Jeremias

39 Judacho Raza Zedekiachea razvottkechea nnovʼvea vorsachea dhavea mhoineant, Babilonacho Raza Nebukadnezar* apli akʼkhi fouz gheun Jeruzalemant ailo ani tannim taka gherav ghatlo.

2 Zedekiachea razvottkechea 11-vea vorsachea chovthea mhoineachea nnovʼvea disa, tannim xarachi vonott moddli. 3 Ani Babilonachea razache sogle kunvor xarant bhitor ghusle, ani Modlea Darvonttea lagim bosle. Te kunvor mhunnttlear, Nergal-sharezer Samgar,* Nebo-sarsekim Rabsaris,* Nergal-sharezer Rabmag,* ani toxench Babilonachea razache urlole sogle kunvor.

4 Judacho Raza Zedekia ani soglea soinikamnim tankam polloile tednam, te xarantlean pollon gele. Te ratchea vellar, razachea bage lagim don vonttim modem aslolea darvontteantlean pollon gele, ani Arabachea vattentlean fuddem vochot ravle. 5 Punn Kaldeikaranchi fouz tanchea fattik lagli, ani tannim Zedekiak Jerikochea oronn’nneant dhorlo. Tannim taka koidi kelo, ani Raza Nebukadnezara* lagim Hamath desant Ribla mhunnttat thoim gheun gele, zoim Nebukadnezaran Zedekiacher formonn marlem. 6 Babilonachea razan hukum diun Zedekiachea dolleam mukhar tachea soglea putank jivexim marle. Tannem tachea soglea vhoddlea odhikareank marun uddounk sanglem. 7 Uprant Babilonachea razan tache dolle kaddun taka kuddʼddo kelo. Magir tannem taka Babilonant haddunk tambeacheo beddio ghatleo.

8 Uprant Kaldeikaramnim rajmahal ani lokanchim ghoram lasoun uddoilim, ani Jeruzalemachim durgam moddun uddoilim. 9 Xarant je lok urlole, toxench je lok Judachea razacho sangat soddun Babilonachea raza vatten zalʼle, tankam sogleank rakhonndaracho mukheli Nebuzaradanan koidi korun Babilonant vhele. Tanchea bhair, desantlea dusrea-i lokank to gheun gelo.

10 Punn rakhonndaracho mukheli Nebuzaradanan, Judache je lok khub gorib asle, zanchea lagim kainch naslem, tankam thoinch soddle. Toxench tannem tea disa tankam kam korunk,* drakxanche molle ani xetam dilim.

11 Uprant, Babilonacho Raza Nebukadnezaran,* rakhonndaracho mukheli Nebuzaradanak Jeremiasa vixim ho hukum dilo: 12 “Haka vhor ani tachi kallji ghe. Taka kainch vaitt korinaka, ani to tujea lagim magta tem soglem taka di.”

13 Taka lagon, rakhonndaracho mukheli Nebuzaradanan, Nebushazban Rabsarisan,* Nergal-sharezer Rabmagan* ani Babilonachea razachea soglea vhoddlea odhikareamnim aplea munxank dhaddle, 14 ani Jeremiasak Rakhonndarachea Angnnantlean kaddun, aplea ghorant vhoronk Ahikamacho put ani Shafanacho natu Gedaliachea hatant dilo. Hea toren Jeremias lokam modem ravonk laglo.

15 Jeremias Rakhonndarachea Angnnant koidi aslo tednam, Jehovacho ho sondex taka mellʼllo: 16 “Ethiopiekar Ebedmeleka lagim voch ani taka sang, ‘Izraelacho Dev, fouzancho Dev Jehova oxem mhunntta: “Hea xarachem borem korchea vixim nhoi, punn tacher odruxtt haddchea vixim hanvem jem sanglolem tem hanv purnn korunk voitam. Jea disa hem ghoddttolem tea disa tum hem polloitolo.”’

17 “‘Punn tea disa hanv tuka salvar kortolom. Tum bhieta tanchea hatant tuka diunchenant,’ oxem Jehova mhunntta.

18 “‘Hanv tuka khorench vanchoitolom. Tum tolvarin morchona. Tuzo jiv salvar zatolo, karonn tunvem mhojer visvas dovorla,’ oxem Jehova mhunntta.”