Boǹ Méné Bàrì dú togó bel ea palàge dú bíi e Kpá Káí palàge kọ́ nú ea kil ló. Jìhóvà é ḿm̀-mè a tóm̀ bùlà ge tú boo kunukẽ̀í naamá Páladaìs tení dú ló a Boǹ Méné. Éé ní ea dú Boǹ Méné Bàrì e? À náàà vaá è nyimá kọọ̀ à dì ea gé bẹl kátogóí é? Éé ní ea ni náa ẽ́? Vaá éé ní ea é náa dì deèsĩ́ ẽ́? Nakà nu gè nòí nè bàà kà ní ea bẽene é áálá gbò bíbví.

1. Éé ní ea dú Boǹ Méné Bàrì e, vaá mée ní ea dú Méné boo é?

Boǹ Méné Bàrì dú bẹbẹ̀l ea aa bá Jìhóvà Bàrì. Jíízọ̀s Kráìst ní ea dú Méné ea gé tõó káála bẹl boo é. (Máátìù 4:17; Jọ́ọ̀n 18:36) Kpá Káí kọ́ kilma ló Jíízọ̀s kọọ̀: “Àé bẹl dú Méné . . . dọ̀ dè-dè.” (Lúùk 1:32, 33, NW ) Dì belí Méné boo Boǹ Méné Bàrì, Jíízọ̀s é bẹl boo kọ̀láá nen ea di boo kunukẽ̀í.

2. Bà mée ní e bàé zọ Jíízọ̀s bẹ̀l ẹ?

Áá Jíízọ̀s náa gé bẹl. Gbò e bà “aa dénè kpá dó . . . kele-kele gã, e bà ólò ló kele-kele dém bel, vaá ié kele-kele mèà . . . é lẹẹlà bel [‘bẹl dú méné,’ NW] boo bàlà booí.” (Kùùà Nù 5:9, 10) Kuù nen ní ea é zọ Kráìst bẹ̀l ẹ? Lọl tṍó e Jíízọ̀s beè dú boo kunukẽ̀í, gã́bug gãà gbò nen a nyoonée nvée. Sõò áá 144,000 nen ní e bàé kil káála vaá zọ̀ Jíízọ̀s bẹ̀l ẹ. (Bugi Kùùà Nù 14:1-4.) Boǹ Méné Bàrì é gbóó bẹl boo kọ̀láá nen ea gé nyoone nvéè Kráìst ea sígá boo kunukẽ̀í.—Psalm 37:29.

3. Éé ní ea náa vaá Boǹ Méné Bàrì à lee èl bẹbẹ̀l gbò nen ẽ́?

Gbò e bà gé bẹl náa íe kpóó gè naamá kọ̀láá kà nu e bà gbĩ́ gè naa, bã̀àna tṍó e bà gbĩ́ gè naa lé nu. Vaá gbò e bà bẹl tṍó e baála ni bẹl lọ̀l, é láá dú gbò kùlù-kúlù e bà náa bulà nú ea kil ló gbò e bà gé bẹl boo. Sõò Jíízọ̀s ea dú Méné boo Boǹ Méné Bàrì náa é bẹl lọ̀l vaá dõòna nèn kpáá bẹ̀l. Bàrì a “dómà ene kà boǹ méné e bè náa é íe kyọ̀à sĩ́.” (Dániẹ̀l 2:44) Jíízòs é bẹl boo dénè nen ea di boo kunukẽ̀í vaá náa é sa sĩ́ nen. À íe vulè, lé láb, nè lé bèèla, vaá àé nóòmà gbò nen kọ bàá ié nágé gbò kpãaí.—Bugi Àìzáíà 11:9.

4. Bẹbẹ̀l ea palàge íe kpóó é bẹl boo zivèkà kunukẽ̀í

Jíízọ̀s Kráìst íe kpóó gè bẹ̀l èlmà kọ̀láá kà nen ea ni bẹl. Bugi Máátìù 28:18, vaá ò gbóó aalai nakà bíbví:

• Mókà kele ní ea di zẹ̀ẹ̀ kpóó e Jíízọ̀s íe gè bẹ̀lmà nè níí gbò nen ẽ́?

Bẹbẹ̀l gbò nen ólò bọọgẹ̀ nyaaá, vaá buù nen ólò bẹl áá sìgà ketõ̀ò ea di ló bàlà booí. Sõò èé kọ́ vàẹ kilma ló Boǹ Méné Bàrì e? Bugi Dániẹ̀l 7:14, vaá ò gbóó aalai gbò bíbví:

• Éé ní ea náa vaá à dú lé kọọ̀ Boǹ Méné Bàrì “náa é íe kyọ̀à sĩ́” ẽ́?

• Éé ní ea náa vaá à dú lé kọọ̀ àé bẹl boo zivèkà kunukẽ̀í ẽ́?

5. Bẹbẹ̀l gbò nen náa é di lee

Éé ní ea náa vaá Boǹ Méné Bàrì é nyááá dẽè bẹbẹ̀l gbò nen ẽ́? Bìlà VÍDIÒÍ, vaá ò gbóó aalai bíb ea nyoone.

VÍDIÒ: Éé Ní Ea Dú Boǹ Méné Bàrì E?—Báàsĩ́ Ea Dṹùnà (1:41)

• Éé ní ea ni silà aa mm̀ bẹbẹ̀l gbò nen ẽ́?

Bugi Ẹ̀klìzíástìs 8:9, vaá ò gbóó aalai gbò bíbví:

• É kọọ̀ àé léémá ni kọọ̀ Boǹ Méné Bàrì á nyaaá dẽè bẹbẹ̀l gbò nen? Ló éé?

6. Gbò e bàé bẹl boo Boǹ Méné Bàrì dú gbò e bà dã́i ból ló

Boo béè kọọ̀ bẹẹ Méné ea dú Jíízọ̀s beè zẹ́ẹ́ dú nen ea beè di boo kunukẽ̀í, àé láá “tói sàn boo tṍó e lóói ọọ.” (Híbrù 4:15) Jìhóvà beè sà 144,000 gbò gbálà nè gbò bia e bà bọ́ló dẹ̀lẹ̀ nyíé boo lọl “dénè kpá dó . . . kele-kele gã, e bà ólò ló kele-kele dém bel, vaá ié kele-kele mèà.”—Kùùà Nù 5:9.

• É kọọ̀ à nveè ni nyíé gbàà ge nyimá kọọ̀ Jíízọ̀s nè dénè gbò e bàé zọ́ẹ bẹ̀l nyímá nú ea kọlà gè tõó dùm boo kunukẽ̀í? Ló éé?

7. Boǹ Méné Bàrì íe log ea palàge lee èl níí bẹbẹ̀l gbò nen

Gbò e bà gé bẹl ólò tenmà log e bà túúmá kọọ̀ àé dọ bélè vaá kpènà gbò e bà gé bẹl boo. Boǹ Méné Bàrì íe nagé gbò log e gbò ea é bẹl boo é íè ge gbàntṍ ló. Bugi 1 Kọ́rìnt 6:9-11, vaá ò gbóó aalai gbò bíbví:

• Ò bulà kọọ̀ bàlà booí é meà naa vàẹ tṍó e dénè nen é gbantṍ ló log Bàrì e?a

• Jìhóvà ẹbmà dẽe kọọ̀ gbò e bàé tõó mm̀ a Boǹ Méné á gbàntṍ ló gbò a log, é kọ à lelà kọ á naa vó? Ló éé?

• Éé ní ea zógè kọọ̀ gbò e bà náa gé gbantṍ ló gbò logí é láá nyaaá ẽ́?—Ẹ̀b 11 gã́bel.

NÚ E NI NÓ

Boǹ Méné Bàrì dú bẹbẹ̀l ea di káála ea é bẹl boo zivèkà kunukẽ̀í.

Ge Òòa Boo

• Bà mée ní e bàé bẹl boo Boǹ Méné Bàrì e?

• Éé ní ea náa vaá Boǹ Méné Bàrì à lee èl bẹbẹ̀l gbò nen ẽ́?

• Gbò éé ní e Jìhóvà gbĩ́ kọọ̀ gbò e bàé tõó mm̀ a Boǹ Méné á naa ẽ́?

KPÁÁ GBĨ́ TẼ́ LÓ

Nó nú e Jíízọ̀s beè noòmà ea kil ló kiẽ́e e Boǹ Ménéá é di.

“Is the Kingdom of God in Your Heart?” (Web article)

Éé ní ea náa vaá Gbò Neǹ Ditõ̀ò Jìhóvà ólò sà ge gbàntṍ ló bẹbẹ̀l Bàrì èlmà bẹbẹ̀l gbò nen ẽ́?

E Beè Beeláfùl Ge Nvèè Sãa Kúm Boǹ Méné Bàrì (1:43)

Nó nú e Kpá Káí kọ́ kilma ló 144,000 nen e Jìhóvà sa kọọ̀ bàá zọ̀ Jíízọ̀s bẹ̀l.

“Who Go to Heaven?” (Web article)

Éé ní ea beè naa kọọ̀ ene kà ńnváá ea beè di tọọ̀ kpọ́gọ́lọ́ á àgala boo kọọ̀ áá Boǹ Méné Bàrì ní ea é láá tú bàlà booí naamá lé é?

“How I Found the Answer to Injustice” (Awake!, November 2011)

Boǹ Méné Bàrì beè dààà togó gè bẹ̀l gbẹá káála mm̀ gbáá 1914. Níà tṍó e dee deè nvée ea di ló bẹbẹ̀l gbò nen beè dààà nàgé togó é. À náàà vaá è nyimá ẽ́? Èé ló bel boo kọ́ọ̀ bùlà Bàrì ea kil ló gbò nú ea gé nááá bàlà booí, nè bé e gbò nen gé lábví láb naa lọ̀l gé mm̀ gbáá 1914 na.

1. Éé ní e kọ́ọ̀ bùlà Bàrì tẹ́lẹ bàlà kẽ ẽ́?

Kpá Dániẹ̀l tẹ́lẹ bàlà kẽ kọọ̀ Boǹ Méné Bàrì é daamà togó gè bẹ̀l tṍó e “àlàbà tṍó” ni íná kùbmà. (Dániẹ̀l 4:16, 17) Gã́bug gbáá aa ló tṍóá, Jíízọ̀s beè ló bel kilma ló áá kà tṍóá kọ à dú “tṍó ea beè dú gè íbá ló nè gbò dóá,” vaá a beè noòmà kọọ̀ tṍóá gáà beè ina kùbmà. (Lúùk 21:24, NW ) Dì belí bé eé beè mòn naa, àlàbà tṍóá beè iná kùbmà mm̀ gbáá 1914.

2. Lọ̀l gé mm̀ gbáá 1914, gbò éé ní ea gé nááá bàlà booí é, vaá gbò nen gé lábví láb naa vàẹ?

Gbò e bà ólò nyoone nvéè Jíízọ̀s beè kọ́ nèe kọọ̀: “Ni kọ́ tṍó e nuí é nááá nèi, vaá ò kọ́ nágé nu ea é zógè tṍó eo é dú nè kùbmà nvéè tṍó nèi.” (Máátìù 24:3) Jíízọ̀s beè gbóó kọ́ gã́bug nú ea é nááá tṍó e ẹlẹ é daamàè togó gè bẹ̀l boo Boǹ Méné Bàrì gbẹá káála. Sìgà nú ea beè kọ àé nááá dú bé gím, kíì gyã́á, nè fùlà kunukẽ̀. (Bugi Máátìù 24:7.) Kpá Káí beè kọ nágé kọọ̀ láb gbò e bàé dí mm̀ “gbò deé e tṍó é gé tà” é náa kọọ̀ dùm á “tàvàlà.” (2 Tímotì 3:1-5) Gbò dìtõ̀ò nè lábví beè palàge dọ bàlà kẽ lọ̀l gé mm̀ gbáá 1914.

3. Éé ní ea náa vaá dìtõ̀ò bàlà booí à kpáá dú pọ́lọ́ lọ̀l gé tṍó e Boǹ Méné Bàrì beè dààmà togó gè bẹ̀l ẹ?

Pọ́ì ńkem̀ tṍó aa ló tṍó e Jíízọ̀s beè dú Méné boo Boǹ Méné Bàrì, a beè bé Sétàn nè gbò zọ gbẹá káála. A beè èlbá Sétàn. Kpá Káí kọ́ọ̀, “ba beè tãa bá [Sétàn] nè dénè pá a gbò nyómá tóm lọl káála uulá kẽ.” (Kùùà Nù 12:9, 10, 12) Nyíè Sétàn gé palàge bììlà boo béè kọ à nyímá kọọ̀ Bàrì é kyọẹ̀ẹ sĩ́. Níà nú ea náa vaá à gé náa kọọ̀ gbò e bà di boo kunukẽ̀í á tení bá nyaa ló nè mòn tã̀àgã̀ ẽ. Vó ní ea náa vaá dìtõ̀ò bàlà booí à palàge dú pọ́lọ́ ẹ́. Boǹ Méné Bàrì é nveè kùbmà ló dénè gbò tã̀àgã̀í.

KPÁÁ NÓ BỌ̀Ọ̀VẸ̀

4. Gbò tṍó ea di mm̀ Kpá Káí zógè kọọ̀ Boǹ Méné Bàrì beè dààà togó gè bẹ̀l mm̀ gbáá 1914

VÍDIÒ: Boǹ Méné Bàrì Beè Dààà Togó Gè Bẹ̀l Mm̀ Gbáá 1914 (5:02)

Bàrì beè naa kọọ̀ Méné Nèbúkadnezà ea géè bẹ̀l Bábilọ̀n deè kéléá á mòà gyáálá ea zógè nú ea é nááá dì deèsĩ́. Gyááláá nè bé e Dániẹ̀l beè tàb naa zógè kọọ̀ à géè loá bel nyòòmà bẹbẹ̀l Nèbúkadnezà nè Boǹ Méné Bàrì.—Bugi Dániẹ̀l 4:17.a

Bugi Dániẹ̀l 4:20-26, vaá ò tú gbò nú ea di mm̀ tã́à nuá aamai gbò bíbví:

• (A) Éé ní e Nèbúkadnezà beè mon mm̀ a gyáálá ẹ́?—Ẹ̀b 20 nè 21 gã́bel.

• (B) Éé ní ea é nááá ló téá ẹ́?—Ẹ̀b 23 gã́bel.

• (C) Éé ní ea é nááá tṍó e ‘àlàbà tṍóá’ ni íná kùbmà ẽ?—Ẹ̀b 26 gã́bel.

Bé E Gyáálá Ea Kil Ló Téá Lóá Bel Kilma Ló Boǹ Méné Bàrì Naa

KỌ́Ọ̀ BÙLÀ BÀRÌ (Dániẹ̀l 4:20-36)

Bẹbẹ̀l

(A) Gbele gàlà té

Kùbmà zẹ́ẹ́ bã ló bẹbẹ̀la

(B) “Kẽe téá,” vaá ò aa ló kọọ̀ “àlàbà tṍó á tení”

Bẹbẹ̀la kpáá bã kẽ

(C) “Òé kpáá lẹ̀ẹ̀là bel ló o boǹ méné”

Mm̀ túá kà m̀m̀-meè kọ́ọ̀ bùlà Bàrìí . . .

• (D) Mée ní e téá tõó dọ̀ ẹ?—Ẹ̀b 22 gã́bel.

• (E) Mó tṍó ní e kùbmà beè zẹ́ẹ́ bã ló a bẹbẹ̀l ẹ?—Bugi Dániẹ̀l 4:29-33.

• (F) Éé ní ea beè naaá ló Nèbúkadnezà tṍó e ‘àlàbà tṍóá’ ni íná kùbmà ẽ?—Bugi Dániẹ̀l 4:34-36.

TÚÁ TṌÓ EA BEÈ MM-MÁ

Bẹbẹ̀l

(D) Nèbúkadnezà ea dú Méné Bábilọ̀n

Kùbmà zẹ́ẹ́ bã ló bẹbẹ̀la

(E) Tṍó e 606 B.C.E. ni téní, Nèbúkadnezà beè gbóó bọ̀ dáa vaá náa beè láá bẹ̀lnà mm̀ àlàbà gbáá

Bẹbẹ̀la kpáá bã kẽ

(F) Dáa beè tá dẽè Nèbúkadnezà, vaá a beè gbóó kpáá dààmà togó gè bẹ̀l

Mm̀ ní ea égè bàà kà m̀m̀-meè kọ́ọ̀ bùlà Bàrìí . . .

• (G) Mée ní e téá tõó dọ̀ ẹ?—Bugi 1 Krónikòl 29:23.

• (H) Mó tṍó ní e kùbmà beè zẹ́ẹ́ bã ló ba bẹbẹ̀l ẹ? Éé ní ea náa vaá è nyimá kọọ̀ kùbmà beè zẹ́ẹ́ bã ló bẹbẹ̀la tṍó e Jíízọ̀s beè di boo kunukẽ̀í ẽ́?—Bugi Lúùk 21:24.

• (I) Mó tṍó ní e bẹbẹ̀lí beè kpáá bã kẽé, vaá gbẹá ãàe?

NÍ EA ÉGÈ BÀÀ TÓM EA BEÈ MM-MÁ

Bẹbẹ̀l

(G) Gbò méné pá Ízràẹ̀l e bà tõó dọ̀ bẹbẹ̀l Bàrì

Kùbmà zẹ́ẹ́ bã ló bẹbẹ̀la

(H) A beè dú gè kyọ̀sĩ́ Jèrúsalẹ̀m vaá zẹ́ẹ́ nvèè kùbmà ló bẹbẹ̀l gbò méné pá Ízràẹ̀l mm̀ 2,520 gbáá

Bẹbẹ̀la kpáá bã kẽ

(I) Jíízọ̀s daamà togó gè bẹ̀l dú Méné boo Boǹ Méné Bàrì gbẹá káála

5. Bàlà booí beè nyaaá lọ̀l gé mm̀ gbáá 1914

Bìlà VÍDIÒÍ.

VÍDIÒ: Bàlà Booí Beè Nyaaá Lọ̀l Gé Mm̀ Gbáá 1914 (1:10)

Jíízọ̀s beè kọ́ gbò nú ea é nááá bàlà booí lọl tṍó e ẹlẹ é dúè Méné. Bugi Lúùk 21:9-11, vaá ò gbóó aalai nakà bíbví:

• Mókà gbò dìtõ̀òí ní eo ni mon àbèè ge dã́ nú ea kil ló é?

Neǹ tóm Pọ́ọ̀l beè baatẽ́ bé e gbò nen é lábví láb naa mm̀ gbò deé e tṍó é gé tà. Bugi 2 Tímotì 3:1-5, vaá ò gbóó aalai nakà bíbví:

• Mókà gbò lábví ní eo ni mon mm̀ gbò nen deè nieí é?

6. Gè kọọ̀ Boǹ Méné Bàrì gé bẹl bọ́ló kọ á sièi kpóó ló

Bugi Máátìù 24:3, 14, vaá ò gbóó aalai gbò bíbví:

• Mókà tóm ea palàge dú bíi ní ea zógè kọọ̀ Boǹ Méné Bàrì dì ea gé bẹl kátogóí é?

• Mósĩ́ deè ní eo é láá sí nakà tómí ẽ́?

Boǹ Méné Bàrì dì ea gé bẹl kátogóí, vaá tṍó ea é lẹẹlà bel ló dénè nú ea gé nááá boo kunukẽ̀í a íná kuló. Bugi Híbrù 10:24, 25, vaá ò gbóó aalai nakà bíbví:

• Éé ní ea bọ́ló kọọ̀ buù bẹ̀ì é naa kátogóí e moǹ kọọ̀ deeá a dũuà “iná ku ló” é?

NÚ E NI NÓ

Kọ́ọ̀ bùlà Bàrì, gbò tṍó e Kpá Káí kọ́ nú ea kil ló, nè gbò nú ea gé nááá bàlà booí zógè kọọ̀ Boǹ Méné Bàrì dì ea gé bẹl kátogóí. È zógè kọọ̀ è zigà naa vó tení dú ló gè olòó kọ́ kpẹ̀a nè ge sí nònù.

Ge Òòa Boo

• Éé ní ea beè naaá tṍó e àlàbà tṍó e kpá Dániẹ̀l beè kọ́ nú ea kil lóá íná kùbmà ẽ?

• Éé ní ea náa kọ ó àgala boo kọọ̀ Boǹ Méné Bàrì beè dààà togó gè bẹ̀l mm̀ gbáá 1914 ẽ?

• Mósĩ́ deè ní eo é láá zogè kọ ò agàlàẹ̀ boo kọọ̀ Boǹ Méné Bàrì dì ea gé bẹl kátogóí é?

KPÁÁ GBĨ́ TẼ́ LÓ

Nyimá nú e gbò e bà ólò emí nú ea kil ló nú ea beè naaá, nè nú e dõòna gbò kọ́ ea kil ló bé e dìtõ̀ò bàlà booí gé nyááá naa lọ̀l gé mm̀ gbáá 1914.

“When Morals Declined Dramatically” (Awake!, April 2007)

Bugi nú ea kil ló bé e kọ́ọ̀ bùlà Bàrì ea di mm̀ kpá Máátìù 24:14 beè nyaaná dùm ene kà gbálà naa.

“I Loved Baseball More Than Anything!” (Kpá Tọ Kùdẽe Ló No. 3 2017)

Éé ní ea náa vaá è nyimá kọọ̀ kọ́ọ̀ bùlà Bàrì ea di mm̀ kpá Dániẹ̀l 4 togó lóá bel kilma ló Boǹ Méné Bàrì e?

“When Did God’s Kingdom Begin Ruling? (Part 1)” (Kpá Tọ Kùdẽe Ló, October 1, 2014)

Éé ní ea zógè kọọ̀ “àlàbà tṍó” ea di mm̀ kpá Dániẹ̀l 4 togóá beè iná kùbmà mm̀ gbáá 1914 ẽ?

“When Did God’s Kingdom Begin Ruling? (Part 2)” (Kpá Tọ Kùdẽe Ló, November 1, 2014)

Boǹ Méné Bàrì dì ea gé bẹ̀l kátogóí. Póì ńkem̀ tṍó àla, àé palàge nyaaná bá ló boo kunukẽ̀í. Naa mè é ló bel boo sìgà gbò lé nú eo é láá ẹ̀bmà dẽè gè dé kpéè ló kèbá bẹbẹ̀l Bàrì.

1. Mósĩ́ deè ní e Boǹ Méné Bàrì é náa kọọ̀ fẹ́ẹ́-fẹẹ̀ ló nè lé bèèla á di boo kunukẽ̀í ẽ́?

Jíízọ̀s ea dú Méné boo Boǹ Méné Bàrì é kyọsĩ́ gbò pọ́lọ́ lab dògò nè gbò kpóó bẹbẹ̀l tṍó bé Àmágidòn. (Kùùà Nù 16:14, 16) Tṍóá zìgànù ea di mm̀ Kpá Káí ea kọọ̀: “Pọ́ì ńkem̀ tṍó àla, gbò pọ́lọ́ náa é di nà,” é gbóó mm-má. (Psalm 37:10) Tení dú ló Boǹ Ménéá, Jíízọ̀s é náa kọọ̀ fẹ́ẹ́-fẹẹ̀ ló nè lé bèèla á di boo kunukẽ̀í.—Bugi Àìzáíà 11:4.

2. Dùm é meà naa vàẹ tṍó e bùlà Bàrì ni nááá boo kunukẽ̀í ẽ́?

Kèbá bẹbẹ̀l Bàrì, “gbò lé lab dògò ní e bàé tõó boo kunukẽ̀í ẽ́, vaá bàé tõó boo dọ̀ọ̀mà dè-dè.” (Psalm 37:29) Ni doomà dẽe ló kọ ò diè mm̀ bàlà boo e kọ̀láá nen dú gbò lé lab dògò vaá bà vulè Jìhóvà nè dõòna gbò! Kpá ló tọ́ọ̀ nen náa é zọ, vaá kọ̀láá nen é tõó dùm dọ̀ dè-dè.

3. Éé ní e Boǹ Méné Bàrì é náa tṍó ea ni kyọsĩ́ gbò pọ́lọ́ lab dògò e?

Tṍó ea ni dú gè kyọ̀sĩ́ gbò pọ́lọ́ lab dògò lọ̀l, Jíízọ̀s é gbóó bẹ̀l dú Méné mm̀ 1,000 gbáá. Tṍóá, ẹlẹ nè 144,000 nen e bàé zọ́ẹ bẹ̀la é gbóó nvèè bá nè gbò e bà di boo kunukẽ̀í kọ bàá gbõoma. Tṍó e enè tõ̀ò gbááá ni íná kùbmà, boo kunukẽ̀í é gbóó dú páladaìs, vaá nyíè dénè nen é ẹ́ẹ boo béè kọọ̀ bà gé gbantṍ ló gbò log Jìhóvà. Tṍóá sõò, Jíízọ̀s é gbóó lọ̀à bẹbẹ̀l bá nè a Tẹ̀ ea dú Jìhóvà. “Béè [Jìhóvà é gbóó] di káí” èlmà bé ea dì naa. (Máátìù 6:9, 10) Dénè nen é gbóó nyimá kọọ̀ Jíhóvà dú lé Neǹ Ge Bẹ̀l ea ólò bùlà nú ea kil ló gbò ea gé bẹl boo. Jìhóvà é gbóó kyọ̀sĩ́ Sétàn, gbò zọ, nè kọ̀láá nen ea lọl togó kèbá a bẹbẹ̀l. (Kùùà Nù 20:7-10) Gbò lé dìtõ̀ò e Boǹ Méné Bàrì é dómá é di dọ̀ dè-dè.

KPÁÁ NÓ BỌ̀Ọ̀VẸ̀

4. Boǹ Méné Bàrì é nveè kùbmà ló bẹbẹ̀l gbò nen

“Nen a bẹl nen mm̀ sĩ́deè ea nveèe kom ló.” (Ẹ̀klìzíástìs 8:9) Jìhóvà é tú a Boǹ Méné nvèèmà kùbmà ló pọ́lọ́ bèèlaí.

Bugi Dániẹ̀l 2:44 nè 2 Tẹ̀sàlónaikà 1:6-8, vaá ò gbóó aalai gbò bíbví:

• Éé ní e Jìhóvà nè a Sã́áná Jíízọ̀s é náa gbò e bà gé bẹl nè gbò e bà nveè va sãa kúm ẽ́?

• Mósĩ́ deè ní e gbò nú eo ni nó ea kil ló Jìhóvà nè Jíízọ̀s náa kọ ó àgala boo kọọ̀ bàé náa nu mm̀ sĩ́deè ea lelà vaá dú lé é?

5. Jíízọ̀s dú Méné ea dú lé lọ̀l vaá à lee

Dì belí Méné ea é bẹl boo Boǹ Méné Bàrì, Jíízọ̀s é náa gã́bug nú ea é dọ bélè nè gbò ea é bẹl boo. Bìlà VÍDIÒÍ kọbé ò mon bé e Jíízọ̀s ni zógè kọọ̀ à íèè tàn nè kpóó ea aa bá Bàrì gè nvèèmà bá nè gbò nen naa.

VÍDIÒ: Jíízọ̀s Beè Naa Gbò Nú Ea Zógè Gbò Nú E Boǹ Méné Bàrì É Náa (1:13)

Tṍó e Jíízọ̀s beè di boo kunukẽ̀í, a beè naa gbò nú ea zógè gbò nú e Boǹ Méné Bàrì é náa. Mókà gbò tã́áná deè báí ní eo gé palàge ẹ̀bmà dẽe gè dé kpéè ló é? Bugi gbò dọ̀ Kpá Káí ea nyoone ea náa kọ é kpáá palàge dã́tẽ́ ló gbò tã́áná dee báá.

6. Boǹ Méné Bàrì é dómà kà lé dì deèsĩ́

VÍDIÒ: Bé E Dì Deèsĩ́ É Dú Dũ̀ùnè Naa (4:38)

Bugi Psalm 145:16, vaá ò gbóó aalai nakà bíbví:

• À tõó ní ló naa vàẹ gè nyimá kọọ̀ Jìhóvà é ‘ḿm̀-mè tàn dénè nú ea di dùm’ ẽ?

NÚ E NI NÓ

Boǹ Méné Bàrì é náa gbò nú e Bàrì gbĩ́ kọ á naaá. Àé náa kọọ̀ boo kunukẽ̀í á dú páladaìs e áá gbò e bà gé fã Jìhóvà ní e bàé tõó boo dọ̀ dè-dè e.

Ge Òòa Boo

• Mósĩ́ deè ní e Boǹ Méné Bàrì é náa kọọ̀ béè Bàrì á di káí é?

• Éé ní ea náa vaá èé láá zìgà kọọ̀ Boǹ Méné Bàrì é ḿm̀-mè gbò zìgànù Bàrì ea di mm̀ Kpá Káí é?

• Gbàà dénè gbò lé nú e Boǹ Méné Bàrì é náa, mókà ea di zẹ̀ẹ̀ ní ea é palàge tàn ni gè dé kpéè ló é?

KPÁÁ GBĨ́ TẼ́ LÓ

Gbĩ́tẽ́ ló nú e Àmágidòn dú.

“What Is the Battle of Armageddon?” (Web article)

Bugi nú ea kil ló gbò nú ea é nááá tṍó e Jíízọ̀s beè kolíe tṍó ‘pọ̀b kpo tã̀àgã̀.’—Máátìù 24:21.

“What Is the Great Tribulation?” (Web article)

Nyimá bé e pá tọ é láá gbá dòòmà dẽe ló gbò tã́áná dee bá e bàé dé kpéè ló mm̀ Boǹ Méné Bàrì naa.

Dòòmà Dẽe Ló Kọ Ò Diè Mm̀ Páladaìs (1:50)

Mm̀ nòòtẽ́ ea togó bel kọ́ọ̀ “I Was Troubled by Many Questions,” nyimá bé e enè nen ea ólò naa uú boo kpóó ea gé bẹl beè láá mòn nú ea géè gbĩ̀ naa.

“The Bible Changes Lives” (Kpá Tọ Kùdẽe Ló, January 1, 2012)