Jezu Magnnem Korunk Xikoita

Farizev kortale tim soglim kamam dusream thaun vakhannʼnni mellonk kortale. Te fokot dusreank dakhounk zai mhunn lokank modot kortale. Lok tankam pollounk xokta toslea eka zagear ube ravon te magnnem kortale. Te Farizev sobha-ghorant ani rosteancher ravon dusreank aikonk ieta toxem tondd-patt kelʼlim lamb-lamb magnnim kortale. Punn lok Jezuchim utram aikon ojap zale. Karonn tannem tankam sanglem: ‘Farizevam bhaxen magnnem korinakat. Tankam dista lamb-lamb magnnim kelolean Dev khuxal zata. Punn khorem mhunnttlear Dev khuxal zaina. Magnneant tumi fokot Jehova lagim uloitat. Magnnem kortana tinch-tinch utram porot-porot mhunnonakat. Ami kallza thaun tache lagim uloilolim Jehovak zai.

Tumi oxe toren magnnem korunk zai: “Amchea Bapa sorginchea, tujem nanv povitr zaum. Tujem Raj ieum. Tuji khuxi sorgar zata, toxi sonvsarant zaum.”’ Toxench Jezun dor disachea jevnna khatir, amchea patkanchea bhogsonnea khatir ani jivitachea her vostum khatir magnnem korunk xikoilem.

Jezun sanglem: ‘Tumcho Bap, Jehova lagim magnnem korop bond korinakat. Tachea lagim boreo vostu magot ravat. Ek bapui aplea bhurgeank sodanch bori vost diunk sodhta. Tumcho put unddo maglear tumi fator kaddun ditolim kai? Vo nustem maglear taka sorop kaddun ditolim kai?’

Jezun tea udharonna thaun oxem lisanv xikoilem: ‘Tumi tumchea bhurgeank boreo vostu diunk zannant zalear, tumcho Bap, Jehova tumkam povitr xokti diuncho na kai? Tor, tunvem tachea lagim fokot magchi goroz asa.’ Jezun sanglam toxem, tum korta kai? Tum magnneant kitem-kitem magta?