Jeremias

44 Ejipttachea Migdol, Tafanes, Nof* ani Pathros vattarant ravpi soglea Judev lokam pasot Jeremiasak oso sondex mellʼllo: 2 “Izraelacho Dev, fouzancho Dev Jehova oxem mhunntta, ‘Hanvem Jeruzalemacher, ani Judachea soglea xarancher haddleant tim soglim odruxttam tumi polloileant. Aiz he zage padd zalʼle asat ani thoim konnuch ravona. 3 Oxem ghoddlem, karonn vaitt kamam korun tannim mhaka rag haddlo. Tannim vochon dusrea devank bolidanam bhettoilim, ani tumi toxench tumche purvoz vollkhonasle, tea devanchi tannim seva keli. 4 Hanv mhojea soglea sevokank, mhojea provadeank tumche lagim porot-porot dhaddun, tumkam oxi vinoti korit ravlom: “Upkar korun, tumi hem vitt haddtta toslem kam korinakat, zacho hanv dves kortam.” 5 Punn tannim mhojem aikonk na vo mhaka kan diunk na. Tannim dusrea devam mukhar bolidanam bhettoupachem aplem vaitt kam korop soddun diunk na. 6 Taka lagon, hanvem mhozo rag ani krodh votoilo ani Judachim xaram ani Jeruzalemache roste lason gele, ani aiz poriant te padd zalʼle asat ani osadd poddleat.’

7 “Ani atam Izraelacho Dev, fouzancho Dev Jehova oxem mhunntta, ‘Tumi kiteak tumcheruch itlem vhoddlem odruxtt haddttat, jea vorvim Judachea dor eka dadleacho, bailecho, bhurgeacho ani dudh pieta tea ballkacho nas zaun, thoim konnuch urchona? 8 Ejipttant, zoim tumi ravonk geleat, thoim tumchea hatamnim dusrea devank bolidanam bhettoun mhaka rag kiteak haddttat? Tumcho nas zatolo, ani prithume voilea soglea raxttramnim tumi xirap poddlole zatole ani tumcho opman zatolo. 9 Juda desant ani Jeruzalemachea rosteancher tumchea purvozamnim ani Judachea razamnim ani tanchea bailamnim koslim noxttim kamam kelʼlim tim tumi visorle? Ani tumi, ani tumchea bailamnim koslim noxttim kamam keleant tim tumi visorle? 10 Aiz poriant te khalti zaunk nant,* mhoji bhirant dhorunk na, ani hanvem tumkam ani tumchea purvozank dilʼlo kaido ani nem tannim pallunk nant.’

11 “Taka lagon Izraelacho Dev, fouzancho Dev Jehova oxem mhunntta, ‘Akʼkhea Judacho nas korunk, tumcher odruxtt haddttolo mhunn hanvem nichov kela. 12 Ani hanv Judachea tea urlolea lokank dhortolom, zannim Ejipttant vochon ravonk tharailam. Tancho sogleancho Ejipttant nas zatolo. Te tolvarin ani bhuken mortole, lhan toxech vhodd sogle tolvarin mortole. Te xirap poddlole zatole, tanchi poristhiti oxi zatoli ki tankam polloitat te thottaktole, tanchem nanv piddʼddear kortole ani tancho opman zatolo. 13 Hanvem Jeruzalemak khast lailʼli toxich, hanv Ejipttant ravtoleank, tolvarin, bhuken ani pidden* khast laitolom. 14 Ani Judache urlole lok je Ejipttant ravonk geleat te salvar zaunchenant, vo Juda desant porot ieunk jive urchenant. Te Juda desant porot ieun ravonk axetole, punn ieunchenant. Fokot thoddech lok vanchon porot ietole.’”

15 Tednam, apleo bailo dusrea devank bolidanam bhettoitat mhunn zannam asle tea soglea dadleamnim ani thoim ubeo aslolea soglea bailanchea zomean ani Ejiptt desantlea Patros hea zagear ravpi soglea lokamnim Jeremiasak mhunnttlem: 16 “Tunvem Jehovachea nanvan amkam sanglam tem ami korchimnant. 17 Tachea bodlek, amchea tonddantlean bhair sorlolea dor eka utra pormonnem ami kortolim. Ami, amchea purvozamnim, razamnim ani kunvramnim, Judachea xaramnim ani Jeruzalemachea rosteancher zoxim Sorginche Ranniek* bolidanam ani soreacheo bhetto bhettoilʼleo, toxench ami korit ravtolim. Tea vellar amkam pottbhor unddo mellttalo, amkam kainch unnem naslem ani amcher koslench odruxtt ienaslem. 18 Punn ami Sorginche Ranniek* bolidanam ani soreacheo bhetto bhettovop bond keleo tednam thaun, amkam soglea vostunchem unnemponn zaunk laglem, ani ami tolvarin ani bhuken kabar zalim.”

19 Tea bailamnim mhunnttlem: “Ami Sorginche Ranniek* bolidanam ani soreacheo bhetto bhettoitalim tednam, ami tem amchea ghovanchi porvangi nastana kortalim kai? Tanchi porvangi nastana, ami tea devichea murtechea akarachi bhakri korun bolidanam ani soreacheo bhetto bhettoitalim kai?”

20 Tednam Jeremiasan aplea lagim uloitolea soglea lokank, dadleank toxench tanchea bailank mhunnttlem: 21 “Tumi ani tumche purvoz, tumche raza, kunvor ani desantle lok Judachea xaramnim ani Jeruzalemachea rosteancher jim bolidanam bhettoitale tim Jehovachea ugddasak ailim ani to tim visronk na!* 22 Xevottak, tumchim vaitt kamam ani tumi kelʼleo vitt haddtta tosleo vostu Jehovachean anik sosunk zaina zalem. Tumcho des padd zaun gelo, tachi poristhiti oxi zalea ki polloitat tim soglim thottaktat ani xirap ditana tachem udharonn uzar kortat. Thoim konnuch ravona, ani aiz pasun tachi poristhiti toxich asa. 23 Oxem ghoddlem, karonn tumi him bolidanam bhettoilim ani Jehova add patok kelem. Tumi Jehovachem aikonk na, tacho kaido ani tache nem pallunk nant ani jeo suchounneo tannem tumchea ugddasak haddleo, tea pormonnem tumi cholonk nant dekhun tumcher hem odruxtt ailam ani aiz poriant asa.”

24 Jeremiasan soglea lokank ani soglea bailank hem pasun sanglem: “Ejipttant ravpi Judachea soglea lokamno, Jehovacho sondex aikat. 25 Izraelacho Dev, fouzancho Dev Jehova oxem mhunntta, ‘Tumi ani tumchea bailamnim aplea tonddamnim jem sanglem tem tumi aplea hatamnim purnn kelem. Tumi mhunnttlem: “Ami Sorginche Ranniek* bolidanam ani soreacheo bhetto bhettoitolim mhunn angvonn kelʼli, ani ami ti purnn kortolinch.” Bailamno, tumi tumcheo angvonneo purnn kortolinch ani tumi tumcheo angvonneo pallttolinch.’

26 “Taka lagon, Ejipttant ravpi Judachea soglea lokamno, Jehovacho sondex aikat: ‘Jehova mhunntta, “Hanv mhojea vortea nanvacho soput gheun sangtam, ‘Akʼkhea Vixvacho Dhoni Jehovachea jivacho soput!’ oxem mhunnon, akʼkhea Ejipttant porot kednanch Judacho khoinchoch munis mhojea nanvan soput gheunchona. 27 Atam hanv tanchea boreak lagon nhoi, punn tancher odruxtt haddunk tancher nodor dovrun asam. Ejipttant ravpi Judache sogle munis kabar zaun vochonant tea meren, tolvarin ani bhuken tancho nas zatolo. 28 Fokot thoddech lok tolvari thaun salvar zatole ani Ejiptta thaun Judant porot ietole. Tednam Judache urlole sogle lok je Ejipttant ravonk gelʼle, tankam konnanchem utor khorem zalem tem kollon ietolem, mhojem vo tanchem!”’”

29 “Jehova mhunntta, ‘Hanv hea zagear tumkam khast laitolom, ani hanv hachi ek khunna ditam, jea vorvim hanvem tumcher jem odruxtt haddttolom mhunn sanglolem, tem khorench purnn zatolem mhunn tumkam kollon ietolem. 30 Jehova oxem mhunntta: “Zoxem hanvem Judacho Raza Zedekiak, Babilonacho Raza Nebukadnezarachea* hatant dilo, zo tacho dusman aslo ani taka jivexim marunk tachea fattik laglolo, tosoch hanv Ejipttacho raza, Faraoh Hofrak tachea dusmanachea ani tea lokanchea hatant ditolom, je taka jivexim marunk tachea fattik lagleat.”’”