Jehovachem ani Jezuchem Chintop Apnnaiat

1-2. Jehovacho mog korop hantunt kitem mellon asa, ani Jezun aplea soglea monan Jehovacho mog koso kelo?

MOIZESA udexim dilʼlea Kaideantli sogleam-von mhotvachi adnea khoinchi asli tem Jezun spoxttponnim sanglem. Ti adnea mhunnttlear, “Jehova tujea Devacho tunvem tujea soglea kallzan, tujea soglea jivan, tujea soglea bollan, ani tujea soglea monan mog korunk zai.” (Luk. 10:27) Tor ami amchea soglea kallzan Jehovacho mog korunk zai. Hantunt, amchim bhavnam ani itsa mellon asa. Toxench ami soglea bollan tacho mog korunk zai. Mhunnche, amchi takot vo sokot uzar korunk zai. Tea bhair, ami soglea monan tacho mog korunk zai. Hacho orth, Jehovachem chintop zannam zaun tem apnnaunk ami vavr korunk zai. Hem khorem ki ami purnn toren Jehovachem chintop zannam zaunk xokonant. Punn ami “Kristachem mon” somzonk proitn kelo zalear, ami Jehovachem chintop anik bore toren zannam zaunk pavtolim. Karonn Jezun poripurnn toren aplea Bapachem chintop apnnailem.—1 Kor. 2:16 ani study note “we do have the mind of Christ.”

² Jezun aplea soglea monan Jehovacho mog kelo. Apnnem kitem kelʼlem Jehovak zai tem to ekdom bore bhaxen zannam aslo. Ani tem kam korunk taka tras sosunk poddlear pasun te sosunk to toiar aslo. Ani her soglea vostum poros Jehovachi khuxi purnn korop tannem poilea zagear dovorli.

3. Apostl Pedru Jezu thaun kitem xiklo ani tannem Kristanvank kosli urba dili? (1 Pedru 4:1)

³ Apostl Pedruk ani her apostlank Jezu sangata vell sarunk ani tachem chintop zannam zaunk sondhi mellʼlli. Tor Devachea preronnan boroilʼle aple poile chittint, apostl Pedrun Kristanvank Jezu bhaxen chintop dovrun toiar ravat mhunn sanglem. (1 Pedru 4:1 vachat.) Hea chittint tannem ji bhas uzar kelea tea pormonnem “toiar ravat” hea utrak tannem, “hotʼtearam gheun toiar ravat” him utram uzar kelim. Him utram zhuzak toiar aslolea soinikam vixim sangonk uzar kortale. Tor ami Kristachem mon apnnailem zalear ami vaitt vondovnneam thaun, toxench Soitanachea khottea sonvsara add zhuzonk toiar astolim.—2 Kor. 10:3-5; Ef. 6:12.

4. Hea lekhant ami kitem polloitolim?

⁴ Jezuchem chintop koxem aslem ani ami tachi dekh koxi gheunk zata tem ami hea lekhant polloitolim. Tor Jezuchi dekh gheun ami (1) sogleamnim eka monachim zaunk Jehovachem chintop koxem apnnaunk zata, (2) khaltikai koxi dakhounk zata, ani (3) magnnea vorvim Jehovacher patieun sarkem chintop koxem dovrunk zata tem polloum-ia.

JEHOVACHEM CHINTOP APNNAIAT

5. Pedru khoinchea eka vellar Jehovachem chintop zannam zaunk chuklo?

⁵ Pedru Jehovachem chintop apnnaunk chuklo, tea eke ghoddnnecher dhean dium-ia. Jezun aplea apostlank sanglem ki taka Jeruzalemant voichem poddttolem, dhormik fuddari taka dhumallo ditole, taka vollvolle sosunk poddttole ani uprant jivexim martole. (Mt. 16:21) Punn Jezu bhasailʼlo Mesias aslolean to Devachea lokank salvar korpacho aslo mhunn Pedruk khobor asli. (Mt. 16:16) Hea pasot, Jehova Jezuk moronk ditolo hem manun gheunk taka kotthin zalem zait. Tor tannem Jezuk kuxin vhoron oxem mhunnttlem: “Somia, toxem mhunno naka, tuka oxem kednanch zaunchem na.” (Mt. 16:22) Hea vellar Jezuchem ani Pedruchem chintop ek-sarkem naslem. Karonn Pedru Jehovachem chintop zannam zaunk chuklo.

6. Aplem chintop Jehovachea chintpa sarkem asa mhunn Jezun koxem dakhoilem?

⁶ Jehovachem chintop Jezu bore toren zannam aslo ani tannem purnn toren tem apnnailem. Tea pasot, Jezun Pedruk oxem mhunnttlem: “Mhojea mukhavoilo kuxin sor, Soitana. Tum mhojea mukhar addkholl koxi zaun asa, karonn tujem chintop Deva bhaxen nhoi punn munxam bhaxen asa.” (Mt. 16:23) Pedru ghoddie Jezu vixim borem chintʼtalo. Punn Devachi khuxi purnn korunk apleak tras sosun moronk poddttolem mhunn Jezuk khobor asli. Tea pasot tannem Pedrucho ho solʼlo nakarlo. Hantuntlean, Devachem chintop, aplem chintop korunk zai mhunn Pedru xiklo ani ami pasun toxench korunk zai.

7. Pedru Jehovachem chintop apnnaunk sodhtalo mhunn tannem uprant koxem dakhoun dilem? ( Chitr polloiat.)

⁷ Punn uprant Pedru Jehovachem chintop apnnaunk sodhta mhunn tannem koxem dakhoun dilem tem polloum-ia. Jehovan sunot korunk naslolea videxiank pasun aplim sevokam zaunk sondhi diuncho vell pavlolo. Ani Kornel Kristanv dhorm apnnaupi poilo videxi aslo. Tor Kornelak porgott korunk Jehovan Pedruk sanglem. Oxem korop Pedruk sompem aslem kai? Na, karonn choddso Judev lok videxiam sangata kosloch sombond dovornasle. Tor hea vixim Pedrun aplea chintpant bodol korunk zai aslo ani tannem toxench kelem. Videxi lokam vixim Jehovachem chintop kitem asa tem zannam zalea uprant Pedru “fattim-fuddem soronastana” Kornelachea ghora gelo. (D.I. 10:28, 29) Tannem Kornelak, toxench tachea ghorabeak porgott kelem ani tannim sogleamnim bautizm ghetlo.—D.I. 10:21-23, 34, 35, 44-48.

8. Amchem chintop Jehovachea chintpa sarkem asa mhunn ami koxem dakhounk zata? (1 Pedru 3:8)

⁸ Zaitea vorsam uprant Pedrun Kristanvank “eka monachim zaiat” mhunn urba dili. (1 Pedru 3:8 vachat.) Ami Jehovachim Sakxi zalʼlean Jehovachem chintop kitem asa tem ami zannam zaunk zai, jem amkam Bible-ant melltta. Udharonnak, Jezun aplea pattlavdarank Devachem Raj tanchea jivitant poilea zagear dovrunk urba dili. (Mt. 6:33) Hem monant dovrun amche sobhent khoincho-i porgottnnar pioneer seva korta vo her purnn vellachi seva korunk fuddem sorta tednam, taka niraxi korta toslem kitem-i mhunnchea bodlek tannem zo nirnnoi ghetla to ekdom boro zaun asa mhunn sangon taka urba diunk zai. Toxench, amchean zata tea toren taka modot korunk vatto sodhunk zai.

KHALTIM ZAIAT

9-10. Apunn ekdom khalti asa mhunn Jezun koxem dakhoilem?

⁹ Morchea adlea rati, Jezun Pedruk ani her apostlank khaltikaie vixim ek mhotvachem lisanv xikoilem. Tea disa Jezu tanchea sangata nimannem jevonn jevcho aslo. Hea pasot tannem Pedruk ani Juanvak goroz teo vostu toiar dovrunk sangloleo. Hea vostu modem, jevnnak ietat tanche paim dhuvunk tannim ek aidon ani tuvalo pasun dovorlo zait. Punn sogleanche paim dhuvpachem hem khalti kam konn kortolo aslo?

¹⁰ Jezun fatti-fuddem zainastana hem kam kelem. Tannem aplea angacher aslolo kopddo kaddlo, ek tuvalo gheun aplea bhenddak bandlo, eka aidonant udok ghetlem, ani xisanche paim dhuvunk laglo. (Ju. 13:4, 5) Hem polloun tache apostl ekdom ojap zale astole. Karonn hem kam chodd korun ghorantlo chakor kortalo. Jezun aplea bara-i apostlanche, tem mhunnttlear, tacho ghat gheuncho aslo tea Judasache pasun paim dhuile. Hem kam korunk taka zaito vell laglo astolo. Torui oxem korun apunn kitlo khalti asa tem Jezun dakhoilem. Ani tanche paim dhuvun zalea uprant tannem tankam oxem mhunnttlem: “Hanvem kitem kelam tem tumi somzole? Tumi mhaka ‘Guruji’ ani ‘Somi’ mhunnttat tem sarkem, karonn hanv toch. Hanvem Somi ani Guruji zaunui tumche paim dhuile zalear tumi-i eka-mekache paim dhuvunk zai.”—Ju. 13:12-14.

11. Pedru khaltikai dakhounk xiklo mhunn amkam koxem kolltta? (1 Pedru 5:5) (Chitr pasun polloiat.)

¹¹ Pedru Jezu koddlean khalti zaunk xiklo. Jezu sorgar gelea uprant, Pedrun zolma thaun longddo aslolea eka munxak boro kelo. (D.I. 1:8, 9; 3:2, 6-8) Hem vizmit polloun lok ekdom ojap zalo ani Pedru bhonvtonnim ektthaim zalo. (D.I. 3:11) Hea vellar Pedru apleak nanv zoddun gheunk xoktalo. Karonn to eka oslea sonskrutint vaddlolo, zoim svotak nanv zoddunk lok chodd mhotv ditale. Punn Pedrun khaltikaien sogli vakhannʼnni Jehovak ani Jezuk dili, ani oxem mhunnttlem: “Ami [Jezuchea] nanvacher bhavarth dovortat ani tachea nanvanuch ho munis boro zala, zaka tumi polloitat ani vollkhotat.” (D.I. 3:12-16) Uprant Pedrun Kristanvank khaltikaien vagat oxem boroilem. Khaltikaien vagat mhunn sangonk Pedrun jim utram uzar kelim, tantuntlean ami kopdde nhestat tea toren khaltikai nhesonk zai mhunn kolltta. Hantuntlean, Jezun aplea bhenddak tuvalo bandun aplea apostlanche paim dhuilole tacho amkam ghoddie ugddas ieit.—1 Pedru 5:5 vachat.

12. Pedru bhaxen ami khaltikai koxi apnnait ravonk zata?

¹² Ami Pedruchi dekh gheun khaltikai apnnait ravonk zata. Ek munis khalti asa vo na tem fokot to kitem uloita tachea voilean kollona. Punn ‘khaltikai’ hea utrak Pedrun jem utor uzar kelem, tantuntlean ek munis aplea vixim ani dusream vixim kitem chintʼta tem pasun mellon asa mhunn kolltta. Ami bhav-bhoinnank modot kortat karonn ami tancho ani Jehovacho mog kortat. Dusreamnim amkam vakhannʼnni diunk zai mhunn ami oxem korinant. Ami kortat to vavr dusreank disona zalear pasun, ami khuxalkaien Jehovachi ani bhav-bhoinnanchi seva kortat zalear, ami khoreaninch khalti asat mhunn dakhoitat.—Mt. 6:1-4.

“SARKEM CHINTOP” DOVRAT

13. Amkam “sarkem chintop” asa mhunn ami koxem dakhounk zata?

¹³ Ami “sarkem chintop” koxem dovrunk zata? (1 Ped. 4:7) Amchea jivitant kosle-i nirnnoi ghetana tea vixim Jehova kitem chintʼta tacher ami dhean ditat. Toxench, her soglea vostum poros Jehova lagim aslolea amchea ixttagotik ami chodd mhotv ditat. Ani amkam soglem khobor asa oxem ami kednanch chintinant. Tea bhair, porot-porot magnnem korun ami Jehovacher patieun ravtat mhunn dakhoitat.a

14. Pedru khoinchea eka vellar sarkem chintop dovrunk chuklo?

¹⁴ Morchea adlea rati, Jezun aplea apostlank oxi xittkaunni dili: “Aichea rati mhojea thaim jem ghoddttolem taka lagon tumcho sogleancho bhavarth haltolo.” Tednam Pedrun nettan oso zobab dilo: “Tujea thaim jem ghoddtta taka lagon urlolea sogleancho bhavarth halʼlo zalear pasun mhozo bhavarth kednanch halchona.” Toxench uprant, Jezun aplea thoddea xisank oxem sanglem: “Zagrut ravat ani magnnem korit ravat.” (Mt. 26:31, 33, 41) Punn Pedru toxem korunk chuklo. Tannem Jezuchem aikolʼlem zalear, to ghoddie dhiran apunn Jezucho xis mhunn sangtolo aslo. Punn dukhachem mhunnttlear, tannem aplea Dhoniak nakarlo ani haka lagon taka uprant khub khont bhogli.—Mt. 26:69-75.

15. Morchea adlea rati Jezun sarkem chintop koxem dovorlem?

¹⁵ Jezu sodanch Jehovacher patieun ravlo. To poripurnn aslo, torui tannem Jehova lagim porot-porot magnnem kelem. Hea vorvim dhiran Jehovachi khuxi korunk taka modot zali. (Mt. 26:39, 42, 44; Ju. 18:4, 5) Morchea adlea rati Jezun zaite pavtti Jehova lagim magnnem kelem. Hem Pedrun polloilʼlem ani tem to kednanch visronk na.

16. Pedru sarkem chintop dovrunk xiklo mhunn koxem kolltta? (1 Pedru 4:7)

¹⁶ Vell gelo toso, Pedru magnnem korun Jehovacher anik patieun ravonk xiklo. Udharonnak, Jezu jivont zalea uprant tannem Pedruk ani her apostlank povitr xokti mellttoli mhunn sanglem, jea vorvim lokank bori khobor porgottunk tankam modot zatoli asli. Punn ti melltta mhunnosor, Jezun tankam Jeruzalemantuch ravonk sanglem. (Luk. 24:49; D.I. 1:4, 5) Tor Pedrun kitem kelem? To ani her xis “magnnem korit ravle.” (D.I. 1:13, 14) Uprant tannem aple poile chittint, bhav-bhoinnank sarkem chintop dovrunk ani magnneant Jehovacher patieun ravonk sanglem. (1 Pedru 4:7 vachat.) Tor Pedru Jehovacher patieunk xiklo ani sobhecho khambo zalo.—Gal. 2:9.

17. Amkam korunk sompeo zatat teo vostu kortana pasun, ami kitem korit ravop gorjechem? (Chitr pasun polloiat.)

¹⁷ Sarkem chintop dovrunk, ami porot-porot Jehova lagim magnnem korunk zai. Amkam korunk sompeo zatat teo vostu kortana pasun, oxem korop gorjechem. Khas korun mhotvache nirnnoi ghetana ami tachem margdorxon magonk zai. Hachea voilean, amkam kitem borem tem Jehova zannam mhunn ami tacher visvas dovortat mhunn dakhoitolim.

18. Ami Pedru bhaxen kitem korit ravonk zai?

¹⁸ Ami Jehovachi dekh gheunk xoktat tea toren tannem amkam rochleant dekhun ami tache khub upkari asat. (Ut. 1:26) Ami purnn toren Jehovachi dekh gheunk xokonant tem khorem. (Iz. 55:9) Punn ami Pedru sarkim Jehovachem chintop apnnait ravonk xikonk zai, zata titlim khaltim zaunk proitn korit ravonk zai, ani amchem chintop sarkem dovrunk zai.