Jeremias
18 Jehovacho ho sondex Jeremiasak mellʼllo: 2 “Utth ani kumbharachea ghora voch ani thoim hanv tuka mhozo sondex kolloitolom.”
3 Tor hanv utthon kumbharachea ghora gelom ani to chokracher kam kortalo tem hanvem polloilem. 4 Punn to matiechem jem aidon kortalo, tem tachea hatant piddʼddear zalem. Taka lagon, tannem teach matiechem ek dusrem aidon kelem, apleak zai aslem toxench tannem tem kelem.*
5 Uprant Jehovacho ho sondex mhaka mellʼllo: 6 “Jehova mhunntta, ‘Izraelachea ghorannea, hea kumbharan kelem toxench hanvem-i tumchea sangata korunk zaina kai? Izraelachea ghorannea, polloi! Kumbharachea hatant zoxi mati asta, toxinch tumi mhojea hatant asat. 7 Khoinchea-i eka raxttrak vo rajeak hanv umttun kaddttolom, sokol uddoitolom ani tacho nas kortolom, oxem zor hanv mhunnttam, 8 punn tednam tea raxttran aplem vaittponn soddlem zalear hanv-ui mhojem mon bodoltolom, ani hanvem tancher jem odruxtt haddunk tharailʼlem, tem hanv tancher haddchom na. 9 Punn khoinchea-i eka raxttrak vo rajeak hanv bandun kaddttolom ani roitolom, oxem zor hanv mhunnttam, 10 punn tednam tea raxttran mhojea nodren vaitt kamam kelim zalear ani mhojem aikonk na zalear hanv mhojem mon bodoltolom, ani hanvem taka jem borem korunk tharailʼlem, tem hanv korchom na.’
11 “Atam tum upkar korun Judachea lokank ani Jeruzalemant ravtoleank oxem sang, ‘Jehova mhunntta: “Hanv tumcher odruxtt haddpachi toiari kortam ani tumchea add ek manddnni ievjitam. Upkar korun, tumcheo vaitt vatto soddun diat ani tumchi vagnnuk ani tumchea jivitachi chal bodlat.”’”
12 Punn tannim mhunnttlem: “Oxem korun kainch faido na! Ami jem chintlam tench ami kortole. Amchea modlo dor eklo hottʼtti* zaun, aplem noxttem kalliz jem sangta tench kortolo.”
13 Taka lagon Jehova oxem mhunntta:
“Upkar korun raxttrank vicharun polloiat.
Oxem mhunnttlolem konnem-i kednam aikolam kai?
Izraelachea ankvarin sogleam-von vitt haddtta toslem kam kelam.
14 Lebanonachea denvteancher aslolea khoddpam voilean borf kednam tori nanch zata kai?
Vo pois thaun vhanvta tem thondd udok kednam tori suktolem kai?
15 Punn mhoje lok mhaka visorleat.
Karonn valor naslolea vostunk te bolidanam* bhettoitat,
Jea vatten tanche purvoz cholʼle tea vattencher te lokank addkhollon poddom-xe kortat
Ani tankam voir-sokol ani khoddboddit aslolea* rosteancher choloitat.
16 Jea vorvim tanchea desachi oxi poristhiti zatoli, ki polloitat tim soglim samkinch thottaktolim,
Ani tim fivnneo* ghalun sodankal tachim fokannam kortolim.
Thoim thaun pasar zaupi dor eklo bhirantin polloit ravtolo ani apli tokli haloitolo.
17 Udente thaun ieta tea varea bhaxen hanv tankam tanchea dusmana mukhar ximpddaitolom.
Odruxttachea disa hanv tankam mhojem tondd nhoi, punn mhoji fatt dakhoitolom.”
18 Ani tannim mhunnttlem: “Ieiat, ami Jeremiasa add ek manddnni kaddum-ia, karonn amchea iadnikam koddlean kaido,* vo zannaram koddlean solʼlo, vo provadeam koddlean sondex mellop kednanch bond zaunchona. Ieiat, ami tachea add uloum-ia* ani to amkam jem sangta tacher ami matui dhean diunchem nhoi.”
19 Jehova Deva, mhojer dhean di,
Ani mhoje virodhi kitem mhunnttat tem aik.
20 Borem kelam tem vaittan farik korop sarkem asa kai?
Karonn mhozo jiv kaddunk tannim ek fondd marla.
Tanche voilo tuzo krodh pois korunk,
Tanche vixim borem ulounk hanv koso tujea mukhar ubo ravlom tem ugddas kor.
21 Taka lagon, tanchea putank bhukechea tabeant kor,
Tankam tolvarichea tabeant kor.
Tancheo bailo vidva zaum ani tanchi bhurgim morom.
Tanche dadle, jiv gheta toslea piddent morom-di,
Ani tanche tornatte, zhuzant tolvarin moron vochom.
22 Jednam tum okosmat luttpeancho zomo dhaddun tancher akromonn kortolo,
Tednam tanchea ghorantlean bob marun roddttat to avaz aikonk ieum.
Karonn tannim mhaka dhorunk ek fondd marla,
Ani mhojea paim-am pasot fas manddleat.
23 Punn Jehova Deva,
Mhaka marunk tannem kosleo-kosleo manddnneo kaddleo teo sogleo tum bore bhaxen zannam.
Tancho guneanv dhampinaka,
Ani tanchem patok tujea mukhavoilem pusun kaddinaka.
Tum ragan bhoron tanchea add panvl ghetolo tednam,
Te tujea mukhar addkhollon poddom.