“Aalii Gé Naanii Kọ Dénè Gbò Nen Á Nyooném̄”

1-2. (a) Nyòòmà lẹ̀ẹ̀là e Jíízọ̀s né mm̀ kpá Máátìù 28:​18-20, éé ní ea dú pọ̀bkà tóm ea di sĩ́ bõ̀ònatõ̀ò Kráìst e? (b) Mókà gbò bíb ní eé ló bel boo mm̀ nakà kpò nònùí ẽ́?

A BEÈ iè ge dú kọọ̀ nyíè gbò tóm Jíízọ̀s beè palàge ẹẹ tṍó e bà bṍóná boo gùa. Tṍó e Jíízọ̀s ni kẽeà aa kemà ú lọ̀l, a beè noo gè mòn va gbẹá kĩé. (Máát. 28:16) Be à sẹlẹ níà tṍó e ‘gã́ bug nen e a é zelí ló 500 [vòò gbò] nen e bà ólò nyoonée nvée beè gboó gbá mònie tẽ̀ènè tómá.’ (1 Kọ́r. 15:⁠6) Éé ní ea beè naa vaá Jíízọ̀s beè gbĩ́ gè mòn pá a gbò nyòòne nvée gbẹá kĩá ẽ́? A beè dú boo béè ge nè va tóm ea é ẹ́ẹ̀lẹ̀ va nyíe, a beè nè va tóm ea é zaavẹ́ va ló tṍó ea kọ́ọ̀: “Boo bée vó, aalii gé naanii kọ dénè gbò nen á nyooném̄.”​—⁠Bugi Máátìù 28:​18-20.

² Gbò nyòòne nvéè Kráìst e ba beè dã́ bel Jíízọ̀sa beè dũùnà bõ̀ònatõ̀ò Kráìst ea beè di mm̀ túá gbò gbááá. Kà pọ̀bkà tóm ea beè di sĩ́ bõ̀ònatõ̀òa beè dú gè naa kọ gbò nen á nyoone nvéè Kráìst.b Deè nieí, kà tõ̀ò bõ̀ònatõ̀ò gbò níí Kráìst dì beeá ló bàlà booí, vaá tẽ̀ènè kà tóm ní ea di sĩ́ kọ̀láá ọ̀và ẹ. Mm̀ nakà kpò nònùí, èé ló bel boo ténì kà bíb ea kọ́ọ̀: Éé ní ea náa vaá gè naa kọọ̀ gbò nen á nyoone nvéè Kráìst à palàge dì bíi é? Gbò éé ní ea bĩ́íná lọ̀líí báẹ́? É kọ dénè gbò nyòòne nvéè Kráìst é sí nakà tómí? Vaá éé ní ea náa vaá è ié bíi ló ĩ̀ìmà kọbé è láá sí tómí ẽ́?

ÉÉ NÍ EA NÁA VAÁ GÈ NAA KỌỌ̀ GBÒ NEN Á NYOONE NVÉÈ KRÁÌST À PALÀGE DÌ BÍI É?

3. Nyòòmà nú ea di mm̀ kpá Jọ́ọ̀n 14:6 nè 17:​3, Éé ní ea náa vaá tóm gè naa kọọ̀ gbò nen á nyoone nvéè Kráìst à palàge dì bíi é?

³ Éé ní ea náa vaá tóm gè naa kọọ̀ gbò nen á nyoone nvéè Kráìst à palàge dì bíi é? Boo béè kọọ̀ áá gbò nyòòne nvéè Kráìst ní e bàé láá dú kóò Bàrì e. Nagé, gbò e bà ólò nyoone nvéè Kráìst íe lé dùm kátogóí vaá ié ból dẽesĩ́ gè dé kpéè ló dùm boo kunukẽ̀í dọ̀ dè-dè. (Bugi Jọ́ọ̀n 14:6; 17:⁠3.) Mm̀ kà kà, Jíízọ̀s beè nèi kà pọ̀bkà tóm gè sì, sõò níì áá bẹ̀ì ní e ólò sí nakà tómíé nì. Neǹ tóm Pọ́ọ̀l beè emí kilma ló a bá nè dõòna gbò e ba beè dìé ló kọọ̀: “Beele gé gbá sí tóm nè Bàrì.” (1 Kọ́r. 3:⁠9) Ẹ̀b bé e níí dú kà lé tóm e Jìhóvà nè Kráìst ne gbò nen e bà náa gbõoma naaà!

4. Éé ní eé láá nó lọl ló nu dòòmà bá Ivan nè Matilde ẹ?

⁴ Tóm gè naa kọọ̀ gbò nen á nyoone nvéè Kráìst é láá nèi zààvà. Ni bugi togó boo nu dòòmà bá ea kil ló Ivan nè a va ea kọlà, Matilde, e bà di dó Colombia. Ba beè kọ́ kpẹ̀a nè ene kà nvín ãa gbálà ea bée kọlà Davier, ea beè kọ́ nè va kọọ̀: “M̀ gbĩ́ì ge nyaaná nà dùm, sõò ním láà nyaaná.” Davier beè dú nen ea ólò bé-bé deemá kpègè vaá ṍ pọ́lọ́ biè, ṍ míí tẽeá dẽe, vaá tõó ló ene kà nvín pá nyáá ea bée kọlà Erika naamá gã̀. Ivan beè baatẽ́ kọọ̀: “E beè dààmà togó gè zọ̀ẹ noá Kpá Káí. Ba bon beè di kà kpã́á, è ólò tú kà gã́bug ávà teemá kpé tení boo èèlè e gbá di ḿ-má boo besĩ́ è kálá iná. Tṍó e Erika mon bé e dùm Davier nyááá naa, a beè gbóó zọ̀i nó Kpá Káí.” Tṍó e tṍó téní, Davier beè gbóó òòà aa ló gè ṍ pọ́lọ́ biè, ge ṍ míí tẽeá dẽe nè ge bé-bé. A beè gbóó ilí Erika. Matilde kọ́ọ̀: “Tṍó e Davier nè Erika diìa múú mm̀ gbáá 2016, e beè kẽ̀èa boo kọ a beè olòó kọọ̀, ‘M̀ gbĩ́ì ge nyaaná nà dùm, sõò ním láà nyaaná.’ Nyíéi beè palàge ẹẹ naa ní e gĩ́i kalà ààí dẽe.” Tọ́ọ̀ kà bàà-bàà bùlà á gé ló, nyíéi ólò palàge ẹẹ tṍó e nveè bá nè gbò nen kọ bàá láá nyoone nvéè Kráìst.

GE NAA KỌỌ̀ GBÒ NEN Á NYOONE NVÉÈ KRÁÌST BĨ́ÍNÁ ÉÉ LỌ̀LÍÍ BÁẸ́?

5. Éé ní ea dú túá kà nú ea dú bíi kọ é naa mm̀ ge naa kọọ̀ gbò nen á nyoone nvéè Kráìst e?

⁵ Túá kà nú ea dú bíi kọ é naa kọbé è láá naa kọọ̀ gbò nen á nyoone nvéè Kráìst dú gè “gbĩ́” gbò e bà íe tàn ge nó nú ea kil ló Jìhóvà. (Máát. 10:11) È zógè kọ beeleè kà kà gbò Neǹ Ditõ̀ò Jìhóvà tení dú ló gè kọ́ kpẹ̀a nè kọ̀láá gbò e monì. Tṍó e gbanì tṍ ló lẹ̀ẹ̀là Jíízọ̀s ea kọ́ é kọ́ kpẹ̀a, è zógè kọ è dúù kà kà gbò nyòòne nvéè Kráìst.

6. Éé ní eé láá naa kọbé gbò nen pãanéi tṍ ló tṍó e gé kọ́ kpẹ̀a ẹ́ ?

⁶ Sìgà gbò íe tàn ge nó gbò kà kà bel ea di mm̀ Kpá Káí, sõò à ólò belí kọọ̀ gã́bug nen náa íe lèèma ló kà túá tṍó e ínà vá ló. Àé dú bíi kọ é siè va kpóó ló kọ á tàn va gè nó bọ̀ọ̀vẹ̀. Kọbé è láá sìm kilsĩ́ mm̀ bẹẹ sìtóm kọ̀ kpẹ̀aí, àé dú bíi kọ é palàge kpoogá dee ló. Sà gbò togó bel ea é láá leemá gbò eo é zọ nyòònà. Vaá ò gbóó noo bé eo é téní ló buù kà togó belá tẹlẹ èla naa.

7. Móbá ní eo é láá dààmà togó gè zọ̀ nen loá sọ́lẹ́, vaá éé ní ea náa vaá ò bùlà kọ à dú bíi kọ ó pãane tṍ ló dõòna gbò vaá fã̀ va dẽe ẽ́?

⁷ Dì belí nu dòòmà bá, òó laá bĩiná tẹ̀ íè tọá kọọ̀: “É kọ m̀ḿ láá bĩiná ni nakà bíbví: Gbele tõ̀ò tã̀àgã̀ e gé mon deè nieí tọ́á ló dénè nen beeá ló bàlà booí. É kọọ̀ olo bulà kọọ̀ gbò e bà gé bẹl gbò dó bàlà booí ní e bàé láá lọ̀l gbò tã̀àgã̀ ea di bàlà booí é?” Tṍóá, òó gbóó láá zọ̀ẹ loá bel boo nú ea di mm̀ kpá Dányẹ̀l 2:44. Òó láá kọ nágé nè nen kọọ̀: “Éé ní e olo bulà kọ à dú kà lé sĩ́deè ge bumá gbò nvín kọbé bà tõo lèlàẹ? À gáẹ̀ leemám gè dã́ o bùlà.” Tṍóá ò gbóó ló bel boo nú ea di mm̀ kpá Dìtolónomì 6:​6, 7. Kọ̀láá kà togó bel eo saà ge ló bel boo, bugi togó boo gbò e bà é pãané ni tṍ ló. Bugi togó boo bé e gè nó gbò kà kà bel ea di mm̀ Kpá Káí é nveè bá nè va naa. Tṍó eo gé zọ́ va loá bel, à dú bíi kọ ó pãané va tṍ ló vaá ò fã dẽè bel e bà ló. Níá é náa kọ ó palàge dã́va tẽ́ ló, vaá àé gbóó palàge leemá baala gè pãané ni tṍ ló.

8. Éé ní ea náa vaá èé kilsĩ́ gè kpáá olòó kãa nené?

⁸ Besĩ́ nen kálá beeláfùl ge zọ̀ ni noá Kpá Káí, àé dú bíi kọ ó noo tṍó vaá ò óloó sì gé kãáe. Ló éé? Boo béè kọọ̀ sìgà gbò náa ólò ié tṍó, tṍó e oòa kẽ sí vá ló. Nagé, àé láá dú bíi kọ ó òòa kẽ sí ló tẹ̀ íè tọ gã́bug tṍó besĩ́ à kálá zìgà ge zọ̀ ni noá Kpá Káí. Kẽ̀èa boo kọọ̀, à ólò valí ló té gè bọọ tṍó e bà ólòó tṍe múú ló. Mm̀ tẽ̀ènè sĩ́deèá, vulè e nen ea íé tàn ge nó Kpá Káí íe kilma ló Jìhóvà nè Jíízọ̀s ólò kpáá palàge bọọ tṍó e kilsĩ́ gè zọ̀ẹ loá bel boo Moǹ Bel Bàrì lee.

É KỌ DÉNÈ GBÒ NYÒÒNE NVÉÈ KRÁÌST É SÍ NAKÀ TÓMÍ?

9-10. Éé ní ea náa vaá èé láá kọọ̀ dénè gbò nyòòne nvéè Kráìst gé gbá síá tóm mm̀ ge gbĩ́ gbò e bà íe tàn ge nyoone nvéè Kráìst e?

⁹ À dú tóm ea dì nè kọ̀láá kà gbò nyòòne nvéè Kráìst ge gbĩ́ gbò e bà íe tàn. Èé láá tú tómí doolé ló gbò e bà gé gbĩ́ ńkem̀ nvín ea dágí pè. Mósĩ́ deè e? Zẹ́ẹ́ bugi togó boo nú ea beè naaá ló ene kà nvín págbálà ea ni tóólá taà gbáá ea beè dagí pè. Nú ea é tóólá 500 (vòò gbò) nen ní e ba beè sì gé gbĩ́e ẽ́. Bé ea é dú 20 ávà aa ló tṍó e nvíná beè pèa, enè nen ea dṹùnà gbò e ba beè tú lóó nè ge gbĩ́eá beè gbóó mònie boo bàlà ól. Nená náa beè zìgà kọ bàá leelàẹ̀ẹ boo béè kọ ẹlẹ ní ea monìè nvíná ẽ́. A beè kọọ̀: “Gã́bug nen ní ea beè gbĩ́e besĩ́ bà kálá mònìe ẽ́.

¹⁰ Gã́bug nen dì belí nvín ea beè pèa. Bà náa íe ból dẽesĩ́, sõò bà íe bíi ló nvèè bá. (Ẹ́fẹ. 2:12) Dénè bẹ̀ì e sígà ló aatáà gãà gbò nen gé gbá sí tóm gè gbĩ́ gbò e bà íe tàn. Àé láá dú gè kọọ̀ níì olo ní eo é mon nen ea íe tàn ge nó Kpá Káí é nì. Sõò dõòna gbò kọ̀ kpẹ̀a e bà gé zọ́ ni kọ́ kpẹ̀a gbẹá tẽ̀ènè ketõ̀ò gé láá mòn nen ea íe tàn ge nó kà kà bel ea di mm̀ Moǹ Bel Bàrì. Tṍó e enè neǹ vígà mon nen ea dú gé nyoone nvéè Kráíst, nyíè dénè bẹ̀ì e géè gbá gbĩ́ nená ólò gbóó ẹẹ.

11. Kabèè nóo íè nen eo gé zọ noá Kpá Káí, mókà dõòna kà gbò sĩ́deè ní eo é láá naa kọọ̀ gbò nen á nyoone nvéè Kráìst e?

¹¹ Kabèè náa íe nen eo gé nóòmà Kpá Káí kátogóí, òó láá nvèè bá gè naa kọọ̀ gbò nen á nyoone nvéè Kráìst mm̀ dõòna kà gbò sĩ́deè. Dì belí nu dòòmà bá, tṍó eo monì ãa nen gbẹá nònù, òó láá zààvàẹ́ ló vaá ò nveè bá nèe. Vulè e íè kìlmà vá ló é náa kọ bàá àgala boo kọọ̀ è dúù kà kà gbò nyòòne nvéè Kráìst. (Jọ́ọ̀n 13:​34, 35) Kabèè bíb eo áàlà gbẹá nònù náa bọọ́ beg, àé láá noòmà gbò e bà ã́àa sí nònù kọ bàá áálá bel. Òó láá zọ̀ nàgé ãa neǹ kọ̀ kpẹ̀a siá tóm vaá nvèè bá nè nèe kọ á láá noòmà nuù gbò nen lọl mm̀ Kpá Káí. Tṍó eo náà vó, ò gé nóòmàe kọ á nó Kráìst.​—⁠Lúùk 10:​25-28.

12. É kọ à dú bíi kọ é zẹ́ẹ́ ié kele íb tál besĩ́ è kálá naa kọ gbò nen á nyoone nvéè Kráìst? Baatẽ́.

¹² Náa dú bíi kọọ̀ tọ́ọ̀ bẹ̀ì é bugi togó kọọ̀ èé zẹ́ẹ́ ié kele íb tál besĩ́ è kálá noòmà nuù dõòna gbò kọ bàá nyoone nvéè Kráìst. Ló éé? Ni bugi togó boo nú ea beè naaá ló Faustina ea ólò tõó dó Bolivia. Náa beè láá olòó bugi nu tṍó ea beè dààmà togó ge gbaaá ló Gbò Neǹ Ditõ̀ò Jìhóvà. Lọl tṍóá ààmà, pábiaí beè gboó dààmà togó gè nó gè bugi nu ńkem-kem̀. A diìa múú kátogóí, vaá à ólò leemáe ge noòmà nuù dõòna gbò. À ólò noòmà Kpá Káí vòò nen buù sè. Náa kal ló béè kọọ̀ Faustina gáà laa palàge bugi nu belí gbò e ẹlẹ ólò noòmà Kpá Káí, a láá nvèè bá nè ọ̀ọ̀lẹ̀ nen kọ bàá dììa múú.​—⁠Lúùk 10:⁠21.

13. Kabèè lóói ọọ, éé ní ea dú sìgà gbò tã́áná dee bá eé láá ié be è náa kọọ̀ gbò nen á nyoone nvéè Kráìst e?

¹³ Gã́bug gbò níí Kráìst ólò dú kíìli-kíìli boo béè kọ bà íe gi gã́bug nú ea dú bíi gè naa. Sõò, bà ólò noo tṍó nyòòmà ge noòmà nàgé kpá Káí gbò nen. Nvèè kpíí ló nú dòòmà bá ene kà vígà pábia ea kọlà Melanie. Áá ẹ̀ẹ̀ ní ea géè bumá a nvín pábia ea ni tóólá aatáà gbááẹ́ gbẹá dó Alaska. À beè dì nàgé ló tóm bèkéè ea náa kọ á láá ẹ̀b nú ea kil ló a ka e kánsà dié ló. Áá Melanie ní ea beè dú neǹ vígà mm̀ boná ẽ́, vaá a beè di kpã́á aa ló dõòna kà gbò bon. A beè olòó tã̀àgã ló Bàrì kọ á neèe kói gè tenmá gbàà tọ́ọ àà gé kọ́ kpẹ̀a, boo béè kọọ̀ a beè ié tàn ge noòmà Kpá Káí nen. A beè gbóó mòn Sara, e nyíée beè palàge ẹẹ ló gè nyimá kọọ̀ Bàrì íe bée. Tṍó e sìgà tṍó téní, Sara beè gbóó zìgà ge nó Kpá Káí. Melanie beè kọọ̀: “Lóó m̄ ólò palàge ọọ́ boo ló èlà deè Friday, sõò nà nvín pábia nè m̀m̀ ólò àà gé noòmàe Kpá Káí vaá a beè palàge dọ̀ bèlè nèi. È ólò dé kpéè ló gè gbĩ́tẽ́ ló gbò ààla ea kuu bíb e Sara bĩ́ínái, vaá nyíéi beè palàge ẹẹ tṍó e monì kọ à dú kóò Jìhóvà.” Sara beè ié agẹló vaá ĩ̀ìmà kèbá nàà uú boo, a beè aa ló gè sí tọ Bàrì vaá dììa múú.

NÚ EA NÁA VAÁ GÈ NAA KỌỌ̀ GBÒ NEN Á NYOONE NVÉÈ KRÁÌST À BĨINÁ Ĩ̀ÌMÀ

14. (a) Mósĩ́ deè ní e gè naa kọọ̀ gbò nen á nyoone nvéè Kráìst dì belí gè kpó dọọ̀ ẹ? (b) Gbò moǹ bel Pọ́ọ̀l ea ẽ́á mm̀ 2 Tímotì 4:​1, 2 tọ́á ló olo naa vàẹ?

¹⁴ Kàbèè ò gáà nvèè bá nè tọ́ọ̀ nen kọ á nyoone nvéè Kráìst, lóó ni á gá ọọ ló gè gbĩ́ ãa gbò e bà ié tàn ge nyoone nvéè Kráíst. Kẽ̀èa boo kọọ̀ Jíízọ̀s beè tú sìtóm kọ̀ kpẹ̀aí doolé ló gè kpó dọọ̀. Gbò e bà gé kpó dọọ̀ ólò tú gã́bug ávà kpoomá dọọ̀ besĩ́ bà kálá sii gyã́à. Bà ólò bọ̀ọ̀gè kpó dọọ̀ imá kpã́á tóm bílá dee àbèè kà bòm dee, vaá sìgà tṍó bà ólò ọví faà sĩ́ múú kil kà kpã́á ketõ̀ò. (Lúùk 5:⁠5) Mm̀ tẽ̀ènè sĩ́deèá, sìgà gbò kọ̀ kpẹ̀a ólò tú gã́bug tṍó nè “ĩ̀ìmà nvee mm̀ ge kọ́ kpẹ̀a imá ló gbò nen kele-kele tṍó nè gbẹá kele-kele ketõ̀ò. Ló éé? Kọbé bà láá mòn gã́bug gbò e bàé nóòmà Kpá Káí. Gbò e bà sí tóm agẹlẹ bá mm̀ nasĩ́ deèí ólò ié bélè lọl ló boo béè kọọ̀ bà ólò mòn gbò e bà íe tàn ge dã́ lé kpẹ̀aí. É kọ òó láá dò ge kọ́ kpẹ̀a tṍó eo é láá palàge mòn gbò nen àbèè kiẽ́e eo é palàge mòn gbò nen?​—⁠Bugi 2 Tímotì 4:​1, 2.

15. Éé ní ea náa vaá gè noòmà kpá Káí nen ólò bĩiná ĩ̀ìmà ẽ?

¹⁵ Éé ní ea náa vaá gè noòmà kpá Káí nen ólò bĩiná ĩ̀ìmà ẽ? Ene kà bug ea di nvée dú gè kọ à dú bíi gè naa kọọ̀ nen e gé nóòmà Kpá Káíá á nò vaá vùlè gbò nú e Kpá Káí nóòmà. Á dú nágé bíi kọ é nvèè bá nèe kọ á vùlè nen ea beè emí Kpá Káí, ea dú Jìhóvà. Gba nagé ló gè noòmàe nú e Jíízọ̀s bĩ́íná lọl bé pá a gbò nyòòne nvée, à dú bíi kọ é nvèè bá nèe kọ á nyimá sĩ́deè bé ea é tõó dùm belí kà kà neǹ Kráìst naa. Sìgà gbò e ólò noòmà Kpá Káí a láá nyááná ba láb mm̀ kóló sìgà ẽ́; vaá à ólò tu gã́bug ẽ́ àbèè gbáá bá sìgà gbò.

16. Éé ní eo nóò lọl ló nú ea beè naaá ló Raúl ẹ?

¹⁶ Nú ea beè naaá ló ene kà nen ea ólò kọ́ kpèa aa dó dọ dó gbẹá dó Peru baatẽ́ lé nú ea ólò sìlà aa ló gè ié ĩ̀ìmà. Neǹ kọ̀ kpẹ̀aí beè kọọ̀: “M zọ nen em ólò noòmàe nu ea bée kọlà Raúl noá bàà kà kpá, sõò à beè i-íé kà agẹbá tã̀àgã̀ mm̀ dùm. A beè ié kà agẹbá tã̀àgã̀ mm̀ a ílà dóm nè va, à ólò bọ́ọ̀gẹ̀ ló gbóò gã́ bel vaá zilá zíl, vaá a lábví beè naa kọọ̀ pá a nvín á gá fã̀e dẽe. Náa kal ló béè vó, à ólò sí nònù lee, m beè olòó kãáe vaá nvèè bá nè ẹlẹ nè pá a tọ. A beè gbóó láá sìm tùlà ge dììa múú tṍó e nú ea sígá ló taà gbáá ni téní aa ló deé em beè dààmà togó gè noòmàe Kpá Káí.”

17. Éé ní eé nó mm̀ kpò nònù ea bẽene níí ẽ́?

¹⁷ Jíízọ̀s beè kọ́ nèi kọọ̀ “aalii gé naanii kọ dénè gbò nen á nyooném̄.” Kọbé è láá sí nakà tómí mm-mè, èé ié bíi ló gè kọ́ kpẹ̀a nè gbò e nú e bà ziga ló dú kele ló ńbeele, bii nagé ló gbò e bà náa ólò sí tọ́ọ̀ kà bõ̀ònaló fã̀ àbèè ge zìgà kọọ̀ Bàrì dì. Kpò nònù ea bẽene níí é beè baatẽ́ bé eé láá kọ́ kpẹ̀a nè íb gbòí naa.