Ádàm nè Íìv beè ié gã́bug nvín tṍó e bà aa mm̀ gònò Ídèna. Ba túá sĩ́ nvín ea kọlà Kéìn beè dú neǹ kìl ól, vaá ní ea égè bàà kà ea kọlà Ébẹ̀l, à dú neǹ kùdẽe ló naanà ból.

Enè dee, Kéìn nè Ébẹ̀l beè vaalá gyọ́ọ nè Jìhóvà. É kọ ò nyímà nú e gè vaalá gyọ́ọ tõó dọ̀? Níà kele íb dõ̀ònù. Nyíè Jìhóvà beè palàge ẹẹ́ ló vààla gyọ́ọ̀ Ébẹ̀l, sõò nyíée náa beè ẹẹ́ ló níí Kéìn. Níá beè naa kọọ̀ nyíè Kéìn á palàge bììlà. Jìhóvà beè palàge ãane Kéìn kọọ̀ a súng é láá naa kọ á sí pọ́lọ́. Sõò náa beè pãane tṍ.

Tãa vó, Kéìn beè gbóó kọ́ nè Ébẹ̀l kọọ̀: ‘Dù mè èé gbá àà sí ól.’ Tṍó e áá pálaa ọ̀và di boo bàlà ólá, Kéìn beè gbóó tú nu fẹẹmá a vígà Ébẹ̀l. Éé ní e Jìhóvà é náa kilma ló belí é? Jìhóvà beè nè kpọ̀té Kéìn tení dú ló gè lẹ̀ẹ̀làẹ kilma kpã́á lọl ló pá a tọ. Bà náa é zigà kọọ̀ Kéìn á òòa na kẽ dù.

É kọ à íe nú eé láá nó lọl ló? Nyíéi é láá bììlà beè nu náa nááá belí bé ea dú beélè bùlà naa. Be è monì kọọ̀ súng bã́í​—àbèè kọọ̀ nen ãanéi boo béè kọ à mon kọọ̀ súng bã́i​—à bọ́ló kọ é vàlẹ̀ bá sí tóm boo vaá nyaaá besĩ́ súng kálá lẹ̀ẹ̀lài bel ló.

Jìhóvà é kẽèa boo Ébẹ̀l boo béè kọ a beè naa nú ea dú lé. Bàrì é kẽeé ẽ lọl kemà ú tṍó ea é náa kọọ̀ boo kunukẽ̀í á dú páradaìs.

Tṍó e tṍó téní, gã́bug nen beè gbóó di boo kunukẽ̀í. Gã́bug ọ̀và beè ié pọ́lọ́ lab dògò. Bã̀àna sìgà gbò nyómá tóm e bà di káála beè ié nágé pọ́lọ́ lab dògò. Ba beè aa káála e Bàrì beè tú va sẹlẹ dú boo kunukẽ̀í. É kọ ò nyímà nú ea náa bà naa vó? Ba beè naa vó kọbé bà láá kììà dú nen vaá ilí gbò bia.

Gbò nyómá tómá nè gbò biaá beè gbóó ié gbò nvín págbálà. Gbò nvíní beè bọọ, palàge ié kpóó vaá dú gbò bàg. Bà ólò nvèè tã̀àgã̀ ló gbò nen. Jìhóvà náa é láá sọ̀tọ́ deè kọọ̀ íb nuí á kilsĩ́ gè naa ã́. Vó beè naa kọ á beeláfùl ge tú múú kyọ̀ọ̀mà sĩ́ gbò pọ́lọ́í.

Sõò à íe ene kà gbálà ea beè dú kele àà vá gbàà. A beè vùlè Jìhóvà. A bée kọlà Nóà. A beè ié ene kà va nè taà kà nvín págbálà. Béè gbò nvín págbálàí beè kọ̀là, Shém̀, Hám̀, nè Jéfẹ̀t. Buù kà pá a nvíní beè ié va. Jìhóvà beè kọ́ nè Nóà kọ á ká pọ̀bkà faà kọbé à duulà pá a tọ nè ẹ̀ẹ̀ lọl bá tù múú. Faàí beè belí pọ̀bkà kpó ea é láá zẹẹ́ sĩ́ múú. Jìhóvà beè kọ nágé nè Nóà kọ á tú gã́bug nom nvee mm̀ faàa kọbé bà láá dùùà nàgé.

Tẽ̀ènè tṍóá, Nóà beè gbóó dààmà togó gè ká faàa. A beè tú nú ea é láá dú 50 gbáá bá Nóà nè pá a tọ gè ká faàí. Ba beè ká faàí gbõ̀ònà bé e Jìhóvà beè kọ́ nè va naa. Mm̀ gbò tṍóá, Nóà beè ãane gbò nen ea kil ló tù múúá. Sõò tọ́ọ̀ ọ̀và náa beè pãanée tṍ ló.

Dee deè nvée, tṍó gè bã mm̀ faàí beè gbóó lee. Naa mè èé gbĩ́tẽ́ ló nú ea kpáá naa ã́.