Jòsáíà Beè Vùlè Log Bàrì

Jòsáíà beè dààmà togó gè bẹ̀l Júdà tṍó ea tóólá aatáà gbáá. Mm̀ gbó tṍóá, gbò e ba beè di dóá géè bó biè vaá fã̀ gbò ńbàlì e bà náàmà bá. Tṍó e Jósáíà ni tóólá 16 gbáá, a beè pììgà ge naa gbò nú ea é náa kọ á láá fã̀ Jìhóvà mm̀ sĩ́deè ea lelà. Tṍó ea tóólá 20 gbáá, a beè gbóó dààmà togó gè kyọ̀sĩ́ gbò ńbàlì nè gbò gbàni vààla gyọ́ọ ea di dóá. Vaá tṍó ea ni tóólá 26 gbáá, a beè noo gè sí tóm ló tọọ̀ káí Jìhóvà.

Pọ̀b neǹ vààla gyọ́ọ ea kọlà Hìlkáíà beè mòn úl kpá e Log Jìhóvà di dẽe gbẹá tọọ̀ káíá​—à é láá dú kọọ̀ níà kà lèlà úl kpá e Mózìs beè emí ã́. Shéfàn, ea dú neń ea ólò emí kpá nè Méné Jòsáíà beè faalá úl kpáá má Jòsáíà, vaá a beè bugi Logá tẹlẹ bàlà kẽ. Tṍó e Jòsáíà gé pãane tṍ, à gbóó nyimá kọọ̀ pá a gbò a lọl togó kèbá Jìhóvà mm̀ gã́bug gbáá. Méné Jòsáíà à gbóó kọ́ nè Hìlkáíà kọọ̀: ‘Nyíè Jìhóvà palàge bììlàí ló. Àà gé bàn Jìhóvà, mè àé kọ́ nú ea bọ́ló kọ é naa nèi.’ Jìhóvà beè aalá vá bel gã́ tení dú ló ene kà pábia ea dú neǹ kọ́ọ̀ bùlà Bàrì ea bée kọlà Húldà, kọọ̀: ‘Pá Júdà a aàḿ ló. M̀ é né va kpọ̀té, sõò níì tṍó e Jòsáíà gé bẹlí nì, boo béè kọ à kilmà kpáló kẽ.’

Tṍó e Méné Jòsáíà dã́ belá, à gbóó àà kil tọọ̀ káí vaá kolí dénè pá Júdà bõonè. Tṍóá, à gbóó tú agẹ mon bùgmà Log Jìhóvà nè dénè gbòa. Jòsáíà nè pá a gbò beè zìgà kọ bà é gbanìè tṍ ló Jìhóvà lọl mm̀ dénè ba nyíe.

A dú gã́bug gbáá e pá Júdà náa beè sẹlẹna Sẹ̀lẹ̀nù Téní Zelí. Sõò tṍó e Jòsáíà bugi kĩée ea di mm̀ Logá ea kọ́ọ̀ Sẹ̀lẹ̀nù Ténì Zelí á sẹẹa buù gbáá, à gbóó kọ́ nè dénè gbòa kọọ̀: ‘Èé sẹlẹ Sẹ̀lẹ̀nù Téní Zelí nè Jìhóvà.’ Jòsáíà beè gbóó kpoogè dee ló gã́bug nú ea é váámá gyọ́ọ, vaá a beè noo nagé gbò e bà é ọ́lí sọ́l gbẹá tọọ̀ káiá. Tṍó e ba ni sẹlẹ Sẹ̀lẹ̀nù Téní Zelíá lọ̀l, ba beè gbóó sẹlẹ Sẹ̀lẹ̀nù Fétúlú E Nú Ea Ólò Gbuuve Nu Á Gé Gbàà, vaá sẹ̀lẹ̀nùí beè sẹẹa mm̀ àlàbà dee. Íb nakà Sẹ̀lènù Ténì Zelíí gáà beè sẹ̀ẹ̀à lọl tã́gíní tṍó e Sámuẹ̀l beè dì. Jòsáíà beè palàge vùlè Log Bàrì. É kọ à ólò leemá ni gè nó nú ea kil ló Jìhóvà?