“Dií Kpènà Ló Vaá Ò Kuai Dẽe Ló!”

1. Éé ní e Jíízọ̀s beè kọ́ nè pá a gbò nyòòne nvée kilma ló kùbmà nvéè tṍó ẽ́, vaá mókà ã̀àne ní ea beè nèva ẹ́?

PỌ́Ì ńkem̀ dee besĩ́ Jíízọ̀s à kálá ù, ténì nen ea dṹùnà pá a gbò nyòòne nvée beè kó nèe kọọ̀: ‘Ni kọ́ nu ea é zógè kùbmà nvéè tṍó nèi.’ (Máát. 24:3) Àé láá dú kọọ̀ pá a gbò nyòòne nvéeí géè bugi togó boo nú ea é náa kọ bàá nyimá tṍó e bàé kyọsĩ́ Jèrúsalẹ̀m nè a tọọ̀ káí. Sõò, Jíízọ̀s náa beè ló bel ea kil ló áá tṍó e kyòà sĩ́ é dọ́ boo Jèrúsalẹ̀m nè a tọọ̀ káí, a beè ló nágé bel ea kil ló “kùbmà nvéè tṍó” e beele dìí. Jíízọ̀s beè kọ́ kilmá ló tṍó e kùbmà é bã́ ló nakà bàlà booí kọọ̀: “Tọ́ọ̀ nen náa nyímá dee nè tṍó e nda, Sã́áná Nen, é dú, bãànà gbò nyómá tóm ea di káála àbèè nda, em dúù Sã́áná Bàrì. Áá Tẹ̀ ní ea nyímá ẽ́.” Tṍó ea kọ́ vó lọ̀l, a beè gbóó ãane pá a gbò nyòòne nvée kọọ̀ “ọẹi dẽe vaá ò kuai dẽe ló.”​—Máàk 13:​32-37.

2. Éé ní ea náa vaá a beè dú bíi kọọ̀ gbò e ba beè di mm̀ deè pá Júùa á kilsĩ́ gè kùà dẽe ló é?

² A beè dú bíi kọọ̀ pá Júù e bà géè nyoone nvéè Kráìst mm̀ túá gbò gbááá á kilsĩ́ gè kùà dẽe ló; kọbé bà íe dùùà tṍó e kyọ̀à sĩ́ é dú. Jíízọ̀s beè kọ́ gbò nú e pá a gbò nyòòne nvée é mon tṍó e kyọ̀à sĩ́ é gé dọ́ boo Jèrúsalẹ̀m nè a tọọ̀ káí. A beè kọọ̀: “Tṍó eo monìì kọ gbò bé bééá tení ló Jèrúsalẹ̀m, ò gbóó nyimai kọọ̀ tṍó e bàé gímè a íná ku ló.” Kà lèlà tṍóá, àé dú bíi kọ bàá gbàntṍ ló ã̀àne e Jíízọ̀s beè nèa vaá “teelá” kil deè boo gù. (Lúùk 21:​20, 21) Gbò e ba beè gbàntṍ ló ã̀àneí beè ié dùùà tṍó e pá Róm̀ kyọsĩ́ Jèrúsalẹ̀m.

3. Éé ní eé ló bel boo mm̀ nakà togó belí é?

³ Deè nieí, beele di tṍó e kùbmà é gé bã ló nakà pọ́lọ́ bàlà booí. Vóà naa, à dú nágé bíi kọọ̀ beele é kilsĩ́ gè ié ọ̀ẹ̀ dẽe vaá di mm̀ kùà dẽe ló. Mm̀ nakà togó belí, èé ló bel boo bé eé láá naa nu boo bá ea bọ́ló naa tṍó e monì gbò nú ea gé nááá mm̀ bàlà booí, nè bé eé láá ọẹ̀ dẽe vaá tú kùbmà tṍó ea sígáí naamá nu ea dú lé naa.

NAA NÚ BOO BÁ EA BỌ́LÓ TṌÓ EO MONÌ GBÒ NÚ EA GÉ NÁÁÁ MM̀ BÀLÀ BOOÍ

4. Éé ní ea náa vaá à bọ́ló kọ á tànii gè mòn bé e gbò nú ea gé nááá kátogóí ḿm̀-mè kọ́ọ̀ bùlà Bàrì ea di mm̀ Kpá Káí naa ẽ́?

⁴ À íe gbò lé bug ea náa kọ á tànii gè nyimá bé e gbò nú ea gé nááá kátogóí ḿm̀-mè kọ́ọ̀ bùlà Bàrì ea di mm̀ Kpá Káí naa. Dì belí nu dòòmà bá, Jíízọ̀s beè kọ́ gbò nú ea é náa kọ é nyimá tṍó e kùbmà é gé bã ló bàlà boo e Sétàn gé lẹẹlà bel lóí. (Máát. 24:​3-14) Neǹ tóm Pítà beè sièi kpóó ló kọ é àgala boo nú e kọ́ọ̀ bùlà Bàrì beè kọ̀ kọbé bẹẹ zìgà kilsĩ́ gè aga ló. (2 Pít. 1:​19-21) Dee deè nvée kpá ea di mm̀ Kpá Káí daaà togó tení dú ló gè kọọ̀: “Níí gbò nu e Jíìzọ̀s Kráìst beè kùùlà, ea dú gbò nu ea é gé íè ge naaá, vaá Bàrì à nvèèé bá kọ á gé zogè pá a gbò tóm.” (Kùùà 1:1) Vóà naa, a palàge tànii gè nyimá gbò nú ea gé nááá kátogóí, nè bé ea ḿm̀-mè kọ́ọ̀ bùlà Bàrì ea di mm̀ Kpá Káí naa. Vaá àé láá taníi gè zọ̀ pá vígà loá sọ́l boo gbò nú ea gé náááí.

5. Éé ní e náa bọ́ló kọ é naa ẽ́, vaá éé ní eé náa ẽ́? (Ẹ̀b nàgé fòtó.)

⁵ Tṍó e gé zọ dõòna gbò loá sọ́l boo kọ́ọ̀ bùlà Bàrì ea di mm̀ Kpá Káí, náa bọ́ló kọ é dõogẽ kọ́ bẹẹ bùlà. Ló éé? Boo béè kọọ̀ née é gbĩ́ gè ló bel ea é kyọ gbaa ló ea di zẹ̀ẹ̀ pá vígà. Dì belí nu dòòmà bá, èé láá dã́ tṍó e gbò e bà gé bẹl bàlà boo gé ló bel ea kil ló bé e bàé láá kpoogè dee ló tã̀àgã̀ ea bã́ kẽ vaá naa kọọ̀ fẹ́ẹ́-fẹẹ̀ ló nè kpènà á dì naa. Tãa vó e gbẹá boo kọọ̀ bel e bà lóá gé ḿm̀-mè kọ́ọ̀ bùlà Bàrì ea di mm̀ 1 Tẹ̀sàlónaikà 5:​3, à bọ́ló kọ é gbĩ́ gè nyimá nú e bõ̀ònatõ̀ò ã́àa kọ̀ ea kil ló belí. Tṍó e bel e lóò dẹẹ̀a boo gbò nú e bõ̀ònatõ̀ò Jìhóvà kọ́, è náà kọọ̀ pá vígà á gbá ié “tẽ̀ènè kà bùlà nè bug togó.”​—1 Kọ́r. 1:10; 4:6.

6. Gbò éé ní eé láá nó lọl mm̀ 2 Pítà 3:​11-13 é?

⁶ Bugi 2 Pítà 3:​11-13, NW. Neǹ tóm Pítà beè kọ́ bé eé láá ẹ̀b nú boo bá ea bọ́ló naa tṍó e gé bugi togó boo gbò kọ́ọ̀ bùlà Bàrì ea di mm̀ Kpá Káí. À síèi kpóó ló kọ é tú ‘deè Jìhóvà sẹẹa bùlà.’ Ló éé? Níì boo béè kọọ̀ è gbĩ́ gè nyimá kà lèlà “dee nè tṍó” e Jìhóvà é dómà Àmágidòn nì, sõò boo béè kọọ̀ è gbĩ́ gè “tõó dùm ea di káí nè ge labví gbò láb ea zógè kọọ̀ [è gé fã] Barì” tṍó ea sígáí. (Máát. 24:36; Lúùk 12:40) Boo dõona bá, è gbĩ́ gè tõó dùm ea lela vaá pììga boo gè sí tóm nè Jìhóvà mm̀ sĩ́deè ea zógè kọọ̀ è vulèe. Kọbé è láá kilsĩ́ gè naa vó, èé íè ge ié ọ̀ẹ̀ dẽe.

ÉÉ NÍ E GÈ IÉ Ọ̀Ẹ̀ DẼE TÕÓ DỌ̀ Ẹ?

7. Mósĩ́ deè ní eé láá zógè kọọ̀ è íè ọ̀ẹ̀ dẽe ẽ́? (Lúùk 21:34)

⁷ Níì áá gbò nú ea di mm̀ bàlà booí ní e Jíízọ̀s beè kọ́ nè pá a gbò nyòòne nvée kọ bàá ié ọ̀ẹ̀ dẽe kilma lóé nì, a beè kọ bàá ié nágé ọ̀ẹ̀ dẽe kilma ló ba bá. Nakà ã̀àneí di mm̀ kpá Lúùk 21:34. (Bugi.) Jíízọ̀s beè kọọ̀: “Ọẹi dẽe.” Nen ea íe ọ̀ẹ̀ dẽe ólò di mm̀ kùà dẽe ló kilma ló kọ̀láá kà nú ea láá kyọ̀ a gbaa ló kilma ló Jìhóvà, vaá à ólò naa gbò nú ea é náa kọ á gá dọ̀. Be à náa vó, àé kilsĩ́ gè gbẹá mm̀ vulè Bàrì.​—Pró. 22:3; Júùd 20, 21.

8. Mókà dùùlà bá deè tṍ ní e neǹ tóm Pọ́ọ̀l beè nè gbò e bà géè nyoone nvéè Kráìst e?

⁸ Neǹ tóm Pọ́ọ̀l beè kọ́ nè gbò nyòòne nvéè Kráìst kọ bàá ié ọ̀ẹ̀ dẽe. Dì belí nu dòòmà bá, a beè kọ́ nè pá vígà e ba beè di Ẹ́fẹsọ̀s kọọ̀: “Ọẹi dẽe ló bé eo é lábvii láb naanii. Ó gá labvii láb belii gbò ból, sõò labvii láb belii gbò nyìmànù.” (Ẹ́fẹ. 5:​15, 16) Sétàn dì ea gé piigà ge kyọ̀ bẹẹ gbaa ló kilma ló Jìhóvà, níà nu ea náa vaá Kpá Káí à dùùlài bá deè tṍ kọ é ‘pììgà vaá nyimá ló nu e Jìhóvà gbĩ́ kọ é naa’ kọbé è láá kpènà bẹẹ lóó lọl bá gbò béa ea aa bá Sétàn ẽ.​—Ẹ́fẹ. 5:17.

9. Mósĩ́ deè ní eé láá nyimá nu e Jìhóvà gbĩ́ kọ é naa ẽ́?

⁹ Kpá Káí náa kọ́ kọ̀láá kà nú ea é láá kyọ̀ bẹẹ gbaa ló kilma ló Jìhóvà. Gã́bug tṍó, àé dú bíi kọ é nè béèlàfùl kilma ló gbò nu e Kpá Káí náa aa deè kọ é náa. Kọbé è láá nè béèlàfùl e nyìmànù di m, à dú bíi kọ é pììga boo gè nyimá, àbèè ge dã́ból ló ‘nu e Jìhóvà gbĩ́ kọ é naa.’ Èé láá naa vó tení dú ló gè olòó nó Kpá Káí nè ge bugi togó boo nu e nóò. Bé e dã́à ból ló nu e Jìhóvà gbĩ́ kọ é naa, nè bé e náà kọọ̀ “beéle bùlà nè níí Kráìst” á dú tẽ̀ènè kà naa, níà bé eé lábví láb belí “gbò nyìmànù,” kọbèè tṍó e née íè log ea é kọ́ kà lèlà nú eé náa nèi naa ẽ́. (1 Kọ́r. 2:​14-16) À ólò valí kọ é nyimá sìgà nu ea é láá kyọ̀ bẹẹ gbaa ló kilma ló Jìhóvà, sõò dénè náa ólò bọọgẹ̀ valí.

10. Mókà gbò nuù gẹẹ-gẹẹ ló ní eé íè ge kpòòlà lóó lọl ló é?

¹⁰ Sìgà gbò nuù gẹẹ-gẹẹ ló eé íè ge kpòòlà lóó lọl ló dú gè tõó dùm ge lẹlá gbò bia àbèè gbò gbálà, ge ṍ gã́bug míí, ge dé nu zelmá kẽ, ge ló pọ́lọ́ bel, bií ló gè ẹ̀b pọ́lọ́ fíìm, ge ẹ̀b gbò fòtó ea zógè kóló kètẽ́ nen, nè gbò nú ea bélí vó. (Ps. 101:3) Bẹẹ neǹ ọ́b, ea dú Pọ́lọ́ Nyómá, gé gbĩ́ gbò nèà dee ge kyọ̀ bẹẹ gbaa ló kilma ló Jìhóvà. (1 Pít. 5:8) Be née kuà dẽe ló, Sétàn é láá naa kọ é ié dùm bẹẹ súú dẽe, ge kpọ́ kyáá bel, gọ̀l òò, ọ́b nyíe, dàlà kpáá boo, nè ge ká súng gbẹá nyíe. (Gàl. 5:​19-21) Túá ból, àé láá tõoí ló belí kọọ̀ tọ́ọ̀ kà pọ́lọ́ á gé ló gbò tàní. Sõò be née valẹ̀ bá tú lọa m, àé kilsĩ́ gè bọọ belí té ea íe múú tã́á vaá nvèèi tã̀àgã̀ ló.​—Jém̀z 1:​14, 15.

11. Mókà nuù gẹẹ-gẹẹ ló e née ẹbvì kọ à bọọgẹ̀ dú pọ́lọ́ ní ea dú bíi kọ é kpòọ̀là lóó lọl ló é, vaá ló éé?

¹¹ Ene kà nuù gẹẹ-gẹẹ ló eé láá ẹ̀b kọ náa bọọgẹ̀ dú pọ́lọ́ dú gè bã̀àà pọ́lọ́ kóò. Bugi togó boo nakà nu dòòmà báí. Dòòmà dẽe ló kọọ̀ ò ólò zọ̀ nen e náa ólò fã̀ Jìhóvà siá tóm. Boo béè kọ ò gbĩ́ì kọọ̀ nen eo ólò zọ̀ siá tómá á ẹ̀b kọọ̀ gbò Neǹ Ditõ̀ò Jìhóvà dú lé, ò ólò nvèè bá nèe vaá labví lé láb kìlmàé ló. Sìgà tṍó, ò ólò zọ̀ẹ deá nu. Tṍó e tṍó téní, ò gbóó olòó zọ̀ẹ deá nuu lee. Sìgà tṍó eo gé lóai sọ́l, nená ólò ló gbò bel e bè náa bọ́ló, sõò túá ból náa beè olòó tàni gè ló bel tẹlẹ dẽe. Sõò tṍó e tṍó téní, íb gbò belá beè gbóó ọ̀ọ̀là ni ló naa ní e nóo ẹb nà belí pọ́lọ́ bel. Ene dee, nen eo ólò gbai siai tómá à gbóó kol ni kọ ó dù gé zọẹ̀ẹ õè míí tṍó e ba ni kub tóm, ò gbóó sì. Tṍó e tṍó téní, ò gbóó dààmà togó gè bugi togó belí nen eo ólò gbai siai tómá. Gbele tõ̀ò tṍó náa é téní tṍó eo é daamà togó gè labví láb belíe. Mm̀ kà kà, è ólò fã̀ dẽe vaá ié lé nyíe kilma ló kọ̀láá nen, sõò náa dú bíi kọ é sọ̀tọ́ deè kọọ̀ gbò e zọọ̀ naaá nu á nyaaná bẹẹ láb. (1 Kọ́r. 15:33) Be è íe ọ̀ẹ̀ dẽe belí bé e Jíízọ̀s beè kọ́ nèi naaá, èé kpoolà lóó lọl ló kọ̀láá gbò e bà náa tõó boo gbò nòòkúù Jìhóvà. (2 Kọ́r. 6:15) Èé mon nuù gẹẹ-gẹẹ ló vaá kpòòlà lóó lọl ló.

TÚ O TṌÓ NAAMÁ NU EA DÚ LÉ

12. Éé ní e Jíízọ̀s beè kọ́ nè pá a gbò nyòòne nvée kọ bàá naa tṍó e bà gé élá bànà kùbmà nvéè tṍó ẽ́?

¹² Náa bọ́ló kọọ̀ gbò nyòòne nvéè Jíízọ̀s á dõògẽ ĩìtẽ́ kẽ tṍó e bà gé élá bànà kùbmà nvéè nakà bàlà booí. Jíízọ̀s beè nèva tóm gè sì. A beè kọ bàá vee lé kpẹ̀aí inmá “Jèrúsalẹ̀m, tẹlẹ dénè Judíà nè Sàmérìà nè ke kùbmà bàlà booí.” (Tóm 1:​6-8) Kà pọ̀bkà tóm ní e Jíízọ̀s beè nè pá a gbò nyòòne nvée ẽ́! Ge sí tómí zógè kọọ̀ bà tú ba tṍó naamá nu ea dú lé.

13. Éé ní ea náa vaá à dú bíi kọ é tú bẹẹ tṍó naamá nu ea dú lé é? (Kọ́lọsì 4:5)

¹³ Bugi Kọ́lọsì 4:5. Kọbé è láá ié ọ̀ẹ̀ dẽe, à dú bíi kọ é bugi togó boo bé e túù bẹẹ tṍó siimá tóm naa. “Gbò nú e nen náa beè ẹ̀bmà dẽe” é láá naaá ló kọ̀láá bẹ̀ì. (Ẹ̀klì. 9:11) Bẹẹ dùm é láá iná kùbmà tṍó e née beè ẹ̀bmà dẽe.

14-15. Mósĩ́ deè ní eé láá tú bẹẹ tṍó naamá lé nu ẽ́? (Híbrù 6:​11, 12) (Ẹ̀b nàgé fòtó.)

¹⁴ Èé láá tú bẹẹ tṍó naamá nu ea dú lé tení dú ló gè naa bùlà Jìhóvà vaá agẹlẹ ló bẹẹ gbaa ló kìlmàé ló. (Jọ́ọ̀n 14:21) À dú bíi kọ é ‘kilsĩ́ gè elá àgàlà vaá sí tóm nèe.’ (1 Kọ́r. 15:58) Tṍó e kùbmà é lée​—kọbèè à dú tṍó e úù àbèè tṍó e bàlà booí ni íná kùbmà​—née é ọ́gá.​—Máát. 24:13; Róm̀ 14:8.

¹⁵ Deè nieí, Jíízọ̀s dì ea gé túlè pá a gbò nyòòne nvée mm̀ ba sìtóm kọ̀ kpẹ̀a beeá ló bàlà booí. A ḿm̀-mè nú ea beè zìgà. Tení dú ló bõ̀ònatõ̀ò Jìhóvà, Jíízọ̀s dì ea gé nóòmàì bé eé láá kọ́ kpẹ̀a naa, vaá nèi gbò nú e íè bíi ló kọbé è láá sí tómí. (Máát. 28:​18-20) È náà ní ea kuu bá beélè tṍó e pììgà bé e bẹẹ kpóó sim tùlà naa gè kọ́ kpẹ̀a vaá noòmà nuù gbò nen, nè ge di mm̀ kùà dẽe ló tṍó e gé élá bànà kọọ̀ Jìhóvà á nvèè kùbmà ló nakà bàlà booí. Be è tú dùùlà bá deè tṍ ea di mm̀ kpá Híbrù 6:​11, 12 siimá tóm, èé bii bá ló bẹẹ ból dẽesĩ́ “inmá ke kùbmà.”​—Bugi.

16. Éé ní eé bééláfùl ge naa ẽ́?

¹⁶ Jìhóvà a noo dee nè tṍó ea é nveè kùbmà ló bàlà boo e Sétàn gé lẹẹlà bel lóí. Tṍó e deeá é lée, Jìhóvà náa é aa ló gè naa gbò nú ea beè zìgà, ea di mm̀ Kpá Kàí. Sìgà tṍó, àé láá tõoí ló kọọ̀ bàlà booí náa valẹ̀ bá iná kùbmà. Sõò deè Jìhóvà “náa é dú kpẹ̀ nvée!” (Háb. 2:3) Vóà naa, naanii èé kilsĩ́ “gè elá bànà Jìhóvà,” vaá ĩ̀ìmà “elá bànà Bàrì e [bẹẹ] dùùà aa bá.”​—Máí. 7:7.