Mósĩ́ Deè Ní Eo É Láá Naa Kọọ̀ Nyíè Jìhóvà Á Ẹẹ Ló Bé Eo Lóò Bel Naa Ẽ́?

Jìhóvà beè dèmii mm̀ sĩ́deè ea náa kọ é láá ló bel—ea dú kà kele íb dõ̀ònù. É kọọ̀ bé e túù dõ̀ònùí siimá tóm naa ólò bọọẹ́ ló? Ẽei! (Bugi Jém̀z 1:26.) Vóà naa, mósĩ́ deè ní eé láá ló bel mm̀ sĩ́deè ea é náa kọọ̀ nyíè Jìhóvà á ẹẹ ẹ́?

1. Mósĩ́ deè ní eé láá tú nakà dõ̀ònùí siimá tóm boo bá ea bọ́ló é?

Kpá Káí kọ́ọ̀: “Nveenii kpóó ló ene vaá ò nveenii bá nei ene.” (1 Tẹ̀sàlónaikà 5:11) É kọ ò nyímà ló gbò e bà íe bíi ló sìà kpóó ló? Éé ní eo é láá naa mm̀ ge nvèèmà bá nè va ẹ́? Naa kọ bàá nyimá kọọ̀ ò bulàẹ̀ nú ea kil vá ló. Be à sẹlẹ, òé láá kọ́ nú ea léémá ni ea kil vá ló nèva. É kọọ̀ à íe dọ̀ Kpá Káí eo bulà kọọ̀ àé láá siè kpóó ló nen eo nyímà ló? À íe gã́bug dọ̀ Kpá Káí eo é láá naamá vó. Kẽ̀èà nàgé boo kọọ̀, bá eo lóòmà bel é láá tọá ló nen belí bel eo lóò. Boo béè vó, pììga boo gè olòó tú gbọ́ọ́-gbọọ̀ ló nè lé bá loomá bel nè gbò nen.—Próvẹẹ̀b 15:1.

2. Móbá ní e bè náa bọ́ló kọ é loomá bel é?

Kpá Káí kọ́ọ̀: “Ó gá zigai kọọ̀ pọ́lọ́ bel á ààí gã́.” (Bugi Ẹ́fẹsọ̀s 4:29.) Níí tõó dọ̀ kọọ̀ née é ló pọ́lọ́ bel àbèè ge ló gbóò gã́ bel ea é biile nyíè nen. Èé ooà nàgé aa ló gè bã̀ pílì nè ge tenmà dém ló nen.—Bugi Próvẹẹ̀b 16:28.

3. Éé ní ea é nveè bá nèi kọ é ló gbò bel ea é síè kpóó ló nen ẽ́?

Gã́bug tṍó gbò bel e lóò ólò tú nu ea dìí nyíe tẹlẹ bàlà kẽ. (Lúùk 6:45) Vóà naa, à dú bíi kọ é bumá bẹẹ bá naa ní eé ólòó ká bùlà gbẹẹ́ boo gbò nú ea dú lé, dì belí gbò nú ea lelà, nú ea õoà, nú ea léémá gbò nen, nè nú ea bọ́ló gè lèèlà. (Fílipaì 4:8) Kọbé è láá ká dẽe gbẹẹ́ boo gbò nuí, à bọ́ló kọ é tú nyìmànù sààmà bẹẹ kólì kyáà nè gbò kóò e bãaà. (Próvẹẹ̀b 13:20) À ólò du nagé lé gè tú tṍó bùgmà togó boo bel besĩ́ è kálá lò. Bugi togó boo bé e gbò bel eo lóò é láá tọá ló dõòna gbò naa. Kpá Káí kọ́ọ̀: “Bel e nen ló e bè náa bugi togó boo bélí gẹ̀ ea ku nen, sõò bel ea aa gã́ neǹ nyìmànù ólò bó nen.”—Próvẹẹ̀b 12:18.

KPÁÁ NÓ BỌ̀Ọ̀VẸ̀

4. Lẹ̀ẹ̀là bel ló bé eo lóò bel naa

Sìgà tṍó, dénè bẹ̀ì ólò ló bel e tṍó e tṍó téní è ólò ọgá ló. (Jém̀z 3:2) Bugi Gàlésìà 5:22, 23, vaá ò gbóó aalai gbò bíbví:

• Mókà zẹ̀ẹ̀ gbò kpãaí ní eo é láá bàn Bàrì kọ á neè ni kọbé ò láá lẹ̀ẹ̀là bel ló bé eo lóò bel naa ẽ́? Mósĩ́ deè ní e gbò kpãaí é láá nvèè bá nè ni ẽ́?

Bugi 1 Kọ́rìnt 15:33, vaá ò gbóó aalai nakà bíbví:

• Mósĩ́ deè ní eo kólì kyáà nè gbò kóò eo bãaà é láá tọá ló bé eo lóò bel naa ẽ́?

Bugi Ẹ̀klìzíástìs 3:1, 7, vaá ò gbóó aalai nakà bíbví:

• Mó tṍó ní ea é dú lé kọ ó zẹ́ẹ́ pĩigã́ àbèè ge zẹ́ẹ́ elá dọ̀ọ̀mà tṍó ea é bọ́ló kọ ó ló bel é?

5. Ló lé bel ea kil ló dõòna gbò

VÍDIÒ: Ló Bel ‘Ea Dú Lé Ea É Nveè Bá Vaá Siè Kpóó Ló’ Dõòna Gbò (4:07)

• Mm̀ vídiòá, éé ní ea beè naa kọọ̀ vígà págbálàá á gbĩ́ gè nyaaná bá ea ólò loomá bel ea kil ló dõòna gbò e?

• Éé ní ea beè naa kọbé à nyááá ẽ́?

Bugi Ẹ̀klìzíástìs 7:16, vaá ò gbóó aalai nakà bíbví:

• Éé ní ea bọ́ló kọ é kẽ̀èa boo tṍó e bãà kèbá ẹ̀bmà ge ló pọ́lọ́ bel ea kil ló dõòna gbò e?

Bugi Ẹ̀klìzíástìs 7:21, 22, vaá ò gbóó aalai nakà bíbví:

• Mósĩ́ deè ní e dọ̀ Kpá Káíí é láá nvèè bá nè ni kọ ó gá bã̀ súng tṍó e bà ló pọ́lọ́ bel ea kil ní ló é?

6. Tú lé bá loomá bel nè pá o tọ

VÍDIÒ: Vulà Nè Fã̀ Dẽe Ólò Gbá Pá Tọ (3:08)

• Éé ní ea é nveè bá nè ni kọ ó tú lé bá loomá bel nè pá bọọ tọ ẹ́?

Bugi Ẹ́fẹsọ̀s 4:31, 32, vaá ò gbóó aalai nakà bíbví:

• Mókà gbò bel ní ea ólò siè kpóó ló pá tọ ẹ́?

Jìhóvà beè kọ́ bé ea vulè a Sã́aná, ea dú Jíízọ̀s naa. Bugi Máátìù 17:5, vaá ò gbóó aalai nakà bíbví:

• Mósĩ́ deè ní eo é láá nó Jìhóvà mm̀ bá eo zọọmà pá bọọ tọ loá bel é?

NÚ E NI NÓ

Bel e lóò ólò tọá ló nen. Àé bọ́ló kọ é palàge bugi togó boo bel eé ló, tṍó eé ló, nè bá eé lóómá.

Ge Òòa Boo

• Mókà gbò sĩ́deè ní eo é láá ló bel ea é nveè bá nè dõòna gbò e?

• Mókà gbò bel ní eo gbĩ́ì ge òòà aa ló gè lò e?

• Éé ní ea é láá nvèè bá nèi kọ é olòó ló lé bel nè bel ea é síè kpóó ló nen ẽ́?

KPÁÁ GBĨ́ TẼ́ LÓ

Éé ní ea é láá nvèè bá nèi kọ é ló gbò bel ea é síè kpóó ló dõòna gbò e?

Ló Bel Mm̀ Sĩ́deè E Nyìmànù Di M (8:04)

Nó nú ea é láá nvèè bá nè ni kọ ó gá ló gbóò gã́ bel.

“Is Cursing Really That Bad?” (Web article)

Nyimá nú eo é láá naa kọbé nóò bãà pílì ló nen.

Mósĩ́ Deè Ní Em Láá Kùb Ge Bã̀ Pílì E? (2:36)

Nyimá bé e Jìhóva beè nvèè bá nè ene kà gbálà kọ á láá òòà aa ló gè olòó ló gbóò gã́ bel naa.

“I Began to Think Seriously About Where My Life Was Headed” (Kpá Tọ Kùdẽe Ló, August 1, 2013)