Juanvan Polloilʼlim Dorxonam

Apostl Juanv, Patmos zunvear koidi mhunn aslo tednam, Jezun taka fuddara vixim 16 dorxonam vo chitram dakhoilim. Tea dorxonamnim, Jehovachem nanv koxem povitr zatolem, tachem Raj koxem ietolem, ani tachi khuxi sorgar zata toxich prithumer koxi zatoli, hea vixim taka kolloilem.

Eka dorxonant, Juanv polloita ki Jehova sorgar aplea mhoimen bhorlolea xinvasonar boson asa. Tachea bhonvtonnim, 24 vhoddil dhove kopdde ghalun boson asat ani tanchea mathear bhangarache mukutt asat. Jehovachea xinvasona thaun zogllavnnem marta ani goddgoddacho avaz ieta. 24 vhoddil Jehova mukhar paim-am poddttat ani tachi bhokti kortat. Anik eka dorxonant, Juanv ek vhoddlo zomo polloita, zantunt soglea raxttrantle, soglea zatinche ani soglea bhaxentle lok asat, je Jehovachi bhokti kortat. Menddro, mhunnche Jezu tanchi gonvllea porim kallji gheta ani tankam jivitachem udka sorxim pavoita. Uprant anik eka dorxonant, Jezu sorgar Raza zata mhunn Juanv polloita. Jezu borabor 24 vhoddilui raj kortat. Tachea uprant, Juanv anik eka dorxonant, Jezu ar-a add, mhunnche Soitana add, ani toxench tachea dutam add zhuz korta tem polloita. Jezu tankam haroun sorga thaun bhair xevttun prithumer uddoita.

Uprant Juanv ek sobit chitr polloita, zantunt Menddro ani 1,44,000 zann Sionachea dongrar ube asat te taka dixtti poddtta. Taka ek devdutui dista, zo prithume bhonvtonnim uddttalo, ani Devak bhieiat ani Taka mhoima diat mhunn lokank porgott kortalo.

Fuddem eka dorxonant, Juanv Armageddonachem zhuz zata tem polloita. Hea zhuzant, Jezu ani tachi soin, Soitanachea khottea sonvsaracher zoit vhortat. Nimannea eka dorxonant, sorgar ani prithumer xanti asa tem Juanv polloita. Soitanacho ani taka sangat ditoleancho purnn toren nas zata. Toxench, sorgar ani prithumer soglim Devachem nanv povitr mhunn lekhtat ani fokot tachich bhokti kortat mhunn to polloita.