Lé Kpẹ̀a E Máàk Beè Emí

11 Tṍó e ba ni íná Bẹ́tfejì nè Bẹ́tanì ea di boo Gù Ólìv, ea di kuló Jèrúselẹ̀m, a beè gbóó lẹ̀ẹ̀là bàà nen e bà ólò nyoonée nvée 2 vaá kọ́ nè va kọọ̀: “Aalii gé bãí boń ea dìí lèlà sĩ́ àla. Ò gé bãi gé m, ò é monii põòni nom̀ tóòmà tò ea di dáà díí e tọ́ọ̀ nen gáà ĩìtẽ́ boo. Taalaíe vaá ò túíe domai. 3 Vaá beè nen bĩ́ínái kọọ̀, ‘Éé ní eo gé náániiá ẽ́?’ kọi neíe kọọ̀, ‘Neń Ea Íéi íe bíi ló, vaá à é valẹ̀ bá òòma kẽ domá.’” 4 Bà gbóó àà vaá mòn põòni nom̀ tóòmà tòa ea di dáà díí gã́ nùtọ ea di gã́ èèlè. Bà gbóó taaláẹ. 5 Sõò sìgà gbò e ba beè di élá kĩá à gbóó bĩiná va kọọ̀: “Éé ní ea náa ò gé táalai põòni nom̀ tóòmà tòí é?” 6 Bà gbóó kọ́ nè va gbõ̀ònà nú e Jíízọ̀s beè kọ̀a. Bà gbóó sọ̀va bá kọ bà á àà.

7 Bà gbóó tú põòni nom̀ tóòmà tòa domá ló Jíízọ̀s vaá tú ba pọ̀b kọ̀là ló zaalí boo. À gbóó ĩìtẽ́ boo. 8 Nagé, gã́bug nen beè tú ba pọ̀b kọ̀là ló talí boo èèlèa, boo tṍó e sìgà gbò géè fùl gṹ sã lẹ́ boo. 9 Vaá gbò e bà géè kyã̀à gyàẹ́ sĩ́ nè deè nvée géè vulí kpã́ kọọ̀: “È banì kọ ó dùùlàẹ! Tã́áná dee bá á di ló neń ea dú boo béè Jìhóvà!* 10 Bàrì a tã́ànè dee bá Boǹ Méné ea gé dú, ea dú níí bẹẹ tẹ̀ Dévìd! Bàrì eo di káála, è banì kọ ó dùùlàẹ!” 11 A beè gbóó bã Jèrúselẹ̀m, vaá àà sí tọọ̀ káíá gé ẹ̀b dénè nú ea di m. Sõò boo béè kọọ̀ tṍó a dú ló èlà, à gbóó faalá Òb Nè Bàà Neń e bà ólò nyoonée nvéeá kilma Bẹ́tanì.

12 Tṍó e dee ni zilà e bà gé aa Bẹ́tanì àà, tákói beè gbóó táẹ́ ló. 13 À gbóó tõó kpã́á mòn ene kà té fíìg e pà sãa di boo. À gbóó àà sí ló be à é monìè ból bè. Sõò tṍó ea íná ló, áá pà sãa ní ea beè mòn ẽ, boo béè kọ níì tṍó e fíìg ólò mumí nì. 14 À gbóó kọ́ nè téá kọọ̀: “Tọ́ọ̀ nen á gá de ná ból ea dú ní bè tọ́ọ̀ dee.” Vaá pá a gbò nyòòne nvée géè pãane tṍ ló belí.

15 Tṍó e bà íná Jèrúselẹ̀m, à gbóó bã boo beè tọọ̀ káíá, vaá dààmà togó gè kpó gbò e bà géè oo nu nè gbò e bà géè zalí nu tẹlẹ kèdẹi, vaá làbgì tébòl gbò e bà géè nyaaná kpègè nè kpòté gbò e bà géè oo kú-kuú kẽ, 16 vaá náa beè zìgà kọọ̀ tọ́ọ̀ nen á kpáá faalá ná nu tenmá boo beè tọọ̀ káíá. 17 À géè noomà nu vaá kọ́ nè va kọọ̀: “É kọ bà náa beè emí kọọ̀, ‘Bà é kolí ńdáà tọ kolíe tọ e dénè dó é tõó m tã̀àgã ló Bàrì’? Sõò boolo kiilàì naamai kóló zib.” 18 Tṍó e gbò togó vaala gyọ́ọ nè gbò émì kpá dã́ nú ea nááá, nè bé e a nòòmànù palàge bọọ́ ló gbò nen naa, pọ̀ à gbóó sií va lóóe. Bà gbóó gbĩ́ bé e bà é náa vaá fẹ́ẹ.

19 Tṍó e nàànì ni dọ, Jíízọ̀s nè gbò e bà ólò nyoonée nvée à gbóó aa boná àà. 20 Tṍó e dee ni zilà e bà gé téní kĩá boo lọ̀ọ̀le, bà gbóó mòn té fíìga ea ni ọọ dọ ló lí. 21 Pítà à gbóó kẽ̀èa boo vaá kọ́ nèe kọọ̀: “Neǹ Dòbá, Ẹ̀b! Mè té fíìg eo beè kọ́ belá a ọọ.” 22 Jíízọ̀s à kọ́ nè va kọọ̀: “Iei zìgà mm̀ Bàrì. 23 M̀ lóò kà-kà bel nèi kọọ̀, kọ̀láá neń ea kọ́ nè gùí kọọ̀, ‘Bùùà dọ pène,’ vaá náa íe bàà-bàà bùlà, sõò à íe zìgà kọọ̀ kọ̀láá nú ea kọ́ẹ̀ é nááá, à é nááá. 24 Níà nú ea náa m̀ kọ́ nèi kọọ̀, kọ̀láá nú eo bĩ́ìnàì bá Bàrì mm̀ tã̀àgã ló, iei zìgà kọ o íei, mè ò é íei é. 25 Tṍó eo gé tãagãi ló Bàrì, iai ló pọ́lọ́ e nen beè síi kọbé bọọ Tẹ̀ ea di káála láá ìà nàgé ló pọ́lọ́ e boolo beè sii.” 26* ——

27 A beè kpáá iná Jèrúselẹ̀m. Vaá tṍó ea gé kyãa mm̀ tọọ̀ káíá, gbò togó vààla gyọ́ọ nè gbò émì kpá nè gbò kàneǹ pá Júù beè gbóó dù, 28 vaá bĩináe kọọ̀: “Mó íb kpóó ní eo síìmà gbò tómí ẽ́? Àbèè kọọ̀ mée ní ea beè nè ni kpóó eo síìmà gbò tómí ẽ́?” 29 Jíízọ̀s à aalá nè va kọọ̀: “À íe ene kà bíb e nda é bĩ́íná nágé boolo. Aalai neḿ mi, mè m̀ é kọ́ nèi íb kpóó em ólò siimá gbò tómí. 30 É kọọ̀ Bàrì sẹ̀ nen ní ea beè nè kpóó Jṍòn kọ á diile nen múú ẽ́? Aalai neḿ mi.” 31 Bà gbóó dààmà togó gè kọ́ nè ene kọọ̀: “Be è kọ́ọ̀, ‘Bàrì ní ea beè nèe ẽ́,’ à é bĩ́ínái kọọ̀, ‘Vaá éé ní ea náa nóo beè zigaíé ló é?’ 32 Vaá née é láá kọọ̀, ‘Nen ní ea beè nèe ẽ́.’” Pọ̀ beè sií va ló nú e gbò nen é náànìè va boo béè kọ ba beè olòó ẹ̀b Jṍòn naamá neǹ kọ́ọ̀ bùlà Bàrì. 33 Bà gbóó aalá nè Jíízọ̀s kọọ̀: “Née nyímà.” Jíízọ̀s à gbóó kọ́ nè va kọọ̀: “Beè vó, nda ním é kọ́ nágé íb kpóó e nda ólò siimá gbò tómí nèi.”