Lé Kpẹ̀a E Máàk Beè Emí
4 Jíízọ̀s beè gbóó kpáá noomà nu gbẹá gã́ pèneá, vaá gã́bug nen beè bõonáé ló. Vó à naa, à gbóó àà gé ĩìtẽ́ mm̀ faà sĩ́ múú vaá kpõ̀òà kil sĩ́ múú, sõò dénè gbòa beè gbẹá gã́ pèneá. 2 À gbóó dààmà togó gè noomà nu vaá tú nu dòòle ló loomá bel nè va kọọ̀: 3 “Pãanei tṍ! Neǹ kìl ól beè àà gè fó nu. 4 Boo tṍó ea gé fó nuá, sìgà súú beè dọ gã́ èèlè vaá gbò ńnóm à dù gé tigi ààmà. 5 Sìgà à dọ gbàà dem, kĩée e sãa á bọọgẹ̀ gè, vaá bà beè vàlẹ̀ bá sí mée boo béè kọọ̀ sãa náa beè bọọ́ tõ̀ò. 6 Sõò tṍó e gbei mo, à gbóó taá va naa ní e bà ọọ, boo béè kọọ̀ ba lí náa beè sii kẽ. 7 Sìgà súúá à dọ gbàà té e suu di ló, vaá téá à gbóó dùm uú va bá boo naa ní e bà náa múmí. 8 Sìgà beè dọ boo sãa ea dú lé, vaá ba beè sí mée vaá bọọ naa ní e bà dààmà togó gè mumí. Sìgà beè mumí 30 tóm, sìgà à mumí 60 tóm, vaá sìgà à mumí 100 tóm ní e ba beè fòa.” 9 Tṍóá, à gbóó kọọ̀: “Nen ea íe tṍ gè dãamá nu á dã̀.”
10 Tṍó ea ni dú áá ẹ̀ẹ̀, sìgà gbò e bà ólò nyoonée nvée bii ló Òb Nè Bàà Nená beè gbóó dààmà togó gè bĩináe bel ea kil ló gbò nu dòòle lóá. 11 À gbóó kọ́ nè va kọọ̀: “Bàrì a náa kọ boolo ó dãi ból ló nuù ke gũ̀a ea di káí ea kil ló Boǹ Méné Bàrì, sõò à tõó ló dénè nagbòa belí nu dòòle ló. 12 Vó à naa, kọbèè bà gé ẹb, bà náa é mon, vaá kọbèè bà gé pãane tṍ, bà náa é dã́ ból ló kà ea di m, àbẽ̀ènà ní e bà é oòa kẽ dú ló Bàrì naa ní ea é ia ló nè va.” 13 À gbóó kpáá kọ́ nè va kọọ̀: “Tṍó e bè nóo dã́ì ból ló nakà nu dòòle lóí, à é náa và ò dã́i ból ló gbò ní ea sígá ẹ́?
14 “Ból súú e neǹ kìl ólá fó dú kpẹ̀a ea kil ló Boǹ Méné Bàrì. 15 Gbò súú ea dọ́ gã́ èèlèa dú gbò e bà gé dã́ gé moǹ belá lọ̀l, Sétàn à gbóó dù gé tú moǹ bel e ba beè dã̀a lọ̀l vá m. 16 Níà bé ea meà nàgé naa ló gbò ní ea dọ́ gbàà demá ẽ́. Tṍó e bà ló moǹ belá nè va, bà gbẹá boo tú ẹ́ẹ́-ẹẹ̀ nyíe tuumá. 17 Ba beè dùm pọ́ì ńkem̀ tṍó, sõò ba lí náa síi kúm kẽ. Vó à naa, tṍó e bà téní bá tã̀àgã̀ àbèè bíígá ló boo béè mon belá, bà gbóó dọ̀. 18 À íe gbò ní ea dọ́ gbàà té e suu di ló. Níí dú gbò e bà dã́ moǹ belá, 19 sõò tã̀àgã̀ bùlà ea di mm̀ nakà bàlà booí nè kẹ̀lẹ̀ ea di ló gè gbó gyọ́ nè tàn ge ié kọ̀láá kà nu bã́ vá m, vaá gyẽeme moǹ belá naa ní e bà náa múmí ból súú. 20 Dee deè nvée, gbò ní ea dọ́ boo sãa ea dú léá bélí gbò e bà dã́ moǹ belá vaá tú lé bá tuumá, naa ní e sìgà múmí 30 tóm, sìgà à mumí 60 tóm, vaá sìgà à mumí 100 tóm ní e ba beè fòa.”
21 A beè kọ nágé nè va kọọ̀: “Gbò nen náa ólò mùn sã́ sẹlẹ́ kè ńkùn àbèè kè vái, sẹ̀ bà ólò naa vó é? É kọọ̀ bà náa ólò sẹlẹ́ boo nu gè mùn sã́ sẹlẹ́ boo? 22 Boo béè kọọ̀ náa íe nú ea di ke gũ̀a e náa é beè dọ bàlà kẽ, vaá kọ̀láá kà nu e bà palàge gṍ é beè dọ bàlà kẽ. 23 Kọ̀láá neń ea íe tṍ gè dãamá nu á dã̀.”
24 A beè kpáá kọ́ nè va kọọ̀: “Palàge pãanei tṍ ló gbò nú eo gé dã́ií. Nú eo doomàì nei dõona gbò ní e bà é doomà nè booloé, vaá bà é kpáá tẹlẹ ló nèi. 25 Boo béè kọọ̀ nen ea íe, bà é kpáá tú zivè tõò tẹlẹ ló nèe, sõò nen e bè náa íe, bà é tú bã̀àna ní ea beè dìé bá lọ̀líé bá.”
26 A beè kilsĩ́ gè kọ́ nè va kọọ̀: “Boǹ Méné Bàrì dì nàgé belí tṍó e ene kà gbálà sí gé fó sọ́gọ́ súú nu boo a ól. 27 À gbóó daa tṍó e dee bílá vaá kẽ̀èà aa boo tṍó e dee zilà. Súú ea beè fòa à gbóó sí mée vaá bọọ. Sõò ẹlẹ náa nyímá bé ea náa vaá à naaá naa vó. 28 Kunukẽ̀ ólá náa kọ bà á dùm vaá gbóó dààmà togó gè mumí. À ólò zẹ́ẹ́ èèlà zágá, à gbóó mumí kum, súú gbóó m-má ló kumá. 29 Tṍó ea ni kpóno, à ólò gbóó fùl boo béè kọ a léèvè.”
30 À gbóó kilsĩ́ gè kọọ̀: “Éé ní eé láá tú Boǹ Méné Bàrì doolé ló é, vaá mókà nu dòòle ló ní eé láá bààmà tẽ́ ẽ́? 31 À dì belí súú móstàd, ea ólò dú ńdígílí èl kọ̀láá íb súú té ea di boo kunukẽ̀í tṍó e ba beè fò. 32 Sõò tṍó e ba ni fó, à ólò bọọ èl kọ̀láá íb sọ́gọ́ nu e bà fó kè ól, vaá gbò a gbónó ólò bọọ naa ní e gbò ńnóm e bà gé pẹ́ẹ sĩ́ káála é láá tõó kè kẽ naamá ù-úù.”
33 A beè tú gã́bug íb nu dòòle lóí loomá bel nè va inmá kĩée ea nyímá kọọ̀ bà é láá dã́ tẽ́ ló. 34 Mm̀ kà-kà, náa ólò ló tọ́ọ̀ kà bel nè va e náa é tú nu dòòle ló loomá, sõò à ólò baatẽ́ kọ̀láá kà nu nè va tṍó ea dú áá pá a gbò nyòòne nvée nè ẹ̀ẹ̀.
35 Tṍó ea dú ló èlà deeá, à gbóó kọ́ nè va kọọ̀: “Naanii mè é ful kil na sábá pèneá.” 36 Tṍó e pá a gbò nyòòne nvée ni kọ́ nè gbòa kọ bà á àà, bà gbóó ọvíe mm̀ faà sĩ́ múú ea beè dìa ààmà, vaá dõona kà gbò faà sĩ́ múú beè dì vá ló. 37 Gbele bá kpóó fọ́ọ́lọ́ beè gbóó ùlà vaá tú dálí nvee mm̀ faàa, naa ní e sigè ńkem faàa gá díi. 38 Sõò dénè tṍóá, a beè dẹlẹ togó boo pílò vaá daa gbẹá deè nvéè faàa. Bà gbóó kẽée lọl boo vaá kọ́ nèe kọọ̀: “Neǹ Dòbá, é kọ nóo monì kọọ̀ èé gé pè?” 39 À gbóó aa boo kọ́ bel fọ́ọ́lọ́á vaá kọ́ nè pèneá kọọ̀: “Gbóó ọ̀b!” Fọ́ọ́lọ́á à gbóó fùlà, vaá dénè kẽ à gbóó ọ̀b. 40 À gbóó kọ́ nè va kọọ̀: “Éé ní ea náa vaá pọ̀ à siíi naa vó é? Naa kọọ̀ tẹlẹ̀ kátogóí, ò gáà iei gé zìgà?” 41 Sõò pọ̀ beè palàge sií va naa ní e bà kọ́ nè ene kọọ̀: “Níì mó íb není ẽ́? Bã̀àna fọ́ọ́lọ́ nè pène gbaníe tṍ ló.”