18 NU GÈ NÒ

O Lòbèl Á Ié Nu Ea Nóòmà Gbò E Bà Gé Pãane Tṍ

1 Kọ́rìnt 9:19-23

GE KỌ́ MM̀ ŃKPULU BÁ: Naa kọọ̀ gbò e bà gé pãanẽ́ ni tṍ ló á bugi togó boo bel eo gé ló naa ní ea é nóòmà va ãa nu.

Bugi togó boo nú e gbò e bà gé pãané ni tṍ ló zẹ́ẹ́ nyimá. Tãa vó eo dõogẽ òòa boo áá bel e ba beè dã̀, nvèè bá nè va kọ bàá ié ãa nú e bàé síi bá ló lọl mm̀ o bel.

Gbalá tṍó eo gé ló bel boo nú e bà nyímá, vaá ó gá gbalá tṍó eo gé ló bel boo gbò nú ea dú ãa.
Gbĩ́tẽ́ ló nu vaá ò bugi togó. Tṍó eo monì kọ à bọ́ló, kọ́ sìgà gbò bel àbèè nú ea ã́àa naaá e bà náa bọọgẹ̀ nyimá nú ea kuu mm̀ ge bààmà tẽ́ kà ea di mm̀ o bel. Palàge bugi togó boo o lòbèl nè bé ea gbááá ló nu dòòmà bá eo gbĩ́ì ge tú siimá tóm naa.

Boo tṍó eo gé nó tení boo o lòbèl, nó gè bugi togó leevè tení dú gè bĩinà o bá sìgà bíb ea dì belí ‘Ló éé, boo béè éé, mó tṍóé, gbẹá ãàe, mée ẽ́, nè mósĩ́ deè e.’ Naa kọọ̀ kà á di mm̀ o nòòmà nù tení dú ló gè bĩiná nè ge aalá sìgà bíb ea dì belí vóá mm̀ o lòbèl.
Naa kọ bàá mòn bé eo lòbèl gé láá dọ̀ bélè nè va naa. Baatẽ́ bé e gbò dọ̀ Kpá Káí eo bugì é láá nvèè bá nè gbò e bà gé pãane tṍ buù deé mm̀ ba dùm naa. Ló sọ́l boo sìgà gbò dìtõ̀ò, láb, nè sìgà nu ea tọ́á ló gbò e bà gé pãane tṍ.