Sonvsarachea Lokam Bhaxen Svarthi Zainakat
SONVSARANTLE aiz zaite lok apnna vixim chodd chintʼtat ani dusrim apnna sangata khas toren vaglolim tankam zai. Tankam zai tem mellʼllear pasun tankam anikui mellonk favo oxem tim chintʼtat. Oslim munxam svarthi astat ani tanchea lagim jem asa tachea pasot tim upkari asonant, ani nimannea disamnim oslim munxam astolim mhunn Bible sangta.—2 Tim. 3:2.
Adim pasun zaitea munxamnim osloch sobhav dakhoilo. Zoxem Adanv ani Even tanchea pasot kitem borem ani vaitt tem vinchun kaddop tancho hokʼk mhunn chintlem. Ani aiz amkam sogleank tanchea nirnnoi-acho vaitt porinnam bhogunk poddtta. Toxench Judacho Raza, Uzia gorvan fulʼlo ani vedicher dhump lasunk apleak pasun odhikar asa mhunn tannem chintlem. Punn tachem chintop ekdom chukichem aslem. (2 It. 26:18, 19) Tea bhair Farizev ani Saduki chintʼtale ki Abraham tancho purvoz aslo dekhun Devan tanchea sangata khas toren vagonk zai.—Mt. 3:9.
Aiz voita thoim lok gorvan bhorlole astat ani tancho sobhav ami pasun apnnaunk xoktat. (Gal. 5:26) Dusreamnim amkam khas toren lekhchem vo tannim amkam ekdom chodd man diuncho oxem amkam disonk xokta. Tor ami oslem chintop koxem pois korunk xoktat? Hea vixim Jehovachem kitem chintop asa tem ami zannam zaunk zai. Oxem korunk Bible-antlim don totvam amkam modot kortolim.
Amkam kitem favo asa tem fokot Jehova tharaunk xokta. Thoddim udharonnam mhunnttlear:
Familint ghovak baile koddlean resped favo ani bailek ghova koddlean mog favo. (Ef. 5:33) Tor kazari zoddpeamnim tim eka-mekak dakhoitat toslo mog dusrea konnankuch dakhounk favona. (1 Kor. 7:3) Tea bhair bhurgeamnim avoi-bapaichem aikon tankam man diunk favo ani avoi-bapaimnim bhurgeancho bhorpur mog korunk ani tankam tenko diunk favo.—2 Kor. 12:14; Ef. 6:2.
Sobhent vhoddilank tanchea koxtti vavrak lagon amcho resped favo. (1 Tes. 5:12) Punn bhav-bhoinnancher odhikar cholovop tancho hokʼk nhoi mhunn tannim ugddas dovrunk zai.—1 Ped. 5:2, 3.
Jea lokancher sorkar odhikar choloita tanchea koddlean tax magonk ani resped mellonk Jehovan tankam odhikar dilʼlo asa.—Rom. 13:1, 6, 7.
Mogak lagon Jehova amkam zaitim besanvam dita ji amkam favonant. Patki aslolean amkam fokot moronn favo. (Rom. 6:23) Punn aplea visvaxi mogak lagon Jehova amkam zaitim besanvam dita. (St. 103:10, 11) Ani dor ek besanv tachea favo naslole doiek lagon amkam melltta.—Rom. 12:6-8; Ef. 2:8.
DUSREAM POROS AMI KHAS MHUNN CHINTINA ZAUNK KITEM KORCHEM
Sonvsarachea lokam bhaxen chintina zaunk chotrai dovrat. Amkam dusream poros chodd man mellonk favo, oslem chintop ami sompeponnim apnnaunk xoktat. Ani haka lagon, Jezun ek udharonn uzar kelem. Tannem thoddea manaiam vixim sanglem je disvoddeak eka dinara pasot drakxanchea molleant kam korunk toiar zale. Punn uprant bhattkaran anik thoddea manaiank kam korunk apoile. Ani sanjer soglea manaiank, mhunnche zannim fokot ek vor kam kelʼlem tankam pasun ek dinar dilo. Punn je manai sokallim kam korunk ailʼle tankam dislem ki tannim dis-bhor khor votant kam kelʼlem dekhun, dusream poros tankam chodd pagar mellonk favo aslo. (Mt. 20:1-16) Hea udharonnantlean, Jehova amkam jem dita tantunt ami dhadoxi ravonk zai mhunn Jezun dakhoilem.
Akʼkho dis kam kelʼlea manaiank tankam chodd pagar mellonk favo aslem oxem dislem
Upkar attoiat ani dusreamnim tumkam divop tumcho hokʼk mhunn chintinakat. (1 Tes. 5:18) Ami apostl Pauluchi dekh gheunk zai. Taka Korint sobhe koddlean apleak goroz teo vostu magonk hokʼk aslo, torui tannem toxem korunk na. (1 Kor. 9:11-14) Tor ami pasun dusrim amkam jem kitem ditat tea pasot tanche upkar attounk zai ani tannim amkam umkeoch vostu divop amcho hokʼk mhunn ami chintunk zaina.
Bhav-bhoinnamnim apnnak poixe vo her vostu divop aplo hokʼk mhunn apostl Paulun chintunk na
Khaltim zaiat. Ami amcheach vixim chodduch chintʼtat tednam, amchea lagim asa tachea poros amkam anikui chodd mellonk favo oxem ami chintunk xoktat. Punn khaltikai aslolean ami oslem chukichem chintop pois korunk pavtolim.
Daniel khalti aslo mhunn to Jehovak chodd opurbaiecho zalo
Khaltikai dakhounchea vixim provadi Danielan ekdom borem udharonn dovorlem. To unch kullientlo aslo, pollounk khub boro distalo, huxar aslo ani taka zaiteo kola asleo. Tori astana, taka mellʼllole sueog taka mellonk favo asle oxem tannem kednanch chintunk na. (Dan. 1:3, 4, 19, 20) Punn to sodanch khalto ravlo dekhun, to Jehovak chodd opurbaiecho zalo.—Dan. 2:30; 10:11, 12.
Aiz choddso lok khub svarthi ani gorvixtt asa. Tor ami tanchea sarkim zaunchem nhoi. Tachea bodlek, Jehovan amkam favo nasloli doia dakhoun jim besanvam dileant tea pasot ami sodanch khuxal asonk zai.