Jeremias
38 Matanacho put Shefatia, Pashuracho put Gedalia, Shelemiacho put Jukal ani Malkijacho put Pashur, hannim Jeremias soglea lokank oxem sangtana aikolem: 2 “Jehova oxem mhunntta, ‘Zo konn hea xarant ravtolo, to tolvarin, bhuken ani pidden* mortolo. Punn zo konn apleak Kaldeikaranchea hatant ditolo,* to jivo urtolo. To aplo jiv salvar kortolo ani jietolo.’ 3 Jehova oxem mhunntta, ‘Hem xar Babilonachea razachea foujechea tabeant poddttolench, ani to tacher kobzo kortolo.’”
4 Kunvramnim razak mhunnttlem: “Upkar korun hea munxak marun uddoi, karonn to oslim utram uloun xarant urlolea soinikanchem ani soglea lokanchem mon moddtta.* Hea munxak lokanchem borem zalʼlem naka, punn vaitt zalʼlem zai.” 5 Zedekia Razan mhunnttlem: “Polloi! To tumchea hatant asa, karonn tumkam addaunk raza kainch korunk xokona.”
6 Taka lagon, tannim Jeremiasak dhorlo ani taka razacho put Malkijachea baint* uddoilo. Hi baim Rakhonndarachea Angnnant asli. Tannim taka doriemnim sokol denvoilo. Tea baint udok naslem, fokot chikol aslo. Ani Jeremias tea chiklant rombonk laglo.
7 Ebedmelek, zo ek Ethiopiekar ani rajmahalachea dorbarantlo ek odhikari aslo, tannem kunvramnim Jeremiasak baint ghatla mhunn aikolem. Tea vellar, raza Benjaminachea Darvonttea lagim boson aslo. 8 Tednam Ebedmelek rajmahalantlean bhair sorlo, ani tannem razak mhunnttlem: 9 “Mhojea dhonia raza, hea munxamnim Jeremias provadea sangata khub vaitt kelam! Tannim taka baint uddoila. To thoim mortolo, karonn xarant bhuk poddlea ani khaunk khoinch unddo na.”
10 Tednam razan, Ethiopiekar Ebedmelekak oxi adnea dili: “Hanga thaun 30 munxank gheun voch, ani Jeremias provadi morchea poilim taka baim-entlo bhair kadd.” 11 Tor Ebedmelekan aplea sangata munxank ghetle ani to rajmahalachea dan pettiechea sokol aslolea kuddant gelo. Thoim thaun tannem thoddim pinzlolim bontram ani kopddeanche kuddke ghetle ani te doriemnim sokol baint denvoun Jeremiasa lagim pavoile. 12 Uprant Ethiopiekar Ebedmelekan Jeremiasak mhunnttlem: “Upkar korun tujea donui khankeam ponda bontram ani kopddeanche kuddke dovor, ani magir tachea voilean dori band.” Jeremiasan toxench kelem. 13 Uprant, tannim dorio voddun Jeremiasak baim-entlo bhair kaddlo. Magir Jeremias Rakhonndaranchea Angnnantuch ravlo.
14 Zedekia Razan, Jeremias provadeak Jehovachea ghorachea* bhitor sorche tisre vatter apoun haddlo. Razan Jeremiasak mhunnttlem: “Hanv tuka kitem vicharunk sodhtam. Mhojea thaun kainch lipoinaka.” 15 Jeremiasan taka mhunnttlem: “Hanvem tuka sanglear, tum mhaka jivexim martoloch. Hanvem tuka solʼlo dilear, tum mhojem aikon gheunchona.” 16 Tor Zedekia Razan guptim Jeremiasak soput diun oxem mhunnttlem: “Amkam hem jivit dilam, tea Jehovachea jivacho soput! Hanv tuka jivexim marchom na ani tuzo jiv gheunk sodhtat tanchea hatant hanv tuka diunchom na.”
17 Tednam Jeremiasan Zedekiak mhunnttlem: “Izraelacho Dev, fouzancho Dev Jehova oxem mhunntta, ‘Tunvem tuka Babilonachea razachea kunvranchea adhin kelo zalear* tuzo jiv salvar zatolo, ani te hem xar laschenant, toxench tum ani tujea ghoranneantlim soglim jivim urtolim. 18 Punn tum svotak Babilonachea razachea kunvranchea adhin korina zalear* hem xar Kaldeikaranchea hatant poddttolem. Te hem xar ujean lasoitole ani tum tanchea hatantlo salvar zaunchona.’”
19 Uprant Zedekia Razan Jeremiasak mhunnttlem: “Kaldeikaranchea vatten zaleat tea Judevanchi mhaka bhirant dista, karonn mhaka tanchea adhin kelo zalear te mhojea sangata krur toren vagot.” 20 Punn Jeremiasan mhunnttlem: “Tuka tanchea adhin korchenant. Taka lagon, upkar korun hanv tuka sangtam tem Jehovachem utor aik. Oxem kelear, tujem borem zatolem ani tum jivo urtolo. 21 Punn tum Kaldeikaranchea adhin zaunk nakarta zalear* Jehovan mhaka kitem kolloilam tem aik: 22 Polloi! Judachea rajmahalant jitleo bailo urleat, tankam sogleank Babilonachea razachea kunvram lagim bhair haddleat, ani tim mhunnttat,
‘Jea munxancher tunvem visvas dovorlo,* tannim tuka fosoila ani tuka haroila.
Tannim tuje paim chiklant rombonk dile.
Atam te tuka soddun geleat.’
23 Te tujea soglea bailank ani putank Kaldeikaram lagim gheun ietat. Tum tanchea hatantlo salvar zaunchona. Babilonacho raza tuka dhortolo, ani tuka lagon hem xar lason voitolem.”
24 Zedekian Jeremiasak mhunnttlem: “Hea vixim tum anik konnankuch kollonk dinaka, na zalear tum mortolo. 25 Hanv tujea lagim ieun uloilam mhunn zor kunvrank kollʼllem, ani tannim ieun tuka oxem vicharlem, ‘Tunvem razak kitem sanglam tem upkar korun amkam sang. Amchea koddlean kainch lipoinaka, ani ami tuka jivexim marchenant. Razan tuka kitem sanglam?’ 26 Tednam tum tankam oxem sang, ‘Mhaka porot Jehonathanachea ghora dhaddinaka mhunn hanv raza lagim vinoti kortalom, karonn thoim gelear hanv mortolom.’”
27 Thoddea vella uprant, sogle kunvor Jeremiasa lagim aile ani tannim taka prosn kele. Razan taka sangonk adnea dilʼli tem soglem Jeremiasan tankam sanglem. Tannim taka anik kainch mhunnonk na, karonn konnench raza ani Jeremiasachem ulovop aikonk naslem. 28 Kaldeikaramnim Jeruzalem aplea tabeant gheum poriant, Jeremias Rakhonndarachea Angnnant aslo. Jeruzalem tanchea tabeant poddlem tednam pasun to thoinch aslo.