Sà Kólì Kyáà Ea Léémá Jìhóvà

Jìhóvà dú ‘Bàrì ẹ́ẹ́ nyíe.’ (1 Tímotì 1:11) À gbĩ́ kọọ̀ nyíéi á ẹẹ vaá è dé kpéè ló bẹẹ dùm. Nyíée ólò ẹẹ tṍó e noò tṍó aa ló tóm e géè sì boo béè ge bṍséi. Mm̀ nakà nu gè nòí, èé nó bé eé láá tú bẹẹ tṍó bõ̀séi naamá nu mm̀ sĩ́deè ea é dĩinéi ló, ẹẹlẹ̀i nyíè, vaá leemá nágé Jìhóvà naa.

1. Éé ní ea bọ́ló kọ é kẽ̀èa boo tṍó e gé sa bẹẹ kólì kyáà ẹ?

Éé ní ea ólò leemá ni gè naa tṍó eo gé bṍséi é? À ólò leemá sìgà gbò ge tú ba tṍó bõ̀séi tõoma tọ vaá bugi kpá, pãane tṍ ló sọ́l, ẹ̀b TV, àbèè ge bã boo íntanèt. Boo tṍó ea ólò leemá sìgà gbò ge tú ba tṍó bõ̀séi zọ̀ọ̀mà ba kóò bìlà kyẽè, zọbví múú, àbèè ge bìlà gém̀. Kọ̀láá nú ea ólò leemái gè tú bẹẹ tṍó bõ̀séi naamá, àé dú bíi kọọ̀ bẹẹ kólì kyáà á dú ní ea é “léémá Bàrì.” (Ẹ́fẹsọ̀s 5:10) À dú bíi kọ é dã́ ból ló níí boo béè kọọ̀ gã́bug kólì kyáà ólò nvèè sãa kúm gbò nú e Jìhóvà ọ́bví dì belí gè èèlà mii, ge kuná gã̀, àbèè ge fã̀ zọ. (Bugi Psalm 11:5.) Éé ní ea é láá nvèè bá nèi kọ é tú nyìmànù sààmà bẹẹ kólì kyáà ẹ?

Be è bãaà kóò gbò e bà vulè Jìhóvà, bàé láá naa kọ é labví láb ea dú lé vaá sà kólì kyáà ea bọ́ló. Dì belí bé e beè nó mm̀ 48 Nu Gè Nò naaá, “nen ea zọ neǹ nyìmànù gbá tọ é nyímá nu.” Sõò, “nu é bẽ́é ló” nen ea ólòó zọ̀ gbò e bà náa tõó boo gbò nóòkúù Bàrì naaá nu.—Próvẹẹ̀b 13:20.

2. Éé ní ea náa vaá à dú bíi kọ é lẹ̀ẹ̀là bel ló gã́bug tṍó e nveè mm̀ bẹẹ kólì kyáà ẹ?

Kọbèè à gá náa vaá bẹẹ kólì kyáà à dú ní ea léémá Jìhóvà, àé dú bíi kọ é ié ọ̀ẹ̀ dẽe kọbé née túù gã́bug tṍó nvee m. Be níì vó nì, née é íe gã́bug tṍó gè naamá gbò nú ea palàge dú bíi. Kpá Káí síèi kpóó ló kọọ̀: “Tui kọ̀láá kà tṍó eo íèì naamai lé nu.”—Bugi Ẹ́fẹsọ̀s 5:15, 16.

KPÁÁ NÓ BỌ̀Ọ̀VẸ̀

Nyimá bé eo é láá nè lé béèlàfùl ea kil ló o kólì kyáà naa.

3. Kìn kólì kyáà e bè náa bọ́ló

Éé ní ea náa vaá à bọ́ló kọ é tú ọ̀ẹ̀ dẽe sààmà bẹẹ kólì kyáà ẹ? Bìlà VÍDIÒÍ, vaá ò gbóó aalai gbò bíb ea nyoone.

VÍDIÒ: Mókà Kólì Kyáà Ní E Nda É Sa Ẹ́? (4:39)

• Mósĩ́ deè ní e gbò gém̀ e ba beè olòó bìlà gbẹá Róm̀ deè kéléá bélí gbò kólì kyáà ea di deè nieí é?

• Mm̀ vídiòá, éé ní e Danny beè nò ea kil ló kólì kyáà ẹ?

Bugi Róm̀ 12:9, vaá ò gbóó aalai nakà bíbví:

• Mósĩ́ deè ní eo é láá tú dọ̀ Kpá Káíí siimá tóm tṍó eo gé sa kólì kyáà ẹ?

Sìgà éé ní e Jìhóvà ọ́bví é? Bugi Próvẹẹ̀b 6:16, 17 nè Gàlésìà 5:19-21. Tṍó eo ni bugi buù kà dọ̀ Kpá Káíí lọ̀l, ò gbóó aalai nakà bíbví:

• Sìgà éé ea di mm̀ gbò dọ̀ Kpá Káíí ní ea tọla kẽ mm̀ gbò kólì kyáà ea di deè nieí é?

Gbò bíb ea é láá nvèè bá nè ni kọ ó tú nyìmànù sààmà o kólì kyáà

Bĩiná o bá kọọ̀:

• É kọọ̀ à íe nú e Jìhóva ọ́bví ea di ló nakà kólì kyáàí?

• É kọọ̀ kólì kyáàí náa kọ ḿ gá láá naa nú ea palàge dú bíi?

• É kọọ̀ kólì kyáàí é náa kọ ḿ zọ̀ gbò e bà náa vulè Jìhóvà naaá nu?

Èé íe kpènà be è piiga boo gè kil kpã́á aa ló nú ea é tú bẹẹ dùm nvee kèbá gẹẹ-gẹẹ ló. Níà nú ea náa vaá à bọ́ló kọ é kil kpã́á aa ló kọ̀láá íb kólì kyáà e túùmà kọọ̀ náa bọ́ló é

4. Tú o tṍó siimá tóm leevè

VÍDIÒ: Éé Ní Eo Ólò Tú O Tṍó Naamá Ẽ́? (2:45)

• Náa kal ló béè kọọ̀ kólì kyáà e vígà págbálà ea di mm̀ vídiòí sa náa dú pọ́lọ́, mósĩ́ deè ní e bé ea tú a tṍó bõ̀séi siimá tóm naa beè tọáẹ ló é?

Bugi Fílipaì 1:10, vaá ò gbóó aalai nakà bíbví:

• Mósĩ́ deè ní e dọ̀ Kpá Káíí é láá nvèè bá nèi kọ é nè béèlàfùl ea kil ló gã́bug tṍó eé nvee mm̀ kólì kyáà ẹ?

5. Sà kólì kyáà ea dú lé

Náa kal ló béè kọọ̀ sìgà kólì kyáà bẽ́émá Jìhóvà, à íe sìgà e bè náa bẽ́émáe. Bugi Ẹ̀klìzíástìs 8:15 nè Fílipaì 4:8, vaá ò gbóó aalai nakà bíbví:

• Mókà kólì kyáà ea dú lé ní ea ólò leemá ni ẽ́?

NÚ E NI NÓ

Jìhóvà gbĩ́ kọ é sà vaá dé kpéè ló kólì kyáà ea dú lé.

Ge Òòa Boo

• Mókà kólì kyáà ní ea bọ́ló kọọ̀ gbò e bà gé nyoone nvéè Kráìst á òòà aa ló é?

• Éé ní ea náa vaá à bọ́ló kọ é ié ọ̀ẹ̀ dẽe ea kil ló gã́bug tṍó e nveè mm̀ kólì kyáà ẹ?

• Éé ní ea náa vaá ò gbĩ́ gè sà kólì kyáà ea léémá Jìhóvà ẹ?

KPÁÁ GBĨ́ TẼ́ LÓ

Nyimá nen ea bọ́ló kọ á sà bẹẹ kólì kyáà.

“Do Jehovah’s Witnesses Ban Certain Movies, Books, or Songs?” (Web article)

Nyimá bé eo é láá nè lé béèlàfùl ea kil ló tṍó eo gé ganè ló nè o tṍó bõ̀séi naa.

“Is Your Recreation Beneficial?” (Kpá Tọ Kùdẽe Ló, October 15, 2011)

Mm̀ nòòtẽ́ ea kọ́ọ̀ “I Even Overcame My Prejudice,” nyimá bé e ene kà gbálà beè nyaaná bá ló kólì kyáà ea sa naa.

“The Bible Changes Lives” (Kpá Tọ Kùdẽe Ló, February 1, 2010)

Ẹ̀b bé e ene kà ńnváá beè nè lé béèlàfùl ea kil ló kólì kyáà ea fáálá nòòtẽ́ ea kil ló gbò zọ naa.

Kìn Kólì Kyáà Ea Nveè Sãa Kúm Gè Fã̀ Zọ (2:02)