25 NU GÈ NÒ
Éé Ní Ea Dú Tóm̀ Bùlà Bàrì Kìlmàí Ló É?
Kpá Káí nveè kpíí ló kọọ̀ gbò nen ólò “tõó dùm mm̀ pọ́ì ńkem̀ tṍó vaá ié gã́bug tã̀àgã̀.” (Jóòb 14:1) É kọ níà bé e Bàrì gbĩ́ kọọ̀ bẹẹ dùm á dì naa ẽ́? Be á gé naa vó, éé ní ea dú bùlà Bàrì kìlmàí ló é? É kọ àé beè naaá gé? Bugi togó boo gbò ààla ea é nveè nyíé gbàà nen e Kpá Káí ne.
1. Jìhóvà gbĩ́ kọ é ié mó íb dùm ẽ?
Jìhóvà gbĩ́ kọọ̀ dùm á palàge leeí ló. Tṍó ea beè dèm Ádàm nè Íìv, a beè tú va sẹlẹ́ mm̀ gònò Ídèn, ea beè dú páladaìs. Tṍóá “Bàrì beè tãanè va dee bá, vaá Bàrì à gbóó kọ́ nèva kọọ̀: ‘Manai vaá ò bọọlíí gã́bug, mm-maí boo kunukẽ̀í vaá ò lẹẹlai bel ló.’” (Jénesìs 1:28) Jìhóvà beè gbĩ́ kọọ̀ bàá ié gbò pá nvín, naa kọ zivèkà boo kunukẽ̀í á dú páladaìs, vaá ẹ̀b nú ea kil ló gbò nom. A tóm̀ bùlà beè dú gè naa kọọ̀ dénè nen á ié válá ló vaá tõó dùm dọ̀ọ̀mà dè-dè.
Náa kal ló béè kọọ̀ náa nááá naa vó,a tóm̀ bùlà Bàrì gáà nyaaa. (Àìzáíà 46:10, 11) À kpáá gbĩ́ kọọ̀ gbò e bà gbanìè tṍ ló á tõó dùm dọ̀ọ̀mà dè-dè mm̀ kà lé dìtõ̀ò.—Bugi Kùùà Nù 21:3, 4.
2. Mósĩ́ deè ní eé láá dé kpéè ló dùm kátogóí é?
Jìhóvà beè dèmii mm̀ sĩ́deè eé ié bíi ló tùlè ea aàẹ́ bá, níà nú ea náa vaá è ié tàn ge nyimáe ló vaá fã̀e ẽ́. (Bugi Máátìù 5:3-6.) À gbĩ́ kọọ̀ é duè a díì díílá kóò vaá ‘kyãa boo dénè a èèlè, vulèèe,’ vaá tú “dénè [bẹẹ] nyíe” siimàè tóm neèe. (Dìtolónomì 10:12; Psalm 25:14) Tṍó e náà vó, èé láá palàge ié ẹ́ẹ́ nyíe kọbèè è gé téní bá tã̀àgã̀. Ge fã̀ Jìhóvà é náa kọ é tõó dùm ea é dọ bélè nèi boo béè kọọ̀ è gé náa gbò nú ea léémáe.
KPÁÁ NÓ BỌ̀Ọ̀VẸ̀
Nyimá bé e Jìhóvà palàge vùlèi naa tṍó ea géè dèm boo kunukẽ̀í kọbé è tõó boo, nè nú e Kpá Káí nóòmài ea kil ló tóm̀ bùlà ea di nvéè dùm.
3. Jìhóvà gbĩ́ kọọ̀ gbò nen á tõó mm̀ kà lé dìtõ̀ò
Bìlà VÍDIÒÍ, vaá ò gbóó aalai bíb ea nyoone.
Éé ní ea náa vaá Bàrì à dèm boo kunukẽ̀í ẽ́?
Bugi Ẹ̀klìzíástìs 3:11, vaá ò gbóó aalai nakà bíbví:
Éé ní e dọ̀ Kpá Káíí nóòmà ni kilma ló Jìhóvà ẹ?
4. Bùlà Jìhóvà gáà nyaaa
Bugi Psalm 37:11, 29 nè Àìzáíà 55:11, vaá ò gbóó aalai nakà bíbví:
Éé ní ea náa vaá è nyimá kọọ̀ tóm̀ bùlà Bàrì kìlmàí ló gáà nyaaa ẽ́?
Bàé láá kpáá sí tóm ló tọ e dénè nu ni kyọà tá ló. Mm̀ tẽ̀ènè sĩ́deèá, Bàrì é kpáá sí tóm ló boo kunukẽ̀ e gbò nen ni kyọí nè gbò e bà vulèe
5. Ge fã̀ Jìhóvà náa kọọ̀ bẹẹ dùm á dọ̀ bélè
Ge nyimá bùlà ea di nvéè dùm é láá naa kọọ̀ nyíéi á ẹẹ. Bìlà VÍDIÒÍ, vaá ò gbóó aalai bíb ea nyoone.
Mósĩ́ deè ní e Terumi beè ié bélè lọl ló gè nyimá tóm̀ bùlà ea di nvéè dùm ẽ?
Bugi Ẹ̀klìzíástìs 12:13, vaá ò gbóó aalai nakà bíbví:
Éé ní ea bọ́ló kọ beele é naa nè Jìhóvà ló dénè nú ea ni náa nèi ẽ́?
NEN É LÁÁ BĨINÁ KỌỌ̀: “Éé ní ea dú tóm̀ bùlà ea di nvéè dùm ẽ?”
Òó láá aalá naa vàẹ?
NÚ E NI NÓ
Jìhóvà gbĩ́ kọọ̀ é dé kpéè ló dùm dọ̀ọ̀mà dè-dè mm̀ lé dìtõ̀ò gbẹá boo kunukẽ̀í. Tṍó e fãà Jìhóvà lọa mm̀ dénè bẹẹ nyíe, bẹẹ dùm ólò dọ̀ bélè nèi—kọbèè kátogóí.
Ge Òòa Boo
Éé ní ea beè dú bùlà Jìhóvà kilma ló Ádàm nè Íìv lọl dààà togó é?
À náàà vaá è nyimá kọọ̀ bùlà Bàrì kilma ló gbò nen gáà nyaaa ẽ́?
Éé ní eo é láá naa kọbé o dùm dọ bélè nè ni ẽ́?
KPÁÁ GBĨ́ TẼ́ LÓ
Nyimá nú ea náa vaá èé láá àgala boo kọọ̀ gònò Ídèn beè dì.
“The Garden of Eden —Myth or Fact?” (Kpá Tọ Kùdẽe Ló, January 1, 2011)
Nyimá nú ea náa vaá èé láá àgala boo kọọ̀ boo kunukẽ̀í é di dọ̀ dè-dè.
Bugi togó boo nú e Kpá Káí kọ́ kilma ló gè láá tõó dùm ea é dọ bélè nè ni.
Nyimá bé e ene kà gbálà ea beè tõoé ló belí kọọ̀ à íèè dénè nú mm̀ dùm beè nyimá kọọ̀ à íe nú ea gáà ièè naa.
a Mm̀ nu gè nò ea bẽene níí, òé nó nú ea náa vaá á gé naa vó deè nieí.