sì gé ĩìtẽ́ kè pẹ́ẹ̀ e féé sí kọ̀l boo vaá bigelè sĩ́. Tṍó e fééá ú, Jónà à gbóó nvèè súng. Jìhóvà à gbóó kọ́ nèe kọọ̀: ‘Ò bulà nú ea kil ló vílí èlmà bé eo bulà nú ea kil ló pá Nínevà naa. Nda íè va sàn nyíé ló vaá dùùlà va.’ Éé ní e níí tõó dọ̀ ẹ? Pá Nínèva palàge bọọ èl víl.