Mósĩ́ Deè Ní E Pá O Tọ É Láá Ié Ẹ́ẹ́ Nyíe Ẽ́?—2 Kpò

Gbò pá nvín dú dõ̀ònù ea aa bá Jìhóvà. À gbĩ́ kọọ̀ gbò tẹ̀ nè kà á palàge nvèè ka ló dõ̀ònùí. Jìhóvà ne gbò dùùlà bá deè tṍ e nyìmànù di m ea é láá nvèè bá nè gbò tẹ̀ nè kà kọ bàá naa vó. Gbò a dùùlà bá deè tṍ kọ́ nágé nú e gbò pá nvín é láá naa kọbé ẹ́ẹ́ nyíe di mm̀ ba tọ.

1. Mókà dùùlà bá deè tṍ ní e Jìhóvà ne gbò tẹ̀ nè kà ẹ?

Jìhóvà gbĩ́ kọọ̀ gbò tẹ̀ nè kà á vùlè ba gbò nvín vaá tú gã́bug tṍó dììmà vá ló. À gbĩ́ nágé kọọ̀ gbò tẹ̀ nè kà á kpènà ba gbò nvín lọl bá gbò nú ea é láá nvèè va tã̀àgã ló vaá bumá va dẹ̀ẹ̀a boo gbò nòòkúu ea di mm̀ Kpá Káí. (Próvẹẹ̀b 1:8) À kọ́ nè gbò tẹ̀ kọọ̀: “Kilíí sĩ́ gè bumaí va [bọọ gbò nvín] mm̀ dùùlà bá deè tṍ . . . ea aa bá Jìhóvà.” (Bugi Ẹ́fẹsọ̀s 6:4, NW) Nyíè Jìhóvà ólò ẹẹ beè tẹ̀ nè kà gbantṍ ló a dùùlà bá deè tṍ tṍó e bà gé búmá ba gbò nvín, vaá bà náa tú va nè dõòna nen kọ á bumá.

2. Mókà dùùlà bá deè tṍ ní e Jìhóvà ne gbò pá nvín ẽ́?

Jìhóvà ãane gbò pá nvín kọọ̀: “Gbanii tṍ ló bọọ gbò tẹ̀ nè kà.” (Bugi Kọ́lọsì 3:20.) Tṍó e gbò pá nvín gbantṍ ló vaá fã̀ dẽè ba tẹ̀ nè ba kà, àé náa kọọ̀ nyíè Jìhóvà bií ló ba tẹ̀ nè ba kà á ẹẹ. (Próvẹẹ̀b 23:22-25) Jíízọ̀s beè nè kà lé nu dòòmà bá tṍó ea beè di-dí ńkem. Náa kal ló béè kọọ̀ a beè gbõoma, a beè gbàntṍ ló vaá fã̀ dẽè a tẹ̀ nè a kà.—Lúùk 2:51, 52.

3. Mósĩ́ deè ní e pá o tọ é láá tõo bã ló Bàrì e?

Tọ́ọ̀ kà bàà-bàà bùlà á gé ló kọọ̀ be ọ̀ọ̀ tẹ̀ àbèè kà, àé léémá ni kọọ̀ pá o nvín á palàge vùlè Jìhóvà belí bé e olo vulèe naa. Éé ní ea é nveè bá nè ni kọ ó láá naa vó é? Tení dú ló gè naa nú ea di mm̀ Kpá Káí ea kọ́ọ̀: “Òé íè ge olòó noomai [moǹ bel Jìhóvà] bọọ gbò nvín vaá kọi neí va tṍó eo dií ĩ́ìtẽ́ tọ nè tṍó eo gé kyãaníí boo èèlè.” (Dìtolónomì 6:7) Ge noòmà nu tõó dọ̀ ge olòó òòa boo nú eo kọ́ọ̀ nè nen. Dì belí bé eo nyímà naa, àé dú bíi kọ ó òòa boo nú eo kọ́ọ̀ nè pá o nvín kọbé bà láá kẽ̀èa boo. Dọ̀ Kpá Káíí gé náa kọ é nyimá kọọ̀ à dú bíi kọ ó gbĩ́ gbò nèà deè eo é láá zọ̀ọ̀mà pá o nvín loomá bel ea kil ló Jìhóvà kọ̀láá tṍó. Àé palàge dú lé be è noo tṍó buù sè naa ní e dénè nen ea di bẹẹ tọ é láá gbá nó Kpá Káí. Be nóo íè nvín, àé dọ nàgé bélè nè ni be ò noo tṍó nyòòmà ge nó Kpá Káí buù sè.

KPÁÁ NÓ BỌ̀Ọ̀VẸ̀

4. Bumá pá o nvín mm̀ sĩ́deè ea zógè kọ ò vulè va

Ge bumá nvín náa ólò bọọgẹ̀ valí. Sõò mósĩ́ deè ní e Kpá Káí é láá nvèè bá ẹ́? Bugi Jém̀z 1:19, 20, vaá ò gbóó aalai gbò bíbví:

• Mósĩ́ deè ní e tẹ̀ nè kà é láá zogè kọọ̀ bà vulèè ba gbò nvín tṍó e bà gé zọ́va loá bel é?

• Éé ní ea náa vaá náa bọ́ló kọọ̀ tẹ̀ àbèè kà á dùùlà bá deè tṍ a nvín tṍó e súng gé bã́e ẽ́?a

5. Kpènà pá o nvín

Kọbé ò láá kpènà pá o nvín, àé dú bíi kọ ó zọ̀ buù ọ̀và loá sọ́l boo gbaa ló ea di zẹ̀ẹ̀ págbálà nè pábia. Àé láá tàvàlà ge naa vó. Bìlà VÍDIÒÍ, vaá ò gbóó aalai gbò bíb ea nyoone.

VÍDIÒ: Kpènà Pá O Nvín Lọl Ló Nú Ea Dú Pọ́lọ́ (2:58)

• Éé ní ea náa vaá à ólò tavala ló sìgà tẹ̀ nè kà ge zọ̀ ba gbò nvín loá bel boo gbaa ló ea di zẹ̀ẹ̀ págbálà nè pábia ẹ́?

• Mósĩ́ deè ní e sìgà tẹ̀ nè kà ni kọ́ nú ea kil ló gbaa ló ea di zẹ̀ẹ̀ págbálà nè pábia nè ba gbò nvín ẽ́?

Dì belí bé e Kpá Kái beè gbẹẹ́ sĩ́ kọ́ naa, bàlà boò Sétàní gé kpáá palàge dú pọ́lọ́. Bugi 2 Tímotì 3:1, 13, vaá ò gbóó aalai nakà bíbví:

• Sìgà gbò pọ́lọ́ e 13 gã́belá kọ́ nú ea kil ló dú gès kuná gbò pá nvín. Vóà naa, éé ní ea náa vaá à dú bíi kọọ̀ tẹ̀ nè kà á noòmà ba gbò nvín nú ea kil ló gbaa ló ea di zẹ̀ẹ̀ págbálà nè pábia, nè bé e bàé láá kpènà ba bá naa ẽ́?

O beè nyimá gé?

Gbò Neǹ Ditõ̀ò Jìhóvà a émí gã́bug kpá ea é nveè bá nè tẹ̀ nè kà kọ bàá láá noòmà ba gbò nvín nú ea kil ló gbaa ló ea di zẹ̀ẹ̀ págbálà nè pábia, nè ge kpènà va naa ní e bà náa é dọ́ bá. Dì belí nu dòòmà bá, ẹ̀b:

• Kpènà Pá O Nvín (vídiò)

• Learn From the Great Teacher, 10 nè 32 togó

• “Teaching Your Child About Sex” (Awake! No. 5 2016)

6. Fã̀ dẽè o tẹ̀ nè o kà

VÍDIÒ: Mósĩ́ Deè Ní E Ḿ Láá Zọ̀ Nà Tẹ̀ Nè Nà Kà Loá Belé? (2:19)

• Éé ní ea náa vaá à palàge bọ́ló kọọ̀ nvín á ló bel nè a tẹ̀ nè a kà mm̀ bá fã̀ dẽe ẽ́?

• Mósĩ́ deè ní e nvín é láá ló bel nè a tẹ̀ nè a kà mm̀ bá fã̀ dẽe ẽ́?

Bugi Próvẹẹ̀b 1:8, vaá ò gbóó aalai nakà bíbví:

• À bọ́ló kọọ̀ nvín á labví láb naa vàẹ tṍó ea tẹ̀ nè a kà duulàẹ bá deè tṍ ẽ́?

7. Gbai fãi Jìhóvà dì belí pá tọ

Gbò Neǹ Ditõ̀ò Jìhóvà ólò noo tṍó buù sè naa ní e pá ba tọ nè ọ̀và é láá gbá noá Kpá Káí. Nòònù ge gbá noá Kpá Káíí ólò mèà naa vàẹ? Bìlà VÍDIÒÍ, vaá ò gbóó aalai gbò bíb ea nyoone.

VÍDIÒ: Gbò Ànà Ànà—Nè Gbò Lé Kpẽ́ Ea Di Ló Fã̀ Pá Tọ (8:04)

• Mósĩ́ deè ní e pá tọ é láá olòó ié Fã̀ Pá Tọ ẹ́?

• Éé ní e tẹ̀ àbèè kà é láá naa kọbé dénè nen dé kpéè ló vaá ié nú e bà nó lọl ló ba fã̀ pá tọ ẹ́?—Ẹ̀b fùtó ea di dààà togó nakà nu gè nòí.

• Éé ní ea é láá naa kọ á tavala ló pá tọ gè gbá noá nu ẽ́?

Jìhóvà beè gbĩ́ kọọ̀ buù kà pá tọ ea beè di Ízràẹ̀l deè kéléá á olòó gbá noá Kpá Káí. Bugi Dìtolónomì 6:6, 7, vaá ò gbóó aalai nakà bíbví:

• Mósĩ́ deè ní eo é láá tú nakà nòòkúuí siimá tóm ẽ́?

Lọ̀ọ̀gà bùlà ea kil ló gbò nú eo é láá sẹ̀ẹ̀mà fã̀ pá tọ:

• Kpoogá dee ló nyòòmà nònù.

• Bugi vaá ló sọ́l boo nòòtẽ́ ea di mm̀ Kpá Káí e pá o tọ é dé kpéè ló.

• Beè pá o nvín di-dí ńkem, naa dã̀ànlóòd àbèè ò náa príǹt nu gè naa ea dì nè gbò pá nvín lọl boo jw.org.

• Beè pá o nvín a tóólá òb nè sìgà gbáá, loi sọ́l boo gbò togó bel ea di boo jw.org ea dì nè gbò nvín ãa.

• Dòòmà dẽe ló vaá ò zọ pá o nvín labví láb belí nen e Kpá Káí ló bel ea kil ló.

• Gbai ẹbvii vaá ò lóai sọ́l boo vídiò ea di boo jw.org.

NÚ E NI NÓ

Jìhóvà gbĩ́ kọọ̀ tẹ̀ nè kà á vùlè, bumá, vaá kpènà ba gbò nvín; gbò pá nvín á gbàntṍ ló vaá fã̀ dẽè ba tẹ̀ nè ba kà; vaá à gbĩ́ nágé kọọ̀ pá tọ á gbá fãèe.

Ge Òòa Boo

• Mósĩ́ deè ní e tẹ̀ nè kà é láá bumá vaá kpènà ba gbò nvín ẽ́?

• Mósĩ́ deè ní e gbò pá nvín é láá zogè kọ bà fãè dẽè ba tẹ̀ nè ba kà ẹ?

• Mókà gbò bélè ní eo é íe lọl ló gè noo tṍó buù sè nyòòmà fã̀ pá tọ ẹ́?

KPÁÁ GBĨ́ TẼ́ LÓ

Gbò éé ní ea é láá nvèè bá nè o nvín kọ á bọọ dú nen e togóe tulà nu ẽ́?

“Six Lessons Children Need to Learn” (Awake! No. 2 2019)

Nyimá gbò dùùlà bá deè tṍ e Kpá Káí ne gbò e bà gé ẹb nú ea kil ló ba tẹ̀ àbèè ba kà ea ni dú kànen mm̀ dee.

“What Does the Bible Say About Caregiving for Elderly Parents?” (Web article)

Nyimá bé e ene kà gbálà e bè náa beè nyimá bá gè bumá pá a nvín beè láá dú lé tẹ̀ naa.

Jìhóvà Nóòmài Sĩ́deè Gè Láá Bumá Bẹẹ Gbò Nvín (5:58)

Nyimá bé e gbò tẹ̀ é láá agẹlẹ ló gbaa ló ea di zẹ̀ẹ̀ ba nvín págbálà nè ọ̀và naa.

“How Can Fathers Stay Close to Their Sons?” (Kpá Tọ Kùdẽe Ló, November 1, 2011)