GE DẸLẸ NYÍÉ BOO BÀRÌ Dú Kpãa Ea É Agẹ́lẹ́i Ló

GE DẸLẸ nyíé boo Bàrì ólò palàge nèi kpóó. Dì belí nu dòòmà bá, náa kal ló béè kọọ̀ Sétàn ólò gbĩ́ gè kyọ̀gàlà bẹẹ gbaa ló kilma ló Jìhóvà, ge dẹlẹ nyíé boo Bàrì é láá dú nu eé gíímá “sã́ ló díìla e Pọ́lọ́ Nená é tã́.” (Ẹ́fẹ. 6:16) Be è dẹlẹ nyíé boo Bàrì, èé láá emá gbò tã̀àgã̀ ea élaí sĩ́ vaá bọọ́ gãboo belí gù. Jíízọ̀s beè kọ́ nè pá a gbò nyòòne nvée kọọ̀: “Kà bè bọọ gè dẹlẹ́m̄ nyíe boo tõ̀ò ene kà ńdígílí súú té, mè ò é láá kọi nei gùa ela kọ, ‘Kyã̀à aa dọ̀,’ vaá à kyãà.” (Máát. 17:20) Tã́gíní bé e nyímà kọọ̀ ge dẹlẹ nyíé boo Bàrì é síè kpóó ló bẹẹ gè fã̀ Bàrìa, à bọ́ló kọ é bugi togó boo gbò bíb ea kọ́ọ̀: Éé ní e gè dẹlẹ nyíé boo Bàrì kọlà ẹ? Mósĩ́ deè ní e bé e bẹẹ nyíe dì naa ólò tọá ló bé e dẹlẹ̀ nyíé boo Bàrì naa ẽ́? Mósĩ́ deè ní eé láá siè kpóó ló bẹẹ gè dẹlẹ nyíé boo Bàrì ẹ? Vaá mée ní eé íè ge dẹlẹ nyíé boo é?—Róm̀. 4:3.

ÉÉ NÍ E GÈ DẸLẸ NYÍÉ BOO BÀRÌ KỌLÀ Ẹ?

Ge dẹlẹ nyíé boo Bàrì bọọ èlmà áá gè ziga ló gbò nú e Kpá Káí kọ́, boo béè kọọ̀ bã̀àna “zọ zigànà gé naa vó [kọ Bàrì dì]—vaá ié kéné ló pọ̀.” (Jém̀z 2:19) Vó à naa, éé ní e ge dẹlẹ nyíé boo Bàrì kọlà ẹ?

Kpá Káí baatẽ́ bàà kà nú e gè dẹlẹ nyíé boo Bàrì kọlà. Túá kà, “gè dẹ̀lẹ̀ nyíe boo Bàrì kọlà ge agala boo nu e e bólì dẽe sĩ́.” (Híb. 11:1a) Be ò dẹlẹ nyíé boo Bàrì, òé palàge àgala boo kọọ̀ dénè nú e Jìhóvà kọ́ dú kà kà vaá àé nááá. Dì belí nu dòòmà bá, Jìhóvà beè kọ́ nè pá Ízràẹ̀l kọọ̀: “Be ò láá kyọgalai nà zíl ea kil ló ẹ́ẹ́ èlà nè bílá dee, naa ní e ẹ́ẹ́ èlà nè bílá dee náa é dú lèlà tṍó e bà ólò dù, áá vó ní ea é láá naa kọọ̀ ńdáà zil em beè zilá nè ńdáà gyóòlo Dévìd á gá naaáé.” (Jèr. 33:20, 21) É kọ à íe deé e pọ̀ ni síí ni kọọ̀ nàànì náa é baa nà àbèè ge dọ̀ nà, vaá naa kọọ̀ ẹ́ẹ́ èlà nè bílá dee á gá dì nà? Be nóo íè bàà-bàà bùlà boo gbò log ea di sĩ́ dee ea ólò naa kọọ̀ boo kunukẽ̀í á olòó kpọlá beeá ló nàànì, é kọọ̀ à bọ́ló kọ ó ié bàà-bàà bùlà kọọ̀ Nen ea beè nvèè gbò logí náa é láá mm-mè gbò a mòn bel? Náa bọ́ló kọ é naa vó!—Àìz. 55:10, 11; Máát. 5:18.

Ní ea égè bàà kà, ge dẹlẹ nyíé boo Bàrì dú gè “palà ge nyimá kọ kà kà e gbò nu e bè née monmà dẽeá dì.” À dú gè kọ́ kọọ̀ ge dẹlẹ nyíé boo Bàrì dú gè “palà ge nyimá,” àbèè “ge àgala boo” kọọ̀ gbò nú e dẽè nen náa é moà dì. (Híb. 11:1b.) Mósĩ́ deè e? Zẹ́ẹ́ ni túúmá kọọ̀ o nvín bĩ́íná ni kọọ̀, ‘Éé ní ea náa vaá ò nyimá kọọ̀ fọ́ọ́lọ́ dì e?’ Náa kál ló béè kọọ̀ ò gáà mòn fọ́ọ́lọ́ tọ́ọ̀ dee, àé léémá ni ge nvèè bá nè nvíná kọ á bugi togó boo gbò nú ea náa vaá è nyimá kọọ̀ fọ́ọ́lọ́ dì—ea dú sẹ̀ẹ̀gẹ̀ séi, gbò tóm e fọ́ọ́lọ́ ólò sì, nè gbò ńdõòna kà. Tṍó e gbò nuí ni kuuàẹ́ dẽe, àé gbóó zìgà kọọ̀ nú e náa monmà dẽeá dì. Mm̀ tẽ̀ènè sĩ́deèá, zìgà dẹẹ̀a boo kà àgẹ bá nu ea zógè kọọ̀ nu dú kà kà.—Róm̀ 1:20.

KOBÉ È LÁÁ DẸLẸ NYÍÉ BOO BÀRÌ, ÈÉ ÍÈ GE NVÈÈ KA LÓ KÀ KÀ BELÁ

Tã́gíní bé e gè dẹlẹ nyíé boo Bàrì dẹẹ̀a boo gè agala boo kọọ̀ nu dú kà kàa, nen íè ge zẹ́ẹ́ “nyima ló kà kà bel.” (1 Tím. 2:4) Sõò áá níá náa gbõomá. Neǹ tóm Pọ́ọ̀l beè emí kọọ̀: “Bàrì léèvè bel nen tṍó e nen dẹlẹ́e nyíe boo.” (Róm̀ 10:10) Nen é íè ge nvèè ka ló kà kà bel, níì áá gè ziga ló nì. Tṍó ea náa vó ní ea zógè kọ à dẹlẹ nyíé boo Bàrì e, ea dú gè tõó dùm mm̀ sĩ́deè ea léémá Bàrì. (Jém̀z 2:20) Nen e náa aa deè zààva ló kà kà belí é láá àmà nàgé sàn nú ea zógè kọọ̀ Bàrì dì é be à gá náa vaá náa tú bug ea beè zẹ́ẹ́ iéá lọa m àbèè kọọ̀ à gbĩ́ gè naa nú ea léémá ẹlẹ. (2 Pít. 3:3, 4; Júùd 18) Níà nú ea náa vaá mm̀ tṍó Kpá Káíá, níì dénè nen ea beè mònmà dẽè tóm dũ̀ùnè ní ea beè dẹlẹ nyíé boo Bàrì e nì. (Nóm. 14:11; Jọ́ọ̀n 12:37) Nyómá káí Bàrì ólò naa kọọ̀ gbò e kà kà bel léémá á láá bọ́ló dẹ̀lẹ̀ nyíé boo.—Gàl. 5:22; 2 Tẹ̀s. 2:10, 11.

BÉ EA BEÈ NAA VAÁ DÉVÌD À LÁÁ PALÀGE DẸLẸ NYÍÉ BOO BÀRÌ

Méné Dévid di gbàà gbò e ba beè palàge dẹlẹ nyíé boo Bàrì. (Híb. 11:32, 33) Sõò níì dénè nen ea dṹùnà pá tọọ̀ Dévìd ní ea beè dẹlẹ nyíé boo Bàrì naa vó é nì. Dì belí nu dòòmà bá, à íe tṍó e Èláíàb, ea dú sã́á kà Dévìd, náa beè dẹlẹ nyíé boo Bàrì, tṍó ea kọ́ bel Dévìd kọ à bã súng ló gbò bel gbẹ́a e Gòlíàt géè lòa. (1 Sám. 17:26-28) Bà náa beè màn ge dẹlẹ nyíé boo Bàrì bií ló tọ́ọ̀ nen àbèè kọọ̀ à íe nen ea beè ié lọl bá a tẹ̀ àbèè a kà, vó à naa, lé gbaa ló e Dévìd beè ié kilma ló Jìhóvà ní ea beè naa kọ á láá dẹlẹ́ẹ nyíé boo é.

Mm̀ kpá Psalm 27, Dévìd kọ́ nú ea beè naa kọ á láá dẹlẹ̀ẹ̀ nyíé boo Bàrì. (1 gã́bel) Dévìd beè bugi togó boo gbò nú ea beè naaá ló ẹlẹ nè nú e Jìhóvà beè naa kilma ló pá a gbò ọ́b. (2 nè 3 gã́bel) A beè palàge nvèè ka ló tọọ̀ káí Jìhóvà. (4 gã́bel) Dévìd beè olòó zọ̀ dõòna gbò nè fã̀ Bàrì gbẹá mm̀ tọọ̀ káíá. (6 gã́bel) A beè tú àgẹbá gbĩimá Jìhóvà mm̀ tã̀àgã ló. (7 nè 8 gã́bel) Dévìd beè gbĩ nágé kọọ̀ Jìhóvà á noòmàèe nu. (11 gã́bel) Ge dẹlẹ nyíé boo Bàrì beè palàge bọọ́ ló Dévìd naa ní ea bĩ́íná kọọ̀: “Ãàe ní e nda gáẹ̀ beè dì be ním beè dẹlẹ nyíé boo Bàrì e?”—13 gã́bel.

BÉ EO É LÁÁ SIÈ KPÓÓ LÓ O GÈ DẸLẸ NYÍÉ BOO BÀRÌ NAA

Òé láá dẹlẹ nyíé boo Bàrì belí Dévìd be ò nó gè ié bug nè láb e kpá Psalm 27 togó baatẽ́á. Tã́gíní bé e gè dẹlẹ nyíé boo Bàrì dẹẹ̀a boo kà kà bel e nen ni nyímáá, bé eo kilsĩ́ gè nó Kpá Káí nè gbò kpá ea dẹẹ̀a boo Kpá Káí naa, níà bé ea é náa kọ á valí ní ló gè ié nakà gáí ea dṹùnà ból súú nyómá káíá naa ẽ́. (Ps. 1:2, 3) Tú gã́bug tṍó bùgmà togó boo nú eo nóò. Ge bugi togó boo nu ní ea ólò naa kọọ̀ nen á láá ié lèèma ló nu ẽ́. Tṍó eo palàge ié lèèma ló Jìhóvà, òé gbóó ié tàn ge dẹlẹ́ẹ nyíé boo tení dú ló gè olòó sĩ́ nònù nè ge kọ́ nú ea kil ló o ból dẽesĩ́ nè dõòna gbò. (Híb. 10:23-25) Nagé, è zógè kọ è dẹlẹ̀ẹ̀ nyíé boo Bàrì tṍó e kilsĩ́ gè ‘tã̀àgã ló Bàrì vaá née peè bùlà.’ (Lúùk 18:1-8) Vó à naa, “tãagãi ló Bàrì lee,” dẹlẹi nyíé boo kọọ̀ “à gé bulà nu e a kilií ló.” (1 Tẹ̀s. 5:17; 1 Pít. 5:7) Ge dẹlẹ nyíé boo Bàrì ólò naa kọ é labví láb, vaá níí ólò sièi kpóó ló.—Jém̀z 2:22.

DẸLẸI NYÍÉ BOO JÍÍZỌ̀S

Kà lèlà ló èlà deé ea úá, Jíízọ̀s beè kọ́ nè pá a gbò nyòòne nvée kọọ̀: “Dẹlẹi nyíe boo Bàrì vaá ò dẹlẹi nyíe boo nda.” (Jọ́ọ̀n 14:1) Vó à naa, à bọ́ló kọ é dẹlẹ nyíé boo Bàrì vaá è dẹlẹ nagé nyíe boo Jíízọ̀s. Mósĩ́ deè ní eé láá dẹlẹ nyíé boo Jíízọ̀s e? Naanii mè é ló sọ́l boo taà sĩ́deè.

Túá kà, ẹ̀b nu ààaá dì belí dõ̀ònù e Bàrì ne olo. Neǹ tóm Pọ́ọ̀l beè kọọ̀: “M̀ tú ge dẹlẹ nyíe boo Sã́áná Bàrì e a beè vùlèm̄ vaá úm̄ boo tõoma m na kà dùm e nda di m kátogóí.” (Gàl. 2:20) Be ò dẹlẹ nyíé boo Jíízọ̀s, òé agàla boo kọọ̀ a ú vààa gyọ́ọ é dọ bélè nè ni, à dú nu e Bàrì é téní ló ia ló o pọ́lọ́, à né ni ból dẽesĩ́ gè ié dùm e bè náa tá, vaá à dú kà agẹbá nú ea zógè kọọ̀ Bàrì vulè ni. (Róm̀ 8:32, 38, 39; Ẹ́fẹ. 1:7) Níí é náa kọọ̀ ó gá olòó bẽgẽ̀ bel o bá.—2 Tẹ̀s. 2:16, 17.

Ní ea égè bàà kà, tõo bã ló Jìhóvà mm̀ tã̀àgã ló boo béè ú vààa gyọ́ọ̀ Jíízọ̀s. Boo béè nu ààaá, èé láá dú ló Jìhóvà mm̀ tã̀àgã ló mm̀ “táàa ló . . . Bàrì é élá kĩé tói sàn vaá nèi a sàn nyíe e a é nveè bá nèi kà lèlà tṍó e bíi dìí ló.” (Híb. 4:15, 16; 10:19-22) Tã̀àgã ló Bàrì ólò siè kpóó ló bẹẹ béèlàfùl ge bé èlbá ẹ̀bmà ge sí pọ́lọ́.—Lúùk 22:40.

Ní ea égè taà kà, gbàntṍ ló Jíízọ̀s. Neǹ tóm Jọ́ọ̀n beè emí kọọ̀: “Kọ̀láá nen e a dẹlẹ nyíe boo Sã́áná Bàrì íe dùm e bè náa tá, sõò kọ̀láá nen e a lọl togò kè kẽ a Sã́ánáí náa é íe dùm; tãa vó, kpọ̀ té Bàrì dìé boo.” (Jọ́ọ̀n 3:36) Nvèè kpíí ló kọọ̀ Jọ́ọ̀n baatẽ́ kelé ea di zẹ̀ẹ̀ ge dẹlẹ nyíé boo Bàrì nè ge lọ̀lie togó kèbá. Vó à naa, òó láá dẹlẹ nyíé boo Jíízọ̀s tṍó eo gbanìe tṍ ló. Òó láá gbàntṍ ló Jíízọ̀s tení dú ló gè gbàn tṍ ló “log Kráìst,” ea dú gè naa dénè nú ea beè noòmà nè ge sẹlẹ a lẹ̀ẹ̀là. (Gàl. 6:2) Òó gban nàgé tṍ ló Jíízọ̀s tení dú ló gè tõó boo a tùle ea gé ne tenmá bá “nen tóm e a nyimá nu vaá bọ́ ló dẹ̀lẹ̀ nyíe boo.” (Máát. 24:45) Be ò gban tṍ ló Jíízọ̀s, òó íe kóì ge ĩ̀ìmà gbò àgẹ dìtõ̀ò ea bélí ìlìsẽ́.—Lúùk 6:47, 48.

“ELAI AGALAI BOO BỌỌ ZÌGÀ BEL E A PALÀ GE DI KÁÍ”

Ene kà gbálà beè tó nè Jíízọ̀s kọọ̀: “M̀ dẹlẹe nyíe boo. Nvèè bá nèm̄ kọ ḿ kpáá dẹlẹe nyíe boo bọ̀ọ̀vẹ̀!” (Máàk 9:24) À íé kiẽ́e ea beè dẹlẹ́ẹ nyíé boo imá, sõò gbálàí beè kilmà kpá ló kẽ vaá nyimá kọ à íèè bíi ló gè kpáá palàge dẹlẹ̀ẹ̀ẹ nyíé boo. Dì belí gbálàí, à íe dìtõ̀ò ea é náa kọọ̀ dénè bẹ̀ì é kpáá palàge dẹlẹ nyíé boo Bàrì. Vaá dénè bẹ̀ì gé láá siè kpóó ló bẹẹ gè dẹlẹ nyíé boo Bàrì kátogóí. Dì belí bé e beè mòn naaá, è ólò siè kpóó ló bẹẹ zìgà tṍó e nóò Kpá Káí vaá bugi togó boo, vaá níí ólò naa kọọ̀ ge sí tóm nè Jìhóvà á kpáá palàge leemái. Bẹẹ gè dẹlẹ nyíé boo Bàrì é palàge agaló tṍó e zọọ̀ pá vígà sí nònù, kọ́ nú ea kil ló bẹẹ ból dẽesĩ́, nè ge olòó tã̀àgã ló Bàrì. Bọọ èlmà tõ̀ò, tṍó e síè kpóó ló bẹẹ gè dẹlẹ nyíé boo Bàrì, èé íé kpẽ́ ea bọọ lọ̀l vaá à lee. Kpá Káí síèi kpóó ló kọọ̀: “Sõò boolo, pá vígà e m vulè, elai agalai boo bọọ zìgà bel e a palà ge di káí. . . . Tõonii m dùm e a é náa kọ vulà súú dẽe ló Bàrì á gbẹáí boo.”—Júùd 20, 21.