Móbá Ní Ea Bọ́ló Kọọ̀ Gbò Níí Kráìst Á Ẹ̀bmà Míí Ea É Láá Tení Dẽè Nen Ẽ́?

Beeá ló bàlà booí, gbò nen íe kele-kele bùlà ea kil ló míí ea é láá tení dẽè nen. Sìgà nen ólò láá zọ̀ pá kóò ṍ míí gbẹá kẽè sẹ̀lẹ̀nù. Sìgà gbò bééláfùl kọọ̀ bà náa gé ṍè míí. Boo tṍó e sìgà gbò ólò ṍ tẽeá dẽe. Kpá Káí ẹb gè ṍ míí ea é láá tení dẽè nen naa vàẹ?

1. É kọọ̀ à dú pọ́lọ́ gè ṍ míí ea é láá tení dẽè nen?

Kpá Káí náa kọ́ọ̀ à dú pọ́lọ́ gè ṍ míí ea é láá tení dẽè nen. Gbàà gã́bug lé nu e Bàrì néi, Kpá Káí kọ́ọ̀ à néi “míí kọbé nyíè nen ẹ́ẹ.” (Psalm 104:14, 15) Kpá Káí kol béè sìgà gbò gbálà nè gbò bia e ba beè bọ́ló dẹ̀lẹ̀ nyíé boo e ba beè ṍ míí ea é láá tení dẽè nen.—1 Tímotì 5:23.

2. Mókà dùùlà bá deè tṍ ní e Kpá Káí ne gbò e bà bééláfùl gè ṍ míí ẽ́?

Ge ṍ gbele tõ̀ò míí nè ge ṍ míí tẽeá dẽe dú pọ́lọ́ kèsĩ́ Jìhóvà. (Gàlésìà 5:21) Kpá Káí kọ́ọ̀: “Ó gá di zẹ̀ẹ̀ gbò e bà ólò ṍ gbele tõ̀ò míí.” (Próvẹẹ̀b 23:20) Vóà naa, be è bééláfùl ge ṍ míí ea é láá tení dẽè nen—kọbèè kiẽ́e e áá bẹ̀ì dì—náa bọ́ló kọ é ṍ ní ea é náa kọ é gá láá bugi togó leevè, lẹ̀ẹ̀là bel ló bel e lóò nè bẹẹ láb, àbèè ge ṍ ní ea é náa kọọ̀ kpá lói á zọ̀. Be è nyímá kọọ̀ née é láá lẹ̀ẹ̀là bel ló gã́bug míí eé ṍ kọbé náa ténií dẽe, àé bọ́ló kọ é òòà aa ló gè õ̀.

3. Mósĩ́ deè ní eé láá zogè kọ è fãà dẽè béèlàfùl dõònà gbò ea kil ló gè ṍ míí ea é láá tení dẽè nen ẽ́?

Buù nen é ne béèlàfùl ea kil ló gè ṍ gbò míí ea é láá tení dẽè nen. Náa bọ́ló kọ é beelá bel ló nen ea bééláfùl ge ṍ pọ́ì ńkem̀ míí ea é láá tení dẽè nen, vaá náa bọ́ló kọ é tãgĩ bá nen e náa gbĩ́ gè õ̀ kọ á õ̀. (Róm̀ 14:10) Èé láá beeláfùl kọ née gé ṍ be è mon kọ àé tãagẽ dõòna gbò. (Bugi Róm̀ 14:21.) Née ólò “naa áá [beélè] lee ló, sõò [è ólò] naa nú ea é léé nágé ló dõòna nen.”—Bugi 1 Kọ́rìnt 10:23, 24.

KPÁÁ NÓ BỌ̀Ọ̀VẸ̀

4. Beeláfùl be òé ṍ

Jíízọ̀s beè ẹ̀b ge ṍ míí ea é láá tení dẽè nen naa vàẹ? Ge nyimá a ààla, zẹ́ẹ́ bugi togó boo túá kà tóm dũ̀ùnè ea beè sì. Bugi Jọ́ọ̀n 2:1-11, vaá ò gbóó aalai gbò bíbví:

• Lọl ló nakà tóm dũ̀ùnèí, éé ní eé láá nó lọl ló bé e Jíízọ̀s ẹb gè ṍ míí ea é láá tení dẽè nen nè gbò e bà ṍ naa ẽ́?

• Tã́gíní bé e Jíízọ̀s náa beè ẹ̀b kọọ̀ ge ṍ míí ea é láá tení dẽè nen dú pọ́lọ́á, móbá ní ea bọ́ló kọọ̀ gbò níí Kráìst á ẹ̀bmà nen ea bééláfùl ge õ̀ ẽ?

Náa kal ló béè kọọ̀ nen ea gé nyoone nvéè Kráìst íe dì pọ́ì ge ṍ míí ea é láá tení dẽè nen, náa bọ́ló kọ á dú a lóó nu. Bugi Próvẹẹ̀b 22:3, vaá ò gbóó bugi togó boo bé e gbò dìtõ̀òí é láá tọá ló o béèlàfùl ge ṍ míí naa:

• Tṍó eo é gé ọ́ví faà àbèè ge tú ńzì siimá tóm.

• Tṍó eo níìnà gbàà.

• Tṍó e neǹ dóm biè beè kọ ó gá ṍ míí ea é láá tení dẽè nen.

• Tṍó eo íè tã̀àgã̀ ea kil ló gè láá lẹ̀ẹ̀là bel ló gã́bug míí eo é ṍ.

• Tṍó e log náa ténmá kọ ó ṍ míí ea é láá tení dẽè nen.

• Tṍó eo di kpàn nen ea beè beeláfùl kọ náa é ṍè boo béè kọ a beè tàvàlàẹ́ ló gè láá lẹ̀ẹ̀là bel ló bé ea ṍ naa tṍó ea kil nvéeá.

É kọọ̀ àé bọ́ló kọ ó tenmà míí ea é láá tení dẽè nen gbẹá kẽè sẹ̀lẹ̀nù ílà dóm nè va àbèè gbẹá kẽè dõòna kà gbò sẹ̀lẹ̀nù? Kọbé ò nyímá nú ea é láá nvèè bá nè ni kọ ó nè lé béèlàfùl, bìlà VÍDIÒÍ.

VÍDIÒ: É Kọ Àé Bọ́ló Kọ Ḿ Tenmà Míí Ea É Láá Tení Dẽè Nen? (2:41)

Bugi Róm̀ 13:13 nè 1 Kọ́rìnt 10:31, 32. Tṍó eo ni bugi buù kà dọ̀ Kpá Káíí lọ̀l, ò gbóó aalai nakà bíbví:

• Mósĩ́ deè ní e gè tú nòòkúu ea di mm̀ dọ̀ Kpá Káíí siimá tóm é nveè bá nè ni kọ ó nè béèlàfùl ea é léémá Jìhóvà ẹ?

5. Beeláfùl boo gã́bug míí eo é ṍ

Be ò béèlàfùl ge ṍ míí ea é láá tení dẽè nen, kẽ̀èa boo kọọ̀: Náa kal ló béè kọọ̀ Jìhóvà náa kọ́ọ̀ à dú pọ́lọ́ gè ṍ míí ea é láá tení dẽè nen, ge ṍ gbele tõ̀ò bẽ́émáe. Ló éé? Bugi Hòsíà 4:11, 18, vaá ò gbóó aalai nakà bíbví:

• Éé ní ea é láá naaá beè nen ṍ gbele tõ̀ò míí ẽ́?

Mósĩ́ deè ní eé láá òòà aa ló gè ṍ gbele tõ̀ò míí ẽ́? Àé dú bíi kọ é naa nú mm̀ kuna-kuna bá, àbèè ge nyimá bẹẹ gbò ketõ̀ò ọ́ọ́-ọọ̀. Bugi Próvẹẹ̀b 11:2, vaá ò gbóó aalai nakà bíbví:

• Éé ní ea náa vaá à dú nú e nyìmànù di m gè nyimá gã́bug míí eo é ṍ ẽ́?

6. Éé ní ea é láá nvèè bá nè nen kọ á òòà aa ló gè ṍ gbele tõ̀ò míí ẽ́?

VÍDIÒ: ‘Nà Sĩ́deè Tõo Dùm A Ḿmá M’ (6:32)

• Mm̀ vídiòá, Dmitry beè labví láb naa vàẹ tṍó ea ṍ gbele tõ̀ò míí ẽ́?

• É kọọ̀ a beè valíé ló ge òòà aa ló?

• A beè naa và láá òòà aa ló dùm ge ṍ gbele tõ̀ò míí ẽ́?

Bugi 1 Kọ́rìnt 6:10, 11, vaá ò gbóó aalai gbò bíbví:

• Bàrì ẹb gè ṍ míí tẽeá dẽe naa vàẹ?

• Éé ní ea zógè kọọ̀ nen ea ólò ṍ míí tẽeá dẽe é láá nyaaá ẽ́?

Bugi Máátìù 5:30, vaá ò gbóó aalai nakà bíbví:

• Bel dòòle Jíízọ̀s ea kil ló gè fùl bá lọa ló, tõó dọ̀ kọọ̀ àé dú bíi kọ é sọ̀bá sìgà nu kọbé è láá naa nú ea é léémá Jìhóvà. Éé ní eo é láá naa be ò gé piìga boo gè òòà aa ló gè ṍ gbele tõ̀ò míí ẽ́?a

Bugi 1 Kọ́rìnt 15:33, vaá ò gbóó aalai nakà bíbví:

• Éé ní e gbò eo bãaà kóò é láá naa ló gã́bug míí eo ṍò ẽ?

NÚ E NI NÓ

Jìhóvà ní ea beè naa míí ea é láá tení dẽè nen kọbé è dé kpéè ló é, sõò náa gbĩ́ kọ é ṍ zelmá kẽ àbèè ge ṍ tẽeá dẽe.

Ge Òòa Boo

• Éé ní e Kpá Káí kọ́ kilma gè ṍ míí ea é láá tení dẽè nen ẽ́?

• Mókà gbò gẹẹ-gẹẹ ló ní ea di ló gè ṍ gbele tõ̀ò míí ẽ́?

• Mósĩ́ deè ní eé láá zogè kọ è fãà dẽe béèlàfùl dõòna gbò ea kil ló gè ṍ míí ẽ́?

KPÁÁ GBĨ́ TẼ́ LÓ

Mósĩ́ deè ní e gbò nvín ãa é láá nè lé béèlàfùl ea kil ló gè ṍ míí ea é láá tení dẽè nen ẽ́?

Bugi Togó Boo Nú E Míí Ólò Láá Naa Besĩ́ Ò Kálá Õ̀ (2:31)

Nyimá gbò nú eo é láá naa kọbé ò láá òòà aa ló gè ṍ gbele tõ̀ò míí.

“Keeping Alcohol in Its Place” (Kpá Tọ Kùdẽe Ló, January 1, 2010)

É kọ à bọ́ló kọọ̀ nen ea gé nyoone nvéè Kráìst á zọ̀ nen tú gbag míí sá ló ene besĩ́ à kálá õ̀?

“Questions From Readers” (Kpá Tọ Kùdẽe Ló, February 15, 2007)

Mm̀ nòòtẽ́ ea kọ́ọ̀ “I Was a Bottomless Barrel,” ẹ̀b bé e ene kà gbálà beè láá òòà aa ló gè ṍ gbele tõ̀ò míí naa.

“The Bible Changes Lives” (Kpá Tọ Kùdẽe Ló, May 1, 2012)