Kìlmà Kpá Ló Kẽ Tṍó Ea Íe Sìgà Nú E Bè Nóo Nyímà

1. Móbá ní e Jìhóvà beè dèmài ẽ́, vaá ló éé?

JÌHÓVÀ beè dèmii mm̀ sĩ́deè eé láá bugi togó, nó ãa nu, dã́ ból ló nu, vaá tú gbò nú e nóò siimá tóm. Éé ní ea náa vaá à dèmii naa vó é? À gbĩ́ kọ é “ié nyìmànù Bàrì” vaá níà lèlà sĩ́deè ge fã̀ Bàrì e.​—Pró. 2:​1-5; Róm̀ 12:1.

2. (a) Éé ní ea dú bíi kọ é dã́ ból ló ea kil ló bẹẹ bá ẹ́? (Jóòb 37:​23, 24) (Ẹ̀b nàgé fòtó.) (b) Éé ní ea náa vaá gè nyimá kọ née é láá dã́ ból ló dénè nu é dọ bélè nèi ẽ́?

² Jìhóvà beè dèmii mm̀ sĩ́deè eé láá nó gã́bug nu, sõò à íe sìgà nú e née nyímà. (Bugi Jóòb 37:​23, 24.) Bugi togó boo nu dòòmà bá Jóòb. Jìhóvà beè bĩináe gã́bug bíb, vó beè naa kọ Jóòb á dã́ ból ló kọ à íe gã́bug nú e náa nyímàè. Gbò bíbvá beè nvèè bá nè Jóòb kọ á kìlmà kpá ló kẽ vaá nyaaná bá ló bé ea bugi togó naa. (Jóòb 42:​3-6) Tṍó e kẽeà boo kọ née nyímà dénè nu, àé nveè bá nèi kọ é kìlmà kpá ló kẽ, vaá dẹlẹ nyíé boo kọ Jìhóvà é kọ́ gbò nú e palàge ié bíi ló nèi kọbé è láá nè lé béèlàfùl.​—Pró. 2:6.

3. Éé ní eé ló bel boo mm̀ nakà togó bel ge nòí ẽ́?

³ Mm̀ nakà togó bel gè nòí, èé ló bel boo sìgà nú e née nyímà nè gbò ànà-ànà eé láá kpeesĩ́ ló. Èé ló nágé bel boo nú ea náa vaá à dú lé kọ née nyímà sìgà nu. Ge ló bel boo gbò gáí é náa kọ é agala boo kọọ̀ Jìhóvà ea dú “nen ea gbõoma mm̀ nyìmànù” ní ea ólò kọ́ gbò nú ea dú bíi kọ é nyimá nèi ẽ́.​—Jóòb 37:16.

NÉE NYÍMÀ TṌÓ E KÙBMÀ É BÃ́ LÓ PỌ́LỌ́ BÀLÀ BOOÍ

4. Dẹ̀ẹ̀a boo nú ea di mm̀ kpá Máátìù 24:​36, éé ní e beele née nyímà ẽ?

⁴ Bugi Máátìù 24:36. Beele née nyímà tṍó e kùbmà é bã́ ló nakà pọ́lọ́ bàlà booí. Bã̀àna Jíízọ̀s, tṍó ea beè di boo kunukẽ̀í náa beè nyimá dee nè “tṍó” e kùbmà é dú.a Tṍó e tṍó téní, Jíízọ̀s beè kọ́ nè pá a gbò nyòòne nvée kọọ̀, áá Jìhóvà ‘ní ea íe kpóó gè kọ́ tṍó e sìgà nu é nááá’ dẹ̀ẹ̀a boo tṍó e ẹlẹ beè noo ẽ́. (Tóm 1:​6, 7) Jìhóvà beè noo tṍó ea é nveè kùbmà ló nakà pọ́lọ́ bàlà booí, sõò beele née é láá nyimá lèlà tṍó ea é náa vó.

5. Ge kọ née nyímà tṍó e kùbmà é bã́ ló bàlà booí é láá tọáí ló naa vàẹ?

⁵ Dẹ̀ẹ̀a boo bel e Jíízọ̀s beè lò, beele née nyímà begè dẽè tṍó ea é téní besĩ́ kùbmà kálá bã ló nakà pọ́lọ́ bàlà booí. Vóà naa, àé láá m-mái àbèè kọ lóói ọọ be e tú gã́bug gbáá emá bànà deè Jìhóvà. Àbèè kọ lóóí é láá ọọ beè pá bẹẹ tọ àbèè dõona gbò nveemài lẹ́ boo béè kọ Jìhóvà gáà nvèè kùbmà ló nakà pọ́lọ́ bàlà booí. (2 Pít. 3:​3, 4) Èé láá bugi nagé togó kọ be e beè nyimá tṍó e kùbmà é bã́ ló nakà pọ́lọ́ bàlà booí, à gáẹ̀ beè valíí ló gè ĩ̀ìmà tṍó e bà nveemài lẹ́.

6. Éé ní ea náa vaá à dú lé kọ née nyímà tṍó e kùbmà é bã́ ló nakà pọ́lọ́ bàlà booí é?

⁶ Ge kọ Jìhóvà náa kọ́ nèi kà lèlà tṍó e kùbmà é bã́ ló nakà pọ́lọ́ bàlà booí é náa kọ é fã̀e boo béè kọ è vulèe vaá dẹlẹ́ẹ nyíé boo. È gbĩ́ì gè fã̀ Jìhóvà dọ̀ọ̀mà dè-dè, níì dọ̀ọ̀mà tṍó e kùbmà é bã́ ló bàlà booí nì. Vóà naa, tãa vó e káà dẽe gbẹẹ́ boo tṍó e “deè Jìhóvà” é dú, àé dú lé be è ká dẽe gbẹẹ́ boo gbò lé nu e Jìhóvà é náa nèi mm̀ ãa bàlà boo. Tṍó e náà vó, èé kpáá palàge dũ̀ùà bã kpàn Jìhóvà, dẹlẹ́ẹ nyíé boo, vaá naa gbò nú ea léémáé.​—2 Pít. 3:​11, 12.

7. Éé ní e nyímà ẽ?

⁷ Àé palàge dú lé kọ é ká bùlà gbẹẹ́ boo nú e nyímà. È nyímà kọọ̀ dee-deè nvéè tṍó beè dààmà togó mm̀ gbáá 1914. Jìhóvà beè naa kọ bàá emí gbò kọ́ọ̀ bùlà Bàrì ea di mm̀ Kpá Káí ea zógè kọọ̀ dee-deè nvéè tṍó beè dààmà togó mm̀ gbáá 1914, vaá a beè kọ nagé bé e dìtõ̀ò bàlà booí é meà naa tṍó e gbááá ni téní. Ge kọ gbò kọ́ọ̀ bùlà Bàrìá dì ea gé ḿḿ-má náa kọ é agala boo kọọ̀ “gbele deè Jìhóvà a íná kuló.” (Zèf. 1:14) È nyímà nàgé tóm e Jìhóvà gbĩ́ kọ é sì, níà ge kọ́ “lé kpẹ̀a ea kil ló Boǹ Méné Bàrì” nè gbò nen. (Máát. 24:14) E kọ́ lé kpẹ̀aí mm̀ nú ea é tóólá 240 kpò kunukẽ̀, nè mm̀ nú ea é sígà ló 1,000 dém bel. Náa dú bíi kọ é zẹ́ẹ́ nyimá dee nè tṍó e kùbmà é bã́ ló pọ́lọ́ bàlà booí, besĩ́ è kálá tú bẹ̀à sã́ bùlà kọọmá kpẹ̀a.

NÉE NYÍMÀ BÉ E JÌHÓVÀ É NVEÈ BÁ NÈI NAA

8. Éé ní e ‘tóm e kà-kà Bàrì gé sí’ gé lóá bel nyòòmà ẽ? (Ẹ̀klìzíástìs 11:5)

⁸ Née ólò bọọgè nyimá “tóm e kà-kà Bàrì . . . gé sí.” (Bugi Ẹ̀klìzíástìs 11:5.) Tã́á belá gé lóá bel nyòòmà nú e Jìhóvà náa kọ á naaá, àbèè nú ea sọtọ́ deè kọ á naaá kọbé à ḿm̀-mè a tóm̀ bùlà. Beele née é láá nyimá dénè nú ea náa vaá Jìhóvà à sọ̀tọ́ deè kọ sìgà nu á naaá, àbèè bé ea é nveè bá nèi naa. (Ps. 37:5) Belí bé e gbò Sã́ìns gáà laa nyimá bé e nvín ólò bọọ gbẹá gbàà a kà naaá, níà bé e beele gáà laa dã nagé ból ló bé e Jìhóvà é náa sìgà nu naa ẽ́.

9. Mókà gbò ànà-ànà ní eé láá kpeesĩ́ ló boo béè kọ née nyímà bé e Jìhóvà é nveè bá nèi naa ẽ́?

⁹ Pọ̀ é láá siíi ló gè nè sìgà béèlàfùl tṍó e née nyímà bé e Jìhóvà é láá nvèè bá nèi naa. Pọ̀ é láá siíi ló gè sọ̀bá sìgà nu gbẹẹ́ kẽ kọbé è láá bọ̀ọ̀vẹ̀ gbàà bẹẹ sìtóm kọ̀ kpẹ̀a, àbèè ge àà kil kĩée e bíì gbò kọ̀ kpẹ̀a bọọ. Àé láá tõo nái gé ló kọọ̀ Jìhóvà náa ténmài be née láà teelá tùlà gbò nú e beè noo sẹ̀ẹ̀a sĩ́ kọbé è láá fã̀ Bàrì leevè. Tṍó e kpeèsĩ́ ló ànà-ànà àbèè tṍó e túù gã́bug tṍó kọọmá kpẹ̀a vaá née íè gbò e nóòmà Kpá Káí, àé láá tõoí ló belí kọ Jìhóvà náa gé nveè bá nèi.

10. Mókà gbò lé kpãa ní e íè boo béè kọ née nyímà bé e Jìhóvà é nveè bá nèi naa ẽ́?

¹⁰ Ge kọ née nyímà bé e Jìhóvà é nveè bá nèi naa náa kọ é kìlmà kpá ló kẽ, ea dú ene kà kpãa ea palàge dú bíi kọ é ié. À nveè bá nèi kọ é nyimá kọọ̀ Jìhóvà palàge nyimá nú ea é leeí ló. (Àìz. 55:​8, 9) Vó a náa kọ é palàge dẹlẹ nyíé boo Jìhóvà. Tṍó e lé nu silà aa mm̀ bẹẹ sìtóm kọ̀ kpẹ̀a àbèè tóm e bà néi mm̀ bõ̀ònatõ̀ò, è ólò palàge õá Jìhóvà zaa. (Ps. 127:1; 1 Kọ́r. 3:7) Beè nú e géè ẹ̀bmà dẽe náa naaá, à dú bíi kọ é kẽ̀èa boo kọọ̀ Jìhóvà mon kọ̀láá bé e nu gé nááá naa vaá àé nveè bá nèi kọ é kilsĩ́ gè ié fẹ́ẹ́-fẹẹ̀ ló. (Àìz. 26:12) Èé kilsĩ́ gè naa kùbmà nú e bẹẹ kpóó sim tùlà, vaá agala boo kọọ̀ Jìhóvà é nveè bá nèi. È agàlà boo kọ Jìhóvà é kpenài kọbèè à gá náa vaá náa kpenài mm̀ sĩ́deè ea dú dũ̀ùnè belí bé ea beè olòó naa tṍó ea kil nvéeá naaá.​—Tóm 16:​6-10.

11. Éé ní e nyímà ea é láá nvèè bá nèi ẽ́?

¹¹ È nyímà kọ Jìhóvà vulèi, nyimá nu, vaá dú lé. È nyímà kọ Jìhóvà palàge nvèè ka ló kọ̀láá kà tóm e síì nèe, nè nú e náà nè pá vígà. Vaá è nyímà nàgé kọọ̀ Jìhóvà ólò nè kpẽ́ kọ̀láá gbò e bà bọ́ló dẹ̀lẹ̀ nyíé boo nèe.​—Híb. 11:6.

NÉE NYÍMÀ NÚ EA É NÁÁÁ DÌ DEÈSĨ́

12. Dẹ̀ẹ̀a boo nú ea di mm̀ kpá Jém̀z 4:​13, 14, éé ní e bè née nyímà ẽ?

¹² Bugi Jém̀z 4:​13, 14. Kà-kà bel ea dì dú kọ née nyímà nú ea é náaaí ló dì deèsĩ́. Gã́bug nu e née beè ẹ̀bmà dẽe vaá née é láá lẹ̀ẹ̀là bel ló é láá náááí ló. (Ẹ̀klì. 9:11) Vóà naa, née é láá nyimá beè gbò nú e beè noo é íe togó, àbèè ge nyimá be èé dí dùm vaá naa gbò nú e beè noo.

13. Mókà tọa ló ní e ólò ié sìgà tṍó boo béè kọ née nyímà nú ea é láá naaá dì deèsĩ́ ẽ́?

¹³ Àé láá tàvàlàí ló gè ĩ̀ìmà gbò tã̀àgã̀ e kpeèsĩ́ ló boo béè kọ née nyímà nú ea é nááá dì deèsĩ́. Ló éé? Be à gá náa vaá è bọọgẹ̀ ié tã̀àgã̀ bùlà kilma ló nú ea é láá naaá, àé náa kọ é gá ié ẹ́ẹ́-ẹẹ̀ nyíe. Pọ́lọ́ nu àbèè nú e née beè ẹ̀bmà dẽe é láá naaáí ló, vaá vó é láá naa kọ nyíéi á palàge bììlà. Tṍó e gbò nú e géè ẹ̀bmà dẽe náa nááá, níí é láá palàge ọọvẹ́i ló.​—Pró. 13:12.

14. Éé ní e bẹẹ ẹ́ẹ́-ẹẹ̀ nyíe dẹẹa boo é? (Ẹ̀b nàgé fòtó.)

¹⁴ Tṍó e ĩimà kèbà tàvàlà dìtõ̀ò, è zógè kọọ̀ kọ̀láá bé e nu meà naa, èé kilsĩ́ gè fã̀ Jìhóvà boo béè kọ è vulèe. Gbò nòòtẽ́ ea di mm̀ Kpá Káí náa kọ é nyimá kọọ̀ Jìhóvà náa é kpenài lọl bá kọ̀láá kà tàvàlà dìtõ̀ò e kpeèsĩ́ ló, nè ge kọ níì ẹlẹ ní ea ólò gbẹẹ sĩ́ noo gbò nu ea é náaaí ló é nì. À nyímá kọ bẹẹ ẹ́ẹ́-ẹẹ̀ nyíe náa dẹẹa boo gè nyimá kọ̀láá kà nú ea é nááá dì deèsĩ́, tãa vó à dẹẹa boo gè bĩiná tùle lọ̀líé bá vaá gbànie tṍ ló. (Jèr. 10:23) Be è dẹẹà ẹ́ boo tṍó e gbĩ́ gè nè béèlàfùl, à tõó dọ̀ kọ è gé kọ́ọ̀: “Be à dú bùlà Bàrì, èé dí dùm vaá naa vóí àbèè vóí.”​—Jém̀z 4:15.

15. Éé ní e nyímà ea kil ló dì deèsĩ́ ẽ́?

¹⁵ Boo tṍó e née nyímà nú ea é nááá buù dee, è nyímà kọ Jìhóvà a zigà dùm e bè náa tá nèi, kọbèè à gá náa è ié ból dẽesĩ́ gè kil káála àbèè ge tõó boo kunukẽ̀í. È nyímà kọ náa ólò kpọ́ kyáá bel, vaá tọ́ọ̀ nu náa é láá kpègie lọl ló gè mm-mè gbò nú ea beè zìgà. (Táítọ̀s 1:2) Áá ẹlẹ ní ea é láá ‘kọ́ nú ea é nááá lọl dààmà togó, vaá gbẹẹ́ sĩ́ kọ́ nú ea gáà zẹẹ naaa ẽ́.’ Kọ̀láá kà nú ea beè kọ́ tṍó ea kil nvéeá beè naaá, vaá kọ̀láá kà nú ea ni zigà nèi kilma ló dì deèsĩ́ é nááá. (Àìz. 46:10) È palàge nyimá kọ tọ́ọ̀ nu náa é kpeg Jìhóvà lọl ló gè vùlèi. (Róm̀ 8:​35-39) Àé néi nyìmànù, nvèè nyíé gbàà, nè kpóó e íè bíi ló kọbé è láá ĩ̀ìmà kọ̀láá kà nú e kpeèsĩ́ ló. È palàge agala boo kọ Jìhóvà é nveè bá nèi vaá tãanèi dee bá.​—Jèr. 17:​7, 8.

NÉÉ É LÁÁ PALÀGE DÃ́ BÓL LÓ BÉ E JÌHÓVÀ NYÍMÁI LÓ NAA

16. Dẹ̀ẹ̀a boo nú ea di mm̀ kpá Psalm 139:​1-6, mókà nyìmànù Jìhóvà ní e née é láá palàge dã́ ból ló é?

¹⁶ Bugi Psalm 139:​1-6. Bẹẹ Neǹ Dèmnù nyímá kọ̀láá kà nú ea kilíí ló. À nyímá nú ea náa kọ é bugi togó vaá lábví gbò láb e lábvì. À ólò iéi lèèmá m lee. A nyímá kọ̀láá kà nú e kọ́ọ̀, nè nú ea náa vaá è kọ́ vó. À nyímá nágé nú e náà nè nú ea náa vaá è naa vó. Méné Dévìd beè kọọ̀, Jìhóvà ólò di kpènà ló gè nvèè bá nèi. À tõo ní ló naa vàẹ gè nyimá kọ Bàrì ea beè dèm dénè nu vaá ié kpóó lọ̀l vaá à lee gé ẹb nú ea kil ní ló é? Dévìd beè kọọ̀: “Bé eo nyímà nu naa palàge dú dũ̀ùnè kilma kĩée e nda dì. À palàge bọọ naa ní e ním é láá dã́ tẽ́ ló.”​—Ps. 139:6.

17. Éé ní ea é láá naa kọ á tàvàlàí ló gè zìgà kọ Jìhóvà palàge nyimái ló é?

¹⁷ Be à sẹlẹ gbò nú ea ni nááá bẹẹ tọ, bẹẹ nàànù kunukẽ̀, àbèè gbò nú e beè olòó ziga ló é láá naa kọ á tàvàlàí ló gè mòn kọ Jìhóvà dú Tẹ̀ ea vulèi vaá iéi lèèmá m. Àbèè kọ àé láá tõoí ló belí kọ Jìhóvà náa é gbĩ́ gè dũ̀ùà bã̀í kpàn boo béè gbò pọ́lọ́ e beè sí tṍó ea kil nvéeá. Bã̀àna Dévìd beè ié nágè íb tọa lóá. (Ps. 38:​18, 21) Be à sẹlẹ nen ea gé piigà ge nyaaná bé ea beè olòó tõó dùm naa vaá gbĩ́ gè naa nú ea é léémá Jìhóvà é láá bĩiná a bá kọọ̀, ‘beè Bàrì palàge dám ból ló, éé ní ea náa vaá à gbĩ́ kọ ḿ aa ló gbò láb e bè náa válim ló gè aa ló é?’

18. Mókà bélè ní eé íe lọl ló gè nyimá kọ Jìhóvà nyímái ló èlmà bé e nyímà ló bẹẹ bá naa ẽ́? (Ẹ̀b nàgé fòtó.)

¹⁸ Èé láá agala boo kọ Jìhóvà nyímái ló èlmà bé e nyímà ló bẹẹ bá naa, nè ge kọ à mon gbò lé kpãa ea dìí m e beéle née é láá mòn. Náa kal ló béè kọ à mon gbò lọ̀ e ólò ié vaá nyimá nú ea náa è bugi togó vaá labví gbò láb e lábvì, à vulè nài gé. (Róm̀ 7:15) Tṍó e nyímà kọ Jìhóvà ólò mòn íb nen e dúù, àé síèi kpóó ló vaá naa kọ é tú ẹ́ẹ́-ẹẹ̀ nyíe siimá tóm nè Jìhóvà mm̀ bọ́ọ̀ló dẹ̀lẹ̀ nyíé boo.

19. Éé ní e palàge nyimá ea kil ló Jìhóvà ẹ?

¹⁹ È palàge agala boo kọọ̀ Jìhóvà dú Bàrì vulè. (1 Jọ́ọ̀n 4:8) È nyímà kọ à ólò nèi dùùlà bá deè tṍ boo béè kọ à vulèi vaá à gbĩ́ kọ nu á leeí ló. È nyímà nàgé kọ Jìhóvà gbĩ́ kọ é ié dùm e bè náa tá. A beè nèi nu ààaá kọbé è láá tõó dùm dọ̀ dè-dè. Nu ààaá náa kọ é agala boo kọọ̀ náa kal ló béè kọ née gbõomà, èé láá kilsĩ́ gè fã̀ Jìhóvà mm̀ sĩ́deè ea gbĩ́. (Róm̀ 7:​24, 25) Vaá è nyímà kọọ̀ “Bàrì el boo nyíe ea dìí m vaá à nyimá dénè nu.” (1 Jọ́ọ̀n 3:​19, 20) È nyímà nàgé kọọ̀ Jìhóvà mon kọ̀láá kà nú e gé náa, vaá à dẹlẹ́i nyíé boo kọ èé náa nú ea léémáe.

20. Éé ní ea é nveè bá nèi kọ é gá ié tã̀àgã̀ bùlà kilma ló gbò nú e née nyímà ẽ?

²⁰ Jìhóvà ólò kọ́ kọ̀láá kà nú ea dú bíi kọ é nyimá nèi. Vóà naa, náa dú bíi kọ é tãagẽ bẹẹ bá kilma ló gbò nú e née nyímà. Tãa vó èé láá ká bùlà gbẹẹ́ boo gbò nú ea palàge dú bíi. Tṍó e náà vó, è zógè kọ è palàge dẹlẹ nyíé boo Jìhóvà ea dú “nen ea gbõoma mm̀ nyìmànù.” (Jóòb 36:4) Náa kal ló béè kọ née nyímà dénè nu kátogóí, è nyímà kọ Jìhóvà é kilsĩ́ gè noomài ãa nu dọ̀ọ̀mà dè-dè, vaá nyíéi é palàge ẹẹ boo béè kọ èé kilsĩ́ gè nó ãa nú ea kil ló bẹẹ Bàrì ea dú dũ̀ùnè.​—Ẹ̀klì. 3:11.