Mée Ní Ea Dú Jíízọ̀s E?

Jíízọ̀s dú nen e gbò nen a palàge dã́ bée mm̀ nòòtẽ́ ea kil ló gbò nen. Sõò gã́bug nen náa nyímá gbele tõ̀ò nú ea kil ló Jíízọ̀s daalá lọl ló a bée, vaá bà íe kele-kele bùlà kilma ló íb nen e ẹlẹ dú. Éé ní e Kpá Káí kọ́ kìlmàé ló é?

1. Mée ní ea dú Jíízọ̀s e?

Jíízọ̀s dú nyómá tóm ea palàge íe kpóó ea di káála. Jìhóvà beè dèmie besĩ́ à kálá dèm dõòna kà gbò nu. Vó ní ea náa vaá bà kolíe “túá nen e Bàrì beè dèm” ẽ. (Kọ́lọsì 1:15, NW ) Kpá Káí kólí Jíízọ̀s “áá kà . . . Sã́áná” Bàrì, boo béè kọọ̀ áá ẹlẹ ní e Jìhóvà beè tú a bá dèmàe. (Jọ́ọ̀n 3:16) Jíízọ̀s beè zọ̀ a Tẹ̀ Jìhóvà siá tóm leevè vaá nvèè bá nèe mm̀ ge dèm dõòna kà gbò nu. (Bugi Próvẹẹ̀b 8:30.) Jíízọ̀s íe kà lé gbaa ló kilma ló Jìhóvà. Jíízọ̀s ní ea dú “Mon Belá” ẹ́, níà gè kọọ̀ Bàrì géè ló bel tenmáé gã́ nè dõòna gbò.—Jọ́ọ̀n 1:14.

2. Éé ní ea náa vaá Jíízọ̀s beè dú boo kunukẽ̀í ẽ́?

Mm̀ nú ea é dú 2,000 gbáá ea kil nvéeá, Jìhóvà beè tú dùm Jíízọ̀s nveè gbàà ene kà nvín pábia ea gáà si ló págbálà ea bée kọlà Mérì. Vó beè naa kọọ̀ Jíízọ̀s á láá mèà gbẹá boo kunukẽ̀í. (Bugi Lúùk 1:34, 35.) Jìhóvà beè lẹ̀ẹ̀là Jíízọ̀s domá boo kunukẽ̀í kọ á dú Mèsáíà, àbèè Kráìst e ba beè kọ́ nú ea kil lóá, nè ge kọ á dùùlà gbò nen.a Dénè kọ́ọ̀ bùlà Bàrì ea kil ló Mèsáíà beè mm-má kìlmàé ló, ea náa kọ gbò nen á gbóó nyimá kọọ̀ ẹ̀ẹ̀ “Méné e Bàrì Sà, [ea] dú Sã́áná Bàrì ea di dùm.”—Máátìù 16:16.

3. Ãàe ní e Jíízọ̀s di kátogóí é?

Tṍó e Jíízọ̀s ú, a beè kẽ̀èà aa kemà ú dú nyómá vaá òòà kil káála. Gbẹá kĩá, “Bàrì [beè] gbóó palàge dàlàẹ́ boo.” (Fílipaì 2:9) Kátogóí, Jíízọ̀s dú nyómá tóm ea palàge ié kpóó e áá Jìhóvà ní ea boo èlie é.

4. Jíízọ̀s níì Bàrì ea Bọọ Lọ̀l Vaá À Lee nì

Náa kal ló béè kọọ̀ Jíízọ̀s dú nyómá ea íe kpóó ea di káála, Kpá Káí nóòmà kọọ̀ à ólò gbàntṍ ló a Tẹ̀ ea dú Jìhóvà Bàrì. Éé ní ea náa èé láá kọ́ vó é? Bìlà VÍDIÒÍ kọbé ò nyímá kelé ea di zẹ̀ẹ̀ Jíízọ̀s nè Bàrì ea bọọ lọ̀l vaá à lee.

VÍDIÒ: É Kọọ̀ Jíízọ̀s Kráìst Níà Bàrì? (3:22)

Gbò dọ̀ Kpá Káíí nveè bá nèi kọ é nyimá kelé ea di zẹ̀ẹ̀ Jìhóvà nè Jíízọ̀s. Bugi buù kà dọ̀ Kpá Káíí, vaá ò gbóó aalai gbò bíb ea nyoone.

Bugi Lúùk 1:30-32.

• Mósĩ́ deè ní e nyómá tómá baatẽ́ kele ea di zẹ̀ẹ̀ Jíízọ̀s nè Jìhóvà Bàrì ea ‘Bọọ Lọ̀l Vaá À Lee’ é?

Bugi Máátìù 3:16, 17.

• Tṍó e Jíízọ̀s géè dììa múú, éé ní e mon ea silà aa káálaá beè kọ̀ẹ?

• Ò bulà kọọ̀ níà moǹ mée ẽ́?

Bugi Jọ́ọ̀n 14:28.

• Mée ní ea dú kànen vaá palàge ié kpóó é? É kọọ̀ tẹ̀ sẹ̀ nvín ẽ́?

• Ge kọọ̀ Jíízọ̀s kólí Jìhóvà a Tẹ̀ nóòmài éé?

Bugi Jọ́ọ̀n 12:49.

• É kọọ̀ Jíízọ̀s túúmá kọọ̀ ẹlẹ nè a Tẹ̀ dúè tẽ̀ènè nen? O bulà kọ́ vàẹ?

5. Nú ea zógè kọọ̀ Jíízọ̀s ní ea dú Mèsáíà ẹ

VÍDIÒ: Jíízọ̀s Ḿm̀-mè Kọ́ọ̀ Bùlà Bàrì (3:03)

Bugi gbò dọ̀ Kpá Káí ea kil ló gbò kọ́ọ̀ bùlà Bàrìí, vaá ò gbóó aalai gbò bíb ea nyoone:

Bugi Máíkà 5:2 kọbé ò nyímá kiẽ́e e ba beè kọọ̀ Mèsáíà é meà gbẹá.b

• É kọọ̀ kọ́ọ̀ bùlà Bàrìí beè mm-má tṍó e Jíízọ̀s meà?—Máátìù 2:1.

Bugi Psalm 34:20 nè Zèkàráíà 12:10 ge nyimá nú e Kpá Káí beè kọ́ kilma ló ú Mèsáíà.

• É kọọ̀ gbò kọ́ọ̀ bùlà Bàrìí beè mm-má? —Jọ́ọ̀n 19:33-37.

• É kọ à tõó ní ló kọọ̀ Jíízọ̀s ní ea beè naa kọọ̀ gbò kọ́ọ̀ Bùlà Bàrìí á mm-má ẽ́?

• Éé ní e níí nóòmà ni kilma ló Jíízọ̀s e?

NÚ E NI NÓ

Jíízọ̀s dú nyómá ea íe kpóó. Ẹ̀ẹ̀ Sã́áná Bàrì nè Mèsáíà.

Ge Òòa Boo

• Éé ní ea náa vaá Jíízọ̀s à kọ̀là ‘túá nen e Bàrì beè dèm’ ẽ?

• Éé ní e Jíízọ̀s beè naa besĩ́ à kálá dú boo kunukẽ̀í ẽ́?

• Éé ní ea náa vaá è nyimá kọọ̀ Jíízọ̀s ní ea dú Mèsáíà ẹ?

KPÁÁ GBĨ́ TẼ́ LÓ

Kpáá nó nú ea náa vaá è nyimá kọọ̀ Jíízọ̀s ní ea dú Mèsáíà ẹ.

“Do Messianic Prophecies Prove That Jesus Was the Messiah?” (Web article)

Nyimá lọl mm̀ Kpá Káí beè Bàrì beè bòn Jíízọ̀s belí bé e gbò nen ólò bòn nvín naaá.

“Why Is Jesus Called the Son of God?” (Web article)

Nyimá nú ea náa vaá nòòmànù ge kọọ̀ Taà Kà Bàrì Di Mm̀ Ene Kà náa dú nòòmànù Kpá Káí.

“Is Jesus God?” (Kpá Tọ Kùdẽe Ló, April 1, 2009)

Bugi nú ea kil ló bé e dùm ene kà ńnváá beè nyaaá naa tṍó ea nó nú e Kpá Káí kọ́ kilma ló Jíízọ̀s.

“A Jewish Woman Explains Why She Reexamined Her Faith” (Awake!, May 2013)