Gbò Ketõ̀ò E Bà Kólí Nyòòmà Dùm Nè Kpá Bõ̀ònaló Sìtóm Kọ̀ Kpẹ̀a
© 2023 Watch Tower Bible and Tract Society of Pennsylvania
JANUARY 1-7
GBÒ GYỌ́ EA DI MM̀ MOǸ BEL BÀRÌ | JÓÒB 32-33
Nvèè Nyíé Gbàà Gbò E Bà Íe Tã̀àgã̀ Bùlà
it-1 710
Èláíhù
Èláíhù náa beè ié dùm bààsĩ́, àbèè ge lèèlà nen zelmá kẽ. A beè nyimá kọọ̀ dì belí Jóòb, loo bã́ ní e ba beè demàèe ẽ́, vaá Nen Ea Bọọ Lọ̀l Vaá À Lee ní ea beè demèèe ẽ́. Èláíhù náa beè gbĩ́ gè siimà pọ̀ Jóòb sõò a beè ló bel nèe belí kà lé kóò, a beè tú béè Jóòb kolmáe, ea dú nú e Ẹ́lifàz, Bíldàd, àbèè Zófà náa beè naa.—Jóòb 32:21, 22; 33:1, 6.
w14 6/15 25 ¶8-10
É Kọ Ò Ólò Ẹ̀b Lọ̀ Dõona Gbò Belí Bé E Jìhóvà Ẹb Naa?
8 Èé láá kpáá ié tóè sàn be è kẽèa boo kọọ̀ lóó sìgà pá vígà págbálà nè pábia a ọọ boo béè agẹ bá dìtõ̀ò e ba ni téní bá, dì belí zọ̀ kpá ló, ge di tọ e dénè nen á gé mm̀ kà-kàí, àbèè tã̀àgã̀ bùlà. Íb nú ea mèà naa vó é láá naaá nágé ló beele. Ba beè kẽeé nyíè pá Ízràẹ̀l e ba beè dú tãa gbẹá Íjèpt besĩ́ bà kalá bã boo kunukẽ̀ zìgànùa kọ bàá gá ‘agẹlẹ nyíe’ ló pá ba vígà e bà gé téní bá tàvàlà dìtõ̀ò. Jìhóvà beè gbĩ́ gè kọ bàá mòn kọọ̀ à bọ́ló gè nvèè bá nè gbò tãa.—Dìt. 15:7, 11; Lìv. 25:35-38.
9 Tãa vó e béèlà bel ló àbèè ge tú pọ́lọ́ dẽe ẹ̀bmà gbò e bà gé téní bá tàvàlà dìtõ̀ò, èé nveè va nyíé gbàà tení dú ló gbò moǹ bel ea di mm̀ Kpá Káí. (Jóòb 33:6, 7; Máát. 7:1) Ge nè nu dòòmà bá: Tṍó e bùló nu nááá nen ea géè ọví faà vaá bà teemàe kilma tọọ̀ biè, é kọọ̀ gbò e bà ólò bó nen ólò zẹ́ẹ́ gbĩ́ gè nyimá beè ẹlẹ ní e lọ̀ dú bá ẹ́? Ẽ́èe, bà ólò gbẹá boo bóe. Mm̀ tẽ̀ènè sĩ́deèá, beè tã̀àgã̀ náa kọọ̀ lóó neǹ vígà á ọọ, nú eé sẹẹ̀a sĩ́ dú gè nvèè bá nèe kọ á láá ié lé gbaa ló kilma ló Jìhóvà.—Bugi 1 Tẹ̀sàlónaikà 5:14.
10 Be è bugi togó boo gbò dìtõ̀ò e pá vígà gé téní bá, àé láá naa kọ é tú dõona bá ẹ̀bmà ba ọ́ọ́-ọọ. Bugi togó boo gbò vígà pábia e ba ni ĩimà bá nàà uú boo ea aa bá pá ba tọ mm̀ gã́bug gbáá. Mèà sìgà ọ̀và é láá naa kọ á belí kọ bà náa aga ló, sõò ba láb zógè kọ bà íe agẹ zìgà nè agẹ ló. Tṍó eo monì kà e áá ẹ̀ẹ̀ ní ea gé búmá pá a nvín ẽ́ vaá à ólò fáálá va domá nònù lee, é kọ íb zìgà nè sìà kpóó ló ea íe náa ólò leemá ni? Vaá èé kọ́ vàẹ kilma ló gbò nvín ãa e bà bii bá ló kà-kàí náa kal ló béè kọọ̀ bà gé téní bá tã́gĩ̀ bá gè naa nú e bè náa dú lé gbẹá tọọ̀ kpá ẹ́? Mm̀ kà-kà, è monì kọọ̀ sìgà gbò e bà di kèbá íb dìtõ̀òí “íe agẹ zìgà” belí nágé gbò e bà di lé dìtõ̀ò, náa kal ló béè kọọ̀ ba mèà é láá naa kọ á belí kọ bà náa aga ló.—Jém̀z 2:5.
Mó Tṍó Ní Ea Lelà Ge Ló Bel É?
17 Èláíhù ea dú dúà ló Ébràhàm ní ea beè egè ténì nen ea beè ló bel nè Jóòb e. A beè pãane tṍ tṍó e Jóòb nè nakà taà kà pá a kóòa géè ló bel. A beè palàge pãane tṍ ló nu e bà géè kọ̀ boo béè kọọ̀ a beè láá nè dùùlà bá deè tṍ ea bọ́ló vaá lèlà, vaá níí beè nvèè bá nè Jóòb kọ á le-le dee bá bé ea bugi togó naa. (Jóòb 33:1, 6, 17) Nú ea beè palàge dú bíi ló Èláíhù beè dú gè nvèè ka ló Jìhóvà, e bè níì ge nvèè ka ló a bá àbèè dõona nèn nì. (Jóòb 32:21, 22; 37:23, 24) Nu dòòmà bá Èláíhùí nóòmài kọọ̀ à íe tṍó gè pĩi gã́ vaá pãane tṍ ló bel. (Jém̀z 1:19) È nó nàgé kọọ̀ tṍó e gé dùùlà bá deè tṍ nen, pọ̀b kà nú eé sẹẹ̀a sĩ́ á dú gè nvèè ka ló Jìhóvà, níì beélè bá nì.
18 Èé láá zogè kọ è nveè ka ló dõ̀ònù ge ló bel, tení dú ló gè tõó boo dùùlà bá deè tṍ ea di mm̀ Kpá Káí ea kil ló tṍó nè sĩ́deè eé lóómá bel. Kèbá tùle nyómá káí, Méné Sólomòn beè emí kọọ̀: “Dì belí nóò kpé e bà dem mm̀ nú e ba beè tú ẹ́ẹ́ kpé tõomá, níà bé e bel e nen ló tṍó ea bọ́ló meà naa ẽ́.” (Pró. 25:11) Tṍó e palàge pãane tṍ ló bel e dõona gbò ló vaá bugi togó boo besĩ́ è kálá ló bel, gbò bel ea é aàí gã́ é bélí gbò nu e ba beè tú nóò kpé dèmàa—àé dọ bélè vaá kpe tṍ. Kọbèè è lóò gbele tõ̀ò àbèè pọ́ì ńkem̀ bel, bẹẹ bel é síè kpóó ló dõona gbò, vaá à náa kọọ̀ nyíè Jìhóvà á ẹẹí ló. (Pró. 23:15; Ẹ́fẹ. 4:29) Níí ní ea dú kà lé sĩ́deè ge zogè kọọ̀ nyíéi ẹ́ẹ́ ló nakà dõ̀ònù ea aa bá Bàrìí é!
Gbò Lé Nu Ea Di Mm̀ Kpá Káí
w13 1/15 19 ¶10
Kilsĩ́ Gè Dũ̀ùà Bã Kpàn Jìhóvà
10 Mm̀ tẽ̀ènè sĩ́deèá, náa dú pọ́lọ́ gè bugi togó boo bẹẹ mèà. Sõò náa dú bíi kọ é pììga boo gè lọ̀l kọ̀láá kà nú ea zógè kọọ̀ è gé dú kànen mm̀ dee. Gbò nuí é láá nvèèi ka ló, zogè kọ è íè lé kpãa, nè ge kọọ̀ togói a sim tùlà nu. Dì belí nu dòòmà bá, Kpá Káí kọ́ọ̀: “Kyọọlẹ̀ dú pẹ̀gẹ̀lẹ̀ ka tṍó ea di ból neǹ lé lab dògò.” (Pró. 16:31) Níà bé e Jìhóvà ẹbvíi naa ẽ́, vaá níà bé ea bọ́ló kọ é ẹ̀b bẹẹ bá naa ẽ́. (Bugi 1 Pítà 3:3, 4.) Vóà naa, náa dú nú e nyìmànù di m gè pee gã́bug tṍó nyòòmà ge tú bóa ea dú gẹẹ-gẹẹ ló boo béè bé ea é náa vaá è gbẹá ãa vaá kpáá dú lé. “Zààvà ea aa bá Jìhóvà” ní ea ólò naa kọọ̀ nen á ié dĩ̀ìnè ló bùlà ẹ, e náa dẹẹ̀a boo válá kpáló e nen íe àbèè gbáá e nen ni tóólá. (Nìh. 8:10) Áá mm̀ ãa bàlà boo ní e nen é íe gbõ̀òme válá ló vaá kpáá dú ãa ẽ́. (Jóòb 33:25; Àìz. 33:24) Sõò besĩ́ à kálá dọ̀ tṍóá, ge labví láb e nyìmànù di m nè ge ié zìgà é nveè bá nèi kọ é davá gbẹá ló Jìhóvà boo tṍó e gé náa nú e bẹẹ dìtõ̀ò sọ́i bá kọ é naa.—1 Tím. 4:8.
JANUARY 8-14
GBÒ GYỌ́ EA DI MM̀ MOǸ BEL BÀRÌ | JÓÒB 34-35
Tṍó Ea Bélí Kọọ̀ Nu Náa Nááá Boo Bá Ea Bọ́ló
wp19.1 8 ¶2
Mó Íb Nen Ní E Bàrì Dú É?
Bàrì ólò naa nú ea dú lé lee. Kàsĩ́, “àé dú nú e nyìmànù á gé m, kọọ̀ kà-kà Bàrì é lábví láb mm̀ sĩ́deè ea dú pọ́lọ́, nè ge kọọ̀ Nen Ea Bọọ Lọ̀l Vá À Lee é náa nú ea dú pọ́lọ́!” (Jóòb 34:10) Gbò a bèèla bel lelà, dì belí bé e neǹ ọ́lì sọ́l beè kọ́ naa kilma ló Jìhóvà kọọ̀: “Òé béélá bel ló gbò nen mm̀ sĩ́deè ea lelà.” (Psalm 67:4) Boo béè kọọ̀ “Jìhóvà ólò mòn mm̀ nyíè nen,” nen náa é láá kẹlẹ́ẹ, à nyímá nú ea dú kà-kà vaá à ólò beelá bel boo bá ea lelà. (1 Sámuẹ̀l 16:7) Gbá ló vó, Bàrì mon kọ̀láá kà pọ́lọ́ bèèla nè pọ́lọ́ e gbò nen gé sí boo kunukẽ̀í vaá à zigà kọọ̀ pọ́ì ńkem̀ tṍó àla, “àé kyọ̀ẹ̀ sĩ́ gbò pọ́lọ́ . . . lọl boo kunukẽ̀í.”—Próvẹẹ̀b 2:22.
w17.04 10 ¶5
Éé Ní E Bè Náa É Di Nà Tṍó E Boǹ Méné Bàrì Ni Dú É?
5 Éé ní e Jìhóvà é náa ẽ́? Kà lèlà katogóí, Jìhóvà gé ne deè gbò pọ́lọ́ lab dògò kọ bàá nyaaá. (Àìz. 55:7) Bà gáà ié ba dee deè nvéè bèèla bel. Nakà kúúlíí ní e Bàrì ni béélá bel bẽèe. Sõò éé é nááá ló gbò e bà náa zigà ge nyaaá, e bà kilsĩ́ gè nvèè sãa kúm nakà bàlà booí dọ̀ọ̀mà tṍó pọ̀b kpo tã̀àgã̀ ẽ? Jìhóvà beè zìgà kọ àé kyọẹ̀ sĩ́ gbò pọ́lọ́ lọl boo kunukẽ̀í dọ̀ọ̀mà dè-dè. (Bugi Psalm 37:10.) Gbò pọ́lọ́ é láá tuumá kọọ̀ bà diè pọ́ì aa bá íb bèèla belá. Gã́bug nen a nó gè láá gṍ nú e bà gé náa, vaá mm̀ nakà bàlà booí, gã́bug tṍó bà ólò láá kìl aa bá bèèla bel nè nú ea gáẹ̀ sìlà aa mm̀ ba láb. (Jóòb 21:7, 9) Sõò Kpá Káí kẽeéí nyíe kọọ̀: “Súú dẽè Bàrì di boo gbò nen, vaá À ólò mòn dénè nú e bà gé náa. Náa íe tọ́ọ̀ kà kè gín àbèè kĩée ea kuu gín e gbò pọ́lọ́ lab dògò é láá gũá.” (Jóòb 34:21, 22) Náa íe kĩée e bàé láá gũá aa kèsĩ́ Jìhóvà Bàrì. Tọ́ọ̀ nen ea ólò gṍ nú ea dú náa é láá kẹlẹ́ẹ; tọ́ọ̀ ketõ̀ò náa é láá kuu gín iná kĩée e Bàrì náa é láá mòn kọ̀láá kà nú ea gé nááá. Tṍó e bé Àmágidòn ni íná kùbmà, èé beè ẹ̀b kĩée e gbò pọ́lọ́ beè olòó dì, sõò née é mon ná va. Bà náa é di nà dọ̀ dè-dè!—Ps. 37:12-15.
É Kọ Òó Zigà Kọọ̀ Enè Íb Nu Á Òòmà Ni Lọl Ló Gè Nyoone Nvéè Jíízọ̀s?
19 É kọọ̀ gbò nuí gé nááá gé deè nieí? Ẽei. Gã́bug nen deè nieí ólò kìnii boo béè kọọ̀ née gbáàà ló bìlà bẹlbẹ̀l. Bà ólò gbĩ́ kọ é tẹlẹ̀ kpá. Sõò beele nyímà kọọ̀ be à gá náa è tẹlẹ̀ kpá nè gbò nen kọ bàá bẹ̀lii, è kiǹ Jìhóvà. (1 Sám. 8:4-7) Àé láá tõó ló sìgà nen kọọ̀ à bọ́ló kọ è gáẹ̀ beè tìbgì tọọ̀ kpá nè tọọ̀ biè vaá sí dõona kà gbò tóm ea é dọ bélè nè gbò nen. Bà náa ólò pãanéi tṍ ló tṍó e gé kọ́ kpẹ̀a boo béè kọọ̀ è káà bùlà gbẹẹ́ boo bẹẹ sìtóm kọ̀ kpẹ̀a, tãa vó e lọlì gbò tã̀àgã̀ ea di mm̀ bàlà booí.
20 Éé ní eé láá naa kọbé née ooà aa ló gè fã̀ Jìhóvà ẹ? (Bugi Máátìù 7:21-23.) Pọ̀bkà nú eé ká bùlà gbẹẹ́ boo dú gè sí tóm e Jíízọ̀s beè nèi kọ é sì. (Máát. 28:19, 20) Née é zigà kọọ̀ kpóó bẹlbẹ̀l àbèè ge kpoogè dee ló gbò tã̀àgã̀ ea di bàlà booí á maaná bẹẹ bùlà. È vulè gbò nen vaá bùlà nú ea kil ló tã̀àgã̀ e bà íe, sõò è nyímà kọọ̀ kà lé sĩ́deè ge nvèèmà bá nè gbò nen dú gè noomà va nú ea kil ló Boǹ Méné Bàrì, nè ge nvèè bá nè va kọ bàá ié kà lé gbaa ló kilma ló Jìhóvà.
Gbò Lé Nu Ea Di Mm̀ Kpá Káí
w17.04 29 ¶3
Naanii Kọọ̀ Bọọ Dùm Ge Tú Lóó Nè Á Nvèè Ka Ló Jìhóvà!
3 Jìhóvà náa beè le-le dee bá Èláíhù boo béè kọ à bĩ́íná kọọ̀: “Be ò dúù neǹ lé lab dògò, éé ní eo neè [Bàrì] e; éé ní ea ólò ié lọ̀l ní bá ẹ́?” (Jóòb 35:7) É kọọ̀ Èláíhù géè kọọ̀ bẹẹ pììgà ge fã̀ Bàrì náa dọ tọ́ọ̀ kà bélè? Ẽ́èe. À géè kọọ̀ níì bẹẹ fã̀ ní ea sẹlẹ Jìhóvà ẹ nì. Jìhóvà gbõoma. Née é láá naa kọ á bã̀ méné àbèè ge naa kọ á kpáá aga ló. Boo dõona bá, kọ̀láá kà lé nú e náà, kalì e íè, àbèè kói e íè aa bá Bàrì, vaá à ólò nvèè kpíi ló bé e síìmà tóm naa.
JANUARY 15-21
GBÒ GYỌ́ EA DI MM̀ MOǸ BEL BÀRÌ | JÓÒB 36-37
Nú Ea Náa Òó Láá Dẹlẹ Nyíé Boo Zìgànù Bàrì Ea Kil Ló Dùm E Bè Náa Tá
w15 10/1 13 ¶1-2
É Kọ Èé Láá Gbĩ́ Bàrì Mòn?
GÃ́BUG TṌÓ E BÀRÌ NI TÕOMA DÙM: Kpá Káí nóòmà kọọ̀ Bàrì dì “lọl tṍó e kùbmà á gé ló tẹlẹ tṍó e kùbmà á gé ló.” (Psalm 90:2) Boo dõona bá, Bàrì náa íe dààà togó vaá náa é íe ke kùbmà. Dẹ̀ẹ̀a boo bé e gbò nen ólò ẹ̀b nu naa, “nen náa é láá dã́ ból ló gã́bug gbáá ea ni tõoma dùm.”—Jóòb 36:26.
Bé ea dọ bélè nè ni naa: Bàrì zigà dùm e bè náa tá nè ni be à gá náa ò dù gé nyimáe ló. (Jọ́ọ̀n 17:3) Bàrì gáẹ̀ láá naa và mm-mè íb zìgànùí beè ẹlẹ náa é di dọ̀ dè-dè e? Áá “Méné ea dì dọ̀ dè-dè” ní ea é láá mm-mè íb zìgànùí ẽ́.—1 Tímotì 1:17.
É Kọ Ò Nveè Gé Ka Ló Gbò Dõ̀ònù E Bàrì Né Ni?
6 Múú ólò di boo kunukẽ̀í boo béè kọọ̀ kĩée boo kunukẽ̀í dì aa ló nàànì náa kọọ̀ é láá ié múú. Be à gá náa vaá boo kunukẽ̀í beè kpáá kpõ̀òà ńkem kil ló nàànì, dénè múú ea di boo kunukẽ̀í gáẹ̀ beè ulí kãa tá kẽ, vaá tọ́ọ̀ nu ea di dùm náa gáẹ̀ beè láá tõó boo. Be à gá náa vaá boo kunukẽ̀í beè kpáá kpõ̀òà kil kpã́á aa ló nàànì, dénè múú gáẹ̀ beè àgà dú báà, vaá zivèkà bàlà booí gáẹ̀ dú gbele pọ̀b ból báà múú. Boo béè kọọ̀ Jìhóvà beè tú boo kunukẽ̀í sẹlẹ́ kà lé ketõ̀ò, náa kọọ̀ múú á láá naa kọọ̀ gbò nú ea di dùm á kilsĩ́ gè tõó dùm. Kói ea aa ló nàànì ólò naa kọọ̀ múú ea di pène nè boo kunukẽ̀í á bẹ̀à sã́ vaá gbóó dùùlà múúá kilma sĩ́dee naa ní ea é dú bù dee. Buù gbáá, gã́bug múú e nàànì ólò dùùlà kilma sĩ́dee ólò palàge bọọ́ tõ̀ò èl dénè múú eo é láá mongi mm̀ kòòla. Múúí ólò tõó sĩ́dee mm̀ nú ea é láá dú òb dee besĩ́ à kálá dọọ dú boo àbèè báa-báà múú. Múúí ólò gbóó ọví òòà kil pène àbèè ọọ, vaá kpáá kãa nagé kil sĩ́dee kọbé à dọọ. Jìhóvà beè naa vóí kọbé múú kilsĩ́ gè di boo kunukẽ̀í. Níí zógè bé e Jìhóvà nyímá nu vaá ié kpóó naa.—Jóòb 36:27, 28; Ẹ̀klì. 1:7.
Kilsĩ́ Gè Agẹlẹ Ló O Ból Dẽesĩ́
16 Bẹẹ ból dẽesĩ́ ea kil ló gè tõó dùm dọ̀ọ̀mà dè-dè dú dõ̀ònù e ka di ló ea aa bá Bàrì. È gé ẹbmà dẽè dì deèsĩ́ ea dú dũ̀ùnè—e agàla boo kọ àé nááá. À bélí lòmà ea sííi sẹlẹ́ tẽ̀ènè dọ̀ kọbé è láá ĩ̀ìmà tã̀àgã̀, bíígá ló, vaá ié agẹ ló tṍó e kpeè sĩ́ ló ú. À bélí nágé pẹ̀gẹ̀lẹ̀, ea kpenà bẹẹ bug kọbé è láá kìn nú ea dú pọ́lọ́ vaá naa nú ea dú lé. Bẹẹ ból dẽesĩ́ ea dẹẹ̀a boo Kpá Káí náa kọ é tõo bã ló Bàrì vaá naa kọ é mòn bé ea palàge vùlèi naa. Be è kilsĩ́ gè naa kọọ̀ bẹẹ ból dẽesĩ́ á aga ló, àé dọ bélè nèi.
Gbò Lé Nu Ea Di Mm̀ Kpá Káí
it-1 492
Loa Sọ́l
Ba beè olòó naa kọọ̀ bel á zààlà aa bá na nená dọ bá dõona nen mm̀ kele-kele sĩ́deè gbẹá gbò kĩée e ba beè tõo emí Kpá Káí. Ba beè olòó bọ̀ọ̀gẹ̀ tú gã́ kọọmá gbò nú ea gé nááá kĩée e bà dì nè ní ea gé nááá kpã́á nè dõona gbò. (2 Sám. 3:17, 19; Jóòb 37:20) Gbò e bà ólò bã mm̀ gbò fãà e nom ólò kpọlẹ̀ siimá kyẽè, ólò gbóó nootẽ́ gbò kpẹ̀a ea aa kpã́á tṍó e bà élá dé gyã́á, ṍ múú, nè tṍó e bà gé náa dõona kà gbò nu gbẹá gbò pọ̀b boná àbèè gbẹá gã́ èèlè kĩée e gbò fãà e nom ólò kpọlẹ̀í ólò tení. Kĩée e Palestine beè dì ló Asia, Africa, nè Europe beè naa kọ á valí ló gbò e bà ólò bã mm̀ gbò fãà e nom ólò kpọlẹ̀ ge tení sí gbò kĩée ea dú kpã́á vaá tení nágé òòa kẽ. Vó beè naa kọ á valí ló gbò e bà di kĩá gè dã́ gbò nú ea gé nááá dõona kà gbò dó. À ólò valí gè dã́ gbò nú ea gé nááá dóá nè ní ea gé nááá dõona kà gbò dó gbẹá kèkiì boná.
JANUARY 22-28
GBÒ GYỌ́ EA DI MM̀ MOǸ BEL BÀRÌ | JÓÒB 38-39
É Kọ Ò Ólò Ié Tṍó Gè Ẹ̀bmà Gbò Nú E Bàrì Beè Dèm?
É Kọ Ò Di Kpènà Ló Gè Elá Bànà Jìhóvà?
7 Tṍó e Kpá Káí gé baatẽ́ bé e Jìhóvà beè dèm boo kunukẽ̀í naa, à ló bel ea kil ló a gè “dò,” nú e bà “tú a bã̀ ĩgẽ boo,” nè a “gá ból.” (Jóòb 38:5, 6) A beè tu nágé tṍó bùgmà togó boo gbò tóm ea ni sí. (Jén. 1:10, 12) É kọọ̀ òó láá dòòmà dẽe ló bé ea beè tọá ló gbò nyómá tóm naa tṍó e bà mon kọọ̀ gbò nú e Jìhóvà gé dem a daamà togó gè ié mèà? Nyíé va beè palàge ẹẹ naa ní e bà daamà togó gè “kpá bá.” (Jóòb 38:7) Éé ní e níá nóòmài ẽ́? Jìhóvà beè tú gã́bug gbáá dèmà nu, sõò tṍó ea ẹb dénè nú ea beè tú ọ̀ẹ̀ dẽe dèmà, a beè gbóó kọọ̀ à “palàge dú lé.”—Jén. 1:31.
Kẽ̀èà Aa Kemà Ú Zógè Kọọ̀ Bàrì Ié Vulè, Nyìmànù, Nè Ĩ̀ìmà
2 Túá kà, Jìhóvà beè dèm nen ea é zọ́ẹ siá tóm. Tṍóá sõò, a beè gbóó tú a Sã́áná dèmà “kọ̀láá kà nu,” bii nagé ló gã́bug gãà gbò nyómá tóm. (Kọ́l. 1:16) Nyíè Jíízọ̀s beè palàge ẹẹ gè zọ̀ a Tẹ̀ siá tóm. (Pró. 8:30) Vaá nyíè gbò nyómá tóm beè palàge ẹẹ nagé. Ba beè mònmà dẽe tṍó e Jìhóvà nè Jíízọ̀s ea géè zọ̀ẹ siá tómá géè dèm káála nè boo kunukẽ̀í. Éé ní e gbò nyómá tóm beè naa ea zógè kọ nyíé va beè ẹẹ ẹ́? Ba beè “vulí kpã́ vaá kpá bá” tṍó ea dem boo kunukẽ̀í, vaá kilsĩ́ gè lèèlàẹ tṍó ea kpáá dèm dõona kà gbò nu, èlmà tõ̀ò gbò nen. (Jóòb 38:7; Pró. 8:31, ekk.) Buù kà nú e Jìhóvà beè dèm zógè bé ea ié vulè vaá nyimá nu naa.—Ps. 104:24; Róm̀ 1:20.
Kpáá Nó Gã́bug Nú Ea Kil Ló Jìhóvà Tení Dú Ló Gbò Nú Ea Beè Dèm
8 À bọ́ló kọ é dẹlẹ nyíé boo Jìhóvà. Jìhóvà beè nvèè bá nè Jóòb kọ á kpáá dẹlẹ̀ẹ̀ẹ nyíé boo. (Jóòb 32:2; 40:6-8) Tṍó ea géè zọ̀ Jóòb loá bel, a beè ló bel kilma ló gã́bug nú ea beè dèm, dì belí gbò gyã́à káála, bù dee, nè kói ea di ló náà káála. Jìhóvà beè lo nágé bel kilma ló gbò nom, dì belí dom láo nè nyà-nyà. (Jóòb 38:32-35; 39:9, 19, 20) Dénè gbò nuí zógè kọọ̀ Bàrì bọọ́ mm̀ nyìmànù, kpóó, nè vulè. Loa sọ́lí beè nvèè bá nè Jóòb kọ á kpáá dẹlẹ nyíé boo Jìhóvà èlmà bé ea beè dì naa. (Jóòb 42:1-6) Mm̀ tẽ̀ènè sĩ́deèá, tṍó e nóò nú ea kil ló gbò nú e Bàrì beè dèm, à ólò kẽeí nyíe kọọ̀ áá Jìhóvà ní ea palàge nyimá nu vaá ié kpóó ea bọọ lọ̀l vaá à lee é. Àé beè nvèè kùbmà ló dénè bẹẹ tã̀àgã̀. Ge nyimá níí é náa kọ é kpáá dẹlẹ́ẹ nyíé boo.
Gbò Lé Nu Ea Di Mm̀ Kpá Káí
it-2 222
Nen Ea Ólò Nè Log
Jìhóvà ní ea dú Nen ea ólò nè log é. Jìhóvà ní ea dú kà lèlà Nen ea ólò nè log beeá ló bàlà booí é. Ẹlẹ ní ea íe gbò log ea gé lẹẹlà bel ló gbò nú ea beè dèm e bè á gé dùm (Jóòb 38:4-38; Ps. 104:5-19), nè gbò nom ẽ́. (Jóòb 39:1-30) Boo béè kọọ̀ Jìhóvà ní ea beè dèm gbò nen ẽ́, bà dì nàgé kè kẽè a log, vaá tã́gíní bé e gbò nen ólò láá bugi togó vaá sẹlẹ kelé zẹ̀ẹ̀ nú ea dú lé nè nú ea dú pọ́lọ́, vaá láá ié lé gbaa ló kilma ló Bàrìa, à lelà kọ bàá tõó kè kẽè log Bàrì ea kil ló nú ea dú lé nè nú ea dú pọ́lọ́. (Róm̀ 12:1; 1 Kọ́r. 2:14-16) Gbá ló vó, log Jìhóvà ólò bẹl boo gbò nyómá tóm, ea dú gbò dèmnù ea di mm̀ nyómá.—Ps. 103:20; 2 Pít. 2:4, 11.
Gbò nen náa é láá kyọ̀gàlà gbò log Jìhóvà ea ólò lẹ̀ẹ̀là bel ló gbò nú ea beè dèm. (Jèr. 33:20, 21) Beeá ló zivè kà bàlà booí kĩée e dẽè gbò nen láá mòà, gbò log Bàrì náa ólò nyaaá vaá à dú ní e nen é láá dẹ̀ẹ̀a boo, vó a náa kọọ̀ gbò e ba beè nó sã́ìns á láá nyimá nú ea kil ló gbò logí náa ní e ba ni láá nyimá bé e ẽ́, gbò ból bàlà boo, nè dõona kà gbò nú ea di sĩ́dee mèà naa. Kọ̀láá nen e bè náa tõó boo gbò log ea gé lẹẹlà bel ló gbò nú e Bàrì beè dèm e dẽè nen moà ólò gbẹá boo mòn tã̀àgã̀ ea dú ló. Mm̀ tẽ̀ènè sĩ́deèá, gbò nen náa é láá nyaaná log Bàrì ea kil ló nú ea lelà àbèè nú e bè náa lelà àbèè ge gbĩ́ sĩ́deè ge ààma bá àbèè ge kyọ̀gàlà log Bàrì e bà náa é íe kpọ̀té ea dú ló. Tẽ̀ènè áá báá, è agàlà nàgé boo kọọ̀ gbò e bà lọl togó kèbá gbò log ea gé lẹẹlà bel ló gbò nú e Bàrì beè dèm é mon nagé tã̀àgã̀ ea dú ló, náa kal ló béè kọọ̀ sìgà tṍó ba kpọ̀té náa ólò dú tẽ̀ènè tṍóá. “Tọ́ọ̀ nen náa é láá gĩimá Bàrì. Kọ̀láá nú e nen fó ní ea é buulà ẹ.”—Gàl. 6:7; 1 Tím. 5:24.
JANUARY 29–FEBRUARY 4
GBÒ GYỌ́ EA DI MM̀ MOǸ BEL BÀRÌ | JÓÒB 40-42
Gbò Nú Eé Láá Nó Lọl Ló Nú Ea Beè Naaá Ló Jóòb
w10 10/15 3-4 ¶4-6
“Mée Ní Ea Ni Nyímá Bùlà Jìhóvà Ẹ?”
4 Tṍó e bugì togó boo gbò nú e Jìhóvà ni náa, àé dú bíi kọ é òòà aa ló gè beelá bel ló Bàrì dẹ̀ẹ̀a boo bé e gbò nen ẹb nu naa. Kpá Káí kọ́ nú ea kil ló gè ẹ̀b nú mm̀ nasĩ́ deèá mm̀ kpá Psalm 50:21, tṍó ea kọ́ọ̀: “O beè ié bùlà kọọ̀ nda dì belí olo.” À dì belí bé e enè nen ea ólò nó Kpá Káí beè kọ́ naa mm̀ nú ea sígá ló 175 gbáá ea kil nvéeá naa kọọ̀: “Gbò nen ólò ẹ̀b kọ à lelàẹ̀ vá ló gè beelá bel ló Bàrì, vaa tuumá kọọ̀ à bọ́ló kọọ̀ Bàrì á tõó boo nú e baala ẹb kọ à lelà.”
5 À dú bíi kọ é ọẹ̀ dẽe kọbé née túù bé e beele ẹb nu naa nyaamá ló níí Jìhóvà, kọbé à gbááá ló beélè nòòkúu nè gbò nú ea léémá beele. Éé ní ea náa níí à dú bíi é? Boo tṍó e gé nó Kpá Káí, àé láá tõoí ló belí kọọ̀ sìgà sĩ́deè e Jìhóvà ólò naamá nu náa lelà dẹ̀ẹ̀a boo beélè sĩ́deè ge ẹ̀bmà nu e náa gbõoma. Pá Ízràẹ̀l deè kéléá beè ẹ̀b nàgé nu mm̀ na sĩ́deèá vaá nvèè kùbmà ló mm̀ sĩ́deè e bè náa bọ́ló kọọ̀, bá e Jìhóvà lábmá láb kilmàè vá ló náa dú lé. Nvèè kpíí ló nú e Jìhóvà beè kọ́ nè va, tṍó ea kọ́ọ̀: “Òé kọ́i kọọ̀: ‘sĩ́deè e Jìhóvà náámá nu náa lelà.’ Sóo-sóo, dãi e pá tọọ̀ Ízràẹ̀l. É kọọ̀ níì bé e nda náà nu naa ní ea lèlàẹ nì? É kọọ̀ níì bé e boolo náà nìì nu naa ní e bè náa lelàẹ nì?”—Èzí. 18:25.
6 Ene kà pọ̀b kà nú ea é náa kọ é òòà aa ló gè beelá bel ló Jìhóvà dẹ̀ẹ̀a boo bé e beele ẹb nu naa, dú gè nyimá kọọ̀ bé e beele ẹ̀b nu naa náa gbõomá vaá è ólò ié lọ̀ gã́bug tṍó. A beè dú bíi kọọ̀ Jóòb á nó nakà nuí. Tṍó e Jóòb géè mòn tã̀àgã̀, náa beè ié ná ból dẽesĩ́ vaá a beè gbóó ká bùlà gbẹẹ́ boo a bá. Náa beè kaná dẽe gbẹẹ́ boo gbò nú ea palàge bọọ. Sõò Jìhóvà beè nvèè bá nèe kọ á láá kpáá mòn dõona kà gbò nú ea bãàa m. Jìhóvà beè náa kọọ̀ Jóòb á mòn kọọ̀ bé ea dã́ ból ló nu naa náa gbõoma tení dú ló gè bĩináe 70 kà kele-kele bíb, e náa beè láá aalá tọ́ọ̀ kà. Jóòb beè gbóó labví láb mm̀ kìlmà kpá ló kẽ vaá nyaaná bé ea géè ẹ̀b nu naa.—Bugi Jóòb 42:1-6.
w17.06 25 ¶12
Ká Dẽe Gbẹẹ́ Boo Nú Ea Palàge Bọọ
12 É kọọ̀ a beè dú pọ́lọ́ kọọ̀ Jìhóvà beè tú íb agẹ bá dùùlà bá deè tṍ ea náaí nè Jóòb tṍó ea ni ĩima bá gã́bug tã̀àgã̀? Níì vó nì, vaá Jóòb náa beè ẹ̀b nàgé naa vó. Kèbá dénè gbò dìtõ̀ò ea gé téní báí, Jóòb beè gbóó láá dààmà togó gè ló bel ea zógè kọ à zaava ló nu. A beè kọọ̀: “M̀ oomà gã́ ló gbò bel em beè lò, vaá m̀ ọ́gà gbẹá gbàà dúu nè bùùlù.” Níà nú ea beè sìlà aa mm̀ dùùlà bá deè tṍ ea dĩinée ló e Jìhóvà beè nèe ẽ́. (Jóòb 42:1-6) Besĩ́ à kalá dọ̀ tṍóá, Èláíhù e ẹlẹ nómá beè zẹ́ẹ́ nèe dùùlà bá deè tṍ ea lelée dee bá. (Jóòb 32:5-10) Tṍó e Jóòb ni tú kọ̀bèl ea aa bá Bàrì vaá nyaaná bé ea géè ẹ̀b nu naa, Jìhóvà beè gbóó kọ́ nè dõona gbò kọọ̀ à ténmàè kọọ̀ Jóòb láá bọ́ló dẹ̀lẹ̀ nyíé boo kèbá tã̀àgã̀.—Jóòb 42:7, 8.
“Dẹlẹ Nyíé Boo Jìhóvà”
17 Jóòb di zẹ̀ẹ̀ gbò gyóòlo Jìhóvà e ba beè kilsĩ́ gè ié agẹ ló kèbá agẹ bá tã̀àgã̀. Mm̀ kpá e Pọ́ọ̀l beè lẹ̀ẹ̀là má pá Híbrù, à ló bel ea kil ló “gã́bug gbò neǹ ditõ̀ò.” (Híb. 12:1) Dénè ọ̀và beè mòn agẹ bá tã̀àgã̀; sõò ba beè bọ́ló dẹ̀lẹ̀ nyíé boo nè Jìhóvà. (Híb. 11:36-40) É kọọ̀ ba ĩ̀ìmà nè ba tóm beè dú zọ̀là pọ́ì? Ẽ́èe! Ba beè kilsĩ́ gè bọ́ló dẹ̀lẹ̀ nyíé boo nè Jìhóvà náa kal ló béè kọọ̀ bà náa beè mòn gbò nú ea beè zìgà nè va dọ̀ọ̀mà tṍó e bà ú. Ba beè dẹlẹ nyíé boo kọọ̀ bàé monìè gbò zìgànù Jìhóvà boo béè kọọ̀ ba beè àgala boo kọọ̀ à ténmàè va. (Híb. 11:4, 5) Ba nu dòòmà bá é láá sièi kpóó ló kọ é kilsĩ́ gè dẹlẹ nyíé boo Jìhóvà.
18 Deè nieí, è di mm̀ bàlà boo e pọ́lọ́ gé kpáá zoogá. (2 Tím. 3:13) Sétàn gáà sẹ̀ẹ̀à ló gè ẹ̀bmà gbò níí Bàrì. Kọ̀láá bé e tã̀àgã̀ eé téní bá é meà naa, naanii èé kilsĩ́ gè sí tóm agẹlẹ bá nè Jìhóvà vaá àgala boo “kọ è túù bẹẹ nyíe dẹlẹ́ boo Bàrì ea di dùm.” (1 Tím. 4:10) Kẽ̀èa boo nú e Jìhóvà beè naa nè Jóòb ea “zógè bé [ea] íe lé nyíe vaá ié sàn nyíe naa.” (Jém̀z 5:11) Naanii mè beélè nagé é kilsĩ́ gè bọ́ló dẹ̀lẹ̀ nyíé boo nè Jìhóvà belí Jóòb vaá àgala boo kọọ̀ àé ne kpẽ́ “gbò e bà gbĩ́e.”—Bugi Híbrù 11:6.
Gbò Lé Nu Ea Di Mm̀ Kpá Káí
it-2 808
Nvèèmà Lẹ́
Jóòb dú nen ea beè kilsĩ́ gè bọ́ló dẹ̀lẹ̀ nyíé boo bã̀àna tṍó e gbò nen palàge nvèèmàe lẹ́. Sõo tṍó e tṍó téní, a beè ẹ̀b nu boo bá e bè náa bọ́ló vaá ié lọ̀, vó beè naa kọ bàá lelée dee bá. Èláíhù beè kọ́ kìlmàé ló kọọ̀: “Mée ní ea bélí Jóòb, ea é láá ṍ nvèèmà lẹ́ belí múú ẽ́?” (Jóòb 34:7) Jóòb beè gbóó dààmà togó gè ká bùlà gbẹẹ́ boo nú e ẹlẹ ẹb kọ à lelà ea dú kele ló bé e Bàrì ẹb nu naa, vaá gbóó ẹ̀b belí kọ à dúè lé lab dògò elìè Bàrì. (Jóòb 35:2; 36:24) Jóòb beè ẹ̀b nvèèmà lẹ́ ea aa bá taà kà “pá a kóòa” belí kọọ̀ ẹlẹ ní e bà gé nveemàè lẹ́ẹ́, tãa vó ea ẹb kọọ̀ Bàrì ní e bà gé nveemà lẹ́ ẹ́. Ge naa vó beè naa kọ á belí nen ea tú lóó nè kọ bàá nveemàèe lẹ́ vaá gbóó ié lèèmá m, belí kọọ̀ à gé tú záá-zaà ló õomá múú. Tṍó e tṍó téní, Bàrì beè kọ́ nè Jóòb kọọ̀ (tṍó ea dú gè palàge ẹ̀b m,) gbò nvèèmà lẹ́á géè ló gbò bel e náa dú kà-kà uú boo Bàrì. (Jóòb 42:7) Mm̀ tẽ̀ènè sĩ́deèá, Jìhóvà beè kọ́ nè neǹ kọ́ọ̀ bùlà Bàrì Sámuẹ̀l tṍó e pá Ízràẹ̀l géè gbĩ́ gè ié méné ea é bẹl vá boo kọọ̀: “Níì olo ní e bà kiné nì, sõò nda ní e bà kin kọ ḿ gá duná méné ea é bẹlìè vá boo é.” (1 Sám. 8:7) Vaá Jíízọ̀s beè kọ́ nè pá a gbò nyòòne nvée kọọ̀: “Dénè nen é ọ́bvíi [níì boo béè boolo nì, sõò] boo béè kọ ò gé nyoonei nvéè nda.” (Máát. 24:9) Ge tú gbò nuí sẹ̀ẹ̀a bùlà é náa kọọ̀ gbò e bà gé nyoone nvéè Kráìst á láá ĩ̀ìmà nvèèmà lẹ́ boo bá ea bọ́ló vaá láá ié kpẽ́ ea aa ló ba ĩ̀ìmà.—Lúùk 6:22, 23.
FEBRUARY 5-11
GBÒ GYỌ́ EA DI MM̀ MOǸ BEL BÀRÌ | PSALMS 1-4
Nvèè Sãa Kúm Boǹ Méné Bàrì
“Nda É Zugè Dénè Gbò Dó”
8 Mósĩ́ deè ní e gbò nen ni lábmá láb nyòòmà sìtóm kọ̀ kpẹ̀aí é? Gã́bug nen náa ólò zìgà ge pãane tṍ ló. (Bugi Psalm 2:1-3.) Gbò dó àla a noo pọ́lọ́. Bà náa nveè sãa kúm Méné e Jìhóvà sa kọ á bẹ̀l. Bà náa ẹb kpẹ̀a ea kil ló Boǹ Ménéí naamá “lé kpẹ̀a.” Kàsĩ́, kpóó ea gé bẹl sìgà dó a kọ́ bàá gá kọná kpẹ̀a! Náa kal ló béè kọọ̀ gã́bug gbò e bà gé bẹl gbò dó àla túúmá kọ bà gé fãè Bàrì, bà náa gbĩ́ gè òòà aa ló gè bẹ̀l. Dì belí gbò e bà géè bẹ̀l mm̀ deè Jíízọ̀sa, gbò e bà gé bẹl deè nieí kin Jíízọ̀s tení dú ló gè naa uú boo pá a gbò nyòòne nvée e bà bọ́ló dẹ̀lẹ̀ nyíé boo.—Tóm 4:25-28.
w16.04 29 ¶11
Kilsĩ́ Gè Tõó Kele Mm̀ Bàlà Boó Ea Pooà
11 Ge gbó gyọ́. Be è bọọ̀gẹ̀ ká nyíe gbẹẹ́ boo bẹẹ gbò ìènù, àé láá naa kọ é gá láá tõó kele tṍó e bãà kèbá ẹ̀bmà. Ruth, ea di Malawi beè mòn kọọ̀ gã́bug Gbò Neǹ Ditõ̀ò Jìhóvà beè naa vó tṍó e ba beè biigè va ló mm̀ gbò gbáá 1970. À kọ́ọ̀: “Bà náa beè zìgà ge sọ̀bá ba gbò gyọ́. Sìgà ọ̀và beè zọ̀i teelá aa be, sõò tṍó e tṍó téní ba beè tú lóó gbá ló bõ̀ònaló gbò bìlà bẹbẹ̀l vaá òòà kil be, boo béè kọọ̀ bà náa beè láá ĩ̀ìma bá gbò tàvàlà dìtõ̀ò e ba beè kpeesĩ́ ló gbẹá kĩée e bà ólò sẹlẹ gbò e bà téélá aa ba be boo béè tã̀àgã̀.” Níá dú kele boo béè kọọ̀ gã́bug gbò gyóòlo Bàrì a kilsĩ́ gè tõó kelè, bã̀àna tṍó e dénè nú e bà íe peè va àbèè tṍó e bà gé téní bá tàvàlà dìtõ̀ò.—Híb. 10:34.
Gbò Lé Nu Ea Di Mm̀ Kpá Káí
it-1 425
Sál Nu
Pọ́ì lẹ́gẹ-lẹ́gẹ̀ kpá ea ólò di kpá ló gbò súú-súú gyã́á ea dì belí kpá kyàlà nè wheat. Náa kal ló béè kọọ̀ Kpá Káí ólò tú sál nu loomá bel kilma ló dõona kà nu, à ólò kolí bùlà nen nyòòmà bé e gbò e ba beè di deè kéléá beè olòó lọ̀l sál gbàà súú-súú gyã́á naa. Tṍó e ba ni kam lọ̀l, gbò lẹ́gẹ-lẹ́gẹ̀ kpá e bà náa ólò dè ea aa ló súú-súú gyã́áá náa ólò dọ̀ nà bélè, vó ólò naa kọ á lèlà ge loomá bel nyòòmà nú ea válí, nú e náa dọ tọ́ọ̀ kà bélè, nú e náa dú bíi, nè nú ea bọ́ló gè kpòòlà lọ̀l gbàà nú ea dú lé vaá toví gbẹẹ.
Túá kà, bà ólò zẹ́ẹ́ kàm súú-súú gyã́áá. Tṍó e ba ni náa vó lọ̀l, bà ólò gbóó naa ní e fọ́ọ́lọ́ é ul sál lọl gbàà belí bé e fọ́ọ́lọ́ ólò ùl dúu pèèmà naaá. (Ẹ̀b WINNOWING.) Níí palàge naa kọ é dã́ ból ló bé e Jìhóvà ólò tú gbò e bà bé uú boo nòòmà nù Kráìst lọl gbàà pá a gbò naa, vaá kyọ̀sĩ́ gbò pọ́lọ́ nè gbò dó e bà náa uú é boo naa. (Jóòb 21:18; Ps. 1:4; 35:5; Àìz. 17:13; 29:5; 41:15; Hòs. 13:3) Boǹ Méné Bàrì é kyọsĩ́ pá a gbò ọ́b vaá legè va naa ní ea é válí ló fọ́ọ́lọ́ ge ùl va lọ̀l belí sál nu.—Dán. 2:35.
Ba beè olòó bõonè ló gbò sál e náa dọnà bélèí vaá kpá sã́ ló kọbé náa ulà bã gbàà gbò súú-súú gyã́á e ba beè sí tóm ló lọ̀l. Mm̀ tẽ̀ènè sĩ́deèá, Jọ́ọ̀n Neǹ Dììlè Nen Múú beè kọ́ nú ea kil ló agẹ bá kyọ̀à sĩ́ ea é dọ́ boo gbò e bà di sĩ́ kyáá bõ̀ònaló fã̀—Neǹ Ea Ólò Kàm Nu ea dú Jíízọ̀s Kráìst, é bṍònè ló súú-súú gyã́áá, “sõò àé kpálí kpá ea dú lóá nvee dáà sã́ e bè náa é gímí.”—Máát. 3:7-12; Lúùk 3:17; ẹ̀b THRESHING.
FEBRUARY 12-18
GBÒ GYỌ́ EA DI MM̀ MOǸ BEL BÀRÌ | PSALMS 5-7
Kilsĩ́ Gè Bọ́ló Dẹ̀lẹ̀ Nyíé Boo Náa Kal Ló Béè Láb Dõona Gbò
Bé E Gè Bugi Kpá Káí É Láá Nè Ni Kói Naa
7 É kọọ̀ o kóò àbèè nen ea dṹùnà pá bọọ tọ beè naa nú ea kyẽ́ ni? Beè vó, nòòtẽ́ ea kil ló nú e Dévìd beè naa tṍó ea nvín Ábsalọ̀m beè naa uúé boo vaá gbĩ́ gè tú a dọ̀ méné lọ̀líé bá é dọ bélè nè ni.—2 Sám. 15:5-14, 31; 18:6-14.
8 (1) Tã̀àgã ló Bàrì. Tú nòòtẽ́á sẹ̀ẹ̀a bùlà, vaá ò kọ́ nè Jìhóvà bé e pọ́lọ́ bá e bà sẹẹmà ni tọ́a ní ló naa. (Ps. 6:6-9) Kọ́ nè Jìhóvà kà lèlà bé e nu tọ́a ní ló naa. Tṍóá, ò gbóó bàn Jìhóvà kọ á nvèè bá neè ni naa ní eo é mon gbò nòòkúu ea é nveè bá nè ni kọ ó láá ĩ̀ìmà tã̀àgã̀ eo di bá.
Àgala Boo Kọọ̀ Nú Eo Zigà Ló Dú Kà-kà
3 À dú bíi kọọ̀ bẹẹ zìgà á gá dẹ̀ẹ̀a boo áá vulè e gbò níí Bàrì íe. Ló éé? Boo béè kọọ̀ neǹ vígà—bã̀àna neǹ kànen àbèè neǹ gyàdeè sĩ́ tóm é láá sí kà agẹ bá pọ́lọ́. Vaá be à gá náa neǹ vígà à sí ni kà agẹ bá pọ́lọ́ à? Àbèè kọọ̀ nen ea beè dọ̀ aa mm̀ bõ̀ònatõ̀ò kọ́ nè ni kọ ó gé mm̀ kà-kà bõ̀ònatõ̀ò. Beè gbò nú ea dì belí vóí nááá, é kọọ̀ òó gbóó dọ̀ aa ló gè fã̀ Jìhóvà? Níí nóòmài kọọ̀: Beè bẹẹ gè dẹlẹ nyíé boo Bàrì dẹẹ̀a boo áá nú e dõona gbò náa, vaá náa dẹẹ̀a boo bẹẹ vulè e íè kilma ló Jìhóvà, bẹẹ zìgà náa é aga ló. Bùlà eo íè kilma ló Jìhóvà nè pá a gbò é láá nvèè bá nè ni kọ ó toní agẹ zìgà. Sõò à palàge dú nagé bíi kọ ó nó Kpá Káí, dã́tẽ́ ló nú eo gé nó, vaá gbĩ́tẽ́ ló nu kọbé ò láá àgala boo kọ ò diè mm̀ kà-kà bõ̀ònatõ̀ò. À dú bíi kọ ó àgala boo kọọ̀ Kpá Káí fáálá gbò kà-kà bel ea kil ló Jìhóvà.—Róm̀ 12:2.
4 Jíízọ̀s beè kọọ̀ sìgà gbò é “tú ẹ́ẹ́-ẹẹ̀ nyíe” tuumá kà-kàí, sõò lóó ba zìgà é ọọ tṍó e dò ẹ̀b dú. (Bugi Máátìù 13:3-6, 20, 21.) Be à sẹlẹ bà náa beè nyimá kọọ̀ gè nyoone nvéè Jíízọ̀s é man tàvàlà dìtõ̀ò. (Máát. 16:24) Àbèè kọọ̀ ba beè bugi togó kọọ̀ ge nyoone nvéè Kráìst é náa kọ bàá diè pọ́ì aa bá tã̀àgã̀, vaá àé dómà gì tã́áná dee bá, e tọ́ọ̀ kà nu ànà-ànà náa é dí ló. Sõò mm̀ bàlà boò Sétàní, tã̀àgã̀ é íè ge dì. Dìtõ̀ò é láá nyaaá vaá naa kọọ̀ zààvà eo beè ié á pè mm̀ pọ́ì ńkem̀ tṍó.—Ps. 6:6; Ẹ̀klì. 9:11.
Gbò Lé Nu Ea Di Mm̀ Kpá Káí
it-1 995
Bànà Ú
Mm̀ Róm̀ 3:13 neǹ tóm Pọ́ọ̀l beè kolí nú ea di mm̀ kpá Psalm 5:9, vaá tú òò gbò pọ́lọ́ lab dògò nè gbò kẹ̀lẹ̀ doolé ló “bànà ú ea di sèèla.” Dì belí bé e bà ólò tú gbò nú ea ni ú vaá bèm nvee mm̀ bànà ú ea di sèèla naaá, ba òò di sèèla nyòòmà gbò bel ea é láá fẹ́ nen vaá màn kyọ̀à.—Doolé ló Máát. 15:18-20.
FEBRUARY 19-25
GBÒ GYỌ́ EA DI MM̀ MOǸ BEL BÀRÌ | PSALMS 8-10
“Nda É Leelà Ni, E Jìhóvà”!
Nvèè Ka Ló Dọ̀ Eo Íè Zẹ̀ẹ̀ Pá Tọọ̀ Jìhóvà
6 Jìhóvà beè nèi be ea palàge dú lé. Gã́bug gbáá besĩ́ì Jìhóvà à kalá dèm Ádàm nè Íìv, a beè zẹ́ẹ́ kpoogè dee ló boo kunukẽ̀í naa ní e gbò nen é láá tõó boo. (Jóòb 38:4-6; Jèr. 10:12) Boo béè kọọ̀ Jìhóvà íe lé láb vaá dú nen ea ólò dõo nu taalẹ bá, a beè naa gã́bug lé nu ea é náa kọọ̀ nyíéi á ẹẹ. (Ps. 104:14, 15, 24) Sìgà tṍó, a beè bugi togó boo gbò nú ea beè dèm vaá “mòn kọ à dú lé.” (Jén. 1:10, 12, 31) A beè nvèè ka ló gbò nen tení dú ló gè nè va kpóó kọ bàá “lẹ̀ẹ̀là bel ló” gbò nú e ẹlẹ beè dèm sẹlẹ́ boo kunukẽ̀í. (Ps. 8:6) À dú bùlà Bàrì kọọ̀ gbò nen e bà gbõoma á ié ẹ́ẹ́-ẹẹ̀ nyíe ea dú ló gè ẹ̀b nú ea kil ló gbò nú e ẹlẹ beè dèmí dọ̀ọ̀mà dè-dè. É kọ ò ólò õá gé Jìhóvà zaa ló nèà deè ea dú dũ̀ùnèí?
É Kọ Ò Nveè Gé Ka Ló Gbò Dõ̀ònù E Bàrì Né Ni?
10 Enè sĩ́deè èé láá zogè kọ è nveè ka ló dõ̀ònù e íè gè láá ló bel dú gè baatẽ́ bẹẹ zìgà mm̀ Bàrì nè gbò e bà íe bàà-bàà bùlà kilma ló nú ea náa vaá beele née zigà kọọ̀ nu beè dõogẽ fùùà dì. (Ps. 9:1; 1 Pít. 3:15) Gbò e bà ólò nvèè sãa kúm nakà nòòmà nùá gbĩ́ gè kọ é zìgà kọọ̀ boo kunukẽ̀í nè dénè dõona kà gbò nú ea di boo beè bú ló bã kẽ. Be è tú Kpá Káí nè sìgà gbò gá e ni ló bel boo mm̀ nakà togó belí siimá tóm, èé láá ló bel boo bẹẹ Tẹ̀ ea di káála vaá baatẽ́ nè gbò e bà di kpènà ló gè pãanéi tṍ ló nú ea náa vaá beele è àgala boo kọọ̀ Jìhóvà ní ea beè dèm káála nè kunukẽ̀í ẽ́.—Ps. 102:25; Àìz. 40:25, 26.
É Kọ Ò Dúù Lé ‘Nu Dòòmà Bá . . . Tení Dú Ló Bá Eo Lóòmà Bel’?
13 Ọlí sọ́l lọa nyíe. À bọ́ló kọọ̀ nú eé sẹẹ̀a sĩ́ tṍó e gé ọ́lí bẹẹ gbò sọ́l nònù á dú gè lèèlà Jìhóvà. Ene kà vígà pábia ea bée kọlà Sara beè bugi togó kọ náa ólò láá ọlìè sọ́l. Sõò a beè gbĩ́ gè ọlí sọ́l lèèmà Jìhóvà. Boo béè vó, à ólò nó sọ́l gbẹá be belí bé ea ólò kpoogá dee ló nyòòmà dõona kà gbò nu gè naa gbẹá nònù naaá. À ólò tení boo gbò sọ́lá vaá pììga boo ge nyimá bé ea gbááá ló gbò nú e bàé nó gbẹá nònù naa. À kọ́ọ̀, “Níí ólò nvèè bá nèm kọ ḿ ká bùlà gbẹẹ́ boo gbò moǹ bel ea di mm̀ sọ́lá e bè níì bé em ọ́lì naa nì.”
Gbò Lé Nu Ea Di Mm̀ Kpá Káí
it-1 832
Nvéé Bá
Mm̀ sĩ́deè ge doolé ló, bà ló bel kilma ló Bàrì belí kọọ̀ à ólò tú “(gbò) a nvéé bá” siimá tóm, dì belí gè emá Òb Togó Logá boo gbò báà dem (Ẹ́xọ. 31:18; Dìt. 9:10), siimá gi tóm dũ̀ùnè (Ẹ́xọ. 8:18, 19), vaá dèmà gbò káála (Ps. 8:3). “Gbò nvéé bá Bàrì” ea beè dèmà nuá lóá bel kilma ló a nyómá káí àbèè kpóó ea ólò siimá tóm, ea dọa bàlà kẽ mm̀ kpá Jénesìs ea ló bel ea kil ló dèmnù, tṍó ea kọ́ọ̀ kpóó e Bàrì ólò siimá tóm (ruʹach, “nyómá”) beè dì ea géè kyãà kil sĩ́ nè nvée boo múúá. (Jén. 1:2) Sõò, Kpá Káí e ba beè emí mm̀ dèm bel Gríìk náa kọ é palàge dã́ ból ló nú e nakà bel dòòle ló nuí tõó dọ̀, boo béè kọọ̀ nú ea ẽ́á mm̀ kpá Máátìù baatẽ́ kọọ̀ Jíízọ̀s beè tú ‘nyómá káí Bàrì’ kpoomá gi zọ lọl mm̀ gbò nen, vaá kpá Lúùk à kọọ̀ “nvéé bá Bàrì” ní ea beè naamá ẽ́.—Máát. 12:28; Lúùk 11:20.
FEBRUARY 26–MARCH 3
GBÒ GYỌ́ EA DI MM̀ MOǸ BEL BÀRÌ | PSALMS 11-15
Dòòmà Dẽe Ló Kọ Ò Diè Mm̀ Ãa Bàlà Boò Bàrì Ea Dú Ketõ̀ò Fẹ́ẹ́-fẹẹ̀ Ló
w06 5/15 18 ¶3
Ge Kọ́ Kà Ea Di Mm̀ Túá Kpo Ea Di Ló Kpá Psalm
11:3—Mókà gbò dò díí kẽ ní ea kyọà ẹ? Níí dú gbò dò díí kẽ e gbò nen ólò dẹ̀ẹ̀a boo, ea dú log, tùle, nè lé bèèla. Tṍó e gbò nuí náa kyãa na boo kúù, lọ̀l togó kèbá nè pọ́lọ́ bèèla ólò gbóó tọ̀la kẽ. Kèbá íb gbò dìtõ̀òí, “kọ̀láá neǹ lé lab dògò é íè ge palàge dẹlẹ nyíé boo Bàrì.—Psalm 11:4-7.
wp16.4 11
É Kọọ̀ Bàlà Boó E Zààlì Kẽ Náa É Di É Láá Valí?
Kpá Káí zigà kọọ̀ Bàrì é beè gé lọ̀l kọ̀láá kà zààlì kẽ ea di boo kunukẽ̀í. Nakà bàlà boò zààlì kẽí a kpeesĩ́ ló “deè bèèla bel Bàrì nè kyọ̀à sĩ́ ea é dọ́ boo gbò e bà náa fã Bàrì.” (2 Pítà 3:5-7) Gbò zààlì kẽ náa é náa na kọọ̀ dõona gbò á mòn tã̀àgã̀. Èé náa và láá àgala boo kọọ̀ Bàrì gbĩ́ gè labví láb vaá nvèè kùbmà ló dùm zààlì kẽ ẽ́?
Kpá Káí kọ́ọ̀, Bàrì “ọ́bví kọ̀láá nen ea vulè zààlì kẽ.” (Psalm 11:5) Neǹ dèmnù vulè fẹ́ẹ́-fẹẹ̀ ló nè lé bèèla. (Psalm 33:5; 37:28) Níà nú ea náa vaá náa é sọtọ́ deè kọọ̀ gbò zààlì kẽ á kilsĩ́ dọ̀ dè-dè e.
w17.08 6 ¶15
É Kọọ̀ Ò Di Kpènà Ló Ge Ĩ̀ìmà Elá?
15 Éé ní ea beè naa kọọ̀ Dévìd á di kpènà ló ge ĩ̀ìmà elá ẹ́? À néi a ààla mm̀ kpá psalm kĩée ea bĩ́íná ténì tóm kọọ̀: “Begè dẽè tṍó ea tõò vàẹ?” Nee nú ea kọ́í: “Kilma kĩée e nda dì, nda dẹlẹ̀ nyíé boo o vulè ea kyãa mm̀ bọ́ọ̀ló dẹ̀lẹ̀ nyíé boo; Nyíè nda é ẹ́ẹ ló gbò o tóm gè dùùlà nen. Nda é ọ́lí sọ́l nè Jìhóvà, boo béè kọọ̀ a palàge tãanèm dee bá.” (Ps. 13:5, 6) Dévìd beè dẹlẹ nyíé boo vulè Jìhóvà ea kyãa mm̀ bọ́ọ̀ló dẹ̀lẹ̀ nyíé boo. A beè tú zààvà emá bànà dùùà, vaá bugi togó boo bé e Jìhóvà beè tãanèe dee bá naa. Mm̀ kà-kà, Dévìd beè nyimá kọọ̀ bélè di ló gè elá.
kr 236 ¶16
Boǹ Ménéá Náa Kọọ̀ Bùlà Bàrì Á Naaá Boo Kunukẽ̀í.
16 Kpènà. Dee deè nvée, bel ea di mm̀ kpá Àìzáíà 11:6-9 é gbóó ié a gbõ̀òme m̀m̀-me mm̀ sĩ́deè e nen é monmà dẽe. Gbò gbálà, gbò bia, nè gbò pá nvín é gbóó íe kpènà gbẹá kọ̀láá kĩée e bà dì boo kunukẽ̀í. Tọ́ọ̀ kà nú e Bàrì beè dèm, bã̀àna gbò nen àbèè gbò nom náa é síìmà nà pọ̀ nen. Dòòmà dẽe ló tṍó e zivèkà boo kunukẽ̀í é dú o be, tṍó eo é láá zọbví múú ọọ, kọ̀ọ̀la múú, múú ea di pène, dẽgi gù, vaá kyãa boo kpáà bàlà ól e víl dì vaá ié kpènà. Vaá tṍó e dee é bílá, pọ̀ náa é síí ni. Gbò moǹ bel ea di mm̀ kpá Èzíkiẹ̀l 34:25 é gbóó mm-má naa ní e gbò níí Bàrì é “íe kpènà gbẹá boo kpáà bàlà ól vaá daa gbẹá kọ̀l.”
Gbò Lé Nu Ea Di Mm̀ Kpá Káí
w13 9/15 19 ¶12
É Kọọ̀ O Nyááá Gé?
12 À dú pọ́lọ́ kọ è di mm̀ bàlà boo ea bélí ní e Pọ́ọ̀l beè kọ́ nú ea kil lóá. Àé láá dú kọọ̀ bà ẹb kọọ̀, ge naa nú boo kúu àbèè ge tõó boo gbò nòòkúu ea di mm̀ Kpá Káí náa bọ́ná ló àbèè kọ náa síá ná tóm. Gã́bug gbò e bà ólò noomà nu nè gbò tẹ̀ nè kà nveè sãa kúm kọọ̀ nen “di pọ́ì” ge ẹ̀b àbèè ge naa nú boo bá ea léémáe. Bà ẹb kọọ̀, kọ̀láá kà nu é láá nyááá; vaá náa íe áá enè sĩ́deè ge naamá nu. Bã̀ànà gã́bug gbò e bà kọ́ bà gé fãè Bàrì ẹb kọọ̀ ba diè pọ́ì ge naa nú e baala ẹb kọ à lelà, vaá bàá géè kèbá log gè gbàn tṍ ló Bàrì. (Ps. 14:1) Ìb gbò lábví é láá tãagẽ kà-kà gbò e bà gé nyoone nvéè Kráìst. Gbò e bà náa ọ́ẹ̀ dẽe é láá ẹ̀b gbò nòònù ea di mm̀ bõ̀ònatõ̀ò mm̀ tẽ̀ènè sĩ́deèá. Àé láá tàvàlà vá ló gè gbaá ló bé e bõ̀ònatõ̀òí ólò naa nu naa, vaá nuumi bel ló kọ̀láá kà nú e náa léémá va. Àbèè kọọ̀ bàé láá ẹ̀b kọ sìgà dùùlà bá deè tṍ ea di mm̀ Kpá Káí ea kil ló kólì kyáà, ge tú íntanèt siimá tóm, nè ge sí pọ̀b tọọ̀ kpá náa lelà.