Kilíí Sĩ́ Gè “Nveenii Kpóó Ló Ene”

1. Dì belí bé e 1 Tẹ̀sàlónaikà 5:11 kọ́ naa, mókà tóm ní e dénè bẹ̀ì gé sí é?

É KỌỌ̀ pá bọọ bõ̀ònatõ̀ò beè tìb àbèè ge sí tóm ló nómá Kíndòm Họ́ọ̀l? Beè vó, òó láá kẽ̀èa boo túá tṍó eo beè sí nònù mm̀ ãa Kíndòm Họ́ọ̀la. O beè palàge õá Jìhóvà zaa. Mm̀ kà kà, àé láá dú kọọ̀ ẹ́ẹ́ nyíe eo íè beè naa kọọ̀ á tàvàlà ní ló gè ọlí sọ́l ge kùùmà nònù. Bẹẹ gbò Kíndòm Họ́ọ̀l ea õòa ló ólò lèèlà Jìhóvà. Sõò à íe dõòna kà gbò tóm e gé sí ea kpáá pàlàge nè lèèlà Jìhóvà. Gbò nú e nakà tóm bãàa m bọọ èlmà pọ́ì ge tìb tọ. Níà ge siè kpóó ló gbò e bà dú nònù. Níà nú e neǹ tóm Pọ́ọ̀l beè sẹ̀ẹ̀a bùlà tṍó ea beè emí gbò moǹ bel ea di mm̀ 1 Tẹ̀sàlónaikà 5:​11, e nakà togó belí dẹẹ̀a boo é.​—⁠Bugi.

2. Éé ní eé ló bel boo mm̀ nakà togó belí é?

² Neǹ tóm Pọ́ọ̀l dú kà lé nu dòòmà bá kilma ló gbò e bà nyímá sĩ́deè ge siè kpóó ló pá vígà. A beè ié tóè sàn kìlmà vá ló. Mm̀ nakà togó belí, èé ló bel boo bé ea beè nvèè bá nè pá vígà págbálà nè pábia (1) kọ bàá ĩ̀ìmà tã̀àgã̀, (2) tõ̀òa mm̀ fẹ́ẹ́-fẹẹ̀ ló, vaá (3) agẹlẹ ló ba zìgà mm̀ Jìhóvà naa. Naanii èé ẹb bé eé láá nóe vaá siè kpóó ló pá vígà págbálà nè pábia deè nieí naa.​—⁠1 Kọ́r. 11:⁠1.

PỌ́Ọ̀L BEÈ NVÈÈ BÁ NÈ PÁ VÍGÀ PÁGBÁLÀ NÈ PÁBIA KỌ BÀÁ LÁÁ Ĩ̀ÌMÀ TÃ̀ÀGÃ̀

3. Pọ́ọ̀l beè ẹ̀b nú mm̀ kuna-kuna bá naa vàẹ?

³ Pọ́ọ̀l beè palàge vùlè pá vígà. A beè tení bá gã́bug tã̀àgã̀; boo béè vó, a beè ié sàn nyíe nè tóè sàn kilma ló pá vígà e bà beè di kè bá tã̀àgã̀. À íe tṍó e kpègè beè tá bá Pọ́ọ̀l naa ní ea beè gbĩ́ tóm gè sì kọbé à láá ié kpègè ge nvèèmà bá nè a bá nè pá vígà e ba beè dìé ló. (Tóm 20:34) A beè olòó lò kàn ge tìbmà tọ. Túá tṍó ea íná Kọ́rìnt, a beè zọ̀ Àkílà nè Presélà lò kàn ge tìbmà tọ. Sõò a beè olòó tú “kọ̀láá deè bõ̀séi” kọọmá kpẹ̀a nè pá Júù nè Gríìs. Tṍó e Sáílàs nè Tímotì dú, “Pọ́ọ̀l beè gbóó tú dénè a tṍó nè ge vee lé kpẹa.” (Tóm 18:​2-5) Pọ́ọ̀l beè ká bùlà gbẹẹ́ boo nú ea palàge dú bíi mm̀ a dùm, ea dú gè sí tóm nè Jìhóvà. Ge kọọ̀ Pọ́ọ̀l beè tú agẹ bá kọọmá kpẹ̀a beè naa kọ á láá siè kpóó ló pá vígà págbálà nè pábia. A beè kẽeé vá nyíe kọ bàá gá zìgà kọọ̀ tã̀àgã̀ ea di mm̀ dùm nè ge naa gbò nú ea dú bíi ló pá ba tọ á naa ko bàá gbẹmà nvéè “gbò nú ea palàge dú bíi”​—⁠ea dú kọ̀láá kà nú ea bãàa mm̀ ge fã̀ Jìhóvà.​—⁠Fíl. 1:​10, NW.

4. Mósĩ́ deè ní e Pọ́ọ̀l nè Tímotì beè nvèè bá nè pá vígà kọ bàá ĩ̀ìmà bíígá ló é?

⁴ Pọ́ì ńkem̀ tṍó aa ló tṍó e bà nveè bõ̀ònatõ̀ò ea beè di Tẹ̀sàlónaikà lọ̀l, pá vígà e bà ã́àa bã mm̀ bõ̀ònatõ̀òa beè kpeesĩ́ ló kà agẹ bá nàà uú boo. Tṍó e gbò e bà géè naa uú vá booá náa mon Pọ́ọ̀l nè Sáílàs, ba beè sii sìgà pá “vígà mm̀ Kráìst ààmà gé túva má gbò tule boná” vaá kọ́ va kpã́ ló kọọ̀, “Bà gbáálá dénè log e Méné Róm̀ beè nèi.” (Tóm 17:​6, 7) É kọ òó láá dòòmà dẽe ló bé e pọ̀ beè sii pá vígà e bà ã́àa nyoone nvéè Kráìst naa tṍó e bà nyímá kọọ̀ zivè kà boná a náànìè uulìè vá boo? Lóó va gáẹ̀ beè láá ọọ ló gè sí tóm nè Jìhóvà, sõò Pọ́ọ̀l náa beè zìgà kọọ̀ vó á naaá. Náa kal ló béè kọọ̀ ẹlẹ nè Sáílàs beè àà, ba beè mòn kọ bà palàge ẹbvìè nú ea kil ló bõ̀ònatõ̀ò ea ã́àa bã kẽí. Pọ́ọ̀l beè kẽeé nyíè pá vígà e bà di Tẹ̀sàlónaikà kọọ̀: “E beè [lẹ̀ẹ̀là Tímotì] kọ á dúí ló gé nvèèi kpóó ló vaá nèi agẹ nyíe kọ ó kilií sĩ́ gè dẹlẹi nyíe boo Kráìst, kọbé tọ́ọ̀ nen náa élá kè bá bíígá ló ea di kẽí vaá pee a bùlà.” (1 Tẹ̀s. 3:​2, 3) Be à sẹlẹ túá tṍó e Tímotì beè tení bá bíígá ló dú tṍó ea beè di ba boǹ Léstrà. A beè mòn bé e Pọ́ọ̀l beè siè kpóó ló pá vígà e bà di kĩé naa. Boo béè kọọ̀ Tímotì beè mòn bé e Jìhóvà beè nvèè bá nèva naa, a beè naa kọọ̀ pá vígà e bà ã́àa bã mm̀ bõ̀ònatõ̀òa á àgala boo kọọ̀ kọ̀láá kà nu e beè dú lé.​—⁠Tóm 14:​8, 19-22; Híb. 12:⁠2.

5. Mósĩ́ deè ní e vígà Bryant beè ié bélè lọl ló bé ene kà neǹ kànen beè nvèè bá nèe naa ẽ́?

⁵ Mókà dõòna kà sĩ́deè ní e Pọ́ọ̀l beè siè kpóó ló pá vígà ẹ? Tṍó e Pọ́ọ̀l nè Baanàbàs oòa kẽ iná Léstrà, Ikónìàm, nè Ántìọ̀k, ba beè íbá ló gbò kànen “mm̀ buù kà bõ̀ònaló Kráìst e bà íná.” (Tóm 14:​21-23) Mm̀ kà kà, gbò e bà ívá bá lóí beè naa kọọ̀ lóó pá vígà e bà di mm̀ gbò bõ̀ònatõ̀òa á dĩ̀ìnà belí bé e gbò kànen mm̀ bõ̀ònatõ̀ò deè nieí gé náa nagé naa. Ene kà vígà págbálà ea bée kọlà Bryant kọ́ọ̀: “Tṍó em beè toolá 15 gbáá, ńdáà tẹ̀ beè làb nu aa tọ àà, vaá ba beè kpó ńdáà kà lọl mm̀ bõ̀ònatõ̀ò. A beè tõoḿ ló belí kọọ̀ bà sóm bá gbẹẹ́ kẽ vaá lóóm beè ọọ.” Éé ní ea beè nvèè bá nè Bryant kọ á ĩ̀ìmà nakà tàvàlà dìtõ̀òí ẽ́? À kọ́ọ̀: “Ene kà neǹ kànen ea kọlà Tony, beè olòó zọ̀m loá sọ́l gbẹá nònù nè tṍó e bè é gé nònù. A beè kọ́ nú ea kil ló gbò e bà beè tení bá kele-kele íb tã̀àgã̀ vaá nyíé va géè ẹẹ. A beè bugi kpá Psalm 27:10 nèm, vaá gã́bug tṍó a beè olòó kọ́ nú ea kil ló Hèzèkáíà, ea dú nen ea beè fã̀ Bàrì mm̀ bọ́ọ̀ló dẹ̀lẹ̀ nyíé boo náa kal ló béè kọọ̀ a tẹ̀ náa beè zogè lé nu dòòmà bá.” Nvèè báí beè tọá ló Bryant naa vàẹ? Bryant kọ́ọ̀: “Tení dú ló nvèè bá ea aa bá Tony, m beè gbóó dààmà togó gè bã boo tóm gyà deèsĩ́ tóm kọ̀ kpẹ̀a dénè tṍó, ea dú tóm ea ném dĩ̀ìnè ló.” Gbò kànen, dìí kpènà ló gè nveenii bá nei gbò e bà bélí Bryant, e bà íe bíi ló lé “mon bel” ea é síè va kpóó ló.​—⁠Pró. 12:⁠25.

6. Mósĩ́ deè ní e Pọ́ọ̀l beè siè kpóó ló pá vígà tení dú gbò nòòtẽ́ ea kil ló dùm nen ẽ́?

⁶ Pọ́ọ̀l beè kẽeé nyíè pá vígà kọọ̀ “gã́bug gbò nen ditõ̀ò” a ĩimà tàvàlà dìtõ̀ò tení dú ló kói ea aa bá Jìhóvà. (Híb. 12:⁠1) Pọ́ọ̀l beè dã́tẽ́ ló bé e dìtõ̀ò pá vígà e ba beè ĩ̀ìmà tàvàlà dìtõ̀ò tṍó ea kil nvéeá beè siè kpóó ló dõònà kà pá vígà vaá nvèè bá nèva kọ bàá ká bùlà gbẹẹ́ boo “bon Bàrì” ea di dùma naa. (Híb. 12:22) Níà bé ea dì nàgé naa deè nieí é. Mée ní e náa ólò sièe kpóó ló tṍó ea bugi nú ea kil ló bé e Jìhóvà beè nvèè bá nè Gídìòn, Béràk, Dévìd, Sámuẹ̀l nè dõòna gbò naa ẽ́? (Híb. 11:​32-35) Vaá èé kọ́ vàẹ kilma ló nu dòòmà bá gbò e bà íe zìgà deè nieí é? Gbẹá pọ̀bkà tọ nàà tóm ea gé ẹb nú ea kil ló bẹẹ sìtóm kọ̀ kpẹ̀a beeá ló bàlà booí, è ólò ié kpá lẹ̀ẹ̀la tóm ea aa bá pá vígà págbálà nè pábia e ba zìgà kpáá aga ló tṍó e bà bugi nòòtẽ́ ea kil ló dùm gbò gyóòlo Jìhóvà e bà bọ́ló dẹ̀lẹ̀ nyíé boo deè nieí.

PỌ́Ọ̀L BEÈ ZOGÈ PÁ VÍGÀ BÉ E BÀÉ LÁÁ TÕ̀ÒA MM̀ FẸ́Ẹ́-FẸẸ̀ LÓ NAA

7. Éé ní eo nóò lọl ló dùùlà bá deè tṍ Pọ́ọ̀l ea di mm̀ kpá Róm̀ 14:​19-21 é?

⁷ È ólò siè kpóó ló pá vígà págbálà nè pábia tṍó e náa kọọ̀ fẹ́ẹ́-fẹẹ̀ ló á di mm̀ bõ̀ònatõ̀ò. Née ólò sọ̀tọ́ deè kọọ̀ kele-kele bùlà á poói. Vaá née ólò àgala boo kọọ̀ è di lèlà tṍó e nòòkúù Kpá Káí náa aa deè nvèè sãa kúm. Bugi togó boo nakà nu dòòmà báí. Pá Júù nè gbò e bà náa dú Júù ní e ba beè gbá di mm̀ bõ̀ònatõ̀ò ea beè di Róm̀ ẽ. Tṍó e Log Mózìs íná kùbmà, náa beè dú ná bíi kọọ̀ gbò e bà gé fã Jìhóvà á kpáá aa ló gè dé gbò gyã́á e logá beè kọ bàá gá dèa. (Máàk 7:19) Lọl tṍóá ààmà, pá Júù e bà géè nyoone nvéè Kráìst beè gbóó di pọ́ì ge dé kọ̀láá íb gyã́á. Sõò sìgà pá Júù beè bugi togó kọọ̀ náa lelà ge dé gbò gyã́áá. Belí beè naa kọọ̀ bõ̀ònatõ̀òa á pòòa. Pọ́ọ̀l beè nvèè kpíi ló bé ea palàge dú bíi kọọ̀ fẹ́ẹ́-fẹẹ̀ á dì naa, naa ní ea kọ́ọ̀: “À dú lé gè kọ ó aa ló gè bà nom àbèè ge ṍ míí, àbèè ge naa kọ̀láá íb nu ea é náa kọọ̀ o vígà á dọ̀.” (Bugi Róm̀ 14:​19-21.) Vó beè naa kọọ̀ Pọ́ọ̀l á nvèè bá nè pá vígà kọ bàá mòn bé e tàlà belá é láá tãagẽ buù nen nè zivekà bõ̀ònatõ̀ò naa. A beè dì nàgé kpènà ló gè nyaaná bá ló a dùm kọbé náa sívè dõòna gbò. (1 Kọ́r. 9:​19-22) Beele é láá siè nàgé kpóó ló dõòna gbò vaá kilsĩ́ gè naa kọọ̀ fẹ́ẹ́-fẹẹ̀ ló á dì, be née zọọ̀ va tala boo nú ea léémá va.

8. Pọ́ọ̀l beè labví láb naa vàẹ tṍó e bel ea tãagẽ fẹ́ẹ́-fẹẹ̀ ló ea di mm̀ bõ̀ònatõ̀ò bã́ kẽé?

⁸ Pọ́ọ̀l beè zogè kà lé nu dòòmà bá mm̀ ge zọ̀ gbò e bà beè íe kele-kele bùlà kilma ló nú ea palàge dì bíi naaá fẹ́ẹ́-fẹẹ̀ ló. Dì belí nu dòòmà bá, sìgà gbò nyòòne nvéè Kráìst e ba beè di mm̀ bõ̀ònatõ̀ò mm̀ túá gbò gbááá beè kọọ̀ gbò e bè níì pá Júù nì é íe ge kòòa kọbéè pá Júù náa kọ́ va bel. (Gàl. 6:12) Pọ́ọ̀l náa beè zìgà bel e bà kọ́á, sõò tãa vó ea kọ́ nèva ko bàá iè ge naa nú e ẹlẹ kọ́ẹ̀, a beè kìlmà kpá ló kẽ vaá tú belá má gbò tóm nè gbò kànen e bà di Jèrúsalẹ̀m. (Tóm 15:​1, 2) Nú ea beè sìlà aa m dú kọọ̀, a láb beè nvèè bá nè gbò nyòòne nvéè Kráìsta kọ bàá kilsĩ́ gè ié zààvà nè fẹ́ẹ́-fẹẹ̀ ló mm̀ bõ̀ònatõ̀ò.​—⁠Tóm 15:​30, 31.

9. Mósĩ́ deè ní eé láá nó nu dòòmà bá Pọ́ọ̀l ẹ?

⁹ Be à gá náa vaá kà agẹ bá tàlà bel à bã kẽ, èé náa kọọ̀ fẹ́ẹ́-fẹẹ̀ ló á dì tení dú ló gè gbĩ́ tùle lọl bá gbò e Jìhóvà beè íbá ló kọ bàá ẹ̀b nú ea kil ló a bõ̀ònatõ̀ò. Gã́bug tṍó, è ólò ié gbò tùleá lọl mm̀ bẹẹ gbò kpá ea dẹẹ̀a boo Kpá Káí àbèè mm̀ a bõ̀ònatõ̀ò. Be è ká bùlà gbẹẹ́ boo gbò dùùlà bá deè tṍá èlmà bé e beele ẹbvì nu naa, èé náa kọọ̀ fẹ́ẹ́-fẹẹ̀ ló á di mm̀ bõ̀ònatõ̀ò.

10. Dõòna kà éé ní e Pọ́ọ̀l beè naa kọbéè fẹ́ẹ́-fẹẹ̀ ló dí mm̀ bõ̀ònatõ̀ò ẽ?

¹⁰ Pọ́ọ̀l beè naa kọọ̀ fẹ́ẹ́-fẹẹ̀ ló á dì tení dú ló gè nvèè kpíi ló gbò lé kpãa e pá vígà págbálà nè pábia íe, e bè níì ba gbò lọ̀ nì. Dì belí nu dòòmà bá, mm̀ dee deè nvéè kpá e Pọ́ọ̀l beè emí má pá Róm̀, a beè kolí béè gã́bug nen vaá ló lé bel kìlmà vá ló. Èé láá nó Pọ́ọ̀l tení dú ló gè olòó ló lé bel kilma ló gbò lé kpãa e pá vígà págbálà nè pábia íe. Tṍó e náà vó, àé náa kọọ̀ pá vígà á kpáá tõo bã ló ene, nè ge naa kọọ̀ vùlà á di mm̀ bõ̀ònatõ̀ò.

11. Mósĩ́ deè ní eé láá kpáá naa kọọ̀ fẹ́ẹ́-fẹẹ̀ ló á dì tṍó e tã̀àgã̀ bã́í zẹ̀ẹ̀ ẹ?

¹¹ Sìgà tṍó, bã̀àna pá vígà e ba ni tú gã́bug gbáá fã̀àmà Bàrì ólò láá zọ̀ ene tàlà bel. Níà nú ea beè naaá ló Pọ́ọ̀l nè a kọ́ọ̀ Baanàbàs e. Pálaa není beè palàge tàlà boo gè faalá Máàk tṍó e bàé kpáá àà gé kọ́ kpẹ̀a aa dó dọ dó. Pálàa ọ̀và “beè palàge tala boo belá” naa ní e bà dááá vaá ní ea ie deè à tení ńlẹ. (Tóm 15:​37-39) Sõò Pọ́ọ̀l, Baanàbàs, nè Máàk beè sí tóm ló ba gbaa ló, ea zógè kọọ̀ bà nveè ka ló fẹ́ẹ́-fẹẹ̀ ló nè gbaa ló ea di mm̀ bõ̀ònatõ̀ò. Tṍó e tṍó téní, Pọ́ọ̀l beè ló lé bel ea kil ló Baanàbàs nè Máàk. (1 Kọ́r. 9:6; Kọ́l. 4:10) À dú nágé bíi kọọ̀ beele é kpoogè dee ló kọ̀láá kà tã̀àgã̀ ea é láá bã zẹ̀ẹ̀ dõòna gbò nè bẹ̀ì mm̀ bõ̀ònatõ̀ò vaá è kilsĩ́ gè ká bùlà gbẹẹ́ boo ba gbò lé kpãa. Fẹ́ẹ́-fẹẹ̀ ló nè gbaa ló é di tṍó e náà vó.​—⁠Ẹ́fẹ. 4:⁠3.

PỌ́Ọ̀L BEÈ SIÈ KPÓÓ LÓ ZÌGÀ PÁ VÍGÀ

12. Mókà gbò ànà-ànà ní e pá vígà gé kpeesĩ́ ló é?

¹² Zìgà pá vígà ólò aga ló tṍó e síè va kpóó ló. Pá bẹẹ tọ e bà náa ólò fã̀ Bàrì, gbò e gé zọ siá tóm, àbèè gbò e gbáà dia tọọ̀ kpá é láá nvèèmà lẹ́ sìgà bẹ̀ì. Dõòna gbò gé téní bá agẹ bá zọ̀ kpá ló àbèè bììla nyíe. Boo tṍó e sìgà gbò e ba beè dììa mm̀ gã́bug gbáá ea kil nvéeá gé ẹbmà dẽe kọọ̀ kùbmà á gbóó bã ló nakà bàlà booí. Gbò dìtõ̀òí é láá dòà zìgà gbò níí Kráìst deè nieí. Gbò níí Kráìst e ba beè di mm̀ bõ̀ònatõ̀ò mm̀ túá gbò gbááá beè kpeesĩ́ ló íb gbò ànà-ànàí. Éé ní e Pọ́ọ̀l beè naa mm̀ ge siè kpóó ló pá vígàí é?

13. Mósĩ́ deè ní e Pọ́ọ̀l beè nvèè bá nè gbò e ba beè nvèèmà va lẹ́ boo béè gbò nú e bà zigà ló é?

¹³ Pọ́ọ̀l beè siè kpóó ló zìgà pá vígà tení dú ló Kpá Káí. Dì belí nu dòòmà bá, Gbò nyòòne nvéè Kráìst e bà dú Júù beè láá ié bùlà kọọ̀ tọ́ọ̀ kà nú e bà diè ló á gé tṍó e bà dã́ e pá ba tọ e bà náa ólò nyoone nvéè Kráìst gé kọ́ọ̀ bõ̀ònaló fã̀ pá Júù léè èl bõ̀ònaló Kráìst. Mm̀ kà kà, kpá lẹ̀ẹ̀la tóm e Pọ́ọ̀l beè emí má pá vígà e bà ólò ló dém bel Híbrù beè palàge siè va kpóó ló. (Híb. 1:​5, 6; 2:​2, 3; 9:​24, 25) Gbò nú ea beè emí mm̀ kpáí beè láá nvèè bá nèva kọ bàá nyímá lèlà nu gè kọ́ nè pá ba tọ e bà géè naa uú vá booá. Deè nieí, èé láá nvèè bá nè pá vígà e bà gé téní bá nàà uú boo kọ bàá tú bẹẹ gbò kpá ea dẹẹ̀a boo Kpá Káí bààmà tẽ́ gbò nú ea bà ziga ló nè dõòna gbò. Vaá be à gá náa bà nvèèmà lẹ́ bẹẹ gbò nvín ãa boo béè kọ bà ziga ló dèmnù, èé láá tú gbò nú ea di mm̀ gbò bróshọ̀ ea kọlà Was Life Created? nè The Origin of Life​—⁠Five Questions Worth Asking nvèèmà bá nèva kọbé bà nyímá nú ea náa vaá bà zìgà kọọ̀ Bàrì beè dèm nu.

14. Náa kal ló béè kọọ̀ Pọ́ọ̀l beè di mm̀ kíìli-kíìli boo béè ge kọ́ kpẹ̀a nè ge noòmà nu, éé ní ea beè naa ẽ́?

¹⁴ Pọ́ọ̀l beè siè kpóó ló pá vígà kọ bàá ié vulè tení dú ló gè “sí lé tóm.” (Híb. 10:24) A beè nvèè bá nè pá vígà tení dú ló gbò bel ea ló nè nú ea náa. Dì belí nu dòòmà bá, tṍó e kíì gyã́á beè dọ Jùdíà, Pọ́ọ̀l beè nvèè bá dõo gbò nú e pá vígà íe bíi ló nèva. (Tóm 11:​27-30) Mm̀ kà kà, náa kal ló béè kọọ̀ Pọ́ọ̀l beè di mm̀ kíìli-kíìli boo béè ge kọ́ kpẹ̀a nè ge noòmà nu, a beè gbĩ́ gbò sĩ́deè ge nvèèmà bá nè gbò e bà íe bíi ló nu gè tõoma dùm. (Gàl. 2:10) Ge naa vó beè naa kọọ̀ pá vígà á àgala boo kọọ̀ Jìhóvà é ẹbvìè nú ea kiliè vá ló. Deè nieí, tṍó e túù bẹẹ tṍó, kói, nè kalì nvèèmà bá nè gbò e nu kyọa ló, è náa nàgé kọọ̀ zìgà pá vígà á aga ló. Èé láá siè nàgé kpóó ló pá vígà tení dú ló gè olòó nè lọ̀là-lọ̀là nyòòmà sìtóm kọ̀ kpẹ̀a. Tṍó e náà gbò nuí nè dõòna kà gbò nú ea bélí vó, è nveè bá nè pá vígà kọ bàá dẹlẹ nyíé boo kọọ̀ Jìhóvà náa é sọ va bá gbẹẹ́ kẽ.

15-16. Mó bá ní ea bọ́ló kọ é sẹ̀ẹ̀mà gbò e lóó ba zìgà ọọ ẹ́?

¹⁵ Pọ́ọ̀l beè kilsĩ́ gè siè kpóó ló gbò e lóó ba zìgà ọọ. A beè tó va sàn vaá ló gbò bel ea síè va kpóó ló nèva. (Híb. 6:9; 10:39) Dì belí nu dòòmà bá, mm̀ zivè kà kpá lẹ̀ẹ̀la tóm ea beè emí má gbò e bà ólò ló dém bel Híbrù, à beè bọọgẹ̀ tú gbò moǹ bel ea kọ́ọ̀, “è” nè “beele” loomá bel, ge zogè kọọ̀ ẹlẹ íe nagé bíi ló gè tú gbò dùùlà bá deè tṍ ea ne siimá tóm. (Híb. 2:​1, 3) Dì belí Pọ́ọ̀l, Née é ooà aa ló gè nvèè bá nè gbò e lóó ba zìgà ọọ. Tãa vó, èé síè va kpóó ló tení dú ló gè ié va lèèma m. È zógè kọ è vulè va tṍó e náà vó. Bẹẹ gbọ́ọ́-gọọ̀ ló moǹ bel é láá palàge siè kpóó ló nen.

¹⁶ Pọ́ọ̀l beè naa kọọ̀ pá vígà á àgala boo kọọ̀ Jìhóvà mon gbò lé tóm e bà gé sí. (Híb. 10:​32-34) Beele é láá naa nagé vó tṍó e gé síè kpóó ló neǹ vígà ea zìgà beè ọọ. Èé láá kọ́ nèe kọọ̀ á kọ́ bé ea beè naa vaá à bã mm̀ kà kàí, àbèè ge nvèè bá nèe kọọ̀ á bugi togó boo gbò nú ea beè naaá tṍó ea kil nvéeá, ea beè naa kọ á tõoé ló kọọ̀ Jìhóvà nveenìè bá neèe. Èé láá naa kọ á àgala boo kọọ̀ vulè ea beè ié kilma ló Jìhóvà tṍó ea kil nvéeá náa táẹ́ nyíe, nè ge kọọ̀ náa é sọ́ẹ bá gbẹẹ́ kẽ dì deèsĩ́ àla. (Híb. 6:10; 13:​5, 6) Gbò loa sọ́l ea dì naa vó é nveè bá nè gbò e vulèí kọ bàá kilsĩ́ ló tóm e bà gé sí nè Jìhóvà.

KILÍÍ SĨ́ GÈ “NVEENII KPÓÓ LÓ ENE”

17. Mókà gbò kalì ní eé láá kilsĩ́ gè toní ẽ́?

¹⁷ Dì belí bé e nen ea ólò tìb tọ ólò sìm kilsĩ́ mm̀ a kalí bé e tṍó gé téní naa, beele é láá kpáá sìm kilsĩ́ mm̀ ge siè kpóó ló ene. Èé láá nvèè bá nè dõòna gbò kọ bàá ié kói ge ĩ̀ìmà gbò tã̀àgã̀ e bà kpeesĩ́ ló tení dú ló gè kọ́ nú ea kil ló gbò e ba beè láá ĩ̀ìmà gbò tã̀àgã̀ e bà beè kpeesĩ́ ló tṍó ea kil nvéeá. Èé láa naa kọọ̀ fẹ́ẹ́-fẹẹ̀ ló á dì tení dú ló gè kọ́ gbò lé e monì mm̀ dõòna gbò, nè ge naa kọọ̀ fẹ́ẹ́-fẹẹ̀ ló á kpáá dì tṍó e kana bã kẽ. Vaá èé láá kilsĩ́ gè siè kpóó ló zìgà pá vígà tení dú ló gè zọ̀ va loá sọ́l boo gbò kà kà bel ea di mm̀ Kpá Káí, naa gbò nú ea dú va bíi ló nèva, nè ge nvèè bá nè gbò e ba lóó zìgà ọọ.

18. Éé ní eo béèlàfùl ge naa ẽ́?

¹⁸ Nyíè gbò e bà gé sí tóm gè tìbgì gbò tọ e ólò tõó m fã̀ Bàrì ólò ẹẹ vaá nú e bà íe ólò gbõomá vá ló. Èé láá ié ẹ́ẹ́ nyíe nè dĩ̀ìnè ló tṍó e siè kpóó ló pá vígà e bà di mm̀ bõ̀ònatõ̀ò. Pọ́ì tọ e nen tib é kyọà, sõò gbò bélè ea aa ló bẹẹ tóm é láá dì dọ̀ọ̀mà dè-dè! Naanii èé kilsĩ́ gè ‘nvèè kpóó ló ene vaá nvèè bá nè ene.’​—⁠1 Tẹ̀s. 5:⁠11.