Tú “Log Sàn Nyíe” Siimá Tóm

LISA kọ́ọ̀: “sàn nyíe e pá vígà págbálà nè pábia íe beè palàge tọá ḿ ló.”a À géè kọ́ nú ea kil ló nú ea beè naa kọ á bãè mm̀ kà kàí. Níà íb nú ea beè naaá ló Anne ẽ, à kọ́ọ̀, “Sàn nyíe e bà íe ní ea beè naa kọ ḿ bã mm̀ kà kàí é, níì nú e bà nóòmà nì.” À ólò leemá pálaa kà vígà pábiaí gè bugi Kpá Káí vaá bugi togó boo, sõò sàn nyíe beè palàge tọá vá ló.

Mósĩ́ ní eé láá ié sàn nyíe mm̀ sĩ́deè ea é siè kpóó ló dõòna gbò e? Èé ló bel boo bàà sĩ́deè ea dú: bẹẹ dém nè láb. Tṍóá è gbóó ló bel boo nen ea bọ́ló kọ é ié sàn nyíe kilma ló.

“LOG SÀN NYÍE” DÌ NÍ BOO DÉM

“Log sàn nyíe” di boo dém lé va e bà baatẽ́ nú ea kilíé ló mm̀ kpá Próvẹẹ̀b 31 togóá. (Pró. 31:26) À sọtọ́ deè kọọ̀ ‘logá’ á lẹ̀ẹ̀là bel ló a lòbèl. À bọ́ nágé ló kọọ̀ logí á di boo dém gbò tẹ̀. Gã́bug gbò tẹ̀ nè kà nyímá kọọ̀ ge tú gboo-gboo ló loomá bel é láá tãagẽ ba nvín vaá naa kọọ̀ bàá gá pãane tṍ. Sõò àé válí ló bọọ gbò nvín gè pãane tṍ tṍó eo túì gbọ́ọ́-gbọọ̀ ló loomai bel.

Kọbèè ò íè gbò pá nvín àbèè nóo íè, mósĩ́ deè ní eo é láá nó gè tú gbọ́ọ́-gbọọ̀ ló loomá bel é? Nú ea é láá nvèè bá nèi di mm̀ túá báàsĩ́ ea di ló kpá Próvẹẹ̀b 31:26, ea kọ́ọ̀: “À ólò ló bel e nyìmànù di m.” À bãàa mm̀ ge tú nyìmànù sààmà mon eé lóómá bel. Èé láá bĩiná bẹẹ bá kọọ̀, ‘É kọọ̀ bel em é gé lòí é nveè súng nen, sẹ̀ àé kilmà súng kẽé?’ (Pró. 15:1) Mm̀ kà kà, à dú nu e nyìmànù di m gè bugi togó besĩ́ è kálá ló bel.

Kpá Próvẹẹ̀b kọ́ nágé kọọ̀: “Bel e nen ló e bè náa bugi togó boo bélí gẹ̀ ea ku nen.” (Pró. 12:18) Àé láá valíí ló gè lẹ̀ẹ̀là bel ló bel ea aàí gã́ tṍó e bugì togó boo bé ea é tọ́á ló dõòna gbò naa. Mm̀ kà kà, ge tú “log sàn nyíe” siimá tóm é nveè bá nèi kọ é gá ló pọ́lọ́ bel àbèè ge tú gboo-gboo ló loomá bel. (Ẹ́fẹ. 4:31, 32) Àé nveè nàgé bá nèi kọ é ié lé bug. Jìhóvà beè zogè kà lé nu dòòmà bá ea kil ló níí tṍó ea géè siè kpóó ló a gyóòlo Èláíjà. Nyómá tóm e Jìhóva beè lẹ̀ẹ̀làa beè ló bel mm̀ sĩ́deè ea dú “gbọ́ọ́-gbọọ̀ ló.” (1 Kíǹ. 19:12) Ge ié sàn nyíe bọọ èlmà áá gè tú gbọ́ọ́-gbọọ̀ ló loomá bel. Èé íè ge naa nagé gbò nú ea zógè kọ è íè sàn nyíe. Mósĩ́ deè e?

GE NAA NÚ EA ZÓGÈ KỌ È ÍÈ SÀN NYÍE ÓLÒ TỌÁ LÓ DÕÒNA GBÒ

È nóò Jìhóvà tṍó e lóò bel àbèè ge naa nú ea zógè kọ è íè sàn nyíe. (Ẹ́fẹ. 4:32; 5:1, 2) Lisa e beè kó nú ea kil lóá baatẽ́ bé e pá vígàa beè ié sàn nyíe naa. À kọ́ọ̀, “Tṍó e ba beè kpó pá beélè tọ lọl tọ, bàà kà dóm nè va beè bàn tṍó aa ló tóm deeá vaá zọ̀i làb nu. M̀ gáà beè dààmà togó gè nó Kpá Káí tṍóá!” Gbò lábvá beè naa kọọ̀ Lisa á nó nu ea kil ló kà kàí.

Nyíè Anne e beè kọ́ nú ea kil lóá beè ẹẹ nagé ló sàn nyíe e pá vígà beè iéé ló. À kọ́ọ̀: “A beè tàvàlàḿ ló gè dẹlẹ nyíé boo gbò nen boo béè bá e ba beè sẹ̀ẹ̀màm. Tṍó em zọọ̀ Gbò Neǹ Ditõ̀ò Jìhóvà nyòònà, ním beè dẹlẹ́ va nyíé boo. M beè bugi togó kọọ̀, ‘Éé ní ea náa vaá à tàn va gè bàḿ ló é?’ Sõò bé e nen ea ólò noòmàm Kpá Káí íe sàn nyíe naa beè naa kọ ḿ dẹlẹ́ẹ nyíé boo.” Éé ní ea beè sìlà aa m ẽ́? “Tṍó e tṍó téní, m beè gbóó tú ọ̀ẹ̀ dẽe bùgmà togó boo nú em gé nó.”

Nvèè kpíi ló kọọ̀ sàn nyíe e pá vígà íe ló Lisa nè Anne ní ea beè palàge tọá vá ló é, vaá a beè naa kọ á tàn va gè nó nu ea kil ló kà kàí. Sàn nyíe e pá vígà íe vá ló beè nvèè bá nèva kọ bàá dẹlẹ nyíé boo Jìhóvà nè pá a gbò.

NÓ BÀRÌ VAÁ Ò ÍE SÀN NYÍE LÓ DÕÒNA GBÒ

Àé láá valí ló sìgà gbò ge tú gbọ́ọ́-gbọọ̀ ló loomá bel nè ge kpeeve sĩ́ mang boo béè bé e pá ba bálásĩ́ ólò naa nu naa. À Palàge dú lé kọọ̀ sìgà gbò sọtọ́ deè kọọ̀ lé bá e pá ba bálásĩ́ ólò naamá nu á tọá ló bá e bà lóómá bel. Sõò beè níà áá nu ea náa kọ ó ié sàn nyíeé, nóo nóò bé e Bàrì íe sàn nyíe naa.—Doolé ló Tóm 28:2.

Sàn nyíe di zẹ̀ẹ̀ gbò kpãa e nyómá káí Bàrì ólò naa kọ é toní. (Gàl. 5:22, 23) Vóà naa, è íè bíi ló nyómá káí Bàrì kọbé è láá ié sàn nyíe. È nóò Jìhóvà nè Jíízọ̀s tṍó e náà vó. Vaá dì belí gbò nyòòne nvéè Kráìst, è ólò ié lèèma mm̀ dõòna gbò. Vóà naa, vulè e íè kilma ló Bàrì nè gbò nen ólò naa kọ é ié sàn nyíe. Sàn nyíe dú kà agẹbá kpãa ea dìí m vaá à léémá Bàrì.

MÉE NÍ EA BỌ́LÓ KỌ É IÉ SÀN NYÍE KILMA LÓ É?

Àé láá valíí ló gè ié sàn nyíe ló gbò e bà íéi sàn nyíé ló àbèè gbò e nyímà ló. (2 Sám. 2:6) Enè sĩ́deè ge naamá vó dú gè õá va zaa. (Kọ́l. 3:15) Sõò èé kọ́ vàẹ be à tõoí belí kọọ̀ à íe nen e náa bọ́ló kọ é iée sàn nyíe ló é?

Bugi togó boo níí: Jìhóvà zógè kà lé nu dòòmà bá ea kil ló gè ié sàn nyíe, vaá a Moǹ Bel nóòmài nú ea palàge dú bíi ea kil ló gè ié nakà kpãaí. Tã́á bel ea kọ́ọ̀ “sàn nyíe” silà gã́bug tṍó mm̀ Kpá Káí e ba beè emí mm̀ Gríìk. Mósĩ́ deè ní e Bàrì íéi sàn nyíe ló é?

Bugi togó boo bé e Jìhóvà íe sàn nyíe ló dénè nen tení dú ló gè nèva gbò nú e bà íe bíi ló gè tõoma dùm naa. (Máát. 5:45) Kàsĩ́, Bàrì beè ié sàn nyíe ló gbò nen besĩ́ bà kalá nyimáe ló. (Ẹ́fẹ. 2:4, 5, 8) Dì belí nu dòòmà bá, a beè tú áá kà a Nvín ne boo gbò nen. Neǹ tóm Pọ́ọ̀l beè emí kọọ̀ Jìhóvà beè nèi nu ààaá “dì belí bé ea sàn nyíe bọọ naa.” (Ẹ́fẹ. 1:7) Náa kal ló béè kọọ̀ è ólò sí pọ́lọ́ vaá kẹlẹ Jìhóvà, à kilsĩ́ gè leléi dee bá vaá noòmài nu. A nòòmànù nè gbò a Moǹ Bel bélí “boo ea kpálá sĩ́ víl.” (Dìt. 32:2) Née íè tọ́ọ̀ nu eé láá kpẽ́ nè Jìhóvà ló sàn nyíe ea íeí ló. Kà kà bel ea dì dú kọọ̀, áá sàn nyíè Jìhóvà ní ea é náa kọ é ié ból dẽesĩ́ nyòòmà dì deèsĩ́ ẽ́.—Doolé ló 1 Pítà 1:13.

Mm̀ kà kà, sàn nyíè Jìhóvà palàge dú lé vaá sièi kpóó ló. Boo béè vó, náa bọ́ló kọ é sà gbò eé íe sàn nyíe kilma ló, sõò à bọ́ló kọ é nó Jìhóvà tení dú ló gè ié sàn nyíe ló dõòna gbò kọ̀láá dee. (1 Tẹ̀s. 5:15) Be è kilsĩ́ gè ié sàn nyíe, èé bélí sã́ ea ku nen e tọ́ọ gé sííe. Èé dĩine ló pá bẹẹ tọ, pá vígà, gbò e gé gbá siá tóm, gbò e gbáà dia tọọ̀ kpá, nè pá bẹẹ kè gyṍó.

Bugi togó boo bé e gè tú gbọ́ọ́-gbọọ̀ ló loomá bel nè o lé láb é dọ bélè nè pá bọọ tọ àbèè gbò e bà di mm̀ bõ̀ònatõ̀ò naa. À íe nen ea di mm̀ bọọ bõ̀ònatõ̀ò ea é láá palàge ié bíi ló nen ea é kpálí a be àbèè ge olòó zalí nu máe. Nagé, tṍó eo gé kọ́ kpẹ̀a vaá ò mòn nen ea íe bíi ló nvèè bá, é kọ òó láá nvèè?

Naanii èé nó Jìhóvà tení dú gè naa kọọ̀ “log sàn nyíe” á lẹ̀ẹ̀là bel ló bẹẹ bel nè bẹẹ láb.