Lé Kpẹ̀a E Máàk Beè Emí

15 Dee gé zilà gé, gbò togó vààla gyọ́ọ, gbò kàneǹ pá Júù, gbò émì kpá, nè dénè gbò e bà ólò sí tóm Pọ̀b Tọ Bèèlaà Pá Júù beè gbóó bilá ló, bọbví Jíízọ̀s, vaá túe lọa bá nè Páílèt. 2 Páílèt à gbóó bĩináe kọọ̀: “É kọọ̀ olo ní eo dúù Méné pá Júù e?” À aalá nèe kọọ̀: “Olo ní eo gé kọ́á.” 3 Sõò gbò togó vààla gyọ́ọá géè gbàẹ gã́bug bel. 4 Páílèt à gbóó kpáá bĩináe kọọ̀: “Nóo áàlà tọ́ọ̀ kà bel tẹlẹ dẽe? Nóo dã́à gã́bug bel e bà gé ló uú ní booí?” 5 Sõò Jíízọ̀s náa beè lo ná tọ́ọ̀ kà bel. Vó beè naa kọ á palàge bọọ́ ló Páílèt.

6 Kọ̀láá tṍó Nàànù Ténì Zelí, à ólò sọ̀bá enè neń ea tan gbò nen kọ á sọ̀bá lọl tọọ̀ kpọ́gọ́lọ́. 7 Tṍóá, à íe ene kà gbálà e bà ólò kolíe Bàrábàs e ba beè sii gbò nen nè ẹ̀ẹ̀ nvee tọọ̀ kpọ́gọ́lọ́ boo béè kọọ̀ ba beè lọ̀l togó kèbá kpóó ea gé bẹl vaá fẹ́ nen. 8 Tṍóá, gbòa beè gbóó dù gé kọ́ nú ea dú ba bùlà dẹ̀ẹ̀a boo nú e Páílèt ólò naa nè va. 9 À aalá nè va kọọ̀: “É kọ ò gbĩ́ì kọ ḿ sọ̀bá Méné pá Júù nèi?” 10 Páílèt beè nyimá kọọ̀ bẹẹ nyíe ní ea náa kọọ̀ gbò togó vààla gyọ́ọá á siíe domá ẽ́. 11 Sõò gbò togó vààla gyọ́ọá beè tãgĩ bá gbòa kọ bà á kọ́ nè Páílèt kọ á sọ̀bá Bàrábàs tãa vó ea sọbá Jíízọ̀s. 12 Páílèt à gbóó kpáá bĩiná gbòa kọọ̀: “Vaá ḿ naa éé nen eo kólììe Méné pá Júùí é?” 13 Bà gbóó kpáá vulí kpã́ kọọ̀: “Túe ká kú té!” 14 Páílèt à gbóó bĩiná va kọọ̀: “Ló éé? Mókà pọ́lọ́ ní ea sí é?” Sõò ba beè kilsĩ́ gè vulí kpã́ kọọ̀: “Túe ká kú té!” 15 Sõò boo béè kọọ̀ Páílèt géè gbĩ́ gè naa nú ea é ẹ́ẹ̀lẹ̀ nyíè gbòa, à gbóó sọ̀bá Bàrábàs nè va. A beè gbóó kọ bà á bòm Jíízọ̀s, vaá tṍó e bà bomíe lọ̀l, à gbóó kọ bà á túe ká kú té.

16 Tṍóá, gbò béá beè gbóó faaláẹ kilma mm̀ beè Páílèt, vaá kolí dénè gbò béá bõonè. 17 Bà gbóó nvèèe do-doò dẽè kọ̀là ló vaá ììlà gẹ́l suu naamá pẹ̀gẹ̀lẹ̀ uué ból, 18 vaá dààmà togó gè kọ́ nèe kọọ̀: “Kànà mòn kól, e oló Méné pá Júù!” 19 Nagé, bà géè tú kpóó té olòó sáẹ́ togó vaá tumíe múú kyáá ló. Bà gbóó kumí dúnú kẽ vaá kumí sĩ́ kẽ nèe. 20 Dee deè nvée, tṍó e ba ni nveemàe lẹ́ lọ̀l, bà gbóó tú do-doò dẽè kọ̀là lóá lọ̀líé ló vaá tú a pọ̀b kọ̀là ló nvèèé ló. Bà gbóó faaláẹ ààmà kọbé bà túe ká kú té. 21 Nagé, ba beè tú bá kpóó siimá ene kà gbálà ea kọlà Sáímòn ea dú Sàìrínì, ea dú tẹ̀ Àlẹ̀xzándà nè Rúfọ̀s, ea géè aa ene kà bon ea di kuló kĩá kọ á dàlà té tã̀àgã̀ Jíízọ̀s.

22 Bà gbóó faaláẹ kilma kĩée ea kọlà Gọ́lgọtà, ea gè tàb kọlà, “Ketõ̀ò Kóó Togó.” 23 Ba beè gbĩ́ gè tú míí e ba beè tú máà tẹlẹ m nèe gbẹá kĩá, sõò náa beè zìgà ge õ̀. 24 Bà gbóó túe ká kú té vaá dõ̀ònà a pọ̀b kọ̀là ló tení dú ló gè uuá ńnóm kọbé bà nyímá ló neń e buù báàsĩ́ é kuu. 25 À é láá dú sĩ́ìna òb tóm* boo lọ̀ọ̀le ní e ba beè túe ká kú té é. 26 Ba beè emí bel e ba beè lóé ló sẹlẹ́ẹ́ boo togó kọọ̀: “Méné pá Júù.” 27 Ba beè tu nágé bàà kà neǹ zib ká kú té ea dìé kpàn. Ba beè tú enè nen káẹ́ boo bá lè, bà tú enè nen káẹ́ boo bá kie. 28* —— 29 Gbò e bà gé téní èèlè beè ló pọ́lọ́ bel uué boo vaá kigele togó kọọ̀: “Oló eo beè kọ ò é kṹùnàè tọọ̀ káí vaá tìb lọ̀l mm̀ taà dee, 30 dùùlà o bá tení dú ló gè aa boo té tã̀àgã̀í dọ kunukẽ̀.” 31 Mm̀ tẽ̀ènè sĩ́deèá, gbò togó vààla gyọ́ọ nè gbò émì kpá géè màngã̀e vaá kọọ̀: “A beè dùùlà dõona gbò, sõò náa láà dùùlà a bá! 32 Kráìst ea dú Méné pá Ízrẹẹ̀l á gbóó aa boo té tã̀àgã̀í dọ kẽ kọbé è mon vaá zìgàẹ́ ló.” Kọbèè gbò e ba beè ká kú té gbẹáẹ́ kpàna géè nvèèmàe lẹ́.

33 Tṍó ea ni dú òb nè bàà tóm* fèèbe, zivèkà dóá beè gbóó kuu gín lọl tṍóá tẹlẹ taà tóm* boo fèèbe. 34 Tṍó ea ni dú taà tóm boo fèèbe, Jíízọ̀s à gbóó kòòlà kpã́ kọọ̀: “Ẹ́lì, Ẹ́lì lámá sàbàktánì?” ea tõó dọ̀, “Nà Bàrì, nà Bàrì, éé ní ea náa ò sọ̀m bá gbẹẹ́ kẽ ẽ́?” 35 Tṍó e sìgà gbò e ba beè di élà kĩá dã́ naa vó, bà gbóó kọọ̀: “Ẹbvii! Mè à gé kólí Èláíjà.” 36 Tṍóá, enè neń ea beè di kĩá beè gbóó teelá gé tú sàpó diilé mm̀ agẹ míí vaá nvee dáà té nèe kọ á õ̀, vaá kọọ̀: “Ààẹ́ ló, èé ẹb be Èláíjà é dú gé túe tẹlẹ kunukẽ̀.” 37 Sõò Jíízọ̀s beè kòòlà kpã́ vaá gbóó ù. 38 Tṍóá, kàn e ba beè fùlmà mm̀ tọọ̀ káíá beè gbóó bààlà bàà báà aa gbàn deè dọ kunukẽ̀. 39 Tṍó e neǹ togó gbò bé ea beè di kĩá mon gbò nú ea nááá tṍó ea ú, à gbóó kọọ̀: “Kà-kà gé, gbálàí beè Sã́áná Bàrì.”

40 À íe gbò pábia e bà géè elá kpã́á ẹ̀b nàgé. Mérì ea dú Màgdálà nè Mérì ea dú kà Ńkem̀* Jém̀z nè Jósìs, nè Sàlómì beè dì vá ló. 41 Gbò pábiaí beè olòó dìé ló vaá nvèè bá nèe tṍó ea beè di Gálilì, vaá gã́bug dõona kà gbò pábia e ba beè zọ̀ẹ gbá tọ kil Jèrúselẹ̀m beè dì nàgé.

42 Tṍó ea é gé dú ló èlà Deé E Bà Ólò Kpoogá Dee Ló Nyòòmà Deè Bõ̀séi, naamá deé ea é zilà vaá dú Deè Bõ̀séi, 43 ene kà gbálà ea kọlà Jósẹ̀f ea dú Àrìmàtíà, ea ólò sí tóm Pọ̀b Tọ Bèèlaà Pá Júù ea géè elá nágé bànà Boǹ Méné Bàrì beè gbóó dù. A beè ié agẹ ló vaá àà sí ló Páílèt gé bànie kọ á neèe íí Jíízọ̀s. 44 Sõò Páílèt náa beè àgala boo kọ a ú. Vó beè naa kọ á kolí neǹ togó gbò béá vaá bĩináe beè Jíízọ̀s a ú. 45 Tṍó e neǹ togó gbò béá kọ́ nèe kọ a ú, à gbóó kọ́ nè Jósẹ̀f kọ à é láá tú a íí ààmà. 46 Tṍó ea ni dalàẹ tẹlẹ kunukẽ̀, à gbóó tú lé báà kàn ea beè zalí kọ̀lmàe vaá túe maamé mm̀ kóló dem e ba beè tòg. À gbóó kpọlẹ̀ báà dem uú gã́ kóló demá. 47 Sõò Mérì ea dú Màgdálà nè Mérì ea dú kà Jósìs beè dì e bà géè ẹ̀b kĩée ea lí e.