28 NU GÈ NÒ
Zaava Ló Nú E Jìhóvà Nè Jíízọ̀s Ni Náa Nè Ni
À ólò tõó ní ló naa vàẹ tṍó eo kóò dõo kà lé nu nè ni ẽ́? Be à sẹlẹ, à ólò naa kọọ̀ nyíé ni á ẹẹ, vaá ò ólò gbóó gbĩ́ gè naa kọ o kóòa á nyimá kọọ̀ nyíé ni ẹ́ẹ̀lìẹ̀ ló. Jìhóvà nè Jíízọ̀s néi pọ̀bkà dõ̀ònù ea el kọ̀láá kà nú e nen é láá dõo nèi. Níà éé, vaá mósĩ́ deè ní eé láá zogè kọ è zaàvàẹ̀ ló é?
1. Éé ní ea dú enè sĩ́deè eé láá zogè kọ è zaàvàẹ̀ ló nú e Bàrì nè Kráìst náa nèi ẽ́?
Kpá Káí zigà nèi kọọ̀, ‘kọ̀láá nen ea íe zìgà mm̀ Jíízọ̀s’ é láá tõó dùm dọ̀ dè-dè. (Jọ́ọ̀n 3:16) Éé ní e gè ié zìgà kọlà ẹ? À bọọ ẹ̀lmà áá gè ziga ló Jíízọ̀s. À bọ́ló kọ é zogè kọ è íèè zìgà tení dú ló gbò béèlàfùl e neè nè gbò nú e náà. (Jém̀z 2:17) Tṍó e zógè kọ è íèè zìgà tení dú ló nú e náà nè nú e kọ́ọ̀, è náà kọọ̀ bẹẹ gbaa ló kilma ló Jíízọ̀s nè a Tẹ̀ Jìhóvà, á aga ló.—Bugi Jọ́ọ̀n 14:21.
2. Mókà kele íb sẹ̀lẹ̀nù ní ea ólò nvèè bá nèi kọ é zààva ló nú e Jìhóvà nè Jíízọ̀s beè naa nèi ẽ́?
Ló èlà deé ea bẽene deé e Jíízọ̀s beè ù, a beè kọ́ dõòna kà sĩ́deè e pá a gbò nyòòne nvée é láá zogè kọ bà zaavàẹ̀ ló a ú vààa gyọ́ọ. A beè kolí va ló ene kà kele íb sẹ̀lẹ̀nù, e Kpá Káí kólíe “Dè Gyã́á Ló M̀m̀-neè Bẹẹ Tẹ̀ Íè,” ea kọlà nàgé Sèlẹ̀nù Ge Kẽ̀èa Boo Ú Kráìst. (1 Kọ́rìnt 11:20, NW ) Jíízọ̀s beè gbĩ́ kọọ̀ pá a gbò tóm nè dénè kà kà gbò e bà ólò nyoonìèe nvée á olòó kẽ̀èa boo kọ a beè uè vá boo. Kilma ló nakà sẹ̀lẹ̀nùí, Jíízọ̀s beè nè log kọọ̀: “Olòó naanii níí naamá gè kẽeam mí boo.” (Lúùk 22:19, NW ) Tṍó eo síì kẽè Sẹ̀lẹ̀nù Ge Kẽea Boo Ú Kráìst, ò zógè kọọ̀ nyíé ni ẹ́ẹ́lìẹ̀ ló bé e Jìhóvà nè Jíízọ̀s palàge vùlèi naa.
KPÁÁ NÓ BỌ̀Ọ̀VẸ̀
Kpáá nó gã́bug sĩ́deè eo é láá zogè kọ ò zaavàẹ̀ ló bé e Jìhóvà nè Jíízọ̀s palàge vùlè ni naa. Bugi togó boo nú ea náa vaá Sẹ̀lẹ̀nù Ge Kẽ̀èa Boo Ú Kráìst à palàge dú bíi.
3. Éé ní eé láá naa gè zogè kọ è zaàvàẹ̀ ló nú e bà náa nèi ẽ́?
Ni doomà dẽe ló kọọ̀ à íe nen ea dú gé dùùlà ni tṍó e múú gáẹ̀ gé tú ni. É kọọ̀ nú e nená náa nè ni é valẹ̀ bá tá ní nyíé? Sẹ̀ òó gbĩ́ gè naa gbò nú ea é zógè kọ nyíé ni ẹ́ẹlìẹ̀ ló nú ea náa nè ni ẽ́?
Jìhóvà ní ea íe bẹẹ dùm ẽ. Bugi 1 Jọ́ọ̀n 4:8-10, vaá ò gbóó aalai gbò bíbví:
Éé ní ea náa vaá ú vààa gyọ́ọ̀ Jíízọ̀s à dú kà kele íb lé dõ̀ònù ẽ?
Nú e Jìhóvà nè Jíízọ̀s náa nè ni tõó ní ló naa vàẹ?
Mósĩ́ deè ní eé láá zogè kọ è zaavàẹ̀ ló nú e Jìhóvà nè Jíízọ̀s ni náa nèi ẽ́? Bugi 2 Kọ́rìnt 5:15 nè 1 Jọ́ọ̀n 4:11; 5:3. Tṍó eo ni bugi buù kà dọ̀ Kpá Káíí lọ̀l, ò gbóó aalai nakà bíbví:
Dẹ̀ẹ̀a boo dọ̀ Kpá Káíí, éé ní eé láá naa gè zogè kọ è zaavàẹ̀ ló nú e bà náa nèi ẽ́?
4. Nó Jíízọ̀s
Dõòna sĩ́deè eé láá zogè bẹẹ zààvà dú gè nó Jíízọ̀s. Bugi 1 Pítà 2:21, vaá ò gbóó aalai nakà bíbví:
Mókà gbò sĩ́deè ní eo é láá nó gè tõo belí bé e Jíízọ̀s beè tõo naa ẽ́?
Moǹ Bel Bàrì beè leemá Jíízọ̀s, a beè vee lé kpẹ̀a, vaá nvèè bá nè dõòna gbò
5. Sí kẽè Sẹ̀lẹ̀nù Ge Kẽ̀èa Boo Ú Kráìst
Kọbé ò nyímá nú ea beè naaá túá tṍó e ba beè sẹlẹ sẹ̀lẹ̀nù Dè Gyã́á Ló M̀m̀-neè Bẹẹ Tẹ̀ Íe, bugi Lúùk 22:14, 19, 20, vaá ò gbóó aalai gbò bíbví:
Éé ní ea beè naaá gbẹá kẽè sẹ̀lẹ̀nù Dè Gyã́á Ló M̀m̀-neè Bẹẹ Tẹ̀ Íeá ẹ́?
Éé ní e fétúlúá nè mííá tõó dọ̀ ẹ?—Ẹ̀b 19 nè 20 gã́bel.
Jíízọ̀s beè gbĩ́ kọọ̀ pá a gbò nyòòne nvée á sẹlẹ sẹ̀lẹ̀nù Dè Gyã́á Ló M̀m̀-neè Bẹẹ Tẹ̀ Íe deé ea kpṍònè deé ea beè ù buù gbáá. Níà nú ea náa vaá Gbò Neǹ Ditõ̀ò Jìhóvà ólò bõoná enè tóm buù gbáá ló gè kẽ̀èa boo ú Kráìst mm̀ sĩ́deè e ẹlẹ beè kọ bàá sẹ̀ẹ̀màe. Kọbé ò nyímá nú ea kil ló nakà sẹ̀lẹ̀nù ea palàge dú bíií, bìlà VÍDIÒÍ, vaá ò gbóó aalai bíb ea nyoone.
Éé ní ea ólò naaá gbẹá kẽè Sẹ̀lẹ̀nù Ge Kẽ̀èa Boo Ú Kráìst e?
À íe nú e fétúlúá nè mííá tõó dọ̀. Fétúlúá tõó dọ̀ nom̀ kpá ló Jíízọ̀s ea gbõoma ea beè vaamái gyọ́ọ́ booá. Mííá à tõó dọ̀ a mii
SÌGÀ GBÒ KỌ́Ọ̀: “Áá gè ziga ló Jíízọ̀s ní eo é náa vaá ò gbóó dùùà ẹ.”
Mósĩ́ deè ní eo é láá tú kpá Jọ́ọ̀n 3:16 nè Jém̀z 2:17 bààmà tẽ́ kọọ̀ à íe nú ea dú bíi kọ é naa èlmà pọ́ì ge ziga ló Jíízọ̀s e?
NÚ E NI NÓ
È zógè kọ è zaàvàẹ̀ ló nú e Jíízọ̀s beè naa nèi tení dú ló gè iée zìgà m nè ge sí kẽè sẹ̀lẹ̀nù ge kẽ̀èa boo a ú.
Ge Òòa Boo
Éé ní e gè ié zìgà mm̀ Jíízọ̀s kọlà ẹ?
Mósĩ́ deè ní eo é láá zogè kọ ò zaavàẹ̀ ló nú e Jìhóvà nè Jíízọ̀s ni náa nè ni ẽ́?
Éé ní ea náa vaá gè sí kẽè Sẹ̀lẹ̀nù Ge Kẽ̀èa Boo Ú Kráìst à palàge dú bíi é?
KPÁÁ GBĨ́ TẼ́ LÓ
Éé ní e ú Kráìst síèi kpóó ló kọ é naa ẽ́?
Kpáá nó nú ea kil ló zìgà nè bé eé láá ié naa.
“Exercise Your Faith in Jehovah’s Promises” (Kpá Tọ Kùdẽe Ló, October 2016)
Mm̀ nòòtẽ́ ea kọ́ọ̀ “I Feel Clean, Alive, and Whole,” bugi nú ea kil ló bé e dùm ene kà ńnváá beè nyaaá naa tṍó ea bugi nú ea kil ló nú e ú vààa gyọ́ọ̀ Kráìst kọlà kilmà ló ẹlẹ.
Nyimá nú ea náa vaá pọ́ì ńkem̀ gbò ní e bà ólò dé fétúlúá vaá ṍ mííá gbẹá kẽè Sẹ̀lẹ̀nù Ge Kẽ̀èa Boo Ú Kráìst e.