Kà Agẹ Bá Kã́á Kãà Kẽ​—Éé Ní E Kpá Káí Kọ́ Kilma Ló É?

• “Pá China ne kpẹ̀a kọọ̀ gbei ea mó gbááí ‘palàge aga bá’ vaá egè ní ea égè taà tóm e íb agẹ bá gbeií ni mo.”​—Níà bé e níúz pẹpà ea kọlà The Guardian kọ́ naa ló September 7, 2022 e.

• “Gbò e bà ólò nó nú ea kil ló sĩ́dee kọ́ọ̀ kã́á kãà kẽ é nááá gã́bug ketõ̀ò ea di Africa mm̀ vòò gbáá e tọ́ọ̀ gbáá náa é téní gbàà.”​—Níà bé e UN Niùz kọ́ náa ló August 26, 2022 e.

• “Gã́bug ketõ̀ò ea di Europe di kèbá gẹẹ-gẹẹ ló ea kil ló kã́á kãà kẽ ea é beè láá naaá, e níí é láá aga bá èlmà ní ea beè naaá 500 gbáá ea kil nvéeá.”​—Níà bé e BBC Niùz kọ́ naa ló August 23, 2022 e.

Gã́bug gbò e bà nyímá nú ea kil ló sĩ́dee kọ́ọ̀ íb gbò kã́á kãà kẽí é kilsĩ́ gè naaá vaá olòó zoogá. É kọ è íè ból dẽesĩ́ kọọ̀ dì deèsĩ́ é dú lé? Éé ní e Kpá Káí kọ́ kilma ló é?

Kã́á Kãà Kẽ Nè Kọ́ọ̀ Bùlà Bàrì Ea Di Mm̀ Kpá Káí

Kpá Káí beè kọ́ kilma ló beélè deeí kọọ̀:

• “Kíi . . . é dọ sìgà ke tõ̀ò.”​—Lúùk 21:11.

Kã́á kãà kẽ ólò bọ̀ọ̀gẹ̀ domà kíì gyã́á. Íb gbò kíì gyã́áí, bií ló mòn tã̀àgã̀ nè ú ea silà aaló ḿm̀-mè kọ́ọ̀ bùlà Bàrì ea di mm̀ Kpá Káí.​—Kùùà Nù 6:​6, 8.

Nú ea náa vaá kã́á kãà kẽ dì ea gé zóógá

Kpá Káí tẹ́lẹ bàlà kẽ ene kà pọ̀bkà bug ea náa vaá kã́á kãà kẽ gé zóógá. À kọ́ọ̀:

• “Náa lela ló nen ea gé kyãà ge lele bã̀àna a kátọ.”​—Jèrèmáíà 10:23.

Níí tõó dọ̀ kọọ̀ gbò nen náa é láá “lele [ba] kátọ,” àbèè ge bẹ̀l ba bá. Ba gbò pọ́lọ́ béèlàfùl ólò bọ̀ọ̀gè màn nàgé kã́á kãà kẽ nè ĩ̀a múú.

• Gã́bug gbò sã́ìns zigà kọọ̀ nú e gbò nen náa ní ea náa kọọ̀ zivèkà bàlà booí á bẹ̀à sã́é, ea gbóó naa kọọ̀ kã́á kãà kẽ á kpáá zoogá beeá ló bàlà booí.

• Gọ̀l òò nè ge kọọ̀ bà náa bulà nú ea kil ló dì deèsĩ́ a náa kọ bàá kpọgági kọ̀l, kyọ̀gàgì kẽ, vaá kyọ̀gàgì sĩ́ gbò nú e Bàrì beè dèm, ea náa kọ á tàvàlàí ló ge ié lé múú.

Kọ̀láá bé ea dì naa, Kpá Káí néi ból dẽesĩ́.

É kọ è íè ból dẽesĩ́ nyòòmà dì deèsĩ́?

Kpá Káí zigà kọọ̀ Bàrì é beè naa kọọ̀ múú á gá ĩá ná. Mósĩ́ deè e?

1. 1. Bàrì é “kyọ̀ sĩ́ gbò e bà gé kyọ bàlà booí.” (Kùùà Nù 11:18) Àé lọl ene kà nú ea náa kọọ̀ múú á ĩá, ea dú gbò e bà dú pọ́lọ́ vaá ié gọ̀l òò, e ba láb kyọgàlà boo kunukẽ̀í.​—2 Tímotì 3:​1, 2.

2. 2. “Kunukẽ̀ kiẽ́e ea kã́a bàgà é beè dú ketõ̀ò dẹ̀ẹ̀là múú.” (Àìzáíà 35:​1, 6, 7) Bàrì é oomà bá kọ̀láá kà nú e kã́á kãà kẽ beè kyọ̀ vaá naa kọọ̀ boo kunukẽ̀í á dú Páladaìs kiẽ́e e múú é di boo bá ea bọ́ló.

3. 3. “Ò ẹb nú ea kil ló boo kunukẽ̀í, vaá naa kọ nu á palàge dùm vaá leé boo.” (Psalm 65:9) Tã́áná dee bá ea aa bá Bàrì é náa kọọ̀ dénè nen ea di boo kunukẽ̀í á ié lé gyã́á gè dè nè lé múú.