NAHUM
1 Nineve add ho ek sondex: Hem pustok Elkoshantlea Nahumak* mellʼllolea dorxona vixim sangta.
2 Jehova* ek oslo Dev, zaka lokamnim fokot tachich bhokti kelʼli zai.
Jehova aplea dusmananchi zhoddtti korta ani tancher aplo krodh votounk toiar asta.
To aplea dusmananchi zhoddtti korinastana ravona,
Tanchea pasot Jehova aplo krodh samballun dovorta.
3 Jehova rokddoch ragar zaina* ani taka bhorpur xokti asa,
Punn guneanvkareank khast diunk Jehova kosoch fatti sorchona.
To cholta tednam nisontton haddtta toslem varem ani vadoll ieta,
To paim dovorta tednam kupam dhulʼli sarkim uddttat.
4 To doriak tapoita ani taka sukoita,
To soglea nhoim-enchem udok sukoita.
Bashan ani Karmel sukon voitat,
Ani Lebanonantlim fulam bavon voitat.
5 Taka lagon, dongor thorthortat,
Porvot pigllon voitat.
Tachea mukhar* prithum koddkoddtta,
Sonvsar ani tantunt ravpi soglim thorthortat.
6 Tachea raga mukhar konn ubo ravonk xokta?
Ani tachea zollttea krodha mukhar konn ubo ravonk xokta?
Tacho rag ujea bhaxen votʼtolo,
Ani taka lagon khoddpam futton voitolim.
7 Jehova khorench boro, odruxttachea disa to eka kilʼlea sarko.
Tachea asrea khala ietat tankam to vollkhota.*
8 Bhirankull buddtti haddun to ticho* zago samko kabar korun uddoitolo,
Ani kallokh tachea dusmananchea fattik lagtolo.
9 Jehovachea add tumi kosli mhunn manddnni kortole?
To purnn toren tumcho nas kortolo.
Nisontton dusre pavtti ieunchem na.
10 Te ghusonk kotthin aslolea kantteanchea jhilkutta bhaxen asat,
Te soro* pieun ttaitt zaleat tanchea bhaxen asat,
Punn suklolea tonna bhaxen tancho bhosm zatolo.
11 Jehova add manddnneo korpi tujea thaun ietolo,
Ani to upeog naslolo solʼlo ditolo.
12 Jehova oxem mhunntta:
“Te khub bollixtt ani mezunk zainant title aslear pasun,
Tanchem nisontton zatolem ani te nanch zatole.*
Hanvem tuka* dukh dilam,* punn hea fuddem hanv tuka anik dukh diunchom na.
13 Atam hanv tujea mane voilem tachem zum moddun uddoitolom,
Ani hanv tujea sanklleanche don kuddke kortolom.
14 Jehovan tujea* vixim hi adnea dilea,
‘Tujem nanv fuddem vhoronk konn aschona.
Tujea devanchea ghorantlea* kantoilʼlea murteancho ani dhatunchea murteancho* hanv nas kortolom.
Hanv tujea pasot ek fondd toiar kortolom, karonn tum kanttallo haddtta toslo.’
15 Polloi! Bori khobor haddtta to,
Xantichi kollounni korta to dongram voilean cholon ieta.
O Juda, tujeo porbo monoi ani tunvem kelʼleo angvonneo purnn kor,
Karonn kainch upeog naslolo munis porot kednanch tujea modlean pasar zaunchona.
Tacho purnn toren nas zatolo.”
2 Hanga-thoim ximpddaupi tujea* add aila.
Voch, kilʼleanchi rakhonn kor,
Rosteacher nodor dovor.
Soglea tujea bollan zhuzpachi toiari kor.*
2 Karonn Jehova Jakobak tachi mhoima porot ditolo,
Toxench to Izraelak pasun tachi mhoima porot ditolo,
Karonn nas korpeamnim tancho nas kela,
Ani tanchea drakxanchea valinchea fantteanchem nisontton kelam.
3 Tachea xoktivont munxanche ddhal tambddea rongache asat,
Tachea zhuzareanche kopdde samke tambddech* asat,
To zhuzachi toiari korta.
Tachea zhuzachea rothank asloleo lokhnnacheo vostu ujea bhaxen chokchoktat,
4 Zhuzachim rotham rosteancher abuz zaun hevtten-tevtten dhanvtat,
Nakeancher te hanga-thoim dhanvtat,
Te zollttea divtte* sarke chokchoktat ani zoglavnnea bhaxen porzollttat.
5 To* aplea odhikareank apoitolo,
Te voitat toxe addkhollon poddttole,
Te begin-begin tichea vontti kodden voitole,
Ani addkholl ghaltole.
7 Hem formailam:* Ticho* gutt ukto zala,
Tika koidi korun vhelea, ani ticheo chakorni dukh kortat,
Tim aplim horddim* boddoun parveam sarkim roddttat.
8 Nineve poilim thaun udkachea tollea sarkem aslem,
Punn atam lok tichea thaun pollon voitat.
“Ravat! Ravat!” oxem mhunnttlear pasun,
Konnuch fatti vollon polloina.
9 Bhangar luttat, chandi luttat!
Theve kabaruch zainant,
Tantunt soglea torecheo moladik vostu bhorloleo asat.
10 Xarant konn na, tem padd zalam ani tachem nisontton zalam!
Tanchim kallzam bhirantin pigollttat, tanchim dhompram thorthortat, tanchim bhenddam koddkoddttat,
Ani sogleanchea tonddar usko asa.
11 Xinvanchi dhol khoim asa, zoim tornatto xinv boson khatalo,
Zoim xinv aplea porank gheun bhonvtalo,
Zoim tankam konnachich bhirant nasli?
12 Xinv aplea poram pasot bhorpur xikar kortalo,
Xinvinnim* pasot zonvaranche golle pillttalo.
To apleo dholi xikar kelʼlea zonvaramnim
Ani pinzun uddoilʼlea zonvaramnim bhortalo.
13 Fouzancho Dev Jehova mhunntta, “Polloi! Hanv tujea add asam.
Hanv tujim zhuzachim rotham zolloun tancho dhunvor kortolom,
Tolvar tujea tornattea xinvank khaun uddoitoli.
Hanv tuka prithumer anik xikar korunk diunchom na,
Ani tujea sondexkarancho avaz porot kednanch aikonk ieunchona.”
3 Rogot varoitolea hea xaracher hai!
Tem* fottimnim ani chorlolea vostumnim bhorlolem asa.
Tem* xikar korop soddun dina.
2 Chabkacho ani rodancho* avaz aikonk ieta,
Ghodde nettan dhanvtat ani roth goddgoddtta to avaz ieta.
3 Ghoddesvar ieta, tolvar zhogzhogta, bhalo chokchokta,
Bhorpur lok moron poddla, ani moddeancheo raxi zaleat
—Polloita thoim, mezunk zaina titlim moddim asat.
Te moddeank lagon addkhollot asat.
4 Hem soglem tea xindoll bailechea onoitik kamank lagon zalam,
Ji sobit ani mon bhuloita tosli asa, ji jadu korunk huxar asa.
Ani ji xindollki korun raxttrank, ani jadu korun familink aplea zallant fosoita.
5 Fouzancho Dev Jehova oxem mhunntta, “Polloi! hanv tujea* add asam,
Hanv tuzo ghagro tujea tondda meren ubartolom,
Hanv tujem vinglleponn soglea raxttrank pollounk ditolom,
Ani tuji loz zata ti soglea rajeank pollounk ditolom.
6 Hanv tujer hollxig uddoitolom,
Ani lokank tuji vitt ietoli,
Ani hanv tuka sogleam hujir loz zata toxi kortolom.
7 Zo konn tuka polloita to tujea thaun pois pollon voitolo ani mhunnttolo,
‘Ninevechem nisontton zalem!
Konn tichea pasot dukh korit?’
Tuka bhuzvonn divpi mhaka khoim mellot?
8 Nil kanalachea deger aslolea Noamon* xara poros tum borem asa kai?
Tichea charui vatten udok aslem.
Doria tichi girestkai ani rakhonn diupi vonott koso aslo.
9 Ethiopia ani Ejiptta koddlean tika bhorpur boll mellttalem,
Putt ani Libientle lok tuka modot korpi asle.
10 Tori astana, tika koidi keli,
Ani porkea desant gheun gele.
Tichea bhurgeank dor eka nakeacher apttun tanche kuddkean-kuddke kele.
Tichea manadik munxancher sorti ghatleo,
Ani tichea soglea mhotvachea munxank sanklleamnim bandle.
11 Tum-ui pieun ttaitt zatoli,
Tum lipon bostoli,
Dusmanachea hatant poddona zaunk tum asro sodhtoli.
12 Punn tuje sogle kilʼle anjirachea zhaddam sarke asat, zancher poilech pavtt piklolim follam asat.
Tim zhaddam haloilim zalear anjiram khavpeachea tonddant poddttolim.
13 Polloi! Tujea foujentle soinik bailam sarke zatole,
Tujea desache darvontte dusmanam pasot uktech astole,
Tujea darvontteanche varanv* ujeant kabar zatole.
14 Udok bhor, karonn tuka gherav ghalche asat!
Tuje kilʼle ghott kor.
Chiklant denv and mati maddoi,
Ani vitte toiar korchem aidon ubar.
15 Tori astana, uzo tuka kabar korun uddoitolo.
Tolvar tuka katrun uddoitoli.
Lhan tollam bhaxen ti tuka khaun uddoitoli.
Tum-ui lhan tollam bhaxen tuzo ankddo vaddoi!
Hoi, tollam bhaxen tuzo ankddo vaddoi!
16 Tunvem tujea veapareank mollba voilea noketram poros chodd vaddoileat.
Lhan toll apli kat soddun uddon voitat.
17 Tuje rakhonndar tollam bhaxen asat,
Ani tuje odhikari tollanchea bhirea sarke asat.
Te thonddechea disamnim fatranchea durgamnim liptat,
Punn vot ietanch te uddon voitat,
Khoim tem konnakuch kollona.
18 Are Asiriechea raza, tuje gonvlli jhemtat,
Tuje vhoddle-vhoddle odhikari ghorant suseg ghetat,
Tuje lok dongramnim hanga-thoim ximpoddleat,
Ani tankam ektthaim korpi konnuch na.
19 Tujea odruxtta thaun tuka suseg na.
Tujea ghaveak vokhod na.
Tuji khobor aikotat title-i talleo martole,
Karonn tunvem thambonastana kelʼle zulum konnem mhunn sosunk nant?”
Hacho orth “Bhuzvonn Diupi.”
Mahiti A5 polloi.
Vo “pasiens dakhoita.”
Vo “Tachea tonddak lagon.”
Vo “tanchi to kallji gheta.”
Mhunnche, Nineve.
Vo “gonvachem beer.”
Vo ghoddie, “to tanchea modlean voitolo.”
Mhunnche, Juda.
Vo “xist dilea.”
Mhunnche, Asiria.
Vo “mondirantlea.”
Vo “dhatu koddoun kelʼlea murteancho.”
Mhunnche, Nineve.
Utran utor, “komor ghott band.”
Inglez bhaxent “crimson.”
Vo “hirveach rukhachea lakddache.” Inglez bhaxent “juniper tree.” Xobdhkox polloi.
Vo “dhomkaunk haloitat.”
Boddiek lailʼlo divo.
Ghoddie Asiriechea raza vixim sanglam.
Vo “pigollttolem.”
Vo “Hem tharailam.”
Hanga Nineve vixim sanglam jika ranni mhunnttlea.
Inglez bhaxent taka “breasts” mhunnttat.
Inglez bhaxent “Lionesses.”
Vo “Ti.”
Vo “Ti.”
Vo “chakancho.”
Mhunnche, Nineve.
Mhunnche, Thebes.
Vo “lokhnnache dandde.”