Mósĩ́ Deè Ní E Nònù Gbò Neǹ Ditõ̀ò Jìhóvà É Láá Nvèè Bá Nè Ni Ẽ́?

É kọọ̀ à íe deé eo beè sí nònù Gbò Neǹ Ditõ̀ò Jìhóvà? Be ò gáà sì, be à sẹlẹ lóó ni naa é tááá ló gè sí túá dee. Òó láá bugi togó kọọ̀: ‘Éé ní ea ólò naaá gbẹá gbò nònùí ẽ́? Éé ní ea náa vaá à dú bíi gè sí gbò nònùí ẽ́? Éé ní ea náa vaá à bọ́ló kọ ḿ sìe?’ Mm̀ nakà nu gè nòí, òó mon bé e gè zọ̀ dõòna gbò bõoná é náa kọ ó kpáá tõo bã ló Bàrì naa nè bélè eo é íe lọl ló.

1. Éé ní ea náa vaá Gbò Neǹ Ditõ̀ò Jìhóvà ólò bõoná ẽ́?

Nvèè kpíí ló nú e enè nen ea beè emí Kpá Káí kọ́ ea náa vaá gè zọ̀ dõòna gbò bõoná à palàge dú bíi: “Nda é leelà Jìhóvà gbẹá mm̀ a pọ̀bkà bõ̀ònatõ̀ò.” (Psalm 26:12) Mm̀ tẽ̀ènè sĩ́deèá, nyíè Gbò Neǹ Ditõ̀ò Jìhóvà ólò palàge ẹẹ gè bõoná. Beeá ló bàlà booí, bà ólò bõoná bàà tóm buù sè ló gè lèèlà Bàrì, ọlí sọ́l, nè ge tã̀àgã ló Bàrì. Buù gbáá, bà ólò íe gbò pọ̀bkà bõ̀ònaló ló gè nè fã̀ Bàrì.

2. Éé ní eo é nó gbẹá bẹẹ nònù ẽ?

Gbò nú e nóò gbẹá bẹẹ gbò nònù ólò aa mm̀ Kpá Káí, vaá è ólò “palàge baatẽ́ vaá nvèè kà m.” (Bugi Nìhèmáíà 8:8.) Be ò sí bẹẹ gbò nònù, òó nó nú ea kil ló Jìhóvà nè gbò a lé kpãa. Bé eo gé nó nu ea kil ló bé ea vulè ni naa, níà bé eo é kpáá tõo bã̀é ló naa ẽ́. Òó nyímá nágé bé ea é láá nvèè bá nè ni kọ ó ié dĩ̀ìnè ló naa.—Àìzáíà 48:17, 18.

3. Mósĩ́ deè ní e gbò eo zọọ̀ naaá nu gbẹá bẹẹ gbò nònù é láá nvèè bá nè ni ẽ́?

Jìhóvà síèi kpóó ló kọ é bùlà “nú ea kil ló ene kọbé à síèi kpóó ló kọ é vùlè ene vaá sí lé tóm, naa ní e née é ooà aa ló gè olòó bõoná.” (Híbrù 10:24, 25) Gbẹá bẹẹ gbò nònù, òó mon gbò e bà vulè ene vaá ié lèèmá mm̀ ge nó nú ea kil ló Bàrì belí olo. Òó dã́ tṍó e bà gé ló gbò bel ea di mm̀ Kpá Káí ea é síè kpóó ló nen. (Bugi Róm̀ 1:11, 12.) Òó zọ nàgé gbò e baa ni ílí àbèè ge iá nè gbò e bà gáà naa vó e nyíé va gé ẹ́ẹ loá bel, náa kal ló béè kọọ̀ bà gé téní bá gã́bug tã̀àgã̀. Níì sìgà gbò nú ea náa vaá Jìhóvà à gbĩ́ kọ é bõoná lee é!

KPÁÁ NÓ BỌ̀Ọ̀VẸ̀

4. Nònù Gbò Neǹ Ditõ̀ò Jìhóvà

Gbò e bà géè nyoone nvéè Kráìst mm̀ túá gbò gbááá beè olòó bõoná boo béè ge nè fã̀ Jìhóvà. (Róm̀ 16:3-5) Bugi Kọ́lọsì 3:16, vaá ò gbóó aalai nakà bíbví:

• Mósĩ́ deè ní e gbò nyòòne nvéè Kráìst mm̀ túá gbò gbááá beè olòó fã̀ Jìhóvà ẹ?

VÍDIÒ: Éé Ní Ea Ólò Naaá Kíndòm Họ́ọ̀l Ẹ? (2:13)

• Mókà bèla ní eo monì kọ à di zẹ̀ẹ̀ nú ea ólò naaá gbẹá Kíndòm Họ́ọ̀l nè nú eo bugì mm̀ kpá Kọ́lọsì 3:16 é?

• É kọ à íe dõòna kà nú ea léémá ni ea kil ló bẹẹ nònù eo beè nvèè kpíí ló mm̀ vídiòá àbèè mm̀ fùtóá?

Bugi 2 Kọ́rìnt 9:7, vaá ò gbóó aalai nakà bíbví:

• Éé ní ea náa vaá Gbò Neǹ Ditõ̀ò Jìhóvà náa ólò tú kpègè ló ba nònù ẽ?

Zọ̀ nen ea ólò zọ̀ ni noá Kpá Káí loá sọ́l boo nú e bàé nó gbẹá bẹẹ nònù sè àla.

• Mókà gá ea di ló nònù sè àla ní ea palàge leemá ni àbèè kọọ̀ ò bulà kọ àé dọ bélè nè ni ẽ́?

O beè nyimá gé?

Boo jw.org, òó láá nyimá tṍó nè kiẽ́e e bàé tõo sẹlẹ nònù beeá ló bàlà booí.

1. Bà ólò nè lòbèl, zogè nu gè naa, vaá bìlà vídiò gbẹá bẹẹ gbò nònù. Bà ólò tú sọ́l nè tã̀àgã ló Bàrì dààmà togó vaá nvèèmà kùbmà ló bẹẹ gbò nònù

2. Sìgà kpò ea di ló bẹẹ gbò nònù ólò nè deè gbò nen kọ bàá láá aalá bíb

3. Kọ̀láá kà pá tọ, gbò e bà gáà ili àbèè ge iá, gbò e bà ni dú kànen mm̀ dee nè gbò pá nvín é láá sì

4. Née ólò tú kpègè ló bẹẹ gbò nònù. Gbò Neǹ Ditõ̀ò Jìhóvà náa ólò kọọ̀ gbò nen á kpẽ́ kpègè besĩ́ bà kálá bã ba Kíndòm Họ́ọ̀l àbèè ge kọ́ nè gbò nen kọ bàá tẹlẹ̀ kpègè

5. Òó íe bíi ló sìà kpóó ló kọbé ò láá sí bẹẹ gbò nònù

Bugi togó boo nu dòòmà bá pá tọọ̀ bà Jíízọ̀s. Kọbé bà láá sí kẽè sẹ̀lẹ̀nù ea ólò sẹ̀ẹ̀a enè tóm buù gbáá, ba beè íe bíi ló gè kyã̀à 60 mile tení boo gù aa Názàrẹ̀t kil Jèrúsalẹ̀m. Bugi Lúùk 2:39-42, vaá ò gbóó aalai gbò bíbví:

• É kọ ò bulà kọọ̀ ba beè íe bíi ló sìà kpóó ló kọbé bà láá kyã̀à kil Jèrúsalẹ̀m?

• Éé ní ea náa vaá àé dú bíi kọ ó siá kpóó ló kọbé ò láá sí bẹẹ gbò nònù ẽ?

• É kọ ò bulà kọọ̀ à dú lé gè pììga boo gè sí bẹẹ gbò nònù? Ló éé?

• Éé ní ea náa vaá à bọ́ló kọ é olòó sí nònù ẽ?

NÚ E NI NÓ

Ge olòó sí nònù é nveè bá nè ni kọ ó kpáá nó gã́bug nú ea kil ló Jìhóvà, agẹlẹ ló o gbaa ló kilmàé ló, vaá naa kọ ó láá zọ̀ dõòna gbò fã̀e.

Ge Òòa Boo

• Éé ní ea náa vaá Jìhóvà à sièi kpóó ló kọ é olòó bõoná ẽ́?

• Éé ní eo é nó gbẹá nònù Gbò Neǹ Ditõ̀ò Jìhóvà ẹ?

• É kọ ò bulà kọọ̀ gbò nònùí é láá nvèè bá nè ní mm̀ dõòna sĩ́deè?

KPÁÁ GBĨ́ TẼ́ LÓ

Éé ní eo é náa beè pọ̀ síí ni ló gè sí bẹẹ nònù ẽ? Nó nú ea kil ló bé e ene kà gbálà e pọ̀ beè zẹ́ẹ́ olòó siíe ni dé kpéè ló gè sí bẹẹ gbò nònù kátogóí naa.

Ba Kànà Mòn Kól Náa É Tá Nyíè Beele (4:16)

Nyimá bé e ene kà nvín ãa gbálà beè dé kpéè ló bẹẹ gbò nònù naa, nè nú ea beè naa kọbé à láá olòó sì.

Nònù Beè Palàge Leemám! (4:33)

Nyimá bé e gè olòó sí nònù tọ́á ló gbò nen naa.

“Why Attend Meetings at the Kingdom Hall?” (Web article)

Nyimá bé e dùm enè nen ea beè olòó di gbàà gbò gbóò togó beè nyaaá naa tṍó ea sí nònù Gbò Neǹ Ditõ̀ò Jìhóvà.

“I Never Went Anywhere Without My Gun” (Kpá Tọ Kùdẽe Ló, July 1, 2014)