Kilsĩ́ Gè Bọ́ló Dẹ̀lẹ̀ Nyíé Boo Kilma Ló Jìhóvà

Kà kà gbò níí Kráìst náa ólò zìgà kọọ̀ tọ́ọ̀ nu àbèè nen á oomàè va lọl ló gè fã̀ Jìhóvà. Tọ́ọ̀ kà bàà-bàà bùlà á gé ló kọọ̀ níà bé e olo gbĩ́ nàgé naaé. Jìhóvà nveè ka ló o bọ́ọ̀ló dẹ̀lẹ̀ nyíé boo. (Bugi 1 Krónikòl 28:9.) Mókà gbò dìtõ̀ò ní ea é láá dòà o bọ́ọ̀ló dẹ̀lẹ̀ nyíé boo é, vaá mósĩ́ deè ní eo é láá bé èlbá ẹ́?

1. Mósĩ́ deè ní e dõòna gbò é láá tú bẹẹ bọ́ọ̀ló dẹ̀lẹ̀ nyíé boo kilmá ló Jìhóvà nvee kèbá ẹ̀bmà ẽ?

Sìgà gbò é láá piiga boo gè òòmài lọl ló gè fã̀ Jìhóvà. Bà mée ní e bàé láá naa vó é? Sìgà gbò e ba beè dọ̀ aa mm̀ kà kàí ólò kpọ́ kyáá bel ló bõ̀ònatõ̀ò Bàrì kọbé à ọọvẹ ló bẹẹ zìgà. È nyímà va ló naamá gbò e bà ólò bé uú boo nòòmànù Kráìst. Nagé, sìgà gbò tùle bõ̀ònaló fã̀ ólò kpọ́i kyáá bel ló boo béè ge naa kọọ̀ gbò e bà náa nyímá kà kà bel á òòà aa ló gè fã̀ Jìhóvà. Náa dú lé gè zọ̀ gbò e bà ólò naa uuí boo tàlà bel, ge bugi ba kpá àbèè gbò nú e bà émí boo íntanèt, ge sí boo ba website, àbèè ge ẹ̀b ba gbò vídiò. Jíízọ̀s beè kọ́ kilma ló gbò e bà gbĩ́ gè ọọvẹ ló dõòna gbò naa ní e bà náa é bọ́ná ló dẹ̀lẹ̀ nyíé boo nè Jìhóvà kọọ̀: “Aalíí vá ló. Ọ̀vàà gímá dẽè gbò tùle. Beè neǹ gímá dẽe túlè neǹ gímá dẽe, pálaa ọ̀và é gbá dọ bànà.”—Máátìù 15:14, NW.

2. Mósĩ́ deè ní e béèlàfùl e neè é láá dòà bẹẹ bọ́ọ̀ló dẹ̀lẹ̀ nyíé boo é?

Bẹẹ vulè kilma ló Jìhóvà é náa kọ é gá naa tọ́ọ̀ kà nú ea é túi gbá ló bõ̀ònaló kyáá fã̀. Náa bọ́ló kọọ̀ bẹẹ tóm, bõ̀ònaló e gbááà ló àbèè dõòna kà nu á naa kọ é naa nú ea é túi gbá ló bõ̀ònaló kyáá fã̀. Jìhóvà ãanéi kọọ̀: “Aaliié m [Gbele Bábilọ̀n], e pá nà gbò.”—Kùùà Nù 18:2, 4.

KPÁÁ NÓ BỌ̀Ọ̀VẸ̀

3. Ié ọ̀ẹ̀ dẽe ea kil ló gbò e ba nòòmànù dú kyáá

Éé ní ea bọ́ló kọ é naa be è dã́à pọ́lọ́ bel ea kil ló bõ̀ònatõ̀ò Jìhóvà ẹ? Bugi Próvẹẹ̀b 14:15, vaá ò gbóó aalai nakà bíbví:

• Éé ní ea náa vaá èé ọ́ẹ̀ dẽe kọbé née zigà kọ̀láá kà nú e dã́àe?

Bugi 2 Jọ́ọ̀n 9-11, vaá ò gbóó aalai gbò bíbví:

• Móbá ní ea bọ́ló kọ é sẹ̀ẹ̀mà gbò e bà gé bé uú boo nòòmànù Kráìst e?

• Mósĩ́ deè ní eé láá zọ̀ gbò e bà gé bé uú boo nòòmànù Kráìst loá bel kọbèè née monà sĩ́ nè sĩ́ ẽ́?

• Ò bulà kọ àé tõó ló Jìhóvà naa vàẹ be è pãane tṍ ló pọ́lọ́ bel ea kilíé ló àbèè a bõ̀ònatõ̀ò ẽ?

4. Kilsĩ́ gè bọ́ló dẹ̀lẹ̀ nyíé boo kilma ló Bàrì tṍó e neǹ vígà sí pọ́lọ́

Be è nyímá kọọ̀ neǹ vígà sí pọ́lọ́, éé ní ea bọ́ló kọ é naa ẽ́? Bugi togó boo ene kà nòòkúu ea di mm̀ log e Bàrì beè nè pá Ízràẹ̀l deè kéléá. Bugi Lìvítikọ̀s 5:1.

Dì belí bé e dọ̀ Kpá Káíí kọ́ naa, be è nyímá kọọ̀ neǹ vígà sí agẹbá pọ́lọ́, à bọ́ló kọ é kọ́ nu e nyímà nè gbò kànen. Sõò besĩ́ è kálá naa vó, àé dú lé be è kọ́ nè nená kọ á kọ́ a pọ́lọ́ nè gbò kànen. Be náa zigà ge naa vó, àé bọ́ló kọọ̀ beele é kọ́ kọ̀láá nú e nyímà nè gbò kànen gè zogè kọọ̀ è bọ́ẹ̀ ló dẹ̀lẹ̀ nyíé boo kilma ló Jìhóvà. Mósĩ́ deè ní e gè naa vó zógè kọọ̀ è íè vulè ea kyãà mm̀ bọ́ọ̀ló dẹ̀lẹ̀ nyíé boo kilma ló . . .

• Jìhóvà Bàrì e?

• nen ea sí pọ́lọ́á ẹ́?

• dõòna gbò e bà di mm̀ bõ̀ònatõ̀ò ẽ?

5. Ó gá tú lóó gbá ló Gbele Bábilọ̀n

Bìlà VÍDIÒÍ.

VÍDIÒ: Tení Aa Mm̀ Gbele Bábilọ̀n! (5:06)

Bugi Lúùk 4:8 nè Kùùà Nù 18:4, 5, vaá ò gbóó aalai gbò bíbví:

• É kọọ̀ ńdáà bée di-dí zẹ̀ẹ̀ béè gbò e bà dṹùna ene kà bõ̀ònaló kyáá fã̀?

• É kọọ̀ m̀ dṹùnà bõ̀ònaló ea di kè kẽè dõòna kà bõ̀ònaló fã̀?

• É kọọ̀ tóm em ólò sì nveè sãa kúm bõ̀ònaló kyáá fã̀?

• É kọọ̀ à íe nú em ólò naa ea gbááá ló bõ̀ònaló kyáá fã̀ ea é bọ́ló kọ ḿ kpòòlà lóó lọl ló?

• Éé ní ea bọ́ló kọ ḿ naa be à íe bíb ea di zẹ̀ẹ̀ gbò bíbví e nà aalá dú ẽei ẽ́?

Mm̀ kọ̀láá kà nú eo gé náa, nè béèlàfùl ea é náa kọ ó ié õ̀òa bug vaá zogè kọọ̀ ò bọ́ọ̀ló dẹ̀lẹ̀ nyíé boo nè Jìhóvà.

NÚ E NI NÓ

Kọbé è láá kilsĩ́ gè bọ́ló dẹ̀lẹ̀ nyíé boo kilma ló Jìhóvà, àé dú bíi kọ é òòà aa ló gè zọ̀ gbò e bà gbĩ́ gè kẹlẹ́i naaá nu.

Ge Òòa Boo

• Éé ní ea náa vaá náa bọ́ló kọ é pãane tṍ ló gbò nú ea aa bá gbò a bà gé bé uú boo nòòmànù Kráìst e?

• Be è nyímá kọọ̀ neǹ vígà sí agẹbá pọ́lọ́, éé ní ea bọ́lọ́ kọ é naa ẽ́?

• Mósĩ́ deè ní eé láá gbàntṍ ló ã̀àne ea kọ́ é tení aa mm̀ kyáá bõ̀ònaló fã̀e?

KPÁÁ GBĨ́ TẼ́ LÓ

Nyimá nú eo é láá naa tṍó e gbò nen kpọ́ kyáá bel ló Gbò Neǹ Ditõ̀ò Jìhóvà.

“Do You Have the Facts?” (Kpá Tọ Kùdẽe Ló, August 2018)

Mósĩ́ deè ní eo é láá nyimá ló bõ̀ònaló àbèè tóm ea nveè sãa kúm Gbele Bábilọ̀n ẽ?

“Kilsĩ́ Gè Olòó Naa Bùlà Bàrì ‘M Gbò Dee E Tṍó’ É Gé Tàí” (Kpá Tọ Kùdẽe Ló, October 2019, 16-18 kpò)

Éé ní e sìgà gbò nàà uú boo ni náa mm̀ ge gbĩ́ gè ọọvẹ ló bẹẹ zìgà ẹ?

Ié Ọ̀ẹ̀ Dẽe Kọbé Bà Náa Kẹlẹ́ Ni (9:32)

Mm̀ nòòtẽ́ ea kọọ̀ “I Had Been Looking for God Since Childhood,” bugi nú ea kil ló bé e ene kà neǹ tùle bõ̀ònaló fã̀ pá Shinto beè láá aa mm̀ kyáá bõ̀ònaló fã̀ naa.

“The Bible Changes Lives” (Kpá Tọ Kùdẽe Ló, July 1, 2011)