Ié Ĩ̀ìmà

Nú E Jíízọ̀s Beè Naa

VÍDIÒÍ: Jíízọ̀s Beè Ié Ĩ̀ìmà Vaá Nvèè Bá Nè A Vígà

1. Ẹ̀b VÍDIÒÍ, àbèè ò bugi Jọ́ọ̀n 7:​3-5 nè 1 Kọ́rìnt 15:​3, 4, 7. Vaá ò gbóó aalai gbò bíbví:

1. Pá vígà Jíízọ̀s beè zẹ́ẹ́ labví láb nyòòmà a sìtóm kọ̀ kpẹ̀a naa vàẹ?

2. Éé ní ea zógè kọọ̀ Jíízọ̀s náa beè òòà aa ló gè nvèè bá nè a vígà Jém̀z e?

Éé Ní E Nóò Lọl Ló Jíízọ̀s E?

2. È íè bíi ló ĩ̀ììmà, boo béè kọọ̀ à ólò tú gã́bug tṍó bá sìgà nen gè dã́ lé kpẹ̀aí èlmà sìgà nen.

Nó Jíízọ̀s

3. Dò ge tú dõona bá sií ló. Beè nen náa zigà ge vàlẹ̀bá zọ̀ ni noá Kpá Káí, ó gá tãgĩ́e bá. Tṍó ea bọ́ló, tú vídiò àbèè dõona kà gbò togó bel nvèèmà bá nèe kọ á dã́ tẽ́ ló nú ea ólò naaá tṍó e gé zọ nen noá Kpá Káí nè bé ea é dọ bélè nèe naa.

4. Ó gá túe doolé ló dõona nèn. Buù nen dú kele. Be à gá náa vaá nen ea dú bọọ tọ àbèè nen eo ólò sì gé kãa náa zigà ge nó Kpá Káí, àbèè ge ziga ló nú e Kpá Káí nóòmà, bugi togó boo nú ea náa vaá à mèà naa vó. É kọọ̀ à íe nú e ba bõ̀ònaló fã̀ nóòmà ea palàge ziga ló? É kọọ̀ pá a dúà ló àbèe pá ba kè gyṍó gé tã́gĩ́e bá? Nèe tṍó kọ á bùgmà togó boo gbò nú eo beè kọ́ nèe, nè ge mòn bé e nú e Kpá Káí nóòmà é dọ bélè nèe naa.

5. Tã̀àgã ló Bàrì má gbò e bà íe lèèma. Bàn kọ Jìhóvà á nvèè bá neè ni kọ ó láá ièè ĩ̀ìmà nè ọ̀ẹ̀ dẽe. Bànie kọ á neè ni nyìmànù kọbé ò nyímàè tṍó ea bọ́ló gè òòà aaló gè sí ló nen e náa íe na lèèmá m.​—1 Kọ́r. 9:26.