Jeremias
37 Josiacho put Zedekia, Jehoiakimacho put Koniachea* zagear razvottki cholounk laglo. Karonn Babilonacho Raza Nebukadnezaran,* Zedekiak Juda desacho raza mhunn nemlolo. 2 Punn Zedekia Razan, tachea sevokamnim ani desantlea lokamnim, Jeremias provadea udexim Jehovan sanglolim tim utram aikonk nant.
3 Zedekia Razan, Shelemiacho put Jehukalak ani iadnik Maseiacho put Zefaniak, Jeremias provadea koddem oxem sangon dhaddle: “Upkar korun, amcho Dev Jehova lagim amchea pasot magnnem kor.” 4 Jeremiasak azun pasun bondkhonnint ghalunk naslo, taka lagon to lokam modem ukteponnim bhonvtalo. 5 Tea vellar, Ejiptta thaun Faraoh-chi fouz bhair sorli ani hi khobor Jeruzalemak gherav ghatlolea Kaldeikarank mellʼlli tednam, te Jeruzalem soddun gele. 6 Tednam Jehovacho ho sondex Jeremias provadeak mellʼllo: 7 “Izraelacho Dev Jehova mhunntta, ‘Mhoje lagim choukoxi korunk jea Judachea razan tuka dhaddla, taka oxem sang: “Polloi! Tuji modot korunk ieta tea Faraoh-chea foujek porot aplea desant, Ejipttant vochonk poddttolem. 8 Ani Kaldeikar porot hea xarant ietole, hea xara add zhuz korun tem aplea tabeant ghetole ani taka lasoun uddoitole.” 9 Jehova oxem mhunntta, “‘Amchea add zhuz korunk ailʼle Kaldeikar porot voitolech,’ oxem mhunnon tumkanch fosoinakat, karonn te voichenant. 10 Tumchea add zhuz kortolea Kaldeikaranche akʼkhe foujek tumi marli zalear, ani tanche modle fokot mar laglole munis urle zalear pasun, te aplea tombuntlean utthon ietole ani hem xar lasoun uddoitole.”’”
11 Kaldeikaranchi fouz, Faraoh-che foujek lagon Jeruzalemantlean geli tednam, 12 Jeremias aplea lokam modlo aplo vantto gheunk, Jeruzalema thaun Benjaminachea vattarant vochonk bhair sorlo. 13 Punn Jeremias provadi, Benjaminachea Darvonttea lagim pavlo tednam, rakhonndaracho odhikari Irija, zo Shelemiacho put ani Hananiacho natu aslo, tannem Jeremiasak oxem mhunnon dhorlo: “Tum amkam soddun Kaldeikaram lagim pollon voita!” 14 Punn Jeremiasan mhunnttlem: “Na, tem sot nhoi! Hanv Kaldeikarank sangat diunk vochona.” Punn Irijan tachem aikonk na. Tor tannem Jeremiasak dhorlo ani taka kunvram lagim gheun ailo. 15 Kunvor Jeremiasacher samke ragar zale, tannim taka marlo ani xastri Jehonathanachea ghorant, jem atam ek bondkhonn zaun asli, thoim koidi korun dovorlo. 16 Jeremiasak thoim zomni ponda aslolea kallkhi kuddant ghatlo, zoim oslim anikui kuddam aslim. To zaite dis poriant thoinch urlo.
17 Uprant Zedekia Razan, Jeremiasak aplea rajmahalant apoilo ani guptim taka prosn vicharle. Tannem Jeremiasak vicharlem, “Jehova koddlean koslo-i sondex asa?” Jeremiasan mhunnttlem, “Hoi asa!” Jeremiasan fuddem mhunnttlem, “Tuka Babilonachea razachea hatant ditole!”
18 Jeremiasan Zedekia Razak oxem-i mhunnttlem: “Tumi mhaka bondkhonnint ghalunk, hanvem tujea, tujea sevokam ani hea lokam add koslem patok kelam? 19 ‘Babilonacho raza tumcher ani hea desacher add ieunchona,’ oxi tumkam bhasaunni kelʼli te tumche provadi atam khoim gele? 20 Atam mhojea dhonia raza, upkar korun mhojem aik, ani mhoji hi vinoti manun ghe. Mhaka porot xastri Jehonathanachea ghora dhaddinaka, hanv thoim mortolom.” 21 Tor Jeremiasak Rakhonndarachea Angnnant koidi korun dovorcho mhunn Zedekia Razan hukum dilo. Poder jea rostear undde viktale, thoinchean dor disa taka ek gol unddo diunk lagle. Jea meren xarant unddo aslo, tea meren taka dor disa unddo mellot ravlo. Jeremias Rakhonndarachea Angnnantuch urlo.